Philippians 1

Hilipi Ebeku' Izesu' Evenele Minani' Nene Geke' Lo-ngedo Paulo' Gizine' Gamazi

Paulo' nazasi Timoteokisi Izesu' gelekele' ve minusive netise nene makato' mino lengi' O'moso'mi evenele Izesu' Kilisitoda gi'mizi minave Hilipi numuno ebeku' nizani' muki' nesi ido' mono' gizebo vetinesi ido' mono' gonolo' vetinesi lengikumu' nene luhuvo nite' mene nogize-lingiduze. Ningilo. O'moso metehosi ido' Guvetesi ve Izesu' Kilisito' nesi nasahili' i-lingidikesivo ne'mo lengi' muludingu' nene hongu minivo mine lamine' igi minilizave lo O'mosola noluve.

Paulo' Aza Luhuvo Nite' Gize-ngidive Hilipi Alevemu' O'mosola Line' Gamazi

Naza lengikumu' giluvoni' gamenelo' gamenelo' nene O'moso'nela isaa' neve lo laa' nouve. Ido' a'mine lengikumu' O'mosola laa' nouvongu' nene gamene gamene nolizesi minosavo' nene laa' nouve. Ne'mino laa' nouvoni' nene nanitekumu' ve. Lingine gana' api' igi gamazi lamine' giladoti' mine'mo dizo idise nonida neve a'mine gamazi lamineli'mi gono noduvongu' nene hize ele' i-nidaa' ani' nemu' nene ne'mino O'mosola nolize izo laa' nouve. Naza lengikumu' nene ti' lo gele mu'musi' o nouve: Lengiku' api' ogo gono lamine' nodave O'moso ne'mo nene gono do do vo neivo Izesu' Kilisito' aline' gamenela a'mine gono nene vo pele gehepeve oloseive. Ido' lengi' nene lu'neu' homi do molo nouvoni' ma nene nizanako naza lengikumu' ne'mine lo gele mu'musi' o nouvoni' nene mo lisihe' lamine' o neive. Ee, O'moso'mo nasahili' o-nedo gono nimine' noduvongu' nene lingine mukito' hize ele' i-nidaa' ani' ado' nala' numungu' nouvongu' mesi ido' gamazi lamine' di'mi limaa' aveti gamazi'ine do'mo lemoo gamazi lamine' nene do'mo dizosa a'mine gamazi'mi amuzo've do soto' uvongu' nesi nene hize ele' i-nidaa' ani' nenako nemu' lengi' nene lu'neu' homi do molo nouve. Ee, Izesu' Kilisito' lulo limine' ne'mo do ote-nedavo aza oga' neine' ne'mino mulu'neu' homine lengikumu' nene huhu lo gele nouve. Neve nene mo lamineto' noluvoni' nene O'moso'mo gele neive. Ido' lengikumu' O'mosola luvongu' nene ti' lo laa' nouve: Lingine lutine ngemaa' monovotine nene naba o'mo vo neivo gatine gili nge li inite' ningi hehe laa' monovo di minilizave. 10 Ado' monovo ato ato' muki' ize' mili monovo ma ngivile' igi lamine' gehepeve minani' monovo nene di kegesi ningi dalizado' lisihe' i minilizangumu' nene lingine gatine gili nge li inite' ningi hehe laa' monovo di minilizave lo laa' nouve. Ido' lingine ne'mine ilizadoti' nene Izesu' Kilisito' aline' gamenela nene lingine lutingu' goloso monovo nomivo okodida gamazitinesi nomivo minikevo 11 monovo lisiheli'mi gihile've Izesu' Kilisito' do soto' o-ledaa' neine' nene lengita vai' laavo a'minemu' nene evenelite O'moso di hozi li opo'ni lilizado' lisihe' o mineleseive lo laa' nouve.

Izesu' Kilisito' Gamazi've Lamine' Nene Paulo' Naza Galapuso Numungu' Minuvongukisi Geli Geli Ogo Hize Ele' Ogo Minaa' Nouvoni' Ne'mini Hilipi Aleve Nene A'mine'mine Igi Minilizave Lo Paulo' Line' Gamazi

12 Neze zuhokizo, nenita soto' ine' inite' mene gamazi lamineli'mi aka've nene hize tilivoba asi gamazi lamine' hize ele' ine' nenako nemu' nene lingine gililizave lo gelosa nolo-lingimuve. 13 Ee, naza nalato' nouvoni' nene Kilisito'nimu' nouvoni' nenako nene mo soto' o neivo mela Kaesale' numu'velo' gizebo iga' ani' ami pilisi ve mukilitesi ido' evene' linge mukikisi nene mo ningi gili osu' li nizave. 14 Ido' nalato' nouvoni' ne'mo nene leze zuho linge muki' nete nene Guvelesi vemu' gili mu'musi' i minani' nene naba goloso ogavo ingine ngehelele izamivo amuzo mili Kilisito' gamazi nene li soto' iga' nave.

