Revelation of John 21

Okulumo' Misubo Gosoho' Nene Soto' Nasivo Zelusalemi Gosoho' Nesi Nene O'moso Neidati' Nolimivo Angeloli'mo Elebizavo Ningingumu' Zohane' Gizine' Gamazi

Ido' neloti' gohi ma ninguvoni' nene Okulumo' gosoholi'minesi ido' misubo gosoholi'minesi nene ninguve. Ido' gosoholi'mine ninguve noluvoni' nene Okulumo' misubo litehe nene mo mudise vi haha ikesivo guvo noso nesi nene gohi ma minamine' nenako nemu' nene gosoho' ve noluve. A'mine O'moso'mi numu've ebe've Zelusalemi gosoho' nene Okulumokuti' O'mosolati' nolimivo ninguve. A'mine numuno ebe' nene ha gidi nani' goloso ado' vene' ma velo' volosa do nene ogo gonolise ogo minaa' neine' ne'mino do nene o minine' nolimivo ninguve. Ne'mino nolimivo ningo nouvo O'moso'mi mo'mosi'velati' nene nolo naba ma ti' lo nolivo giluve: Gililo. O'moso ongo mineline' numu've nene eveneliti vovo'ningu' naave. Aza neve nene inginesi minevo' alevo' ogo ongo mono mineleseive. Ne'mino neivo ingine neve nene eze evenele minikevo O'moso asi've nene engikisi mino O'moso'ine gehepeve mineleseive. Ne'mine ogo mino ve'ine novozo nene ve'ninguti' lemali' lemali' lo-ngedo mineleseive. Ido' helaakisi nene ma minamoloseive. Ido' mulumo alumo gelaa' nehe ive nama oga' nehe geni gehaa' nehe nevo'mine monovo nene hamokisi gohi ma minamoloseive. Ee, gomu' minani' monovo nene mo gozopo' vi haha ilisanako nemu' nene ne'mine monovo hamokisi engita ma minamoloseive.

Ido' neloti' nene a'mine mo'mosi'velo' minive ne'mo nene ti' lo line' ve: Gililo. Naza idise nene inite' mata' muki' nene do gosoho' ogo do atoli'mine nouve. Ido' ne'mine lo gohi ti' lo line' ve: A'mine gamazi meve nene mo lamineto' noluvonaze. A'minemu' nene gili medeli minilizado' o neinaze. A'mine gamazi nene mo luhuvo gizezo. Ne'mine lo ti' lo lo-nimive: Gamazi'ne luvoni' malo' nene mo do gihile izo osu' lokuve. Neni' neve nene inite' mata' muki' minamangu' gomu' molo mino alinge' ma osu' lilizani' nene naza ha minevo' minevo' ogo minelove ado' ganakuti' minuvesi ido' alingetasi minelovesi ne nouve. Evene' ma nosomu' ngisavo minilizave nene minevo' minevo' izeleho minine' noso hinipinikuti' neve nene haza gidini ohizo ngemelesuve. Monoli'mi lovou' Satani ma ivile' ilizave nene naza mene noluvoni' inite' mukikuti' nene ize' molo-ngedekuvo dalisave. A'mine alevemu' nene naza engi' O'moso'ine gehepeve lolo' ogo minekuvo ingine nene neni' izipaha'ne gehepeve lili' igi minilisave. Ne neiha evene' ma evenekumu' golise gili mini Kilisito'ni e'meti guni amilizavesi ido' ezemu' gili ele'vole' amaa' ilizavesi ido' lovozo monovolo' e'metaa' ilizavesi ido' evene' ngibili hilaa' ilizavesi ido' vene' vemoho' gipe alu monovo goloso gopo' napa' iga' ilizavesi ido' poisini inite' pata' di monaa' ilizavesi ido' soza o'mosolo' gelekele' igi gubi' izi ngimi ngopo'ni laa' ilizavesi ido' sozalo' ve muki' engi' nesi nene a'mine helaa' naba tuu minine' ebe' ado' a'mine salfa gehenilo' olo' lo mino noso ohuno ne'mino molo miningu' nene vi hilalisave.

