Revelation of John 1

Luhuvo Nite' Me'mi Monovo Gizosa No'noho' Gamazi Gizine' Gamazi

Gizeloni' gamazi mene O'moso'mo Izesu Kilisito'ni lo soto' ogo elebizine' initekumu' nene gizelouve. A'mine inite' elebizine' nene geto soto' ilido' o minine' initekumu' mene eze gonolo' ve ngelebizelive lo O'moso'mo elebizine' ve. Ne'mine ogavo aza leli' gililizave losa gonolo' ve neni' Zohane'ni nelebizelesa angelo've nenito' imiselo a'mine gamazi nene do soto' o-nidine' ve. Ido' a'mine do soto' o-nidine' inite' muki' ninguvoni' nene naza lo soto' ogo a'mine O'moso'mi gamazi Izesu Kilisito' hize ele' ogo lo soto' ido' nene naza hize ele' ogosa nogizuve. A'mine inite' soto' iline' gamene nene mo alite neine' nenako nemu' nene evene' ma a'mine O'moso'mi veleti' gamazi gizuvoni' mene gati ma li-ngimilizave nesi ido' gati li-ngimikevo gilisa a'mingu' gizuvoni' gamazilo' e'meti gili dalizave nesi nene O'moso'mo no'noho' ize-ngedeline' nenako nemu' nene ngolize izilizani' akalo' mini milalisave.

Zohane' naza Asia misubou' mini'mi monani' mono' mulise seveni lengi' nene luhuvo nite' mene nogize-lengedo ti' lo noluve: Idise mino gomukuti' mino mine do dize'mo alive ezelatikisi ido' aza gizebo o-ledo minaa' neine' mo'mosi've'mi velela minaa' nani' Sikalahu' seveni engitatikisi ido' Izesu Kilisito' ado' O'moso'mi gamazi lamine' lo soto' o-ledaa' ive ezelo' gele medelelonido' o minive gomu' molo-ledo hilinguti' oto minive ido' misubou' misubou' mini'mi monani' guve'inesi ve naba muki' engi' guve'inesi ve naba minive ezelatikisi nene ado' nasahili' oga' monovosi ido' hongu lo lamino minaa' monovosi nene lengita minivo.

Ado' lulo've leme neive ne'mo nene ei' vanise've hulo hilidoti' nene lihimete apase-ledo
ei' gizebou' lele'mize molo mo'mosite naba lemosa ei' O'moso've ado' ei' melehinemu' opo'ni lo inite' lehize-daa' olonive lolo' o-lidive eita nene guvele minivo gizebo o-ledeline' amuzo've nene minevo' minevo' ogo mine do dizo minelive. Mo ne'mino miniliho.

Me gililo. Limuso avilelo' nene alosa neive.
Ido' aline' nene evene' muki' nete ve'inedunu' ningilisave.
Ado' bilii losonou' hizi ngolosave inginesi nene ningilisave.
Ido' misubou' misubou' mini'mi monani' evene' zuho ato ato' muki' ingine
eikumu' nene agae agae li ive nama igi minilisave.
Neve nene mo lamine' ve. Mo ne'mino soto' iliho.

Guvelesi ve O'moso ado' inite' mukito' gizebo ve minaa' amuzo'vesi minive idise mino gomukuti' mino mine do dize'mo alive ne'mo nene ti' lo nolive: Neni' nene inite' mata' muki' minamangu' gomu' molo mino alinge' ma osu' lilizani' nene naza ha minevo' minevo' ogo minelove nene nouve.

