Revelation of John 13

A'mine Sata' Gele Vine' Loposo Nite' Ne'mo Loposo Nite' Gohi Seta' Ma Soto' Asine' Nene Amuzo nGemavo O'moso'mi Evenele Goboni Mili-ngidi Misubo Muki' Di Ti' Asine' Ningingumu' Ei' Zohane' Gizine' Gamazi

Ido' ne'mine ningosa gohi ma ninguvoni' nene guvo nosouti' loposo nite' ma dizo nohetelivo ninguve. A'mine loposo nite' nene godolo sevenisi komu've tenisi minine' ve. A'mine komu've hamo hamoto' nene guve'inesi velitevo' gihaa' ani' angili' geheka' geheka' ine' ve. Ido' godolo hamo hamoto' nene gulive goloso O'moso do'mo leme-daa' gulive gizika' gizika' ani' ve. Ido' a'mine loposo nite' ninguvoni' nene loposo pusi lepadi ne'mine oko'nosi mino gizene ana've nene loposo gaha naba' naba'mi gizene ana ne'minesi mino vele gavulo nene laioni gulo ne'mi vele gavulo ne'minesi minine' ve. A'mine loposo nite' nene a'mine sata' gele vine' loposo nite' naba ne'mo nene amuzo'vesi mo'mosi'vesi emosa eveneto' gizebo oga' amuzo naba nesi nene imine' ve. Ido' ma ninguvoni' nene a'mine loposo nite' pusi lepadi gele vine' ne'mi godolo seveni minanguti' hamo' ma neve nene bili hilikeni' giline'za a'mine bili hilani' huso've nene mo lamine' ogani' ve. Ne'mine ogavo misubo vaiku' minave nene ne'mine ingumu' nene vo'ine vavo gopo ga'ine gili mini a'mine loposo nite' nene e'metani' ve. Ne'mine igi a'mine loposo pusi nene amuzo imingumu' ve li a'mine sata' gele vine' loposo nite' nene opo'ni li gelekele' i-di mini ido' a'mine loposo pusi nesi opo'ni li ti' li lani' ve: Aizou, evene' hamolitesi a'mine loposo pusi nene lovo imi ivile' ilizado' minave nene ma nizamanako a'mine loposo niteto' nene lisihe' igi eze ne'mine minave nene ma nizamave.

Ne'mine ikevo a'mine loposo nite' ne'mo ei' oko'no do dizo O'moso do'mo leme-daa' gamazi lilingumu' nene O'moso'mo gele imine' ve. Ido' ike'ni foti tuu (42) ne'mi lulou' nene eveneto' gizebo ogo minaa' amuzo do mino ogo molo ilive lo nemukisi gele imine' ve Ne'mine ogavo aza api' ogo O'mosomu' gamazi goloso lo gulive've do'mo lemo minevo' alevo' oga' ine' numu'vesi ido' Okulumoku' minavesi nene dovo ledevo' o-ngedo minine' ve. Ido' O'moso'mi evenele zuho lovo o ngemo ngivile' ilingumu' nene O'moso'mo gele emo evene' zuho ato ato' misubo ato atoku' mini'mi monave no'ine ato atokisi oko'ine ato atokisi minavelo' nene gizebo ogo mineline' amuzo nesi nene imine' ve. Ne'mine ogavo me misubou' minivi' divi' igi nizani' aleve muki' nete a'mine loposo nite' nene opo'ni li gelekele' i-dilisave. Ado' sipisipi angale bili hilikevo neine' ne'mo do minine' bukuu' gulive'ine nene O'moso'mo olihe okulumo' misubo do soto' amine' gamenela gizamivo minamine' aleve muki' nete a'mine loposo nite' nene opo'ni li gelekele' i-dilisave. Ado' a'mine buku nene minevo' minevo' ngemeni dameni dalizaveti gulive'ine minaa' neine' bukumu' noluve.

