Matthew 24

Mono' Numuno Naba Goloso Ilingumu' Izesu' Lo-ngimine' Gamazi

(Maleko' 13:1-2; Luka' 21:5-6)

Izesu' aza mono' numuno naba nene hulo novivo izipahala zuho eita igi mono' numungu' numuno lamine' tamine' nene elebizani'. Elebizikevo Izesu' aza ti' lo lo-ngimine': Ti' iha me ningilo. Agae, lamineto' lo-lengemelesuve. Numuno naba me geheni naba' nabadunu' gizi nizani' ningahe. A'mine geheni nene bili ngululubizi hulikevo a'minguti' geheni sita' ne'minesi ma bizi minamilisasive.

Geni Vai' Soto' Ilingumu' Lo-ngimine' Gamazi

(Maleko' 13:3-13; Luka' 21:7-19)

Ne'mine losa Oliva gololo' vo mito' neivo izipahala zuho engikovo' nene neida igi ti' li longo' i-dani': Idi'ne lo-lemaine' inite' nene nanihe' soto' ilive. Ido' gei' tine' molo aline' gamene nesi ido' misubou' inite' mata' muki' osu' liline' gamene nesi nene mo alitave lo ningeso' nene nanite' soto' ogavo ningelone. Ne'mine likevo Izesu' aza ti' lo lo-ngimine': Evene' muki' nete nene igi neni' gulive'ne lii O'moso'mo do lungu' izelive lo nimiselelesa live nene na'mo nouve li lika' lika' igi go'ine izikevo evene' muki' nete gili ngimikevo di gopo i-ngidilisave. Ne'mine ilisanako nemu' nene engikuti' mali'mo lengi' gotine izavo linginesi gili imikelizave. Ehe, gizebo lamine' igi minilo. Ido' lovo soto' neivo gili ebe' mala mala lovo soto' neivo ne'mi gamazi ma gililisave. Gili ma upuho' igi golise gilamilo. A'mine nene soto' oloseiha inite' vai' osu' liline' gamene naba nene a'mido' olihe soto' amive. Ido' misubo mau' vete misubo mau' vesi lovo hizilisave. Ido' guvelesi ve naba mali'mi zuhote guvelesi ve naba mali'mi zuhosi lovo hizilisave. Misubo ato atota ga'na naba helaa' gamene ido' mimi' naba soto' oka' oka' oloseive. Venelite izipe gidilisa mulumo api' igi gilii gilika' gilika' i'mi i'mi navo alinge' izipaha'ine soto' oga' neive. A'mine'mine ogo mulumo inite' muki' mene soto' iline' nene ha api' ine' nenako nemu' nene gilika' gilika' i'mi i'mi navo alinge' naza soto' olosuve.

A'mine mulumo nite' api' ogo soto' ogavo evenelite gonito' lengele'mizi mili goboni mili-lingidi linge ma lingibili hililisave. Lingine nenita gi'mizi minilisanako nemu' evene' zuho ato ato' muki' ingine lukehe lingibililisave. 10 Ne'mine aningumu' nene evene' muki' gili nimi nenita gi'mizani' nene huli ge lo soto' o ne lo soto' o li ngibililizani' aleveti a'ningu' mili ingine lukehe ge nebele ne gebele li minilisave. 11 Ido' evene' ma nete engikumu' soza li O'moso'mi gamazi lo soto' oga' nouve polohete ma ne nouve lii evene' muki' go'ine izi ngele'mize gopo ilisave. 12 Ido' monovo goloso daa' suno nene hutile' ogo naba ogavo ne'mo evene' muki' ingine lu'ine ge neme ne geme li guni amavo a'mine monovo ngomo oloseive. 13 Ti' iha evene' ma nenikumu' ha gili ele'vole' igi mini huli-nidamavo gamene naba iline' nene O'moso'mo do ngu' izeleseive. 14 Ido' O'moso'mo ei' gizebo ingu' vi hilaliza evenele do ngu' izo gizebo o-ngedelingumu' gamazi lamine' nene gililizave li di vi misubou' misubou' li-ngimika' li-ngimika' igi evene' zuho ato ato' muki' nene li-ngimi osu' lilisave. Ido' idise mene noluvoni' inite' nene soto' i'mi nivavo a'mine gamazi li-ngimi osu' nilavo gamene naba soto' oloseive.

