Matthew 16

Ele'vole' Suno Ma Danivo Ningelone li Izesu'nimu' Lani'.

(Maleko' 8:11-13; Luka' 12:54-56)

Halisaio' mono' laa' ave linge masi Sadukaio' mono' laa' ave linge masi Izesu' neida igi emengu' mili ti' li lani': Gaza O'moso'mo geikisi neive laa' naine' nene lamine' labe gosoho' labe ne'mi monovo nene ningelonge. Okulumoku' minive O'moso aza amuzo gemavo gaza atoli'mine suno do soto' ogo lelebizanivo ningelone li li-imani'. Ti' li li-imikevo aza ti' lo lo-ngimine': Nivenga' molavo guhizangi' iline' nene lingine ningi aize' nene ho' lo gamene lamine' oloseive li laa' nave. Ido' nedenga' go' lalosa guhizangi' elo limuso gonobu' hitine' nene lingine ningi goline izo hepe' eleleseive li laa' nave. Ne'mine igi Okulumota ningisa ne'mine inite' soto' oloseive li ningi gilaa' nani'za soto' iline' inite' ato atokumu' O'moso'mo molani' gamene aliteline' monovo nene ningi gili minisa'mave. Mene gamenelo' nizave lingine evene' golosovo' mini vene' ma va'ningine huli ve gohi malo' vi lihime daa' nani' ne'mine igi O'mosotine huli lihime daa' nave. Lingine nenikumu' atoli'mine suno do soto' ogo O'moso'mo amuzo nimine' nene lengelebizelongumu' nilani'za ma lengelebizamolosuve. O'moso'mo gozopo' eze veleti' gamazi lo soto' oga' ive Zonada ato' suno do soto' ogo amuzo've ngelebizine' ma'minevo' ma nenita soto' ogavo nevo' ningilisave. Ne'mine lo hulo-ngedo vine'.

Halisaio' Mono' Laa' Avesi Sadukaio' Mono' Laa' Avesi Engi' Monovo Danava'nido' Izipahala Zuholite E'metikelizave Lo Izesu' Aneza Gamazi Lo-ngimine'

(Maleko' 8:14-21)

Ido' izipahala zuho ingine Izesukisi sipiu' dizi noso ohuno helala vani' nene beletimu' ga'ine molavo ma di vamani'. Ne'mine ikevo Izesu' aza evene' maliti ngemeni damenimu' beleti do lulu izaa' ine' inite' zisitilo' lo molo ti' lo lo-ngimine': Halisaio' mono' laa' ave ido' Sadukaio' mono' laa' ave engitati' zisiti nene dikelizaze. Nemu' ningisa minilo. Ne'mine lavo ingine li volelo' melo' igi ti' li lani': Laza beleti ma do amune' nenako nemu' lave. Izesu' aza gamazi li volelo' melo' ani' nemu' nene mo ningo gelo ti' lo line': Lingine gili ele'vole' amave mene beleti di amani' nemu' nene nanitekumu' gamazi li volelo' melo' nave. Naza beleti faef(5) do gito ize' molo evene' faef(5) tauseni ngemekuvo nisa lumo sama hulani' nedunu' nene lingine gosuvaha' tuvelu go'zi vai' lani' mamu' gatine molahe. 10 Ido' beleti seveni do gito ize' molo evene' fo(4) tauseni ngemekuvo nisa lumo sama hulani' nene lingine gosuvaha' naba gidini seveni go'zi vai' lani' mamu' gatine molahe. 11 Beleti nene ne'mine ogo ha do soto' olosuvonako beletimu' lamuvoni' nene lingine gili nilisave lo giluvoni'za gilamani' neive. Halisaio' mono' laa' ave ido' Sadukaio' mono' laa' ave engitati' zisiti nene dikelizaze. Nemu' ningisa minilo. 12 Ne'mine lavo neloti' alinge' nene beleti do lulu izaa' initekumu' lamo zisitimu' lo molo line' ma nene Halisaio' mono' laa' avelite ido' Sadukaio' mono' laa' avelite gamazi ladeni igi evene' apizi ngimaa' ani' monovo nene do minalone li ningi minilizangumu' line' ma nene alinge' mo gili ngolo' lani' ve.

Petolo' Izesu' Monovomu' Lo Soto' Ine' Gamazi

(Maleko' 8:27-30; Luka' 9:18-21)

