Revelation of John 2

Eheso Numuno Ebeku' Evenele Mulisemu' Luhuvo Ma Gize-ngedelive Lo Izesu' Zohane'ni Lo-imine' Gamazi

Ne'mine losa Izesu' ti' lo lo-nidine' ve: Eheso numuno ebeku' evene'ne mulise'mi angeloli'mo engi' lo-ngemeline' gamazi nene luhuvo ti' lo gizezo:

A'ne zamela sonohi' seveni do mino lamu seveni neti vovo'ningu' mono minaa' nouve ne'mo nene gamazi ti' lo noluve:
Lengi' monovotine nene mo ningo gele nouve. Ado' amuzo mili mono' monovolo' e'meti mini mulumo geni ele'vole' igi gihi'mi vi minaa' nani' nemu' nene mo ninge minaa' nouve. Ido' evene' golosomu' gili gosele' iga' nani' nesi ido' aposolo gihile minamaha aposolo none laa' avemu' nesi nene lingine monovo'ine ize' mili ningi sozalo' ve minani' monovo'ine nene mo ningi di soto' igi gilani' nemukisi nene mo ningo gele nouve. Ido' lingine nenikumu' ve li mulumo geni amuzo mili gihi'mi vi minaa' nangu' ahu' lamaa' naani' nemukisi nene mo ningo gele nouve. Ne neiha lengita monovo ma neine' nene mo edamive lo gele nouve. Ado' lutine idise nimaa' nani' nene gana' lutine vauve ili nimi minaa' ani' votigilelo' nene nimisa'mave. Gomu' monovo lamine' igi mili minaa' ani' nene huli mo limi ingikeve. A'mine gomu' monovotinemu' nene gohi gililo. Lutine di velepe' izii gana' iga' ani' suno nene gohi igi mili minilo. Ne'mine amilizani' nene naza ogo lengito' medelo minine' lamutine nene mo'mosi'veloti' do hulolosuve. Lutine ma di velepe' izamilizani' nene ne'mine olosuve losa nene nolo-lingiduve. Ne neiha lengita monovo ma ne'mino neine' nene lamine' ve. Naza gosele' gehepeve oko minaa' nouvoni' monovo ado' Nikolao'ni e'metaa' navete iga' nani' monovo nemu' nene linginesi gosele' gehepeve iki minaa' naave. Gatine ngolo' live ni ma nene O'moso'mi Sikalahu' ne'mo eze evenele mulise minika' minika' angu' nolo-ngimine' gamazi meve nene gililo. Monoli'mi lovou' Satani ivile' ilizave nene gele ngemekuvo ingine neve nene O'moso'mi mi've paladisi za zuhou' vi mini minevo' minevo' ngemeni dameni do otuho-ngedeline' za've'mi gihile nene ili nalisave.

Similina Numuno Ebeku' Evenele Mulisemu' Luhuvo Ma Gize-ngedelive Lo Izesu' Zohane'ni Lo-imine' Gamazi

Ne'mine losa Izesu' gohi ma ti' lo lo-nidine' ve: Ido' Similina numuno ebeku' evene'ne mulise'mi angeloli'mo engi' lo-ngemeline' gamazi nene luhuvo ti' lo gizezo:

