Matthew 21

Izesu'ni Siza Li-di Guvelesi Ve Ve Li-dilisa Navo Zelusalemi Numuda Vine'

(Maleko' 11:1-11; Luka' 19:28-40; Zohane' 12:12-19)

Ido' Zelusalemi numuno di avito' igi Oliva golola Betehage ebeta igi hetelani' nene Izesu' aza izipahala zuhouti' ve sita' ma ngimiselo ti' lo lo-ngimine': A'mine ningi nizasine' numuno ebeku' volene vi nidizi ningilisine' nene dongi ize ma na'nava izikani' nene angale've naba nesi nizasivo ningilisasize. A'mine dongi ize nene vakesi di nouvoda alizo. Ido' ne'mine nasivo evene' mali'mo a'minemu' longo' nolingidivo ma ti' li li-imilizo: Guvelesi ve'mo eze gono neivo dongi ize memu' limiselavo nousive. Likesivo lite' lo gele lengemo ize ne di vilizo loloseive. Ido' Izesu' aza dongi izemu' ngimiseline' nene O'moso'mi veleti' gamazi lo soto' oga' ive polohete mali'mo O'moso'mi gamazi ma ti' lo gizine' ma nene gihile izelingumu' line' ve:

Zioni golola Zelusalemi ebeku' alevemu' nene ti' li li-ngimilo:

Ningilo.
Guvetinesi ve naba aza lengita nave.
Hongu emeni damenisi lemo mino dongi izeli'mi mehenelo' nave.
Ee, gono daa' ine' ize'mi angale ma'mo noohikivo lengita nave.
Ido' Izesu' aza ngimiselavo izipahala sita' vi lo-ngimidi'mine igi dongi izesi angale'vesi di asine'. Ido' saketi'ine apasi mehe'nido' hitikevo Izesu' aza dongi ize ngomo'mi mehenelo' dizo a'mido' minine'. Neivo evene' vailite genegana'ine kuluhizi apasi akalo' mili-dani'. Ido' linge ma nete zavile davile ledi avilise' i-dani'. Ne'mine ikevo evene' linge ma vi velela vave netesi ido' alinge' mili ave netesi asi naba li ti' li lani':

Agae, gozopo' guvelesi ve naba Davidi' a'vopilemo'
ezelo' medelo mo'mosi've dalinive
Guvetesi ve O'moso'mi velemu' anive naine' ma nene no'noho' geita minivo.
Agae, O'moso Okulumoku' veleta opo'ni lolone li lani'.
10 Ido' Izesu' aza Zelusalemi numuda nodizivo numuno me'ninge ingine upuho' igi lani': Me ve nene zaho neve. 11 Ti' li likevo evene' e'metave ingine lani': Me ve nene polohete Izesu' nGalilaia misubou' Nasalete numudati' ve ma ne neive li lani'.

Izesu' Aza Mono' Numuno Nabau' Inite' Maketi Milaa' Meni Hizaa' Igi Minave Nene nGimisele Huline' Gamazi

(Maleko' 11:15-19; Luka' 19:45-48; Zohane' 2:13-22)

12 Ido' Izesu' aza mono' numuno nabala dizine'. Dizo a'mingu' inite' maketi milaa' meni hizaa' igi minave nene ngeleto do hulo-ngedo mono' numungu' hulaa' moni senisimi iga' aveliti holomo'ine nene do tululu lo do hulo-ngedo nama viluso O'moso lehizi-dilizangumu' maketi mili minavete holomo'inesi do velepe' izo hite-ngidine'. 13 Ne'mine ogo Izesu' aza ti' lo lo-ngimine': O'moso'mo line' gamazi ma Mono' Godolou' ti' li gizi nizani' ve:

Neni' numu'ne nene evene' nete dizi
nopo'ni li-nimaa' numuno ve losa mineleseive.
Ne'mine li gizi nizani'za lingine a'mingu' igi mili minaa' nani' inite' ne'mo nene guminelo' vete igi mili minaa' numuno lolo' ogave.

14 Ido' mono' numungu' neivo ve'ine likive ido' gize'ine a'ine goloso ive ingine ezela ani'. Ikevo do guno o-ngidine'. 15 Ido' ne'mine neivo eveneto' medeli mini O'moso inite' lehizi-daa' ave naba nesi ido' Zuda ve gozopotati' lani' mono' apizi ngimaa' avesi ingine Izesu' ngehelele izaa' inite' ato' ato' ogo molo ine' nene ningi ido' a'mingu' izipe ngomo ngama nete gozopo' guvelesi ve naba Davidi' a'vopilemo' ezelo' medelo minanive make, lolize ize gemelone li geke' geke' li-di minani' nesi ningi gili mulu'ningu' goloso gili ngizebolo' molani'. 16 nGizebolo' molavo ti' li li-imani': Ne'mine lamilizani' gamazi nilani' nene gele nabe. Likevo Izesu' ti' lo line': Naza gele nouvoni'za mono' godolou' gamazi ma O'mosomu' ti' lo neine' ma nene lingine gati gilahe gilamave: Gaza ve'ine do lapa nomine' o-ngedanivo izipe angale ngomo olihe amine ninani' nete gopo'ni li-gimilizangu' nene ladanga ma lamilisave. 17 Ne'mine lo lo-ngemo hulo-ngedo Zelusalemi numuno ebe' hulo Betani numuno ebeta vo ongani'.

