Philippians 2

Izesu' Kilisito' Ei' Oko'no Do'mo Lemo Zou Lo Minidi'mine Igi Lengi' Okodine Di'mi Limi Zou Li Mini Lengi' Zuhomu' Gilavo Lingivile' Igi Dizi Minilizave Lo Paulo' Line' Gamazi

Ne'mino neine' nenako nemu' nene naza agae lo ti' lo nolo-lingiduve: Lingine Kilisitoda gi'mizi nizani' ne'mo hize ele' o-lengedavo ido' Kilisito' lulo limine' ne'mo nene lutine do upuho' o-lengedavo ido' O'moso'mi Sikalahu' ne'mo lengikisi bizo neivo muludine hukavo mulumo'ine ningaa' monovo nene lingine di nilizani' nenako nemu' nene naza nene nolize gehepeve izeloni' aka nene ma di soto' i-nidisa ne'mine igi minilo: A'mine nene ado' lingine lutine gatine di hamo' igivo' mini lutine ngemaa' monovo hamoto' e'meti ge luka neme ne lu'ne geme li mini lutine vo hamo' ogavo hamo' gatinevo' gili minilo. Lengiku' nene lengikuti' ma ngivile' ogo minelone li okodine hazamu' di dizaa' monovolo' nene e'metilizavoba asi lengi' okodine di'mi limi mini lengi' okodinemu' gilaa' nani' nene ivile' ivosa evene' mamu' gilavo dizo mineleseive. Lingine hamo hamo' lengi' initetinemukovo' vise' igi minami lingine hamo hamo' evene' linge ma neti inite'inemukisi nene vise' igi hize ele' i-ngidi minilo. Lengi' lengemeni damenitine nene mo Kilisito' emeni dameni've gehepeve me'minesi nene di minilo: Ado' aza neve nene mo ganakuti' O'moso'mi emeni dameni gehepevesi minine'za aza nene O'mososi lisiheto' minine' mo'mosi've nene do gili' lo do minelove lo gelamo a'mine amuzo've nene do hulo gelekele' ve ne'mineti ngemeni dameni gehepeve do otuho evene' okode ne'minesi lolo' ine' ve. Evene' okode ne'minesi soto' ogo mino ei' oko'no nene do leme gehepeve noogo O'mosolo' gelekele' ogo minine' nene O'moso'mo vo heleline line' gamazilokisi nene gele doosa hiline' ve. Ee, lohoto' zalo' bililizanguti' nene ovozo helo olovo' amo O'moso gelekele' o-do evene' mukiliti ve'nido' ve goloso gehepeve ne'mine lolo' ogo lohoto' zalokisi nene hiline' ve. Ne'mine ingumu' nene O'moso'mo do'mo dizo dizo mo mo'mosi' nabalo' goloso hozine hulo-doo ei' gulive do hozi lo-dine' ne'mo nene gulive ato ato' muki' nene ngivile' ogosa minine' ve. 10 Ido' ne'mine ine' nene Okulumoku' nizani' initekisi misubolo' nizanikisi misubo lulou' nizanikisi mukito' Izesu' gulive lilizado' nene obuvo'ine hizi imi 11 mukito' Izesu' Kilisito' neve nene Guvelesi ve naba neive li li soto' ilizave losa ne'mine ine' ve. Ido' Izesu'ni ne'mine i-dikevo ne'mo nene meleho O'moso ne'mi guvele nene voloseive.

Nenito' Gelekele' I-nidi Mini O'moso'mo Do Lungu' Izeline' Ne'mi Gihile Di Soto' I'mi Vi Minilizangu' Nene Sonohi' Ne'minisa Ve'ne Ve'ne Ili Minilizave Lo Paulo' Line' Gamazi

