Revelation of John 14

O'moso'mi Evenele Vanu Hadeti Foti Fo Tauseni (144,000) Nete Okulumoku' Nama Gosoho' Bili Mili Nilavo Gilingumukisi Ido' Engi' Monovo'inemukisi Gizine' Gamazi

Neloti' ma ninguvoni' nene sipisipi angale nene Zaioni gololo' ote neivo ninguve. Ido' ezesi maka' nene evene' vanu hadeti foti fo tauseni (144,000) minani' ve. Ido' a'mine eveneliti golihi'nido' nene sipisipi angale'mi gulivesi ido' melehi gulivesi gizikavo minani' ve. Ido' neloti' nene Okulumokuti' nolo naba ma soto' ine' nene giluve. A'mine nolo nene noso naba'mi gugu ne'minosa mino ido' go' ngilili naba'mi gugu ne'minosa minine' ve. Ee, a'mine nolo giluvoni' nene evene' mukilite ngita bili minaa' naani' ne'minosa minine' ve. Ido' a'mine ninguvoni' aleve nete nene ado' O'moso'mi mo'mosi've'mi velelasi ido' ele'vole' igi ve'inesi ha minaa' nani' inite' seta've seta'veti ve'nidokisi ido' gizebo veti ve'nidokisi mini nama gosoho' nene bili mili lani' ve. A'mine nama nene evene' malitesi ngeli gili lamilizado' o minine' ve. Asi a'mine evene' vanu hadeti foti fo tauseni (144,000) ado' misubou' aleveuti' Guvelesi ve'mo meni hizo do eita ine' aleve engi' netevo' nene gili lilizado' o minine' ve. Ingine vene' damave minani' nenako ne'mo nene vene' alusi monovo goloso igi engi' lu'ine di goloso ma amave nene minani' ve. Ido' ingine nene sipisipi angale'mo vida ada iga' ave nene nizave. Ido' engi' neve nene misubou' aleve mukikuti' gomu' mili O'moso'mi evenelesi ido' sipisipi angale'mi evenelesi lili' ilizangumu' sipisipi angale ne'mo meni hizo do eita ine' aleve nene nizave. Ido' engi' ve'ninguti' nene soza gamazi hamokisi ma lamani' ve. Ee, lihime dikeve gamazi ne'minesi nene engi' oko'nido' ma dizamine' minani' ve.

Angelo' Seto Hamo Soto' Igisa O'moso'mi Golise've Gili Minilizangumukisi Ido' Evene' Naba Kilisito'ni Biluva' I-daa' Ave Limi Ingangumukisi Ido' Loposo Nite' E'metaa' Ave O'moso'mo Lihime Mo nGemelesa Neingumukisi Lani' Gamazi Zohane' Gizine'

Ido' neloti' ma ninguvoni' nene angelo' gohi ma okulumo' veleta oluso' gehepeve hozene patelo nomonivo ninguve. Aza nene misubou' minave ado' misubo'ine ato atoku' evene' zuho ato ato' no'ine ato atokisi oko'ine ato atokisi minave muki' nene ado' minevo' minevo' iline' gamazi lamine' aza lo-ngemeline' gamazi nene do vo nolo nabauti' ti' lo lo-ngimine' ve: O'moso'mo evene' goni' o-ngedo lihime ngemeline' gamene nene mo ogaze. Lingine nene O'moso'mi golise've gili mini di naba i-di mini a'mine Okulumokisi misubosi ido' guvo nososi ido' noso hinipini' mukikisi do soto' ive nene gelekele' i-di opo'ni li minilo.

Ne'mine ogavo angelo' gohi ma naba tuu ne'mo e'meto ogo ti' lo line' ve: Amuzo veti numuno ebe' dizo minine' Babelonia neve nene mo sime' nave. Ee, ado' pasidia' alu nete vemoho' ngimimise' igi vaini noso ngimaa' nani' ne'mino a'mine aleve nene O'moso izebolo' molaline' monovo di soto' igi evene' zuho ato ato' muki' nene engi' monovo'ine golosolo' nene ngimimise' igi apizi ngimaa' aveti numuno ebe'ine Babelonia neve nene mo sime' nave.

