Philippians 3

Okode Losuvo'mi Initeto' Gele Medelamo Mino O'moso'mi Sikalahuli'mo Hize Ele' O-lididi'mo O'moso Gubi' Ize Emo Izesu' Kilisito'ni Do Hozi Lo-daa' Nounive Netevo' Nene O'moso'mi Noso Do None' Nenako O'moso'mi Noso Molaakumu' Okodine Lolovo Hukilizave Laa' Avemu' Ehe' Igi Minilo Loo Paulo' Ei' Monovomu' Lo-ngimine' Gamazi

Neze zuhokizo, gamazi nene mo gize lengemekuvoni'za ma neine' nene lo-lengemeloze. Gililo. Guvelesi vemu' nene longolize iziisa nene minilo. Gomu' lo-lingimuvoni' gamazi gohi gize lengemaakumu' nene naza giluvo gosele' nebelamive. Ido' gohi gize lengemeloni' meve nene lengi' gopo aka vilizadoti' nene alete molo-lengedeline' nenako nemu' nene ti' lo nolo-lingimuve: Goloso gono daa' ave gulo ne'mine minavemu' nene ehe' igi minilo. Ee, Zuda veti monovolo' e'metisa O'moso'mi noso nomulube li Izesu' evenele lengi' okodine di goloso igi huki-lingidilisa laa' avemu' nene ehe' igi ningisa minilo. Ne'mine noluvoni' nene neemu' noluve. O'moso'mi noso gihile neve nene leli' okode losuvo'mi initeto' nene gele medelamuba asi O'moso'mi Sikalahu' ne'mo hize ele' o-lididi'mo O'moso gubi' ize emo Izesu' Kilisito'nimu' lolize izo mino ezelo' gele medele minaa' nounive netevo' nene do none. Okode losuvo'mi initeto' gele medelamuba neni' nene oko'ne losuvo'mi initeto' ma gele medelelove lo giluvodini a'mine gele medelelodo' o minine' inite' nene nenita ha neive. Ee, evene' malite gele medelelonido' o neine' inite' nene leli' okodela ma do none li gili nilizani' nene neni' ngivile' ogo ne'mine lani' inite' nene vai' do nouve. Ado' nemu' noluve: Naza nene soto' uvodoti' gamene seveni ogo vavo eitilo' nene O'moso'mi noso mili-nidi oko'ne lolovo huki hulani' ve. Ido' naza Isilaele' aleveuti' Benizamini' a'vopilemo' zuhouti' soto' uvoni' ve. Ee, ize'ne me'ne neni' gidasive nene Hebilaio' aleve minasine' nenako naza nene Hebilaio' ve gihile ne nouve. Ido' Mose' lou' gamazi'velo' e'mete gehepeve igi minaa' ave Halisaio' veti muliseu' vo gi'mizuve mino a'mine Halisaio' monokumu' gilingili ogo minuvodi'mo nene Izesu' evenele zuho goboni mala' mala' o-ngedaa' uvoni' ve. Mose' lou' gamazi've ne'mo ve lisihe' minilizave nete nene ne'mine ne'mine ilisaave lido' nene e'mete osu' lo naza nene a'mine lou' avuto' amo gamazi'ne nomine' minuvoni' ve. Ne'mine ve minuvoni'za a'mine ne'mine monovo nete nene di naba i-nidilizado' o neive lo giluvoni' initekumu' nene naza alinge' Kilisito' evenele lolo' ogosa ga'ne giluvoni' nene mo haza nite' gehepeve lili' ikeve. Ido' neevo' nomive. Naza Guve'nesi ve Izesu' Kilisito'nimu' ningo gelaa' ne'mo inite' muki' nene ngivile' gehepeve ogo inite' naba ve lo gelo inite' mata' mukikumu' nene giluvoo muki' nene haza nite' gehepeve lili' ikeve. Ee, inite' mata' mukikumu' nene giluvoo pipiza inite' gehepeve lili' ikevoo Kilisito'ni nene do ti' olongumu' ve loo inite' mata' muki' nene huluve. Ee, inite' mata' muki' huluvoni' nene Kilisito'ni do ti' ogo ezela mine molo minosa ve lisihe' lolo' oloni' nene lou' gamazilo' e'metosa nenitati' do soto' ogo lolo' olovoba asi Kilisito'nimu' gili ele'vole' iga' ave nene gili ele'vole' ikevosavo' nene O'moso'mo ve lisihe' lolo' o-ngedaa' neine' ne'mine ogo naza ezemu' gele ele'vole' okuvoo ve lisihe' lolo' o-nidivoo minelongumu' ve loo 10 ido' ezemu' ningo gelo hilinguti' otine' amuzo do neine' ne'mo nene nenitasi mine molo neivo mino aza gomu' mulumo alumo geni gehaa' ine' ma'mino nazasi nene makato' geho mino ido' eze hiline' monovo danava nene nenita minivo mino 11 nazasi helelonguti' ma otelodo' o minelongumu' ve losa inite' mata' muki' nene huluve.

