Revelation of John 19

Babelonia Numuno Ebe' Sime' Nangumu' Evene' Vai' nGolize Izi Lani' Gamazi Zohane' Gelosa Gizine' Gamazi

Neloti' gohi ma giluvoni' Okulumoku' nene evene' vai' golosolite gamazi nilani' no'ine naba ne'mine giluvoni' nene ti' li nilavo giluve:

O'moso opo'ni nolune.
A'mine O'mosote neve nene leli' do lu' izaa' ive mino
Guvelesi naba mino amuzo ve neive.
Ido' O'moso opo'ni ne'mino nolune' nene a'mine pasidia' vene' naba ne'mo monovo golosolo' monaa' idi'mo
misubo mukiku' aleve ngele'mize goloso ine' vene' nene
O'moso'mo goni' o-do ei' gonou' ve've ngebele helavo
vanise'ine lepani' malo' nene golo hizo lihime imine' nenako
nemu' nene aza lihime ngemaa' neine' nene
mo monovo lisihetokovo' do molosa ngemaa' neive lo opo'ni nolune.
Ne'mine li gohi vise li ti' li lani' ve:

A'mine numuno ebe' Babelonia nene mudise lihime eme osu' noline' nenako
olo' noline' sokile neve nene
osukisi lamo sokile dizevo' dizevo' ogo mineline' nemu' nene
O'moso opo'ni nolune.
Ne'mine likevo gizebo ve tuvedi fo'a minani' nesi ido' ele'vole' igi ve'inesi ha minaa' nani' inite' seta've seta've nesi nene limi go'ine hizi ingi mo'mosi'velo' minive O'moso opo'ni li ti' li lani' ve:

Mo ne'mino miniliho lo O'moso opo'ni nolune.
Ne'mine likevo nolo ma nene O'moso'mi mo'mosi'velati' soto' ogo ti' lo line' ve:

Lingine leli' O'moso'mi gonolo' ve
ado' eikumu' golise've gilaa' ave
evene' ngomo' naba' mukito' nene
O'mosote opo'ni lilo.

Vene' Di Oko'nida Ilisa Ikevo Noso' Nite' Nalisa nGolize Izaa' Nani' Ne'mino Sipisipi Angale Ne'mo Eze Zuho Do Eita Ogo Gizebo O-ngedelesa Neivo Noso' Niteto' Di Nubuho Ilisa Navo Lani' Gamazi Zohane' Gizine'

Ne'mine lavo ma giluvoni' nene evene' vai' golosoliti no'ine ne'mine gele vine' ido' noso nabali'mi nolo ne'mine gele vine' ido' go' ngilili amuzo molo laa' neine' ne'mino nolo ma molani' nene ti' lo livo giluve:

Guvetesi ve O'mosote amuzo ve ne'mo nene
evene'velo' api' ogo gizebo neine'
nemu' nene opo'ni nolune.
Sipisipi angale ne'mo eze zuho do eita iline' gamene mo ogavo
a'mine eze zuho mulise neve nene eita volone li elenaho ne'mini
gonolise igi di nene igi nizani' nenako
nemu' nene laza muhele' ahele' amo lolize naba goloso izo mino
O'moso do naba o-duke'zo.
Ido' a'mine vene' nene
lavolavo mokono' guluvi' lamine' goloso lo minine' nene
do oko'nolo' ngolalive lo O'moso'mo gele imine' ve.
A'mine lavolavo lamine' ve lani' nene O'moso'mi evenelelite igi mili ani' inite' lisihe' lamine' malo' nene li milisa lani' ve.

Ido' neloti' nene angelo' ne'mo gohi ti' lo lo-nimive: Gaza luhuvo ti' lo gizezo: Ve ma ingine a'mine sipisipi angale'mo vene've ne'mini evenele minave do eita olosa neingumu' noso' nite' nalizada alizave lo elese molo-ngede nolive nene mo mine lamine' ilizani' akalo' nizani' nenako nemu' nene mo ngolize izilizado' nizave. Ne'mine lo imine' molo gohi ma ti' lo lo-nimive: Mene noluvoni' gamazi nene mo O'moso'mi gamazi gihile ne neive. 10 Ne'mine lo-nemavo naza nene opo'ni lo do naba o-delove lo gizeneuko lemo go'ne hizo unguvoni'za aza nene ti' lo lo-nimive: Naza nene haza O'moso'mi gonolo' ve gei' ne'mino minuve gei' zuho gehepeve ado' Izesu' gamazi've di mini hizi ele' iga' ave lengikuti' ne nouze. Gaza ne'mine o-nedamo asi O'mosovo' nene opo'ni lo do naba o-dezo. Mene noluvoni' nene nanitekumu' ve. O'moso'mi veleti' gamazi li soto' iga' ave muki' nete nene Izesu' gamazi'vevo' hizi ele' iga' naanako nemu' nene noluve.

