Revelation of John 22

A'mine Zelusalemi Numuno Ebe' Gosohoku' Nene Minevo' Minevo' Izeleho Minine' Nososi Ido' Zaasi Ningingumukisi Zohane' Gizine' Gamazi

Ido' a'mine monusine' angelo' ne'mo ma nelebizine' nene minevo' minevo' minali'mi izeleho minine' noso nene ado' O'mososi sipisipi angalesi minaa' nasine' mo'mosi'nidoti' nene ngalasi lamine' ne'mine ve'ne ve'ne elo lemosa o lomo minine' nene nelebizine' ve. A'mine noso nene a'mine numuno ebeku' aka naba minine' ne'mi olusoku' nene o lomo vo neivo a'mine noso ne'mi gaheve hela hela'vela nene minevo' minevo' minali'mi izeleho minine' za seta' nene dizi minasine' ve. A'mine za netise nene ike'nilo' ike'nilo' gihile izika' izika' igi mini Kilisimasi hamoku' nene gamene tuvelu ne'mine gihile izaa' nasive. A'mine za netise avile'ine nene evene' zuho ato atokuti' aleve muki' ingine nikevo inite' gizi dami ha laminekovo' minilizave losa minine' ve. A'mine numuno ebeku' nene O'moso'mo usi' izaa' neine' inite' nene hamokisi ma minamavo O'mososi sipisipi angalesi minaa' nasine' mo'mosi'ine nene a'mine numuno ebeku' ne neivo O'moso'mi gonolo' ve've nene opo'ni li di naba i-di gelekele' i-di minilisave. Ne'mine i-di mini ei' gulive've nene golihi'nido' neivo ei' golo vele'velo' nene ha ningi'mi vi minilisave. Ido' liti'muso neve nene gohi ma minamoloseive. A'mine aleve nene Guvelesi ve O'moso ne'mo nene hize labana' ele-ngedo mineleseinako nemu' nene lamuli'mo nehe holi'mo nehe hizi labana' ili-ngidaa' gono dalisido' nene ma minamilisasive. Ido' a'mine aleve nete guve'inesi ve ne'mine lili' igi gono di minilizani' nene mo huko vamivoo divi divi' igivo' minilisave.

Zohane' Aza Izesu' Alingumu' Angeloli'mo Lo-imine' Gamazisi Izesu' Line' Gamazisi Gizosa Buku Nene Gize Osu' Lolosa Gizine' Gamazi

Ido' angelo' ne'mo nene ti' lo lo-nimive: A'mine gamazi meve nene mo lamineto' nenaze. A'minemu' nene mo gili medeli minilizado' o neive. Guvelesi ve O'moso ado' poloheteliti lu'ine do ote-ngedaa' ive ne'mo nene geto soto' ilido' o neine' initekumu' nene ei' O'moso'mi gonolo' ve ngelebizelive lo angelo've nene imiseline' ve. Ee, Izesu' ti' lo nolive: Me gililo. Naza mo geto alosuve. Evene' ma ingine O'moso'mi veleuti' gamazi me bukuu' neido' nene ma di mini e'metilizave nene mo ngolize izilizani' akalo' mini mili nizave. A'mine gizuvoni' inite' muki' mene neni' Zohane' giluvoni' inite' ido' ninguvoni' inite' nene neive. Ido' a'mine inite' mukikumu' nene gelaa' ido' ningaa' ogosa naza a'mine inite' muki' nelebizine' angelo' nene opo'ni lo do naba o-delesa gizeneu' lemo go'ne hizo unguve. Ne'mine uvoni'za aza ti' lo lo-nimive: Gazasi geze zuho polohete nizavesi ido' me bukuu' neine' gamazi di mini e'metaa' navesi lingine O'moso'mi gonolo' ve nizani' ne'mino nazasi a'mine'mine ogo O'moso'mi gonolo' ve mino lengi' gidini nouze. Gaza ne'mine o-nedamo asi O'mosovo' nene opo'ni lo do naba o-dezo. 10 Ne'mine lo gohi ma ti' lo lo-nimive: O'moso'mi veleuti' gamazi me bukuu' neine' mene gihile izeline' gamene nene mo avito' ogaze. Evene' a'mine bukuti' mene gati gililizani' aka'ine hize tile-ngedo kekeize luhuvo a'mine bukulo' nene mo hitamozo. 11 Ido' gamene nene mo avito' ogani' nenako nemu' nene monovo goloso igi mili iga' nave neve nene a'mine monovo'ine nene ha igi milivo' minilizani' o neive. Ee, goloduvo ele vine' monovolo' e'metaa' nave ingine nene a'mine goloduvo ele vine' monovolokovo' nene ha e'metivo' minilizani' o neive. Ido' monovo lisihe' lamine' igi mili iga' nave ingine neve nene a'mine monovo lisihe' lamine' nene ha igi milivo' minilizani' o neive. Ee, O'moso'mi evenele lili' igi nizave ingine nene mo O'moso'mi evenelelite igi mili ilizado' o neine' monovo lamine' nene ha igi milivo' minilizani' o neive.