Mulumo Gelaa' Gamene Naba Soto' Ilingumu' Lo-ngimine' Gamazi

(Maleko' 13:14-23; Luka' 21:20-24)

15 Gozopo' minine' polohete Danieli' line' inite' ado' ebe' do goloso iline' inite' gosele' inite' goloso gehepeve nene kekeize lo neine' numungu' di soto' milikevo ningilisave. (A'mene gizuvoni' gamazi mene gato nogelo ma gatelinive gaza gele ngolo' lo gelezo.) A'mine inite' nene di soto' milikevo lingine niningi ma Zudaia' misubou' nilizave nene golise golola nivilo. 17 Ehe, a'mine gameneu' nene silibe ogo minaa' nene nominako ve ma ingine numu'ine avitasi nilizadoti' nene ihe' numu'ninguko vi inite' mata'ine a'mingu' neine' nene di vamilisave. 18 Ido' mingu' nilizadoti' nene oko'nido' inite'ine dalisa tine' mili numunguko amilisave. 19 Agae, a'mine gameneu' nene Izipaha'ine minine' venekumukisi ido' izipe amido' nizani' venekumukisi mulumo gele-ngedekuve. Ge'nebe goloso ilisave. 20 A'mine inite' nene goline gameneu' soto' ogo ido' monokumu' mini gililizangumu' ve li aka monamilo li li huki lingimilizani' gameneu' soto' ogalize li O'mosolavo' li minilo. 21 Nanitekumu' ve. O'moso'mo inite' mata' do soto' idoti' idise mene none' gamenelo' mulumo alumo nite' naba ne'mine gomuta soto' amine' nenako api' ogo a'mine gamenelo' soto' oloseive. Ido' soto' ilidoti' nene alingeta gohi ma ne'mine soto' amoloseive. 22 Ido' Guvelesi ve'mo a'mine gamene nene mine ha'na ogalive lo bele hukolove ma lamidiniko evene' hamokisi ve'inesi ma minamadine'za Guvelesi ve aza do kegesine' evenekumu' gelo a'mine gamene nene mine ha'na ogalive lo bele hukolosa neive. 23 Ido' a'mine gameneu' nene ve mali'mo O'moso'mo do lu' izelive lo imiselelesa live aza mela neive lo ido' ningilo. Holela neive lo nolo-lingimivo ma nene gili imamilo. 24 Evene' ma nete soto' ika' ika' igi soza saza li do lungu' izelive lo O'moso'mo imiselelesa live ma nene nouve ido' O'moso'mi gamazi lo soto' oga' nouve polohete ma ne nouve li O'moso'mo ngele'mize kegesine' evene've ingine le'metilizahe li gotine izi ato' nite' golize laa' nite' masi masi di soto' mili lengelebizilisave. 25 Ehe, mene inite' olihe soto' amivo inite' mukikumu' gomu' lo-lengemekuve. Nemu' gizebo lamine' ilo. 26 Ido' ti' li ningilo. O'moso'mo do lu' izelive lo imiselelesa live aza ebe' hadivela vo neive nilavo ma a'mida vamilo. Ido' numuno lulouko dize neive lii nilavo ma gili ngimamilo. 27 Ingine O'moso'mo do lu' izelive lo imiselelesa live zegeno omo neive lilizani'za O'mosolati' ve gihile naza aloni' gameneu' nene gopa'na ledo ogo vaa' neine' ne'mine ogo numudo' namado' ve muki' ningi nizavo alosuve. 28 Ido' evene' hilani' gonoso nolida nene gonoso naa' ani' namalite a'mida nene lite' li igi di gese' igi minilisave.

O'mosolati' Ve Gihile Tine' Molo Alingumu' Lo-ngimine' Gamazi

(Maleko' 13:24-27; Luka' 21:25-28)

29 A'mine mulumo soto' ogo mineline' gamene nene osu' lavo lite' lo holi'mi labanala nolihizivo ike'ni'mi labana'vesi osu' loloseive. Ido' sonohi' nene Okulumokuti' suludi'mozi' mozi' navo Okulumoku' amuzo'inesi inite' nene mo'mongo' i gese' ilisave.

30 Ne'mine ikevo neloti' nene O'mosolati' ve gihile alongumu' soto' iline' maki nene Okulumoto' soto' ogavo misubou' misubou' minani' evene' zuho ato ato' muki' ingine ningi agae agae lii ive nama igi minilisave. Ee, O'mosolati' ve gihile naza amuzo'nesi ido' labana'ne nabasi do soto' ogosa limuso avilelo' nolimuvo ningilisave. 31 Ido' pikuli nolo naba nomolavo naza angelo'ne zuho ngimiselekuvo ingine limi ngele'mize kegesuvoni' evene'ne nene misubo ato' atoku' mini'mi monani' ebe' mukikuti' nene moni ngele'mize nubuho ilisave.

