Matthew 17

Izesu' Oko'nolo Do Atoli'mine Ine' Gamazi

(Maleko' 9:2-13; Luka' 9:28-36)

Gamene sigisi ogo vavo Izesu' aza Petolo'ni ve Zakobo'ni ve ido' nakunolo Zohane'ni nesi ngele'mizo golo ha'nalo' dizo vavo a'mida nene engikovo' mini ningi nizavo Izesu' nene oko'no do atoli'mine ogavo golo veleloti' nene ho' ne'mine hulo mino oko'nolo' initeto' nene labana' elo mokono' goloso elo minine'. Ne'mine neivo nelo' nene Moseki Eliakisi soto' i ngimi Izesu' nesi gamazi li volelo' melo' igi minani'. Ne'mine igi nizavo Petolo' Izesu'ni ti' lo lo-imine': Guvekasi ve, maka' melo' minune' nene lamine' ogave. Nemu' gaza gele nemanivo azibe sitohamo gizelove. Ma nene geikumu' ve. Ma nene Mose'ni ve ido' ma nene Elia'ni ve line'. Ti' lo gamazi nolivo silingenge'ne hulo minine' limuso'mo ogo molo hite-ngidine'. Molo hite-ngedavo a'minguti' gamazi ma ti' lo soto' ine': Me ve nene neni' gipe'ne lu'ne eme nouvoni' ne neive. Eikumu' lanite' goloso nogiluve. Lingine eze gamazi've gili dalo. Izipahala zuho sitohamo a'mine gamazi gili ngehelele izavo go'ine hizi ingi minani'. Ne'mine igi nizavo Izesu' aza ogo oko'nido' do nogelo ti' lo line': Lingine lengehelele izamivo otilo. Ne'mine lavo ingine oti ningani' nene evene' ma ningami Izesukovo' neivo ningani'.

Ne'mine igi gololoti' maka' limi niigi Izesu' ti' lo ga'ine dani': Lingine a'mine ningani' inite' nemu' evene' hamokisi li-ngimamavo O'mosolati' ve gihile naza nene helekuvo me'neho do ote-nedavo ma nene ha li soto' ilizave lo ga'ine dani'. 10 Ne'mine lavo izipahala zuho ti' li longo' i-dani': Ido' do lu' izelive lo O'moso'mo do kegeso imiselelesa live nene a'mine gozopo' minine' polohete Elia' ne'mo gomu' molo-do tine' molo aloseive li avotemoti mono' gamazi apizi limaa' avete laa' nani' ma nene nanimu' laa' nave. 11 Ne'mine li longo' i-dikevo aza ti' lo line': Elia' inite' muki' do veveselesa O'moso'mo do lu' izelive lo imiselelesa live gomu' molo-do aloseive lani' nene mo lamineto' nilave. 12 Ido' naza lamineto' noluve. Elia' nene mo gomu' ani' ma nene ingine Elia' ve li ningi guni ami angise ga'ine gilani' inite' i-di bili hilani'. Ido' O'mosolati' ve gihile nenikisi nene a'mine'mine ogo engi' a'ningu' okuvo ingine mulumo gono nimi eze i-dadi'mine i-nidilisave. 13 Ne'mine lavo izipahala zuho ingine nene mono' noso holo-ngedaa' ive Zohane'nimu' nene nolo-limive li gili nge li gilani'.

Izesu' Sikalahu' Goloso Lulou' Minine' Izipe Ma Do Lamine' O-dine' Gamazi

(Maleko' 9:14-32; Luka' 9:37-45)

