Revelation of John 16

Angelo' Seveni Nete O'moso'mo Evene' Lihime nGemeline' Inite' Goloso Lapese'ningu' Lapese'ningu' Di Minani' Nene Huli Misubouko Ika' Ika' Navo Soto' Oka' Oka' Ine' Inite' Ningingumu' Zohane' Gizine' Gamazi

Ido' ma giluvoni' nene O'moso'mi kekeize numu'veuti' nene nolo naba ma soto' ogo angelo' seveni engikumu' nene ti' lo nolivo giluve: Lingine vi O'moso'mo evene' lihime'inemu' izebolo' molangumu' lihime ngemeline' inite' ado' lapesetingu' lapesetingu' neine' ma nene lepi huli misubouko ilo.

Ne'mine lavo angelo' naba vanu ne'mo vo ei' lapese'veu' minine' inite' goloso nene lepe hulo misubouko ine' ve. Ne'mine ogavo evene' ma ingine loposo niteli'mi maki've di mini a'mine loposo niteli'mi avazahalo' gubi' izi imi opo'ni li minaa' aveti oko'nido' nene huso goloso galasa gehepeve nene izeka' izeka' o'mo vine' ve.

Neloti' nene angelo' naba tuu ne'mo vo ei' lapese'veu' minine' inite' goloso ma nene lepe hulo guvo nosou' ogavo a'mine guvo noso nene evene' hilaveti vanise'ine ne'mine lolo' ogavo a'mingu' ve'inesi minaa' ani' inite' muki' nene hili gese' ani' ve.

Ido' neloti' angelo' naba tili ne'mo vo ei' lapese'veu' minine' inite' goloso ma nene lepe hulo noso naba' nabaukisi hinipini' noso ngomo ngamaukisi ogavo vanise gehepeve lolo' ine' ve. Ne'mine ogavo noso mukito' gizebo oga' ine' angelo' ne'mo nene ti' lo nolivo giluve:

Gaza gomukuti' mino idisesi ha nanive
ado' gemeni damenika lisihe' lamine' gehepevesi minanive neke
ne'mino lihime nongemaine' nene mo monovo lisihe' ogo molo nane.
Naza ne'mine noluvoni' nene nanitekumu' ve.
Ingine a'mine vanise noso nongemanive engi' nene
gei' polohetesi gei' eveneka lingesi ngibili hilikevo vanise'ine lepani' nenako
a'mido' golo hizo vanise noso nalizave lo nongemane.
Ee, engi' ne'mine noo-ngedaine' nene
mo ne'mine o-ngedelinido' lisihe' i nizani' nenako
mo lamine' ne'mine noo-ngedane.
Ido' neloti' ma giluvoni' nene alata ne'mo ti' lo nolivo giluve:

Ee, Guvekasi ve O'moso amuzo malehe mo lamineto' nolive.
Gaza lihime ngemaa' naine' nene
mo monovo gihile lisihetokovo' do molosa ngemaa' nane.
Ido' neloti' nene angelo' naba fo ne'mo vo ei' lapese'veu' minine' inite' goloso nene lepe hulo hoku' ogavo ho' ne'mo olo' ahu' loosa evene' oko'nido' honopono' minelive lo O'moso'mo ho' nene gele imine' ve. Ne'mine ogavo evene' oko'nido' nene holi'mi olo' ahu've ne'mo lo'vote-ngedavo ingine nene ne'mino evene' do goloso o-ngedeline' amuzo'vesi minive O'moso'mi gulive nene divi ledivi' igi mini lu'ine di velepe' izi lihime'ine hulami O'moso di naba i-damani' ve.

10 Ido' neloti' nene angelo' naba faef ne'mo vo ei' lapese'veu' minine' inite' goloso nene lepe hulo loposo niteli'mo gizebo o-ngedo minaa' ine' mo'mosi'velo' nene ogavo a'mine gizebo o-ngedo minaa' ine' alevetida nene liti'muso naba izine' ve. Ne'mine ogavo evene' ingine mulumo giladi'mo ve'ine nahuno nene ingihi mata' mata' izi minii 11 ado' huso'ine golosouti' mulumo neivo mulumo gilani' ne'mo nene Okulumoku' O'moso nene divi ledivika li-di mini lu'ine di velepe' izami igi mili iga' ani' inite' goloso'ine nene mo hulamani' ve.