Aneza Gamazi Gohuno Zalo' Lo Molo Lo-ngimine'

(Maleko' 13:28-31; Luka' 21:29-33)

32 Ido' gohuno zalo' lo molaloni' nene gili lamine' igi gililo. Lingine Zuda veti misubotida mene gohuno zaloti' sisive ho' lavo mo ho' gamene alitave li ningi gilaa' nave. 33 Ido' a'mine'mine ogo nolo-lingimuvoni' nite' nene soto' neivo ma aza avito' ogo mo nene hetelelesa neive li ningi gililisave. 34 Lamineto' ma lo-lengemeloze. Gililo. A'mine gamenelo' aleve nene ha mini olihe hili osu' lamavosi a'mine inite' muki' nene soto' ilisave. 35 Okulumoki misubogi nene ha vi osu' lilisasine'za a'mine gamazi'ne nene mo osu' lamo ele'vole' ogo mineleseive.

A'mine Soto' Iline' Gamenemu' Nene Ve Hamolitesi Ma Gelamune Lo Izesu' Line' Gamazi

(Maleko' 13:32-37; Luka' 17:26-30,)

36 Ne'mine o neine'za a'mine soto' iline' gamenemu' nene ve hamolitesi ma gelamune. Ido' Okulumokuko angelo' nesi nene gilamave. Ido' O'moso'mi gipele nazasi nene ma gelamuve. Me'neho ei' hamo' ne gele neive. 37 Noa' minine' gameneu' nene evene' gopo minani' ne'mini neni' O'mosolati' ve gihile aloni' gameneukisi a'mine'mine igi minilisave. 38 Noa' minine' gameneu' nene noso naba velamivo evene' ingine ngolize izi noso' nite' ni noso ni ido' vene' velo' vavo vene' di huki mili nizavo Noa' aza sipiu' dizavo 39 ingine noso velo lebeleleseive li gilami gopo nizavo noso naba velo ogo a'mine aleve nene giso gilito do vine'. Ido' evene' a'mine'mine igi aloseive li gilami gopo nizavo O'mosolati' ve gihile naza a'mine'mine ogo ogo hetelelesuve.

40 Ido' a'mine gameneu' evene' sita' ma mingu' gono di minilisine' nene evene' ma nene O'moso'mo do vavo ma ne ha mineleseive. 41 Ido' vene' sita' viti gihile sege daa' initetunu' sege di minilisinguti' ma nene O'moso'mo do vavo ma ne ha mineleseive. 42 Guvetinesi ve nani gamenelo' alohe. Lingine gilamanako nemu' nene lingine gizebo lamine' igi minilo. 43 Ido' lingine mene gili' nalo. Guminelo' ve'mo bedine' numuno ne'mi meleho aza guminelo' ve olihe amivosa holuka' aline' gamenemu' nene ma gele minidiniko numu'velo' nene gizebo ogavo guminelo' ve ne'mo nene ma bedamidine. 44 O'mosolati' ve gihile naza aloseive li gilamilizani' gamenelo' alosuze. Nemu' lingine nene a'mine'mine igi di nene igi gizebo lamine' minilo.

Gelekele' Izipe Laminekumukisi Ido' Izipe Golosomukisi Aneza Gamazi Lo-ngimine'

(Luka' 12:41-48)

45 Ido' Guvelesi ve'mo gelekele' izipe ma ele'mize molo gelekele' izipaha'nelo' gizebo ogo noso' nite' naliza gamenelo' gamenelo' noso' nite' ngemeka' ngemeka' ogo minelive lo ele'mize molavo peleseve' izamaa' ive otohato o minive noline' nene nadi' o'mo vo mineline' o neive. 46 A'mine ele'mize molani' gelekele' izipe ne'mo a'mine meleho imine' gono nene dovo' dovo' ogo neivo Guvelesi ve ogo hetelo ningeline' ne'mo gelekele' izipe nene lamine' iline' akalo' mine molo mineleseive. 47 Lamineto' nolo-lingimuve. Guvelesi ve aza ogo a'mine gelekele' izipe nene monovolo ningo inite'ne mukito' nene gizebo o-nedelive lo lo-emavo gizebo o-deleseive. 48 Ee, ne'mine iline'za gelekele' izipe aza lulo golososi mino lulouko neni' gizebo ve'ne ma nene mo lite' lo amiko mino gamene alingeta alihe lo gala gelo 49 api' ogo ezesi maka' gono daa' ave nene ngebeledo' ngebeledo' ogo mino noso ni sipaki igi monaa' avela vo gi'mizo engikisi maka' noso' nite' ni noso ni'mi moni minaa' navo 50 a'mine gelekele' izipe aza gizebo ve'ne nene ne gamenelo' aloseive lo gelamo ngelo amoloseive lo gelo mineline' gamenelo' nene gizebo ve've ogo hetelo 51 oko'no belevo' hukovo' ogo monovo'ine goloso di halekaa' ave hulo-ngedaa' ida hulo-davo a'mida mulumo alumo gili ive nama igi ve'ine ingihi langolo' igi nilizada ezesi vo a'mine'mine ogo mineleseive.

Copyright information for `ASO