Hozi Okulumoku' Minevo' Minevo' Oga' Nene Dalohe Loo Dalongumu' Nene Amuzo Molo Loti' Izo Novuze. Neni' Ogo Molo Uvodo' Nene Ne'metilizave Lo Paulo' Lo-ngimine' Gamazi

12 Ne'mine monovo nenita minelive lo noluvoni' nene nenita mudise minavo O'moso'mo mudise do lisihe' gehepeve o-nedavosa noluvoba asi Izesu' Kilisito' aza neni' do ti' ine' nene ne'mine monovo do mineline losa do ti' o-nidine' nenako nemu' nene a'mine luvoni' monovo nene naza do ti' olosa a'minemu' amuzo molo do novuve. 13 Neze zuhokizo, a'mine inite' nene mo dokuve losa gele nouvoba asi inite' hamo' meve nene oga' nouve: Gomu' inite' mukikumu' nene mo hulo mehe'nela ogosa alinge' inite' ve'nela neine' inite' nene dalohe lo ahanga o do a'mida nene novo 14 O'moso'mo Izesu' Kilisitoda mine molo mino Okulumoku' hozi minevo' minevo' oga' iline lo elese molo-nidine' nene do gihile izo meni'ne ne'mine a'mine Okulumoku' minevo' minevo' oga' nene dalove losa daloni' makila nene amuzo molo loti' izo vo nouve. 15 Nemu' nene laza monoku' lodive ogo nonive nete nene idise luvoni' gamazi menemu' nene hamo' gatevo' gelelone. Ido' lengikuti' malite gatine atoli'mine ma gililizani' nene a'minemukisi nene O'moso'mo do lisihe' ogo lengelebizeleseive. 16 Ne'mine oloseine'za laza monoku' mo gele none' gamazi nene do gili' lo mino a'mine gamazi gehepevelokovo' nene e'meto ogo molo mine do dizelonido' o neive.

17 Neze zuhokizo, naza ogo molo oga' nouvodo' nene api'napi' igi mini leli' lengelebizuune' monovo ne'mido' e'meti igi mili minaa' avelo' nene ngamamaka mili ningi minisa nene a'mine'mine ilo. 18 Ne'mine ve nene ningi minisa nge'metilo noluvoni' nene neemu' noluve: Evene' muki' minani' neti monovo'inemu' nene mo gomu' gamene muki' lo-lingimuvoni' ve. Ido' idise nene mulumo'ine gelosa ve'ne novozo do'moze' moze' neivosa engi' monovomu' nene gohi ti' lo nolo-lingimuve: Ingine igi mili minaa' naani' monovo ne'mo nene Kilisito' lohoto' zalo' hiline' mono' mamu' nene biluva' lili' i-daa' naani' gele neive. 19 Ne'mine igi mili minadoti' gihile've soto' iline' nene vo tolovo oga' ne neive. Engi' O'moso'ine neve nene oko'ine'mo lanite' gelaa' neine' inite' mata' muki' nete nene lili' ikeve. Ingine ngovozo hililizado' o neine' initekumu' nene oko'ine di dizi mini lu'ine nene me misubou' initetokovo' mili minaa' nave. 20 Ido' Izesu' evenele leli' goto' numude nene Okulumoku' nenako ingine ne'mine igi minaa' naani' nene mo edamive. Ee, do lu' izelive Guvelesi ve Izesu' Kilisito' aza Okulumokuti' alingumu' nene gilingili ogo gizebo ogo none. 21 Ido' aline' nene inite' mata' muki' ezelo' do gelekele' o-ngedelido' o minine' amuzo've nedunu' nene idise mene nge lamine' misubou' okode nene do velepe' izo ei' oko'no atoli'mine ogo minine' ne'mine do otuho-ledeleseive.

Copyright information for `ASO