14 Ido' Izesule golo gizeneu' limi evene' muki' di gese' ado' navo ve mali'mo ogo Izesu'ni obuvolo hize emo ti' lo line': 15 Guvekasi ve, neze gipe'ne nene lemo lise-davo goloso ogo mino oloku' lemo pou' laa' ido' nosou' lemo pou' laa' oga' neive. Nemu' nene muhele've ninge-devo. 16 Geze ge'metaa' avela ele'mizo uvoni'za ma ngeli di lamine' i-damave. 17 Ne'mine lavo Izesu' ti' lo line': Eii, lingine ngeli imiseli hulisa'mani' nehe. O'mosomu' gili ele'vole' amani' zuho lutine zovo' ize vine' mene lengikumu' gosele' nebele'mo novivo lengi' vovotingu' gamene gohi ma imine' molo mino langamuzo hize'mo vo mineloni' nemu' nene agae lo noluve. A'mine gipe ele'mizi alo lo lavo 18 ele'mizi ikevo izipe do goloso o-do minine' sikalahu' goloso nene Izesu' ganu' elemavo izipe nene hulo-do lemo vavo izipe nene a'midoti' lamine' ine'. 19 Ne'mine ogavo alinge' angisevo' mini izipahala zuho Izesuda igi ti' li longo' i-dani': Sikalahu' goloso nene laza naniteli'mo imisele hulamolonido' ine' neve. 20 Likevo Izesu' ti' lo line': Naniteli'mo ve. Lengi' O'mosomu' gili ele'vole' ani' nene naba minamidi'mo ve. Sakave' zuho nene inite' ngomo lasolo neine'za lingine O'mosomu' gili ele'vole' anitine ngomo nene a'mine zuho nite' ngomo ne'mine votigilelo' vo lisihe' oti' oti' iline' nene alinge' inite' lamine' ma ilisa navo inite' ma aka hize tile-lengedo golo ne'mine mineline' nene a'mine O'mosomu' gili ele'vole' anitine ngomo nedunukisi a'mine golomu' olovo' ogo ebe' mala vozo lilizani' nene ha olovo' ogo voloseive. Ido' inite' mamu' ne'mine olone li lilizani' nene amilizavoba ha ilisave.

22 Gamene ma izipahala zuhosi nGalilaia misubou' mini'mi nivavo Izesu' aza izipahala zuho ti' lo lo-ngimine': O'mosolati' ve gihile neni' nene evene' maliti a'ningu' nele'mizi milikevo 23 nibili hilikevo helo gamene sitohamo minekuvo O'moso'mo gohi nele'mize oteleseive. Ne'mine lavo izipahala zuho ingine mulu'ine gitihine' ogavo mulumo goloso gili-di minani' ve.

Mono' Numungu' Moni Hulaa' Gamazi

24 Ido' Izesu' ve izipahala zuho ve ingine Kahanaumi numuda igi hetelikevo O'moso'mi gono mono' numuno nabala daa' nani' nene hize ele' ilive li takisi moni daa' ave ingine Petolo' neida igi ti' li longo' i-dani': Lengi' tisatine nene takisi moni hulaa' nooloseive. Olo. 25 Ne'mine li longo' i-dikevo oo, hulaa' neine' ve line': Ne'mine lo numunguko dizo olihe gamazi lamivo Izesu' ti' lo line': Simonizo, misubou' misubou' guve'inesi vete takisi moni daa' nani' nene zamotidati' daa' nave. Engi' zuholati' daa' nahe ato' vetidati' daa' nave. Nemu' gaza nadive lo gele nane. 26 Lavo Petolo' ti' lo line': Ato' vetidati' daa' nave. Ne'mine lavo Izesu' ti' lo lo-imine': Ato' vetidati' takisi moni daa' ve nene lamine' lainako nemu' nene guvelesi veti zuho nene takisi moni meni hizisa'mave. Nemu' nene me'nehi gonomu' hulaa' nani' takisi moni nene gipele naza hulamoloni' o neine'za 27 evene' ingine goloso gilikelizave losa ha hulolove. Gaza vo noso ohunguti' alaha' belaa' nala' nene hulo nosou' ogo alaha' gana' ma beleline' nene vele do aa' o-do ningeline' nene moni nevo ma neivo ningelesange. A'mine nene do vo nenitokisi geitokisi takisi moni ngemezo.

Copyright information for `ASO