12 Ido' neloti' nene angelo' naba sigisi ne'mo vo ei' lapese'veu' minine' inite' goloso nene lepe hulo Zupalati noso nabau' ogavo a'mine noso naba nene ho' dizaa' idati' guve'inesi ve naba alizani' aka'ine nene do va'va' o-ngedo goko' line' ve. 13 Ido' ne'mine ogavo ma ninguvoni' nene sata' naba gele vine' loposo niteli'mi veleutikisi ezeloti' soto' ine' loposo niteli'mi veleutikisi ido' soza polohete ma minidi'mi veleutikisi nene sikalahu' goloso seto hamo ado' gizele' gili vanikovo' nene limi heta ani' ve. 14 A'mine sikalahu' goloso nene ve goloso'mi zuhouti' mini engi' amuzo'ine ngelebizi ato ato' suno di soto' igi misubou' misubou' evene' zuho ato ato' ngamani'ine ato atokisi mini'mi monadaa monadaa nene vani' ve. Ido' a'mine gizele' gili vani' sikalahu' goloso ne'mine igi vani' nene amuzo malehe O'moso'mo lihime ngemo ngebelelesa iline' gamene ado' gamene nabala nene a'midati' a'midati' guve'inesi ve naba nete nene lovo i imilizangumu' ve li di nubuho i-ngidilisa vani' ve.

15 Ido' Guvelesi ve'mo ti' lo nolive: Gililo. Naza nene guminelo' ve alive li gilamado' oga' neine' ne'mino alosuve. Evene' ma ingine laza a'mine gameneu' nene geneganate vise' ogo baka' nomonunivo evene' ningikevo lovozo helalone li ehe' igi mini genegana'nido' gizebo lamine' igi minilizave nene ngolize izilizado' mini mili minilisave.

16 Ne'mine igi a'mine sikalahu' goloso nete a'mine vi di nubo i-ngidave nene ngele'mizi ebe' ma gulive Zuda veti gamazi'ninguti' Halamagedoni ve laa' naada nene di nubo i-ngidani' ve.

17 Ne'mine ikevo angelo' naba seveni ne'mo ei' lapese'veu' minine' inite' goloso nene lepe hulo aka'vozene hepe' monaa' ido' ogavo O'moso'mi kekeize numu'veu' mo'mosi'velati' nene nolo naba ma soto' ogo ti' lo line' ve: Me gono osu' noline' gamene've nene mo ogo novive. 18 Ne'mine lavo a'mido' nene go' pa'na pa'na ogo nolo nolo molo go' ngilili ngilili nolo mimi' naba ma ine' nene mo naba goloso ive. Evene' me misubou' api' ogo soto' ogo mine do dizo idiselasi nonido' nene a'mine mimi' naba goloso ne'mine nene ma amine' ve. 19 Ne'mine ogavo ne'mo numuno ebe' naba nene ho'lo seto hamo neivo ido' evene' zuho ato atoliti numuno ebe'ine mini'mi monani' nesi nene sime' nani' ve. Ee, O'moso'mo numuno ebe' naba dizo minine' Babelonia nemu' nene ha gele mino lihime'inemu' izebolo' goloso molangumu' lihime ngemaa' neine' inite' goloso vaini noso ne'mine nene minine' nenako a'mine izebolo' vaini noso nene nalizave lo Babelonia numuno ebeku' aleve ngimine' ve. 20 Ido' ailani muki' nene vi haha ikevo golosi nene limi ingi osu' li gohi ma minamavo ningamani' ve. 21 Ne'mine ogavo okulumokuti' nene osupo gihile naba' naba ado' gihile hamo hamoli'mo geni've vanu hadeti (100) pauni (foti faef kilo (45Kg)) ne'mine mineka' mineka' ine' nene eveneto' limi'mi vani' ve. Ne'mine neivo a'mine nene inite' goloso gehepeve soto' o-ngidine' nenako a'mine osupo gihile eveneto' di'mozi' mozi' ani' nemu' nene a'mine aleve ingine O'moso divi ledivika li-dani' ve.

Copyright information for `ASO