Izesu' Aza Gohuno Za Usi' Ize-davo Goko' Line' Gamazi

(Maleko' 11-12-14,)

18 Nedenga' go' lavo oteko numuno nabala novivo ga'na olani'. 19 Ga'na olavo novo akalo' gohuno za ma ningine'. Ningo gihile ize neihe lo a'mida vo ningine'za haza avilevo' ningine'. Ningo ti' lo line': Gohi ma gihile izamilido' o neive. Ne'mine lo lavo a'mido' geto gohuno za ma api' ogo gulugulu izo goko' line'. 20 Ne'mine ogavo Izesu' izipahala zuho ingine ningi upuho' igi ti' li lani': Za me ve ne nadi'mine ogosa lite' lo gulugulu izive. 21 Ne'mine likevo Izesu' aza ti' lo lo-ngimine': Lamineto' nolo-lingimuve. Lingine inite' ma ilisa gili O'mosola lunivo hize ele' o-ledavo ha olosune li gili ele'vole' igi gatine sitakisi gilamilizani' nene a'mine inite' ha ilisave. Ido' neni' gohuno zalo' uvoni' inite' ne'minesi ha igi a'mine ne'mine inite' ivile' igisa evene' amiliza inite' gehepeve ha ilisave. Ado' mene golomu' nene ngutoko guvo nosou' lemelive lilizani' nesi nene gihile ha izeleseive. 22 Ee, O'mosola lolone' inite' nene ha lemeleseive li ezemu' gili ele'vole' igi mini ezela li nanite' nanitekumu' lilizahe a'mine inite' nene ha lengemeleseive.

Izesu' Amuzomu' Longo' I-dani' Gamazi

(Maleko' 11:27-33; Luka' 20:1-8)

23 Ido' Izesu' aza mono' numuno nabau' dizo evene' mono' lo-ngemo neivo eveneto' medeli mini O'moso inite' lehizi-daa' ave nabasi ido' eveneliti gizebo ve'inesi igi heteli ti' li longo' i-dani': Inite' mene oga' naine' nene zahi velemu' oga' nane. Ido' zaho lavosa oga' nane. 24 Likevo Izesu' aza lo-ngimine': Nazasi inite' mamu' longo' o-lengedekuvo li-nimilizani' nene a'mine'mine ogo nazasi ha zahi velemu' inite' oga' nouhe nemu' nene lo-lengemelesuve. 25 Mono' noso holo-ngedelive lo Zohane'ni zaho imiselive. O'moso'mo imiselihe ido' haza misubou' velite imiselave. Ne'mine lavo ingine angise'inemu' li volelo' melo' igi ti' li lani': Laza O'moso'mo imiselive loso' nene nanitekumu' gili imisa'mave loloseive. 26 Ido' evenelite ve loso' nene eveneliti golise gelelesune. Evenelite Zohane' nene polohete ve li gili nizanako nemu' ngehelele izine'. 27 Ne'mine li gili ngehelele izavo Izesu'ni ti' li li-imani': Ma gelamune. Likevo Izesu' aza ti' lo lo-ngimine': Lingine li-nimamani' nemu' nene nazasi ogo molo oga' nouvoni' inite' mene iline lo nimiselivemu' nene ma lo-lengemamolosuve.

Ve Mali'mi Gipele Sitato' Lo Molo Izesu' Aneza Gamazi Line'

28 Ne'mine lo imine' molo line': Lingine gililo. Ve mali'mo gipele sita' gedekine'. A'mine ve aza gipele gana've neido' vo ti' lo line': Gipe'ne make, idise nene vaini mingu' vo gono dozo line'. 29 Lavo gipele aza vamolosuve line'. Ne'mine line'za alinge' lu've do velepe' izo gele do vine'. 30 Me'nibo aza ihe' vo alingeni gipele neida vo a'mine'mine line'. Lavo gipele aza Ahono, volosuve lo line'za vamine'. 31 Ne'mine lo Izesu' ti' lo longo' o-ngidine': A'mine gipele sitakuti' nene me'nibine gelekele' lamine' zaho o-dive. Ne'mine lavo ingine gana've'mo ve lani'. Likevo aza ti' lo lo-ngimine': Ido' a'mine'mine ogo Zohane' lengita ogo lamine' igi mili minilizani' aka lengelebizine'za lingine gili imamani'. Ee, lingine gili imamani'za inite' goloso palasa iga' ave, takisi moni daa' ave ido' pasidiato' monaa' ani' vene' alu nevo'minete gili imani'. Ne'mine ani' nene lingine ningikeni' neine'za ningisa alinge' lutine di velepe' izi gili imamani' neive. Lingine langisetinemu' nene laza Okulumoku' minive'mo gizebo ingu' vo holalonive nene la'lisete ado' nene none li gilaa' nahe. Naza lamineto' ma lo-lengemelove. A'mine takisi moni daa' ave golososi ido' pasidia' vene' nesi lengi' lingivile' igi a'mingu' vi hilalizave lili' ilisave.