Ido' neloti' nene a'mine evene' do goloso o-ngedaa' inite' seveni alinge' gamenela soto' ika' ika' ilizani' inite' lapese seveniu' di minika' minika' ani' angelo' seveni engikuti' mali'mo ogo gamazi lo-nemo ti' lo line' ve: Naza sipisipi angale'mo do oko'nola iline' vene' ne'mino minine' numuno ebe' nene gelebizeloze. Ano. 10 Ne'mine lavo O'moso'mi Sikalahu' ne'mo zatuho' o-nidivo nouvo a'mine angelo' ne'mo nele'mizo golo naba ha'nalo' ma dize mino O'moso'mi numuno ebe've Zelusalemi nene Okulumokuti' O'mosolati' nolimivo nelebizine' ve. 11 A'mine numuno ebetoti' nene O'moso'mi labana've soto' ogo minine' ve. A'mine labana've neve nene meni've dizo minine' geheni zasipa ado' ngalasi lamine' gele vine' ne'midoti' silingenge'ni've zavile hulo minine' gelo minine' ve. 12 Ido' lave gesi've neve nene naba zalo' goloso mino a'mingu' nene gateni've tuvelu'a neivo a'mine gatedo' gatedo' nene angelo' tuvelu'a nene mini'mi vani' ve. Ido' a'mine gateni hamo hamoto' nene Isilaele' gipele tuvelu neti nga'vopilemoliti mulise neti gulive'ine ma nene gizika' gizika' ikevo minine' nene ninguve. 13 Ido' a'mine gesi'mi gateni've ho' dizaa' neine' gahevela nene seto hamo neivo ido' veleta gahevela nene a'mine'mine ogo a'mine gesi'mi gateni've nene seto hamo neivo ido' gala'muno gahevela nene a'mine'mine ogo gateni seto hamo neivo ido' ho' lemaa' idaa nene a'mine'mine ogo gateni seto hamo minine' ve. 14 Ido' a'mine numuno ebeli'mi lave've nene geheni naba' naba gavele inite' goloso tuvelu ne'mido' nene di otikani' minine' ve. A'mine gehenilo' nene sipisipi angale'mi aposolo've tuvelu neti gulive'ine nene gizika' gizika' ikevo minine' ve.

