Matthew 25

Laza Ei' Alingumu' Gizebo Lamine' Oloningumu' Aneza Gamazi Alungo Tenilo' (10) Lo Molo Lo-ngimine' Gamazi

Ne'mine lo Izesu' imine' molo ti' lo line': Noluvoni' gamenelo' nene evene' O'moso'mo gizebo ingu' vi hilalizani' monovomu' lo molaloze. Gililo. Alungo teni (10) ne'mine ingine vene' dalive nene vi ele'mizi alisa gizebo i minilisa vani' ne'mine gele voloseive. A'mine alungo teni (10) neti' faef (5) nene ga'ine ngolo' line' ido' linge faef (5) nene ga'ine ngolo' lamine' negi minani'. Ido' ingi ga'ine ngolo' lamine' negi alu faef (5) nene lamu'ine di vani'za a'mingu' noso lumo olo' lihizelingumu' ve li mo di vamani'. Ti' aha ga'ine ngolo' line' alu ingine olo'ine lihizelingumu' noso lumo gomiseu' lepi lamu'inesi di vani'. Ido' vene' dalive geto amiline' ogavo alungo teni (10) mukito' ve'ine hihi' ogavo ingani'. Ingi nizavo go' lo'mo lomo olo'mudise holuka' nene vene' dalive mo naze. Vi ele'mizi alo li asi likevo alungo muki' okiseti' oti lamu'ine di guni igi enge vite' ani'. Ne'mine igi ga'ine ngolo' lamine' negi alu nete ga'ine ngolo' line' alumu' ti' li lani': Lamuteu' noso oku' lo lihizelesa neize. Lengi' nosotinguti' ma leki limilizani' o neive. Ne'mine likevo ga'ine ngolo' line' alu nete ti' li li-ngimani': Lengemeso' o neiha linginesi lezesi dalonido' lisihe' amize. Situvaku' vi langisetine hizisa lamutingu' lepi di alizani' ne lamine' oloseive. 10 Ne'mine likevo ingine meni hizilisa vikengumu' nene vene' dalive ogo hetelavo lamu'ine di va'va' i minani' alungo ezesi maka' vene' dalingumu' noso' nite' gizi vata' angu' nene vani'. A'mingu' dizi vikevo akahe hizi tilani'. 11 Akahe hizi tilikevo alinge' alungo lingela igi heteli Guvekasi ve make, mo okunge. Akahe si'ze-ledevo li lani'. 12 Likevo guvelesi ve ti' lo line': Lamineto' nolo-lingimuve. Lingine ningamuvoni' alevete nilave. 13 Ne'mine lo Izesu' imine' molo line': Ehetine ve. Nani gamenelo' alohe. Lingine mo keke' gilamanaze. Nemu' gizebo lekeseve igi minilo.

Gelekele' Izipe Sitohamoliti Gamazi

(Luka' 19:11-27)