O'moso'mo Ei' Evenele Zuho Zuda Velo' Gizebo Ve Nete Gelekele' I-damave Nene Do Hulo-ngedeleseive Lo Vaini Mido' Gizebo Velo' Lo Molo Aneza Gamazi Line'

(Maleko' 12:1-12; Luka' 20:9-19)

33 Aneza gamazi gohi me gililo. Ve mali'mo misubo've naba minavo a'mingu' vaini mine ma zuho' ine'. Zuho' ogo a'mido' gesi hize vodo vodo ogo vaini gihile hite mi' izo lipeline' galese nesi elo a'mingu' mini mi'velo' gizebo iliza numuno ha'na nesi do dizo gizo evene' ma mine gizebo i-dilizave lo hulo-ngedo misubo mala vo minine'. 34 Vo neivo za gihile elaa' gamene alitavo a'mine za gihileti' ma vi di-nidi alo lo gelekele' izipe ngeletavo vi a'mine minelo' gizebo i-davela vi lani'. 35 Vi lani'za mingu' gono daa' avete gelekele' izipe nene a'nido' di gili' li ma ne gesebe' izi bili ma nene bili hili ma nene geheni huli huli' igi bilani'. 36 Ne'mine ikevo gelekele' ve gomu' ngimiseline' nene ngivile' ogo gelekele' ve gohi ma muki' ngimiseline'. Ngimiselavo vikevo gohi a'mine'mine sunovo' di-ngidani'. 37 Ne'mine ikevo alinge' mine meleho aza ne'mine ikeni'za neni' gipe'ne gihile mene imiselekuvo vavo ei' gipele ogaze li ningi nene ele'mizi lamine' ilizahe lo gelo a'mine gipele nene engita imiselavo vine'. 38 Novivo minelo' gizebo ve ingine ningi ei' gipele gehepeve navo ningi ti' li lani': Me ve'mo alinge' melehido' medelo mine mene dalive neinako mo bele helo ei' minelo' nene leli' molalone. 39 Ne'mine li mo gelelehe' igi ele'mizi vaini gesi heta vi bili hilani'. 40 Ne'mine ani' nemu' mine meleho ogo ningo minelo' gizebo ve nadi' o-ngedelive. 41 Ne'mine lo longo' ogavo ti' li Izesu'ni li-imani': A'mine evene' goloso nene do goloso ogo ngebele gese' oloseive. Ido' vaini mine nene mine gizebo iga' ave ato' ngemavo gizebo igi nizavo minguti' za gihile daa' gamene viline' nene a'mine gihile mine melehine di imika' imika' igi minilisave. 42 Ti' li likevo Izesu' aza ti' lo lo-ngimine': Lingine Mono' Godolou' gamazi ne'mine lo neine' ma gati gilisa'mahe:

Numuno gizilizani' geheni mukikuti' geheni ma nene numuno gizaa' avete ningi
goloso o vive li di kegesi hulani' geheni ne'mo
geheni muki' ngivile' ogo numuno do amuzo molaa' geheni lolo' ogave.
Guvelesi ve'mo a'mine inite' do soto' ogaze.
Evenelite ningekunivo lamine' gehepeve ogave.
43 Nemu' naza lo-lengemelove: O'moso'mo lengito' gizebo oga' neine' nene ipe' ogo evene' zuho gohi ma ei' gizebou' minali'mi monovo gihile igi mili gelekele' i-di minilizave ma do ngemeleseive. [ 44 Ido' evene' ma nete a'mine gehedo' velehe' limi ingalizani' nene izi iti hupi' izilisave. Ido' a'mine geheni ne'mo lemo evene' ma ngebeleline' nene izo lanahana o-ngedeleseive.]

45 Aneza gamazi lo oku' lavo eveneto' medeli mini O'moso inite' lehizi-daa' ave naba nesi ido' Halisaio' mono' laa' avesi a'mine aneza gamazi ne gili lelikumu' nolive li gilani'. 46 Ne'mine li gili analo' di bililizani' akamu' vise' igi minani'za evene' muki' Izesu'nimu' nene O'mosolati' polohete neive li gilanako ne'mo engikumu' golise gili huli-mikani' ve.

Copyright information for `ASO