Revelation of John 11

Sipisipi Angale Ne'mo A'mine Buku'mi Nala've Laasi'a Apase Osu' Lavo Soto' Oka' Oka' Ine' Initekumu' Zohane' Gizingu' Nene O'moso'mi Gamazi Hizi Ele' Iga' Asive Ingine Gono'ine Di Pilikesivo nGibili Hilikevo Hiliisa Gohi Otikesivo Ningingumukisi Gizine' Gamazi Ve

Ido' neloti' gohi ma neve nene inite' maki milaa' ani' gavoso gonoukumu' minelive li milikani' angaba gavoso ne'mine ha'na ma nimii ti' li li-nimani' ve: Gaza oto vo a'mine gavosotunu' maki molo ningo O'moso'mo do ngu' izeli inite've ado' kekeize numu've nesi ido' a'mingu' alata've minine' nesi nene naba'ine do ningo ido' a'mingu' O'moso opo'ni li minaa' nave nesi nene naba'ine do ningezo. Ne'mine iline'za maki molalo ma nene si'mingala gesi vodo vodo ogo neine' nene maki molamosa asi a'midoti' lulou' vodo vodo ogo neine' gesi neloti' nene api' ogo maki molo hulo lulouko ogosa nene do ningezo. Ne nanitekumu' ve. A'mine makimi amiline noluvoni' ebe' nene O'mosomu' gilamave heta ato' velite di minilisave lo O'moso'mo gele ngemavo di mini O'moso'mi numuno ebe've nene lisi di goloso i'mi vi nizavo ike'ni foti tuu (42) ne'mine ogo voloseive. A'mine gameneu' nene neni' gamazi'ne hizi ele' ilisive seta' nene amuzo ngemekuvo a'mine gamene vanu tauseni tuu hadeti sigisiti (1,260) ne'mi lulou' nene alinge' mulumo soto' iline' nemu' evene' mulumo'ine gilisa ne'mi avazaha nene vene' gevonoliti genegana ne'minevo' ngili mini neni' ve'neuti' gamazi nene li soto' soto' igi minilisasive. A'mine ve seta' neve nene gomu' polohete Zekalia' line' oliva za setakisi ido' lamu livi' seta' misuboli'mi Guvelesi ve'mi velelo' minaa' nasive ma nene nizasive. Ido' engi' biluva'ine a'mine ve seta' do goloso o-ngedelone li ave muki' nene a'mine ve setalitisi ve'ninguti' olo' gulumo ne'mo nene lemo gize' vote-ngedaa' neive. Ee, engi' di goloso i-ngidilisa gililizave nene ne'minisa di goloso i-ngidikesivo ne'minisa hililizado' o neive. Ido' a'mine ve seta' nene O'moso'mi veleuti' gamazi li soto' soto' igi minilisine' gamenelo' nene golinesi izamilive li okulumota goline sisili di hulaa' amuzo nene di nizasive. Ido' nosomu' nene likesivo vanise nosovo' lolo' iline' amuzo nesi nene di mini ido' evene' ma di goloso i-ngidilisa gililisine' gamenelo' gamenelo' me misubou' evene' di goloso i-ngidilizani' inite' ato ato' muki' di soto' iga' amuzo nesi nene di nizasive. Ne'mine ilisine' amuzo di nizasine'za O'moso'mi gamazi hizi ele' ilisine' gono'ine di pililisine' nene hemuvosi nomine' galese ha'nauti' dizeline' loposo nite' ne'mo nene lovo do soto' ogo lovo o ngemo ngivile' ogosa ngebele heleleseive. Ne'mine ogavo a'mine hililisine' gonoso'ine nene ningi huli ngimikavo a'mine numuno ebe' naba'mi akau' nene gopo ingi minilisasive. A'mine numuno ebe' naba'mi emeni dameni goloso nene di soto' igi gulive Sodomilokisi ido' Aigitalokisi li mili laa' nave. A'mine numuno ebe' nene a'mine hilasive seta' netisi Guve'inesi ve lohoto' zalo' bilani' numuno ebe' ne neive. Ido' a'mine ve setalitisi gonoso'ine nene akau' gopo ingi nizasivo evene' zuho ato atokutikisi ido' no'ine ato atokutikisi ido' oko'ine ato atokutikisi nene gamene seto hamosi hapu ne'minesi nene gizevo gizi-ngidi minilisaha galeseu' mili-ngidilisa nene o've lilisave. 10 Ne'mine igisa me misubou' aleve ingine meve ma nene hilasive li ngolize naba'mine izi mini ngumo hiline' inite' nevo ve nene ge lehize-nede ne lehize-gede li minilisave. Nanitekumu' ve. A'mine polohete seta' netise lasine' gamazi ne'mo nene me misubou' aleve muki' lu'ine do goloso ogavo lu'ningu' geni bilivo minani' nenako neemu' nene ne'mine ani' ve. 11 Ne'mine igi nizavo gamene seto hamosi hapusi nene ogo vavo O'mosolati' sikalahu' gosoho' nene hilasiveu' ogo dizavo ingine upuho' igi oti pehe likesivo evene' ma ningave nene ngehelele goloso izine' ve. 12 Ne'mine neivo neloti' nene Okulumokuti' nolo naba ma soto' ine' nene engikumu' ti' lo nolivo gilasive: Melo' dizi alizo. Ne'mine lavo ingine nene Okulumokuko limusou' dizi vasine' ve. Ido' dizi nivasivo engi' biluva'ine nete ningi minani' ve. 13 A'mine gamenelo' gehepeve nene mimi' naba neivo a'mine numuno ebeku' numuno teni teni mini di vanguti' hamo hamo' nene nguti ingani' ve. A'mine mimi' ingu' nene evene' seveni tauseni (7,000) ne'mine nene ngebele gese' ogavo linge ha minave engita nene ngeme ngingi naba soto' ogavo Okulumoku' O'moso nene di naba i-di opo'ni lani' ve.