14 Ido' aloni' gameneu' gelekele' izipaha'ne meni ngemeloni' monovomu' lo molaloze. Gililo. Ve mali'mo ebe' mala volosa gelekele' i-daa' ani' izipahala zuho eita do nubuho o-ngedo gizebo i-nidilizave lo inite've muki' nene ngimine'. 15 Ido' ne'mine noogo gono daa' ado' gele mine' mine' ogo moni ize' molo ngimine'. Gelekele' izipe ma ne faef tauseni kina (K5,000) imine'. Ido' ma ne tu tauseni kina (K2,000) imine'. Ido' ma ne vanu tauseni kina (K1,000) imine'. 16 Ne'mine ogo guvelesi ve mo vavo gelekele' izipe faef tauseni kina (K5,000) dave'mo lite' lite' lo vo a'mine faef tauseni kina (K5,000) nedunu' moni gono do gohi faef tauseni kina (K5,000) ma do soto' molani'. 17 Ido' gelekele' izipe aza tu tauseni kina (K2,000) dave a'mine'mine ogo moni gono do ihe' tu tauseni kina (K2,000) ma do soto' molani'. 18 Ido' vanu tauseni kina (K1,000) dave aza vo misubou' galese elo a'mine vanu tauseni kina (K1,000) nene galese izekine'. 19 Ne'mine ikevo guve'inesi ve aza gamene ha'na goloso mino alinge' monidati' ogo izipahala zuho moni ngemekidunu' gono dani' ningo do lisihe' olosa ani'. 20 Gelekele' izipe aza faef tauseni kina (K5,000) dave guvelesi ve'mi velela ogo oto ti' lo line': Guvekasi ve, gaza faef tauseni kina (K5,000) nemeko vaine' matunu' moni gono do ihe' faef tauseni kina (K5,000) ma do soto' uvoni' ne neive lo do ogo elebizine'. 21 Elebizavo guvelesi ve aza gelekele' izipe ti' lo lo-imine': Gaza peleseve' izamanive gelekele' izipe lamine' goloso nane. Gonolo' gizebo lamine' goloso ogane. Gono ngomolo' gizebo lamine' goloso aine' nemu' inite' naba mukito' gizebo ve hulo-gedelesuve. Guvekasi ve naza nolize izo nouvongu' dizanivo makato' lolize izo minelesusize. Ano. 22 Ido' aza tu tauseni kina (K2,000) dave'mosi ogo ti' lo line': Guvekasi ve, gaza tu tauseni kina (K2,000) nemaine' a'mine matunu' gohi tu tauseni kina (K2,000) ne ma do soto' uvoni' ne neive lo do ogo elebizine'. 23 Elebizavo guvelesi ve aza ti' lo lo-imine': Gaza peleseve' izamanive gelekele' izipe lamine' goloso nane. Gonolo' gizebo lamine' goloso ogane. Ido' gono ngomolo' gizebo lamine' goloso aine' nemu' inite' naba mukito' gizebo ve hulo-gedelesuve. Guvekasi ve naza nolize izo nouvongu' dizanivo makato' lolize izo minelesusize. Ano. 24 Ido' aza vanu tauseni kina (K1,000) dave nesi ogo guvelesi ve neida ogo ti' lo line': Guvekasi ve, gei' monovoka nene gele nouvoni' ma neive. Gaza ve amuzo malehe mino gasika zuho' amaninguti' noso' nite' nene ha dolize daa' nanive mino gasika gono damaninguti' evene' maliti gonouti' nesi gihile izavo ipe' ogo ha daa' nanive nane. 25 Gaza a'ne'mine ve nane' nenako nemu' gei' moni nemaninguti' ma vo tolovo iline' nene nelemaline lo golise gelo vo misubou' galese elo a'mine vanu tauseni kina (K1,000) nemaine' nene a'mingu' do haleko molo hitekuvoni' ve. Ido' ningezo. Idise gei' monika mene do-gedo nouve. 26 Ne'mine lavo guvelesi ve ti' lo lo-emo line': Gaza gelekele' izipe goloso, gonomu' gosele' gebele vine' mene, nenikumu' nene aza zuho' amidoti' nene noso' nite' dolizo daa' ive ve ido' gono daminguti' nene gihile izavo ma nesi ipe' ogo daa' ive ve lo gelo nolabe. 27 Ti' lo ma moni'ne nene beni numungu' molo-nedanidini naza tine' molo ogo a'mine moni'nesi ido' a'mido' imine' mili-nidilizani' polopeti masi duvodine' nemu' a'mine moni'ne nene beni numungu' molo-nedelinako molo-nedamane. 28 Ne'mine lo gelekele' izipahala a'mida minani' nene ti' lo lo-ngimine': Ido' ve ma ingine inite'nelo' gizebo lamine' igi ma di minilizave nene imine' molo gohi ma ngemekuvo vai' livo di minilisave. Ido' inite'nelo' gizebo lamine' igi di minamilizave engita inite' ngomo ma noline' nene a'minesi gohi ipe' ogo dalosuve. Ne'mino neine' nenako nemu' lingine a'mine vanu tauseni kina (K1,000) do neine' nene ipe' igi teni tauseni kina (K10,000) do minivela di imilevo. 30 Ne'mine igi gelekele' izipe gulupese mene huli heta i-dikevo liti'muso gehepeveu' vo mino ive nama ogo mulumo alumo gelo vele ongoho langolo' ogo mineleseive.