13 Izesu' aza Kaesalea Hilipi misubola vo hetelo izipahala zuho ti' lo longo' o-ngidine': O'mosolati' ve gihile nenikumu' nene zaho ve li laa' nave. 14 Ne'mine lo longo' o-ngedavo ingine ti' li lani': Evene' linge ma nete mono' noso holo-ngedaa' ive Zohane' hilinguti' otosa noloseive li laa' nave. Ido' linge ma nete gozopo' polohete Elia' aza gohi soto' oloseive ma nene tine' molo abe li laa' nave. Ido' ma nete polohete Zelemia' ma helaninguti' otosa nolibe polohete ato' ma minaine' helanive nolibe li laa' nave. 15 Ne'mine likevo Izesu' gohi ti' lo longo' o-ngidine': Ido' ingine nene mo ne'mine laa' nani'za lingine nenikumu' nene zaho neve li laa' nave. 16 Ne'mine lo longo' o-ngedavo Simoni' Petolo' aza a'mido' ti' lo line': Minevo' minevo' O'moso'mo do lu' izelove lo gipele do kegeso gimiselive ma ne nane. 17 Ne'mine lavo Izesu' ti' lo lo-imine': Zona' gipele Simonizo, haza evenelite a'mine monovo'ne nene li-gimikevo lamane. Okulumoku' me'neho veka do lapa nomine' o-gedavo lange. Nemu' nene lamine' iline' akalo' mine molo nange. Golizesi minezo. 18 Ido' ti' lo nolo-gimuze. Gelezo. Gaza guliveka Petolo' nane. Ido' Petolo' ne'mi monovo nene ele'vole' geheni ve lo nenako nemu' evene'ne zuho do soto' o-ngedo ele'vole' igi minilizave lo a'mine ele'vole' gehedo' do gi'mize-ngedekuvo ve goloso'mi amuzo've ne'mo ngelo ngivile' amivo helaa' ne'mo mudise hele osu' laa' akalo' ma ngele'mize molamoloseive. 19 Naza Okulumoku' minive'mi gizebou' vi hilalizani' amuzo gemekuvo evene' ngele'mizo O'moso'mo gizebo ingu' vo holalosane. Ido' misubouko gaza evene'ne zuho gamazi inite' mamu' lo huko lo-ngemo ne'mine amilo lo o've lo-ngedeline' nene Okulumokuko O'moso ne'mosi a'mine initekumu' o've lo lo huko-ngedeleseive. Ido' misubouko gaza inite' mamu' nene ne'mine oga' ve lo lo-ngedeline' nene Okulumokuko O'moso ne'mosi a'mine initekumu' mo ne'mine oga' ve lo lo-ngedeleseive. 20 Ne'mine lo Petolo'ni lo-emosa Izesu' aza eikumu' nene O'moso'mo do kegeso imiselelesa live neive li eze monovo mo keke' evene' masi li-ngimamilo lo amuzo molo lo izipahala zuho nene ga'ine dani'.

Izesu' Aza Helo Oteline' Monovo Nemu' Lo-ngimine'

(Maleko' 8:31-9:1; Luka' 9:22-27)

21 Ido' a'mine gamene neloti' Izesu' aza api' ogo ti' lo lo-ngeme'mo vo minine': Neni' gono ne'mo gihile've do soto' ilingumu' naza Zelusalemi numuda vokuvo a'mida mono' gizebo vesi ido' eveneto' medeli mini O'moso inite' lehizi-daa' ave nabasi ido' Zuda vete gozopotati' laa' nani' mono' apizi ngimaa' avesi ingine goboni mili-nidi mulumo gono nimi nibili hililisave. 22 Ne'mine ikevo helo gamene sitohamo minekuvo O'moso'mo do ote-nedeleseive. Ne'mine lavo Petolo' aza do gahevela o-miko elemo ti' lo line': Guvekasi ve, ne'mine lamozo. O'moso'mo do gu' izavo laine' inite' mo keke' gei' okongalo' soto' amoloseive. 23 Ne'mine lo line'za Izesu' aza velepe' izo Petolo'ni ti' lo lo-imine': Satani gaza akalo' nene golise ozo. Gaza gaka gele naine' nene O'moso'mo gilidi'mino gelamo me misubou' evenelite gilaa' adi'mino gele naine' nenako volodo' o neine' aka'nela ogo hizo notilange. Satani gaza olovo' ozo.

24 Ne'mine lo Izesu' aza eze e'metaa' ave gamazi ti' lo lo-ngimine': Ve ma ingine ne'meto alone li gilii ma gomu' nene minevo' alevo'ine gizebo iga' nani' monovo'ine nene huli alami neni' ne'metilizangumu' ve goloso nizave li lohoto' zalo' ngibili hililizangumu' nene gili hulisa ne'meti alizave. 25 Ido' ne'mine igisa ne'meti alizave lo noluvoni' nene nanitekumu' luhe. Lingine mene gililo. Ve ma ingine neni' ne'metelone' nene geni initeli'mi lulou' vo minevo' alevote hulalone li ne'metamilizave nene minevo' minevo' minaa' ngemeni dameni nene ma damilisave. Damilisaha ve ma ingine ne'meti vilizangu' ngibili hilikevo minevo' alevo'ine hulilizani' nene alinge' minevo' minevo' ngemeni dameni dalisave. 26 Ee, misubouko mene minevo' alevo' igi mini misubou' inite' vai' di engita igi minilizangu' nene minevo' minevo' minaa' ngemeni'ine hulilizani' nene a'mine inite' vai' nete nene ma hize ele' i-ngidamilisave. Ee, evene' ma ingine minevo' minevo' minaa' ngemeni dameni ma hulilizani' nene a'mine ngemeni dameni di engita olone li a'mido' golo hizilizani' inite' hamokisi ma minamoloseive. 27 Ido' O'mosolati' ve gihile naza me'nehi emeni dameni lamine' nene do ti' ogo mino angelo'ne zuhosi ngele'mizo alosuve. Ido' aloni' nene naza evenelite hamo' hamo' inite' golososi ido' laminekisi igi mili minani' votigilelo' nene meni ngemelesuve. 28 Lamine' lo-lengemelesuve. Melo' nizave lengikuti' linge ma hilami ha nizavo naza O'mosolati' ve gihile Guve'nesi ve lolo' ogo evene'ne zuho gizebo o-ngedelesa soto' ogo lemo nouvo ingine ningilisave.

Copyright information for `ASO