15 Ido' a'mine maka' gamazi lo-nemo minine' angelo' ne'mo nene a'mine numuno ebeku' gateni'vesi lave'vesi nene molo ningaakumu' ve lo maki molo ningaa' inite' angaba gavoso ne'mine ngolidunu' lili' ani' nene do minine' ve. 16 Ido' a'mine numuno ebe' ne'mi kona kona'vela nene mo hamo' lisihetokovo' mino sukoea gehepeve o minine' ve. Numuno ebe' nene a'mine molo ningaa' inite' nedunu' molo ningine' nene a'mida a'mida vanu tauseni faef hadeti (1,500) maili (2,400 Km) ne'mine minavo a'mine numuno'mi kona kona'vesi ido' veleta dizo vaa' ido' lede vaa' ine' ne'mi kona kona've nesi nene mo sukoea gehepeve o minine' ve. 17 Ido' a'mine angelo' ne'mo evenelite maki milaa' ani' monovolo' do molo maki molani' nene a'mine numuno ebeli'mi lave'mi gesi've ne'mi mukile've hetati' lulouko dizo vivo nene mo tu hadeti sigisitini (216) fiti (66 mita) ne'mine minine' ve. 18 Ido' a'mine numuno ebeli'mi lave gesi've nene zasipa gehenidunu' gizani' mino ido' numuno ebe' nene mo ngoli lamine' gehepeve nedunukovo' gizikevo ngalasi guluvi' gehepeve ne'mine mino silingenge'ni've hulo minine' ve. 19 Ido' a'mine numuno ebeli'mi lave gesi've hizi di otikani' nene geheni ato atotunu' nene gonolise ikani' ve. A'mine naba' naba gehenguti' naba vanu geheni nene zavile geheni ado' zasipa geheni minine' ve. Ido' a'midoti' naba tuu geheni nene gumi lo guno amine' ado' sahila geheni ma nene minine' ve. Ido' naba tili geheni nene zavile gumi ne'mine ado' agate geheni minine' ve. Ido' naba fo geheni nene zavile gehepeve ado' emeladi geheni minine' ve. 20 Ido' geheni naba faef nene mokono' lede voka' gulehe' lede voka' ine' ado' saledoniki geheni minine' ve. Ido' geheni naba sigisi nene gulehe' ngenge'ni ado' koneliani geheni nene minine' ve. Ido' geheni naba seveni nene ngoli moni oko'nosi minine' ado' kilisolaiti geheni minine' ve. Ido' geheni naba eiti nene guvo nosolo' gumi zavile elo minaa' neine' ado' belili geheni minine' ve. Ido' geheni naba naeni nene gihungo' zavile ado' topazi geheni minine' ve. Ido' geheni naba teni nene zavileu' mokono' ele minine' ado' kilisopalasi geheni minine' ve. Ido' geheni naba leveni nene okohuno ado' hiasini geheni nene minine' ve. Ido' geheni naba tuvelu nene mo okohuno gehepeve ado' ametisi geheni nene minine' ve. 21 Ido' a'mine lave gesi'mi gateni've tuvelu'a nene meni've dizo minine' inite' ngalulu' gele vine' inite' tuvelu'a nene gateni hamo hamoto' hamo hamodunu' nene lili' ika' ika' ani' minine' ve. Ido' a'mine numuno ebeku' aka ngomo' naba nene mo ngoli gehepevedunu' vilani' aka mino luloukoti' nene ngalasiloti' silingenge'ni hulaa' neine' ne'mino hulo minine' ve.

22 Ido' a'mine numuno ebeli'mi mono' numuno've nene mo asi've Guvelesi ve O'moso amuzo mukili'mi meleho minive nesi ido' sipisipi angale nesi minasine' nenako ne'mo nene naza a'mingu' mono' numunosi mo keke' ningamuve. 23 Ido' a'mine numuno ebeku' nene O'moso'mi labanala'mo hize labana' ele-daa' neivo sipisipi angale neve nene a'mingu' livi' lamu've ne'mino neine' nenako holi'mo nehe ike'ni'mo nehe a'mine numuno ebeku' hize labana' elaato' nene ma minamasive. 24 Ido' a'mine numuno ebeli'mi labanato' nene evene' zuho ato ato' muki' ingine mini mili aka moni ti' igi minilisave. Ido' misubou' misubou' guve'inesi ve naba' naba mini'mi monani' muki' nete ingine gilavo dizo minine' inite'ine nene di a'mingu' alisave. 25 A'mine numuno ebeli'mi akahe've naba nene go' lo mineline' gameneu' nene gizisa'mavo ha gode minaa' neive. Ee, a'mida nene liti'muso izesa'mine' nenako ne'mo akahe've nene ha godovo' minaa' neive. 26 Evene' zuho ato ato' muki' ingine heneni'ine nehe inite' lamine' ato' nolihe ingine gilavo dizo minine' inite' mata'ine nene mo a'mine numuno ebeku' di alisave. 27 A'mine numuno ebeku' nene goloduvo ele vine' inite' hamokisi ma dizamoloseive. Ee, lovozo monovo nehe soza monovo nehe nevo'mine monovo igi mili iga' ave nene a'mine numuno ebeku' dizamavo asi sipisipi angale'mi buku've ado' minevo' minevo' ngemeni dameni dalizaveti gulive'ine neine' bukuu' gulive'ine gizikave engikovo' nene a'mingu' dizilisave.

Copyright information for `ASO