Inite' mata' muki' minamangu' gana' minuve alinge' a'mine inite' osu' lilizangu' nene minevo' minevo' ogo minelove ado' mo hiluvoni'za gohi ve'ne gizo otuve naza nene gamazi ti' lo noluve:
Lengi' goboni mili-lingidi nizavo geni gihi'mi vi nizani' nemukisi ido' goho' gahali' nizani' nemukisi nene mo gele nouve. Ido' ne neiha mo monoku' heneni ve lili' ikeve. Ido' O'moso'mi evenele Zuda ve none laa' naaha O'moso'mi evenele gihile minami Satani'mi evenele mulise nizani' nete lengi' divi ledivi' i-lingidaa' nangumukisi nene mo gele nouve. 10 Ido' mulumo geni gihi-lingidilisa navo lingine mo gihilisa nangumu' nene mo golisesi gilamilo. Lingine gililo. Ve goloso ne'mo nene lengemengu' molo do ningelesa evene' ma do ote-ngedavo ingine lengikuti' evene' linge ma nene nala' numungu' huli-lingidilisa naaze. Mulumo geni inite' nene lengito' soto' ogo neivo gamene li'nibe gamene teni a'ne'minevo' nene mineleseive. Ne neiha nenito' gi'mizi minilizangumu' lingibili hililisa ilizangumukisi gili huli nenito' nene ha gi'mizi gilikovo' li minilo. Ne'mine ma ilizani' ne'mi meni've nene naza minevo' minevo' minaa' lengemeni nene lehize-lengedelesuve. 11 Gatine ngolo' live ni ma nene O'moso'mi Sikalahu' ne'mo eze evenele mulise minika' minika' angu' nolo-ngimine' gamazi meve nene gililo. Ve ma ingine monoli'mi lovou' Satani ivile' ilizave neve nene gamene nabala mono' gilamave gohi hililizangu' nene gohi hilamavo a'mine gohi helaa' ne'mo nene ma ngele'mize goloso amoloseive.

Pelegamoni Numuno Ebeku' Evenele Mulisemu' Luhuvo Ma Gize-ngedelive Lo Izesu' Zohane'ni Lo-imine' Gamazi

12 Ne'mine losa Izesu' gohi ti' lo lo-nidine' ve: Ido' Pelegamoni numuno ebeku' evene'ne mulise'mi angeloli'mo engi' lo-ngemeline' gamazi nene luhuvo ti' lo gizezo:

Ado' bainati mite' velela ge'no mehenela ge'no gohe goloso minine' do minuve ne'mo nene ti' lo noluve:
13 Lingine minaa' nani' ebetine'mi monovo've nene mo gele nouve. Ebe' goloso Satani'mi mo'mosi've gehepeve minine' ebe'veu' nene nizave lo mo ningo gele nouve. Ne neiha neni' gulive'ne lengita neine' nene di gili' li mini neni' hulo-nedamo gamazi'ne hize ele' ogo lo soto' oga' ive Adipasi'ni bili hilani' gameneukisi lingine nenikumu' gili ele'vole' i minani' mamu' nene ne'mine ma osa'mune li ataize lamave. A'mine ve nene ado' lengi' vovotingu' Satani'mo minevo' alevo' oga' neine' ebeta gehepeve nene neivo bili hilani' ve. 14 Ne neiha lengita inite' linge ngomo ma neine' nene edamive lo gele nouve. A'mine nene evene' linge ma Balaamu' gamene gomuta apize ngimine' monovo ha di minaa' nave nene lengiku' ma nizave. A'mine monovo nene ado' Balaamu' ne'mo guvelesi ve Balaki'ni aka elebizavo aza Isilaele' aleve ngimimise' ivo ingine soza o'moso ngimani' noso' nite' nisa vene' vemoho' gopo' napa ingaa' ani' ve. 15 Ido' a'mine'mine ogo lengiku' nene evene' linge ma Nikolao'ni e'metaa' avete apizi ngimani' monovo goloso di minaa' nave nene nizave. 16 Nemu' nene lingine lutine di velepe' izilo. Ne'mine ma amilizani' nene naza lengita geto ogo hetelo ve'neuti' bainati mite' omo hetele neine' nedunu' nene a'mine monovo golosolo' e'meti minave nene lovo o ngemelesuve. 17 Gatine ngolo' live nii ma nene O'moso'mi Sikalahu' ne'mo eze evenele mulise minika' minika' angu' nolo-ngimine' gamazi meve nene gililo. Ve ma ingine monoli'mi lovou' Satani ivile' ilizave nene naza Okulumokuti' noso' nite' haleko minaa' neine' mana nene ma ngemekuvo nalisave. Ido' ma nene geheni mokono' ngemelesuve. A'mine gehenilo' nene gulive gosoho' mineka' mineka' ine' ngemekuvo dalizave netevo' nene a'mine gulivemu' nene suno' gili minilisave.