15 Ido' evene' linge malite Kilisito' gamazi've li soto' iga' naani' nene nenikumu' mulu'ningu' goloso o minivo neni' nivile' ilisa nene laa' naani'za linge ma nete Kilisito' gamazi've li soto' iga' naani' nene lu'ine laminetoti' gehepeve li soto' iga' naave. 16 Ee, ingine Kilisito' gamazi've li soto' naani' nene naza nala' numungu' nouvoni' me'mo gamazi lamine' nene alete molo-delive losa O'moso'mo nele'mize molavo nouvongumu' nene gili mini lu'ine nimisa li soto' naaha 17 linge ma meuko luve nete nene gamazi lamine' li soto' naani' nene lu'ine laminetotikovo' naavoba asi ingine nene Paulo' nala' numungu' neingu' nene geni gohi masi do imine' molo-delone liisa engi' oko'ine di dizilisavo' gamazi lamine' nene li soto' iga' naave. 18 To' o monilize. Gamazi lamine' lu'ine avileloti' abeleni igi li soto' ahe ido' lu'ine lamine' gehepeveloti' nene li soto' ahe ne'mine mana'mine adotikisi nene mo Kilisito'nimu' li soto' naave loosa nemu' nene nolize izaa' nouve. Ee, a'minemu' nene nolizevo' ize'mo vo minelesuve. 19 Ido' naza nene nolize ize'mo voovo' minelesuve noluvoni' nene nanitekumu' ve. Lingine nenikumu' ve li O'mosola laa' naavo ido' O'moso'mi Sikalahuli'mo hize ele' o-nedaa' neivo neine' ne'mo nene idise inite' soto' o-nede neivo nouvonguti' nene ha do nu' izeleseive lo gele nouvongumu' nene nolize ize'mo voovo' minelesuve. 20 Ee, naza novozo ngomosi helamo mino gamene gamene oga' uvodi'mine ogo idisesi nene ha a'mine'minevo' ogo gamazi nene lovo' kiselevo' ogo lo nouvo neni' oko'nedunu' inite' ogo molo oloni' muki' ne'mo Kilisito'ni nene do naba o-deleseive. A'mine nene ado' minevo' alevo' ogo ha minelohe ido' nibili hilikevo helelohe olonikisi Kilisito'ni nene ha do naba o-daakovo' olosuve lo gele mu'musi' o nouve. 21 Nenikumu' ne'mine noluvoni' nene neemu' noluve: Naza minevo' alevo' ogo mine do voloni' nene Kilisito' nenita mine molo neivosa eikumukovo' nene minevo' alevo' olosuve. Ido' helo voloni' ne'mo nene minevo' alevo' ogo mineloni' nesi ivile' ivosa lamine' golosou' vo minelesuve. 22 Ne neiha oko'ne'vesi ha minevo' alevo' ogo mine do voloni' nene gihile vai' izeline' gono nene dalosuvonako nemu' nene heleloni' akalo' e'metelove loloni' nene lamine' ilihe ido' minevo' alevo' o do vaa' akalo' e'metelove loloni' nene lamine' ilihe nemu' nene ma gelamuve. 23 A'mine aka sita' memu' nene ve'nehe' ka'nehe' lo nouve. Naza vo Kilisitokisi minaa' nene ivile' o neine' nenako ne'mine olongumu' lanite' nene ha gele nouha 24 helo voloni' nene lingine sihele'ni ne'mine gopo minilizani' nenako naza me misubou' oko'nesi ha mineloni' ne'mo nene ivile' ogo lamine' oloseive. 25 Nemu' nene ti' lo gele ele'vole' gehepeve ogo gele nouve: Naza nibili hilamavo lingine monokumu' lutingu' gulumo avile lisivo minani' nesi nene do naba o'mo vo minelongumu' nene lengi' mukikisi ha mine do vo minelesuuve losa gele nouve. 26 Ido' ne'mino lengita gohi ogo mineloni' ne'mo nene lingine nenikumu' ve li Izesu' Kilisito'ni nene vauve ilisa di naba i-dilizado' minilisave.

27 Ne'mine mana'mine inite' nanite' nanite' ne'mine soto' ilihe. A'mingukisi lingine nene Kilisito' gamazi lamine' gilavete igi mili minilizado' lisihe' o minine' monovolokovo' nene e'meti igi mili minilo. Ne'mine igi nizavo naza ogo ninge-lengedelohe ido' hota mino lengikumu' gamazi gelelohe oloni' nene lingine ongovango lamii ha lutine di hamo' i mini monoku' oti pehe li mini monoli'mi lovou' nene maka' makato' lutine gatine hamo' minivo biluva' i-lingidaa' avete ne'mine mana'mine inite' i-lingidilizangumu' nene lengehelele izamivo gili ele'vole' i nizani' gamazi lamine' di otilisa nene makato' amuzo mili nizavoo ningo gelelove. Ne'mine igi minilizani' ne'mo a'mine biluva' i-lingidaa' ave vi tolovo ilizangumu' nene ngelebizosa lingine lukuvo nalizangumu' nene lengelebizeleseive. Ne'mino soto' iline' nene O'moso'mo laavosa eitati' nene soto' oloseive. 29 Ido' ne'mine noluvoni' nene neemu' noluve: O'moso'mo nasahili' o-lengedo lingine igi mili ilizani' aka lehize-lingidine' nene lingine Kilisito'nimu' gili ele'vole' i minilizave losavo' lehize-lingidine' nevoba asi ei' Kilisito'nimu' nene mulumo alumo inite' nesi nene gihilizave losa a'mine ne'mine aka nesi nene lehize-lingidine' ve. 30 Ee, linginesi nene a'mine monoli'mi lovou' mene zege' zege' igi nizave. A'mine lovou' nene gomu' naza zege' zege' ogo nouvo ningani' ido' idisesi ha zege' zege' ogo nouvo gilani' lovo ma nene neive.

Copyright information for `ASO