Neloti' nene angelo' gohi ma naba tili ne'mo nene gomu' angelo' seta' ma nene nge'meto ogo nolo nabauti' ti' lo line' ve: Evene' ma ingine a'mine loposo nitekisi a'mine'mi avazaha'velokisi gelekele' i-di opo'ni li mini a'mine loposo niteli'mi maki've golihi'nido' nehe a'nido' nehe ne'mida ma di nizani' noline' nene 10 O'moso'mo lihime'inemu' izebolo' molangumu' lihime ngemeline' inite' nene amuzo malehe vaini noso haza nososi di gopo amani' ne'mine nene neive. A'mine vaini noso nene O'moso'mi izebolo' nenako mo ngemavo nalisave. Ee, O'moso'mi angeloliti ve'nidokisi sipisipi angale'mi velelokisi nene salfa gehenilo' olo' ahu' goloso lo mineline' oloku' nene mulumo alumo gili minilisave. 11 Ee, a'mine loposo nitetokisi ido' a'mine'mi avazahalokisi gelekele' i-di opo'ni li a'mine loposo niteli'mi maki ado' gulive've'mi luhuvo've ma dalizave mukita nene gamene gamene go' liliha liti'muso izeliha mulumo nene matamivo minii mo mini gilamilisave. Ee, mo a'mine oloku' mini mulumo alumo gilivi' gilivi' igivo' minilizadi'mo sokile've nesi dizeline' nene mo huko vamivo mo dizevo dizevo' ogovo' mineleseive. 12 Ne'mine oloseinako O'moso'mi evenele ado' O'moso'mo lo huko line' gamazilo' e'meti Izesu'nimu' gili ele'vole' igi minaa' nani' alevela nene ne'mine monovo soto' o-ngedalize. Ingine O'moso'mo lo huko line' gamazilo' e'meti Izesu'nimu' gili ele'vole' igi minaa' naani' monovo'ine nene hulami a'mine ne'mine angumu' mulumo alumo geni nite' soto' o-ngedeline' nene ele'vole' igi ha gihi'mi vi minilizado' o neive.

13 Neloti' nene Okulumokuti' nolo ma soto' ogo ti' lo nolivo giluve: Gamazi ti' lo gizezo: Idise meloti' evene' ma ingine Guvelesi ve huli-dami eita ha gi'mizi mini hili vika' vika' ilizave nene mo ngolize izi lamini miniliza akalo' mini mili nizave. Ne'mine lavo O'moso'mi Sikalahu' ne'mo nene mo lamine' ve losa ti' lo line' ve: Engi' igi mili minaa' ani' monovo'ine'mi gihile've nesi nene engikisi maka' vo heteleline' nenako nemu' nene lihitehe' gono daa' ani' ma nene gohi dami ha mini gilivo' minilisave.

O'moso'mo Lihime nGemeline' Avazaha Nene Ve Setalitise Misubouko Noso' Nite' Nidolizasivo Ningingumu' Zohane' Gizine' Gamazi

14 Ne'mine ogo gohi ma ve'nela mene ninguvoni' nene limuso mokonoto' nene evene' gihile ne'mine gele vine' ma mito' neivo ninguve. A'mine ve nene ngolidunu' lili' ani' kuvanadi angili' nene godololo' geheko anau' nene noso' nite' dolizaa' mite' gohe goloso nene do neivo ninguve. 15 Ido' angelo' gohi ma neve nene O'moso'mi kekeize numu'veuti' leme heta ogo nolo nabauti' limuso mokonoto' minivemu' nene vise lo ti' lo lo-dine' ve: Misubouko minamuno nene o molavo dolizaa' gamene nene mo ogaze. Miteka nene hulo gonou' ogo noso' nite' nene mo dolizezo. 16 Lavo a'mine limusolo' minive ne'mo a'mine mite've ma nene hulo gonou' ogo misubou' noso' nite' nene dolizine' ve.

17 Ido' angelo' gohi ma nene Okulumoku' O'moso'mi kekeize numu'veu' mininguti' leme heta ine' nene azasi nene noso' nite' dolizaa' mite' gohe goloso nene ma do minine' ve. 18 Ido' angelo' mo gohi ma ado' oloto' gizebo o minive nene O'moso'mi alata maukoti' leme heta ogo a'mine gohe mite' do minine' angelo' nemu' nene nolo nabauti' ti' lo lo-dine' ve: Misubouko vaini mingu' vaini gihile nene mo gaize' naba igi lodive ikeze. Gaza gohe miteka nene hulo gonou' ogo huko do nubo ozo. 19 Ne'mine lavo a'mine angelo' ne'mo mite've nene misubouko hulo gonou' ogo a'mine vaini gihile nene huko do nubo ine' ve. Ne'mine ogosa a'mine vaini gihile lipaa' ani' inite' naba ado' O'moso'mo izebolo' molangumu' lihime ngemeline' inite' nabau' nene huline' ve. 20 Ne'mine ogavo a'mine vaini gihile nene numuno ebe' naba'mi heta nene lisi piliki' izikevo vanise vai' goloso nene a'mine novozo lemaa' ine' bokisiuti' nene leme heta ine' ve. A'mine vanise neve nene noso ne'minosa lomo vine' nene vanu hadeti eiti fo (184) maili (tu hadeti naidi sigisi (296) kilomita) ne'mine nene lomo vo minosa ohuno've nene evenekisi do su'mize-ngedelido' o minine' ve.

Copyright information for `ASO