Okulumoku' Mokono' Hosilo' Minine' Guvelesi Ve Naba Ne'mo Nene Loposo Nitekisi A'mine Loposo Niteli'mi Zuhosi nGivile' Ogo Loposo Nitekisi Soza Polohete'vesi Ololi'mo Noso Ohuno Ne'mino Miningu' Do Hulo-ngedosa nGe'metave Muki' Nene nGebele Gese' Neivo Ningingumu' Zohane' Gizine' Gamazi

11 Ne'mine lavo ve'nela mene gohi ma ninguvoni' Okulumo' nene gode neivo a'mingu' nene mokono' hosi ma ninguve. A'mine hosilo' evene' ma minine' ne'mi gulive nene Monovo Gihilevo' Ogo Molo Ogo Gamazi've Do Gihile Izaakovo' Oga' Ive ve lo minine' ve. Aza nene goni' gelo lihime ngemo lovo do soto' oga' neine' nene mo monovo lisihe' laminetokovo' do molosa oga' neive. 12 Ido' vele gulo neve nene olo' gulumo ne'mino neivo ido' godololo' nene guve'inesi veti angili' nene muki' gehe minine' ve. Ido' eito' nene gulive've ma gizikavoo minine' nene evene' malitesi gilamavoo eikovo' gele minine' ve. 13 Ido' oko'nolo' inite' ngolo minine' neve nene vaniseu' lupizikani' lavolavo do ngolosa minine' ve. Ido' gulive've neve nene O'moso'mi Gamazi've ve lo minine' ve. 14 Ne'mino neivo Okulumoku' minani' ami nene oko'nido' inite' ado' lavolavo mokono' lamine' goloso guluvi' gehepeve neve nene ngilisa inginesi mokono' hosilo' mini e'meti vani' ve. 15 Ido' evene' zuho ato ato' O'mosomu' gilamaa' nave nene ngebelelingumu' bainati mite' gohe goloso o minine' nene veleuti' omo hetele minine' ve. Aza nene ainidunu' lili' ani' gavoso do minosa a'mine O'mosomu' gilamaa' nave nene amuzo molo gizebo o-ngedo mino a'mine mokono' hosilo' minive ne'mo nene O'moso amuzo ve minive ne'mo evene' lihime'inemu' izebolo' molangumu' nene vaini noso lili' ilisa evenelite vaini gihile lisi piliki' izaa' naani' ne'mino nene lihime ngemo do goloso o-ngedeleseive. 16 Ido' oko'nolo' izekine' initetokisi amasuvololasi nene gulive've ne'mine li gizikani' minine' ve: Guve'inesi Veti Guve'inesi Ve Ido' Ve Naba' Nabaliti Ve Naba'ine ve li gizikani' ve.

17 Ido' angelo' hamo' gohi ma ninguvoni' nene hoku' ote neivo ninguve. A'mine angelo' ne'mo nene nolo nabauti' okulumoto' hoze pateli moni minani' nama mukikumu' nene ti' lo nolo-ngimivo giluve: O'moso'mo do soto' o-lengedeline' noso' nite' nabala mene igi di gese' ilo. 18 Igi di gese' ilizani' nene guve'inesi veti gonoso me'mele nehe amiliti gizebo ve nabaliti me'mele nehe amuzo veliti me'mele nehe hosi izeliti me'mele nehe a'mine hosilo' monaa' ani' amiliti me'mele nehe ido' evene' ngomo' naba' ado' angise'ine gono'ine daa' ave nizahe ido' evene' maliti gonou' daa' ave nizahe mo muki' ngomo' naba' neti me'mele'ine nalizangumu' nene igi di gese' ilo. 19 Ne'mine lavo gohi ma ninguvoni' nene a'mine gomu' ninguvoni' loposo nite' masi ido' misubou' misubou' guve'inesi ve naba' naba' nesi ido' engi' lovo hizaa' ani' ami'inesi nete nene a'mine mokono' hosilo' minivesi ido' ezesi maka' minani' ami'vesi nene lovo i-ngimilisa di nubo naavo ninguve. 20 Ne'mine igi mo lovo hizikeni' neine'za loposo nite' nesi ido' ezelo' medelo ato' suno do soto' oga' idi'mo evene' a'mine loposo niteli'mi maki've di mini avazaha'velokisi gubi' izi imi opo'ni laa' ave ngele'mize gopo ive soza polohete nesi nene ngivile' igisa di-ngidani' ve. A'mine ve seta' nene diisa ve'inesi haza nizasivo salfa gehenilo' olo' lo mino noso ohuno ne'mino molo miningu' nene di huli-ngidani' ve. 21 Ido' a'mine loposo niteli'mi zuho linge muki' nene a'mine mokono' hosilo' minive ne'mo nene veleuti' omo hetele minine' bainati mite' nedunu' nene ngebele gese' ogo osu' lavo me'mele'ine nene a'mine nama muki' mate nivi' nivi' igi gatu'ine gehepeve ani' ve.

Copyright information for `ASO