Gamene Nabala Guvelesi Ve'mo Ize' Molo-Ledeline' Gamazi

31 Ido' O'mosolati' ve gihile naza labana'ne do soto' ogo angelo' muki' ngele'mizo aloni' nene Guve'nesi ve naba mineloni' mo'mosi'nelo' minelesuve. 32 Ido' a'mido' nouvo evene' zuho ato ato' muki' nene neni' ve'nelo' ngele'mize nubuho ilisave. Ne'mine ikevo izelo' gizebo ve ne'mo sipisipi ize'vesi meme' izesi gopo igi minanguti' nene do kegese-ngedo sipisipi ize mulise ato' hulo-ngedo meme' ize mulise ato' hulo-ngedaa' ine' ne'mine naza evene' do kegese-ngedo sipisipi ize ne'mini minilizave nene a'ne hulaa' uvoda ngele'mize molo meme' ize ne'mini minilizave nene a'ne hulamaa' uvoda hulo-ngedelesuve. 34 Ne'mine ogo Guve'nesi ve mino naza a'ne hulaa' uvoda minilizavemu' ti' lo lo-ngemelesuve: Me'neho no'noho' ize-lingidive mate, alo. Naza ga'na hele nouvo lingine noso' nite' nimaa' ikeni' ve. Ido' naza nosomu' nisavo lingine hepe' noso ohizi nimaa' ikeni' ve. Ido' venenga ve mino naza lengita okuvo lingine igi nele'mizi lamine' iga' ani' ve. Ido' genegana'ne nomivo lingine ma di ngili-nidaa' ani' ve. Ido' inite' gize dokuvo lingine igi nasahili' lamine' i-nidi minaa' ani' ve. Ido' nala' numungu' huli-nidikevo nouvo lingine igi hizi ele' i-nidaa' ani' ve. Ne'mini i-nidi minani' nenako nemu' nene O'moso'mo Okulumo' misubo do soto' idoti' nene lengi' ebetine ei' gizebo ingu' salani molo-lengede neine' nene igi di minilo. 37 Ne'mine lo lo-ngemekuvo ingine ti' li lilisave: Guvekasi ve make, laine' inite' nene gei' o-gedamune' ve lo gele none. Nemu' nene gei' ga'na helane lo ningo noso' nite' nanihe' do gimuningumu' nolane. Ido' gaza nosomu' nisave lanivo gelo noso nanihe' ohizo gimuningumu' nolane. 38 Ido' gaza venenga ve nane lo ningo laza nanihe' gele'mize lamine' uningumu' nolane. Ido' geneganaka nomivo ningo nanihe' ma do ngolo-giduningumu' nolane. 39 Ido' gaza inite' gize danivo laza nanihe' ogo nasahili' o-giduningumu' nolane. Ido' gaza nala' numungu' huli-gidikevo nanivo laza nanihe' ogo hize ele' o-giduningumu' nolane. 40 Ti' li longo' i-nidikevo naza guve'nesi ve mino ti' lo lo-ngemelesuve: Lingine evene'ne zuho ma nene o-ngidube li gilani'za ne'mine inite' i-ngidani' nene neni' i-nidani' gelave. Ee, neze evene'ne zuho minanguti' lemo minivesi ne'mine i-dikevo neni' i-nidani' gelave.

41 Ido' ne'mine lo a'ne hulamaa' uvoda minilizavemukisi ti' lo lo-ngemelesuve: Lingine me'neho usi' ize-lingidivete nouvodati' vi haha igi lihizami olo' lovo' lovo' ogo neine' nene me'neho do soto' ogo Satanisi eze angelole zuhosi a'mingu' vi hilalizave lo engikumu' salani molo-ngidingu' vi hilalo. 42 Ne Nanitekumu' ve. Naza ga'na helo nouvo lingine noso' nite' nimamani' ve. Ido' nosomu' nonisivo lingine noso ohizi nimamani' ve. 43 Ido' venenga ve mino lengita okuvo lingine nele'mizi lamine' amani' ve. Ido' genegana'ne nomivo lingine ma di ngili-nidamani' ve. Ido' naza inite' gize dokuvo ido' nala' numungu' huli-nidikevo nouvo lingine igi nasahili' i-nidamani' ve. 44 Ne'mine lokuvo ingine ti' li longo' i-nidilisave: Guvekasi ve make, gaza ga'na hele nanivo he nosomu' gise neivo he ido' venenga ve minanivo he geneganaka nomivo he ido' inite' gize do nanivo he ido' nala' numungu' nanivo nanihe' ningo nasahili' o-gedo gele'mize lamine' amune. 45 Ne'mine likevo naza ti' lo lo-ngemelesuve: Lamineto' lo-lengemeloze. Lingine evene' ma ne'mine i-ngidamani' ne'mo neni' i-nidamani' gelave. Ee, neze evene'ne zuho minanguti' lemo minivesi ne'mine i-damavo neni' i-nidamani' gelave. 46 Ido' ne'mine lo lo-ngemekuvo ingine vi mulumo ebeku' vi mulumo gono divi' divi' igi nizavo apasi-ngidamilisave. Ingine ne'mine ilisaha evene' lisihe' lamine' ingine ele'vole' ngemeni dameni dii minevo' minevo' ebeku' vi hilalisave.

Copyright information for `ASO