12 Lu'ne lengeme nouvoni' alevekizo, Izesu' aza nene O'moso ne'mino gelekele' o-do minine' nenako nemu' nene lingine a'mine'mine igi gelekele' igi minilo. Gomu' naza lengikisi minuvongu' gamene gamene gelekele' i-nidaa' ani' ma'mine igi mini idise naza lengikisi minamuvodo' nene a'mine gomu' monovotine nene ivile' igisa gelekele' gehepeve i-nidilo. Naza ti' lo nolo-lingimuve: O'moso'mo do lungu' izeline' nenaze. Ne'mi gihile di soto' ilizangisi lengi' nene ladise ogalone li golise gili luvo luvo izi minisa nene amuzo mili gono dalo. 13 Ne'mine noluvoni' nene nanitekumu' ve. O'moso'mo gilivo lamine' iline' inite' olone li gilisa lingine a'mine inite' ilizado' nene do upuho' noo-lengedo asi've O'moso neve nene lengiku' omo mino gono nodave. 14 Nemu' nene lingine ne'mine mana'mine inite' igi mili minilizangu' nene nulu nulunga li lihiteheka li lovo lolize amisavo' nene igi mili minilo. 15 Ido' ne'mine igi minilizave lo noluvoni' nene nanitekumu' noluve: Lingine nene okodido' gamazi nomivo mini lutingukisi goloso monovo nomivo mini me misubou' aleve aka lisiheto' vami zovo' zava' izi vaa' aveti vovo'ningu' nene O'moso'mi izipahala zuho lengita goloso nite' ma gi'mizamine' minilizangumu' nene ne'mine ilizave losa noluve. Ne'mine igi mini a'mine me misubou' aleveti vovo'ningu' mene sonohi' ne'minisa ve'ne ve'ne ili mini 16 minevo' minevo' minaali'mi gamazi nene di hozi li minikevo naza loti' hazamu' izo minuvoni' nomive lo ido' amuzo molo gono hazamu' do minuvoni' nomive losa Kilisito' aline' gamenelo' nene lengikumu' lo soto' ogo nolize izelodo' minelesuve. 17 Neze nene nibili hililizahe gelamuha ne'mine ma ikevo vanise lepeloni' nene lingine Kilisito'nimu' gili ele'vole' iga' naani' nene sipisipi O'moso imilisa bilaa' naani' ne'mino neivo a'mine nene lingine mo O'moso lehizi-di nizado' neni' vanise'ne lepeloni' nene a'mido' imine' molo mineleseive losa nolize noizuve. Ido' a'minemu' nolize izeloni' nene lengi' mukikisi maka' lolize izelesune. 18 Ido' ne'mine oloni' nene lingine a'mine'mine igi longolize iziisa nenikisi makato' lolize izelonido' o neive.

Timoteongi Epahaloditongi Nene Engita nGimiselelove Loosa Engi' Monovo Danava'ine Paulo' Lo-ngimine' Gamazi

19 Naza lengi' nene nadii nizahe lo a'minemu' gelosa mulu'neu' lamine' gelelove loo Guvelesi ve Izesu' lulolo' noline' nene Timoteo'ni lengita nene lite' losa imiselelove losa gele nouve. 20 Ido' Timoteo'ni ne'mine nene nenikisi mela ma minamave. Asi ei' hamo' nene neni' gelaa' nouvodi'mine ogo gilivo bizo minusive mino lengikumu' gehepeve ogo minelive ne neive. 21 Ido' linge ma muki' nete nene engi' inite'inemukovo' gili minisa Izesu' Kilisito' gono'vemu' nene ma gilisa'mave. 22 Ido' Timoteo' monovo've lamine' mamu' nene lingine mo gili nizani' ma neive. Aza nene nenikisi melehoi gipelei ne'mine lolo' ogo mono' gamazi lamineto' nene gelekele' ogo do hutile' ogo minaa' nousive. 23 Ne'mino minaa' nousingumu' lengita imiselelove nene ei' ve losa gelo neni' oko'nela inite' soto' iline' ma nene vo nadi' nadi' ilihe ninge minosa lite' lo lengita imiselelove lo giluve. 24 Ido' Guvelesi vemu' gele ele'vole' o nouvoni' nenako nemu' nene neni' nesi mo lite' lo lengita alosuve losa gele mu'musi' o nouve.

25 Ido' nenikisi gono doo monoli'mi lovou' makato' zege' zege' ogo minusive leze zuho lengi' imiselikevo ogo nasahili' o-nedo minaa' ive Epahalodito' nene naza lengita tine' molo vilido' o neive lo gelosa gohi lengita imiselelesa nouve. 26 Nene nanitekumu' ve. Aza lengi' mukikumu' nene gohi ningelove lo lulou' huhu lo gelo miningu' nene aza inite' gize do miningumu' lingine gilangumu' nene gelosa gala muki' goloso nogilive. 27 Ee, lamineto' ei' nene mo inite' gize do helaato' mine molani'za O'moso'mo do u' izine' ve. Ido' ne'mine ine' nene eikovo' ne'mine o-damive. Nenikisi nene geni geho mino a'minemu' mulumo gelo nouvongu' mene gohi mulolo kalolo' ogo mulumo gele-daline losa O'moso'mo nenikisi nene do nu' izive. 28 Ido' aza lengikumu' mulunou' huhu lo gelo mino lengikumu' gala muki' gelo minine' nenako nemu' nene lingine eze ningisa muludingu' lamine' gohi nigilavosa nezela mulumo minine' nene ngomo ilive lo gelo lengita imiselelongumu' lu'ne nene amuzo molo otavo imiselelesa nouve. 29 Ne'mine olosuze. Lengi' nene Izesu' Kilisito' zuholiti sunolo' e'meti longolize naba izi minisa ele'mize lamine' ilo. Lingine nene ne'mine vemu' gilavoo dizosa minelido' o neive. 30 Ido' ezemu' nene lingine gilavoo dizosa minelido' o neive noluvoni' nene nemu' noluve. Aza nene lengito' medelo mino neni' nene nasahili' o-nedelove loosa ei' minevo' alevo've hulo labuluvo ogo Kilisito' gono've hize ele' ogo miningu' nene hilinguti' hakaave.

Copyright information for `ASO