14 Agae, mulumo geni inite' naba seta' ma nene mo apasi vikesiha mulumo geni naba hamokovo' olihe soto' amine' ma nene mo nela geto soto' olosa neive.

Sipisipi Angale Ne'mo A'mine Buku'mi Nala've Laasi'a Apaso Osu' Lavo Soto' Oka' Oka' Ine' Initekumu' Luhuvo Zohane' Gizingu' Nene Pikuli Di Minani' Angelokuti' Naba Seveni Ne'mo Pikuli've Hubu Lo Do Nolo Molavo Soto' Ine' Initekumukisi Gizine' Gamazi

15 Neloti' nene angelo' naba seveni ne'mo nene pikuli've hubu lo do nolo molavo Okulumokuko no'ine naba vai' ma soto' ani' nete nene ti' li lani' ve:

Guvetesi ve O'mososi ido' ei' gono'vemu' noso molo-dive Kilisitokisi
me misubou' gizebo oga' gono nene engi' a'ningu' lemaani' ne'mo nene
gizebo oga' gono nene divi divi' igi nizasivo mo hukosi vamoloseive.
16 Ne'mine li likevo gizebo ve tuvedi fo'a (24) mo'mosi'ningu' O'moso'mi velela minave ingine nene limi go'ine hizi ingi O'moso di naba i-di opo'ni li 17 ti' li lani' ve:

Guvekasi ve O'moso amuzo mukili'mi meleho gozopotati' mine do ogo idisesi ha minanive
gaza amuzoka naba do ti' ogo api' ogo me misubou' gizebo ogo naningumu' nene
isaa' neve lo gopo'ni nolune.
18 Ee, geikumu' gilamave heta ato' ve neve nene geikumu' ngizebolo' molavo
gaza engikumu' gizebolo' molani' nene do soto' ogo lihime ngemo
hilavesi goni' o-ngedo
gei' gonou' veka polohetesi ido' gei' eveneka muki'
ado' evene' naba nizahe ngomo nizahe
geikumu' goliseka gili mini ge'meti minave muki' nesi nene meni'ine ngemo
me misubou' di goloso igi minave nesi do goloso o-ngedeline' gamene nene mo ogave.
19 Ne'mine likevo ma ninguvoni' nene O'moso'mi kekeize numu've Okulumokuko minine' nene gode neivo a'mine kekeize numu'veu' nene a'mine evene've lo huko-ngidine' gamazi milikani' bokisi nene soto' ogo minine' ve. Ne'mine ogo neivo a'mingu' nene go' pa'na pa'na ogo nolo nolo molo go' ngilili ngilili lo mimi' neivo osupo gihile ne'mo nene ato' ogo minine' ve.

Copyright information for `ASO