Matthew 18

O'moso'mo Gizebo O-lidingu' Evene' Zaho Dizosa Nolihe Nemu' Lo-ngimine' Gamazi

(Maleko' 9:33-37; Luka' 9:46-48)

A'mine gamenelo' izipahala zuho ingine neida igi ti' li longo' i-dani': Okulumoku' minive'mo gizebo o-lidingu' mene zaho livile' ogo dizosa neive. Ne'mine likevo Izesu' aza izipe ma asi lo vovo'ningu' do ote-miko ti' lo line': Naza lamine' nolo-lingimuve. Lutine di velepe' izi lutine di limi izipe ngomo me'mine minamilizani' nene Okulumoku' minive'mo gizebo ingu' nene vamilisave. O've. Vi hilamilisave. Ido' ve ma ingine izipe ngomo me'mine igi engi' oko'inemu' gilikevo lemo mine do vaa' neine' ne'mini minilizave nete nene Okulumoku' veli'mo gizebo ingu' minave linge ngivile' igi dizisa minilisave. Ido' ve ma ingine nenikumu' ve li izipe ngomo me'mine ma ngele'mize lamine' ilizani' nene neni' nele'mize lamine' ani' geleleseive.

Monovo Golosoli'mo Evene' Do Goloso O-ngedaa' Neine' Nemu' Lo-ngimine' Gamazi

(Maleko'9:42-48; Luka' 17:1-2)

Ido' nenikumu' gili ele'vole' igi minaa' nani' izipaha'ne zuho limi minani' engikuti' hamo' ma evene' mali'mo goloso nite' daline' akau' ele'mize molalosa neivo ma a'mine ve nene O'moso'mo mulumo gono naba' naba emalinako nemu' nene goloso nite' daline' akau' nene olihe ele'mize molamivo gomu' nene luvonou' geni'vesi geheni naba nene nalava izi-di noso ohuno nabau' ehuso' i hulikevo a'mingu' lemo heleline' nene lamine' oloseive. Me misubou' nene evene' ngimimise' igi aka golosolo' ngele'mizi milaliza inite' nene soto' amilizavoba mo vai' soto' ilisanako nemu' nene me misubou' alevemu' mulumo nogele-lingiduve. Ido' a'mine evene' ngimimise' igi aka golosolo' ngele'mizi milaliza inite' di soto' ilizave nene O'moso'mo lihime naba ngemeleseinako engikumu' agae lo mulumo nogele-ngiduve.

Ido' anga sitakisi gizenga sitakisi nanivo O'moso'mo lihime gemo lihizami oloku' hulo-gedavo lemo minalinge. Anga nehe gizenga nehe netise lihime daa' akalo' gele'mize nimilasivo ma ne'mine amilizo lo angasi gizengasi nene huko hulaine' gilivosa minezo. Ne'mine ogo gizenga anga gebili do minaine' gilivo minevo' minevo' ebekuko viline' nene ede voloseive. Ido' vega sitakisi nanivo O'moso'mo lihime gemo lihizami oloku' hulo-gedavo lemo minalinge. Vega ne'mo lihime daa' aka ma nogelebizivo ma nene ne'mine amozo lo vega nene kuluhize hulaine' gilivosa minezo. Ne'mine ogo vega hela gebili do minaine' gilivo minevo' minevo' ebeku' viline' nene ede voloseive.

Sipisipi Ize Vo Halekine' Ne'mi Aneza Gamazi

(Luka' 15:3-7)

10 Lingine izipaha'ne zuho ngomo ngomo engi' neti angelo'ine nene gamene gamene me'nehi velelo' minaa' nanaze. Lingine a'mine izipemu' gilavo haza nite' ogalive. Nemu' nene ehee noluve. 12 Ido' lingine nadive li nigilave. Ve mali'mi sipisipi ize vanu hadeti (100) minilizanguti' hamo' ma vo halekeline' nene a'minemu' vise' amilihe. Ne'mino nomive. Sipisipi ize naedi naeni (99) nene a'mida golola hulo-ngimiko hamo' vo halekine' nemu' nene vise' o'mo voloseive. Olo. 13 Ee, aza vise' ogo do soto' iline' nene naza lamineto' nolo-lingimuve. Olize goloso izeleseive. Olize izeline' nene sipisipi vi halekami mela naedi naeni (99) minani' mamu' olize izine' ma nene ivile' ivosa olize izeleseive. 14 A'mine'mine ogo izipaha'ne zuho ngomo ngomo nizanguti' mene Okulumoku' Metibo ne'mo hamokisi vo halekilive lo lu'veu' gelesa'mive.

Leze Zuho Malite Lihime Dikevo Ma Do Lisihe' O-ngedeloningumu' Lo-ngimine' Gamazi

15 Ido' evene' mali'mo gei' mulunga do goloso o-gedo lihime davo ma gaza a'mine ve neida vanivo lengi' sitakovo' mini a'mine lihime dani' monovo nene elebizanivo ningelive. Ningo gele gemeline' nene a'mine ve nene gohi aka lamineta nene mo ele'mizo ogane. 16 Ido' gele gemamivo ma nene evene' gohi sitape sitohamo he do gi'mizo maka' vi lihime dani' monovo nene elebizilo. Ne'mine ilizani' nene mono' godolou' minine' gamazi mau' nene vo daloseive. A'mine gamazi nene ti' lo neive: Gamazi gono nidavo lihime dave'mi monovo nene evene' sitape sitohamo he ne'minete likevo gamazi lilizani' vo hamo' iline' nene lisihe' oloseive. 17 Ido' ngele'mizo vaniveti gamazi'ine nesi gele hulavo ma ei' lihime dani' monovo nene mono' aleveti muliseu' lo soto' oganivo ingine liliza gamazi nesi gele hulavo ma gaza gelanivo evene' ato' nene mono' gilamavetingutipe takisi moni daa' ave goloso engikutipe minine' gelavo ezesi bizamanivo atokovo' monaa' ilive.