Ido' gatine ngolo' live nii ma nene gamazi meve nene gililo:

10 Evene' ma ingine galapusolo' vilizado' o neivo ma nene mo galapusolo' vilizave.
Ido' evene' ma bainati mitetunu' ngibili hililizani' o neivo ma nene
mo a'mine evene' nene bainati mitetunu' ngibili hililizave.
Ado' ne'mine monovo soto' ilingu' nene O'moso'mi evenele nene ele'vole' igi mulumo geni gihi'mi vi mini Kilisito'ni huli-dami ezela ha gi'mizi minilizado' o neive.

11 Neloti' ma ninguvoni' nene loposo nite' gohi ma misubouti' dizo nohetelivo ninguve. A'mine loposo nite' nene sipisipi angaleliti komu'ine ne'mine setakisi minine' mino gamazi've line' nene sata' gili vani' loposo nite' naba gize'ine a'inesi minani' nete gamazi laa' nani' ne'minosa line' ve. 12 Ido' a'mine loposo nite' ne'mo nene gomu' soto' ine' loposo niteli'mi amuzo muki' nene do mino a'mine'mi velelo' nene a'mine amuzodunu' inite' mata' ogo molo minine' ve. Ne'mine ogo misubosi a'mingu' mini'mi monani' aleve mukikisi nene gana' soto' ine' loposo nite' ado' bili hilani' huso've mo lamine' ogavo minine' loposo nite' neve nene gelekele' i-di opo'ni li minilizave lo a'mine alinge' soto' ine' loposo inite' ne'mo nene zatuho' o-ngidine' ve. 13 Ne'mine ogo atoli'mine suno naba ato ato' do soto' ine' ve. Ido' a'mine atoli'mine suno do soto' ingu' nene ma ne'minesi do soto' ine' ve. Ado' aza logavo eveneliti ve'nido' nene Okulumokuti' olo' ne'mo misubola limine' ve. 14 Ido' O'moso'mo gele emavo gomu' loposo niteli'mi velelo' nene a'mine atoli'mine suno ato ato' do soto' ine' nedunu' nene misubou' aleve go'ine izo ngele'mize gopo ine' ve. Ne'mine ogo misubou' aleve lo-ngedavo ingine a'mine bainati mitetunu' bili hilikevo vele gizo minine' loposo nite' nene gubi' izi imi opo'ni lilizangumu' a'mine'mi avazaha soza o'moso nite' ma lili' ilizave lo-ngedavo lili' ani' ve. 15 Ne'mine ikevo a'mine loposo nite' ne'mo a'mine lili' ani' avazaha niteku' nene sikalahu' molo-delingumu' O'moso'mo gele imine' ve. A'mine gele imine' nene loposo nite' ne'mo avazaha nite' nene sikalahu' molo-davo a'mine avazaha nite' ne'mo gamazi losa evene' nene lo-ngedavo a'mine loposo niteli'mi avazaha nite' nene gelekele' i-di opo'ni ma lamilizave nene ngibili hililizangumu' ve lo O'moso'mo gele imine' ve. 16 Ne'mine ogavo a'mine loposo nite' ne'mo zatuho' o-ngedavo evene' muki' ado' evene' nabasi evene' ngomosi moni heneni vesi goho' gahalikisi evene' maliti gonou' ve lili' igi minavesi ido' angise'ine gono'ine daa' avesi muki' nene a'nine zamela nehe golihi'nido' nehe ne'mida nene maki mili-ngidani' ve. 17 Ido' ne'mine igi evene' ma ingine a'mine maki ado' a'mine loposo niteli'mi gulive've nehe a'mine gulive've'mi naba've nehe neuti' ma damilizave nete nene inite' mata' meni hizilizangumukisi ido' maketi milalizangumukisi nene gili ngimami mo o'ove li-ngidani' ve. 18 A'mine maki ne'mi monovomu' nene gili vevesi gililizado' o neive. A'mine naba nene evene' mali'mi gulivemu' lo molo noluvonaze. Gatine gili vevesaa' ave ma nii ma nene a'mine naba nene gati luhuvo've hamo hamo' di nubo ika' ika' igisa a'mine loposo niteli'mi gulive nene di ningi gati gililisave. A'mine naba've nene sigisi sigisi sigisi (666) ne neive.

Copyright information for `ASO