Tiatila Numuno Ebeku' Evenele Mulisemu' Luhuvo Ma Gize-ngedelive Lo Izesu' Zohane'ni Lo-imine' Gamazi

18 Ne'mine losa Izesu' ti' lo lo-nidine' ve: Tiatila numuno ebeku' evene'ne mulise'mi angeloli'mo engi' lo-ngemeline' gamazi nene luhuvo ti' lo gizezo:

O'moso'mi gipele naza ve'ne gulo nene olo' gulumo ne'minesi mino gize'neloti' nene ngoli gele vine' inite' bolonisi ne'mino ve'ne ve'ne elo minine' gize'nesi minuve naza nene ti' lo noluve:
19 Lengi' igi mili iga' nani' monovotinesi ido' lutine ngimaa' monovotinesi ido' nenita gili ele'vole' iga' nani' monovotinesi ido' hize ele' oga' gono lamine' di minaa' monovotinesi ido' mulumo geni ele'vole' igi gihi'mi vi minaa' nani' monovotinesi nizangumu' nene naza mo gele nouve. Gelo mino alinge' igi mili iga' nani' monovotine ne'mo nene gomu' igi mili iga' ani' monovotine nene ivile' ogo lamine' neingumu' nene mo gele nouve. 20 ne'mino mo gele nouvoni'za lengita monovo ma neine' nene mo edamive lo gele nouve. A'mine monovo nene ado' vene' Zezabele' aza polohete nouve lo neni' gelekele' evene'ne ma nene ngele'mize gopo ogo vene' vemoho' gopo' napa ingi'mi monaa' monovolokisi ido' soza o'moso ngimani' noso' nite' naa' monovolokisi nene apize ngemaa' neine' vene' neve nene ningi gosele' i-dami ningi mati-daa' naangumu' nene noluve. 21 Ido' a'mine ne'mino gopo monaa' monovomu' nene lulo do velepe' izelihe lo lihime emamo ninge mate-miko gamene imuha lulo ma do velepe' izelesa gelamive. 22 Aizoo, me gili'nalo. Ei' neve nene mo mulumo alumo gili ingaa' initekuko nene mo ongokelive losa do nohulo-duve. Ido' ezesi maka' lihime daa' niilizave ingine ezesi iga' ani' monovo'inemu' lu'ine ma di velepe' izamilizani' nene inginesi mulumo gono naba gihilizado' do hulo-ngedelesuve. 23 Ido' ei' izipahala zuho nene mo ngebele gese' okuvo hililisave. Ne'mine okuvo neni' evene'ne mulise muki' nete nenikumu' nene gilikevo neni' neve nene evene' lu'ningu' ga'ningu' minine' initekumu' vise' ogo ningo gelaa' ive ve li gililisave. Ee, lingine igi mili iga' ado' gehepevevo' nene golo hizo hamo hamo' meni lengemelesuve. 24 Ido' neni' evene'ne Tiatila numuno ebeku' nizanguti' linge ma lingine a'mine veneli'mo apize lengemaa' neine' gamazilo' ma gili dami ido' evene' malite SAtani'mi monovo danava luhise've ve laa' nani' monovolokisi nene gili damaa' nave lengi' nene geni gono gohi ma gehe-lengedamolosuze. 25 Asi idise lingine ma di nizani' monoto' nene ha di gili' li di minilo. Ne'mine i nizavosa tine' molo aloni' nene mo lamine' oloseive lo neevo' nene nolo-lingiduve. 26 Ve ma ingine monoli'mi lovou' Satani ivile' igi neni' sunolo' mudise e'meti igi mili nizavo gamene osu' liline' nene naza me'nehidati' do nouvoni' amuzo ne'mine nene O'mosomu' gilamani' evene' zuho ato atoto' gizebo i-ngidilizani' amuzo nene ngemelesuve. Ido' ne'mino ngemekuvo ingine a'mine O'mosomu' gilamave ngibililizani' gavoso ainidunu' lili' ani' nene di minisa amuzo mili gizebo i-ngidi mini misubo somo ngibili itaa' nani' ne'mine igi a'mine aleve nene izivi' itivi' i-ngidilisave. Ido' ma nene nedenga' holukati' dizaa' neine' sonohi' ganangome' nene ngemelesuve. 29 Gatine ngolo' live nii ma nene O'moso'mi Sikalahu' ne'mo eze evenele mulise minika' minika' angu' nolo-ngimine' gamazi meve nene gililo.

Copyright information for `ASO