18 Ido' naza lamine' nolo-lingimuve. Misubouko lingine evene'ne zuho gamazi inite' mamu' li huki li-ngimi ne'mine amilo li o've li-ngidilizani' nene Okulumokuko O'moso ne'mosi a'mine initekumu' nene o've lo lo huko-ngedeleseive. Ido' misubouko lingine inite' mamu' nene ne'mine oga' ve li li-ngidilizani' nene Okulumokuko O'moso ne'mosi a'mine initekumu' mo ne'mine oga' ve lo lo-ngedeleseive.

19 Ido' gohi ma imine' molo lo-lengemeloze: Evene' setape setohamohe ne'minete neni' aleve minani' di gese' igi nopo'ni nilavo ma naza engi' vovo'ningu' hize ele' o-ngedo mineloni' nenako lengikuti' sitalitise inite' mamu' lu'ine mili hamo' igi mini O'mosola lilisine' nene Okulumoku' neive Me'neho ne'mo ha gele ngemeleseive.

Gelekele' Izipe Ne'mo Dina' Ogo Dani' Hulamine' Ne'mi Aneza Gamazi

21 Ne'mine ogo Petolo' aza Izesu' neida ogo ti' lo longo' o-dine': Guvekasi ve, evene' mali'mo lihime neme'mo vo mineline' nene lihime hulo-deloni' nene gamene nanike' hulo-delove. Gamene seveni (7) avo' lihime've hulo-miko ha minelohe. Olo. 22 Ne'mine lavo Izesu' aza ti' lo lo-imine': Gamene seveni (7) avo' lihime've hulo-deline noluvoba lihime've hulo-de'mo vo mineline' nene gamene sevedi seveni (77) nesi ivile' ogo mo lihime doka' doka' neivo ma hulo-dakovo' olosane.

23 Nemu' nene Okulumoku' minive'mo eveneto' gizebo ogo lihime'ine hulo-ngedeline' monovomu' nene ne'mino lo molo lo-lengemelove: Guvelesi ve mali'mo gelekele' izipaha'ne zuho dina' o-ngiduvoni' nene do lisihe' olove lo gelo 24 api' ogo do lisihe' neivo gelekele' izipe ma nene ele'mizi guvelesi ve neida ani'. Gozopo' a'mine gelekele' izipe nene teni (10) milioni kina dina' ogo guvelesi velati' dani'. 25 Ne'mine ine'za aza nene a'mine monilo' golo hizo emeline' moni nene ma molamine' nenako nemu' guvelesi ve aza ti' lo line': A'mine ganalalo' apaselingumu' nene ezesi venele izipahalasi inite' mata'vesi maketi ebeta ngele'mizi di vikevo meni hizi-ngidi osu' likevo moni dalove line'. 26 Lavo a'mine gelekele' ve lo-imine': Agae, gaza ise'ne ize'mo novanivo dina' o-nidanido' golo hize'mo vo osu' loloho. 27 Ne'mine lavo guvelesi ve aza mulumo've ningo alinge' dina' o-giduvoni' monilo' nene golo hizo nemamolosane lo lo-do imisele huline'. 28 Imisele hulavo heta lemo vine' nene gelekele' izipe ezesi gono makato' daa' asive nene ningine'. A'mine ve nene guvelesi ve'mo moni naba imive ne'mo dina' o-do vanu hadeti (100) kina imive minine' nene ningo luvono do nohoto ti' lo line': Gaza nenitati' moni dina' aine' malo' nene alo' golo hizezo. 29 Ne'mine lavo gono makato' daa' asive ne'mo lemo gizeneu' obuvolo hize emo ti' lo line': Gaza ise'ne ize'mo novanivo alinge' a'mido' golo hize-gedeloho. 30 Ne'mine line'za gele hulo o'ove lo gonito' ele'mize molo ti' lo line': Nala' numungu' huli-dikevo mino dina' nene apaso moni neme osu' lavosa kuluhizi-dikevo vilive. Lavo nala' numungu' huli-dani'. 31 Ne'mine ogavo ezesi makato' gono daa' ave ingine ne'mine ine' nene ningi mulu'ningu' goloso gili vi guve'inesi ve nene a'mine gelekele' ve nene ogo molo ine' initekumu' nene li-imi osu' lani'. 32 Li-imikevo guvelesi ve'mo gelekele' izipe nene asi lavo dizine'. Dizavo ti' lo lo-dine': Gelekele' izipe goloso mene gaza muhele' gamazi lo-nemanivo dina' o-giduvoni' ma apase-gedekuve. 33 Ne'mine o-giduvoni' ne'mino gazasi makato' gono daa' asive nene mulumolo ningo dina' o-daine' nene apase-delinako apase-damane. 34 Ne'mine lo izebolo' molavo guvelesi ve ti' lo line': Nala' numungu' mino mulumo gono imi'mi vi nizavo dina' o-duvoni' nene golo hize'mo vo minevo' minevo' ilive. Ido' ne'mine lo nala' numungu' gizebo iga' aveti a'ningu' molani'. 35 Ne'mine lo Izesu' ti' lo line': Lingine hamo' hamo' evene' lihime lutinguti' gehepeve huli-ngidamilizani' nene guvelesi ve'mo gelekele' izipahala o-didi'mino Okulumoku' Me'neho aza a'mine'mine o-lengedo lihimetine nene hulo-lengedamo mulumo gono lengemeleseive.

Copyright information for `ASO