Kilisito' Ato' Oko'nosi Mino Zohane'ni Soto' O Emo Emeni Dameni'vemu' Lo-emosa Ningeline' Inite' Bukuu' Gizezo Lo Lo-imine' Initekumu' Gizine' Gamazi

Lengi' zuho lengikisi maka' Izesuda gi'mize mino ei' gizebou' vo holo nonivo goboni mili-lidangu' mino mulumo geni ha ele'vole' ogo gehe'mo vo minaa' nounive Zohane' naza O'moso'mi gamazi lo soto' ogo Izesu' gamazi hize ele' ogo lo soto' ogo minuvongumu' nene lihime nimi ailani ma Patimosi ve laa' angu' nene mineline li nimiseli hulikevo vo minuvoni' ve. 10 A'mida minuvongu' nene Guvelesi ve'mi gamene ve lo holise' minaa' noune' gamene mau' nene O'moso'mi Sikalahu' ne'mo zatuho' o-nidivo nouvo mehe'nelati' pikuli nolo molaa' neine' ne'mino nolo nabauti' soto' ine' nene gamazi 11 ti' lo line' giluve: Gaza ningeline' inite' meve nene bukuu' gizosa Izesu' evenele mulise seveni ado' Eheso numuno ebetamukisi ido' Similina numuno ebetamukisi ido' Pelegamoni numuno ebetamukisi ido' Tiatila numuno ebetamukisi ido' Saladisi numuno ebetamukisi ido' Hiladelehia numuno ebetamukisi ido' Laodikia numuno ebetamukisi nene gizo hulo-ngedezo.

12 Ne'mine lavo naza a'mine ne'mine nolo molo gamazi lo-nimive nene ningelesa mine velepe' izuvoni' ve. Ne'mine ogo ninguvoni' nene ngolidunu' lili' ani' lamu seveni nene ningo 13 a'mine lamu neti vovo'ningu' nene evene' oko'nosi minive ma ninguve. A'mine ve'mi genegana've nene ha'na ha'na gizenelo' leme pele minine' nene ngolo mino losonolo' nene ngolidunu' lili' ani' inite' leti ne'mine izekine' minine' ve. 14 Ido' godolo zopovo nene mokono' hego gehepeve elo minavo vele gulo nesi nene olo' gulumo ne'minosa minine' ve. 15 Gizene've nene ngoli gele vine' inite' oloku' gizi di lamine' ikevo ve'ne ve'ne elo minaa' neine' ne'mino ve'ne ve'ne elo minine' ve. Ido' nolo've nene noso naba'mi gugu ne'minosa minine' ve. 16 Ido' ana zamela nene sonohi' seveni ne'mine do minine' ve. Ido' veleuti' nene bainati mite' velela ge'no mehenela ge'no gohe goloso minine' nene omo hetele minivo golo vele nene ho' amuzo molo silingenge'ne hulaa' neine' ne'mine labana' nene soto' ogo minine' ve.

17 Ne'mine ogo neivo naza ningo gizeneu' lemo pou' lo ongo hiluve ne'mine gelo minuvoni' ve. Ne'mine ogo nouvo ana zame nedunu' nene oko'nelo' nodo gelo ti' lo line' ve: Gaza golise gelamozo. Naza nene inite' mata' muki' minamangu' gana' minuve alinge' osu' ma lilizangu' nesi nene ha minevo' minevo' ogo minelove nene nouve. 18 Minevo' minevo' oga' nemeni damenisi nene nouve. Gomu' nene naza hiluvoni'za aizo, idise nene naza gohi ve'ne gizo minevo' minevo' ogovo' nouve. Ido' neni' neve nene hili vilizangumu' akahe si'zaa' kii' nesi ido' hilisa minani' ebekuti' oti vilizangumu' akahe si'zaa' kii' nesi nene nenikovo' do nouve. 19 Nemu' nene gaza ne'mine olosane. Gaza idise soto' o neine' initekisi ido' alinge' soto' olosa neine' initekisi nene ningelesange. A'mine inite' nene ningosa luhuvo gizezo. 20 Suno' minine' inite' ado' a'ne zamela nene sonohi' seveni do nouvo ningaine' ne'mi monovo nesi ido' ngolidunu' lili' ani' lamu seveni minine' ne'mi monovo nesi nene ne'mino neive: A'mine sonohi' seveni nene evene'ne mulise seveni neti angelo'nido' nene medeli avazaha ne'mine nene nizave. Ido' a'mine lamu seveni nene a'mine evene'ne mulise sevenilo' nene medeli avazaha ne'mine nene nizave.

Copyright information for `ASO