12 Izesu' ti' lo nolive: Gililo. Naza mo geto alosuve. Ido' aloni' nene evene' hamo hamo' igi mili ani' votigilelo' nene golo hizo meni ngemelove lo a'mine ngemeloni' inite' ado' meni golososi ido' laminekisi nene do alosuve. 13 Neni' neve nene inite' mata' minamangu' gomu' molo mino alinge' ma osu' lilizani' nene naza ha minevo' minevo' ogo minelove ado' ganakuti' mino ido' alingetasi minelove ne nouve.

14 Ido' evene' ma ingine oko'nido' inite' noso izaa' nani' ne'mini lu'ine di guluvi' lisa minilizave ingine nene ngolize iziliza akalo' mini mili nizave. Naza gele ngemekuvo ingine O'moso'mi numuno ebe've'mi gatengu' nene dizisa minevo' minevo' ogo minaali'mi izeleho minine' zali'mi gihile nene naa' ilisave. 15 Ne neiha evene' ma ize gulo monovo'inesi minave poisini inite' pata' di monaa' avesi ido' vene' vemoho' monovo goloso gopo' napa' iga' avesi ido' evene' ngibili hilaa' avesi ido' soza o'mosolo' gelekele' i-ngidi gubi' izi ngimi ngopo'ni laa' avesi ido' soza gamazimu' lanite' gili laa' ave muki' nesi nene a'mine numuno ebeku' nene dizami haza hetavo' minilisave.

16 Neni' Izesu' nene naza angelo'ne meve ne alinge' soto' iline' inite' memu' nene evene'ne mulise mini'mi monani' lengi' nene vo lo soto' ogo lo-lengemelive losa imiselekuve. Neni' neve nene Davidi' nalavauti' ado' Davidido' medelo mino ei' mo'mosi've do O'moso'mi eveneleliti Guve'inesi ve naba lolo' ogo gizebo o-ngedo mine'mo vo minaa' uve ma nene nouve. Naza nene nedenga' holukati' dizaa' neine' sonohi' labana'vesi minine' ado' ganangome' ma'minosa minuve ma nene nouve.

17 O'moso'mi Sikalahu' ne'mosi ido' vene' ne'mino Izesu' mudise do eita iline' evenele inginesi nene gaza ano nilave. Ido' gamazi mene gililizave muki' nesi nene eikumu' gaza ano lilizado' o neive. Ido' evene' ma minevo' minevo' minaali'mi izeleho minine' nosomu' ngisavo a'mine noso ma nalisa gililizave ingine nene haza gidini nalisave.

18 Ido' O'moso'mi veleuti' gamazi me bukuu' neine' nene gati gililizave mukikumu' naza ti' lo hungo' molo nolo-ngiduve: Me bukuu' gizuvoni' gamazilo' mene evene' ma ingine gamazi ato' gohi ma a'mido' imine' mili gizilizave nene ingine adi'mino O'moso'mo engi' minevo' alevo'ningu' nene imine' molo do goloso o-ngedeline' inite' nene do soto' o-ngedeleseive. Ado' mene bukuu' gizuvoni' inite' nene evene' di goloso i-ngidiliza inite' ne'mine ma do soto' o-ngedeleseive. 19 Ido' O'moso'mi veleti' gamazi a'mine mene bukuu' neinguti' ma di hulilizave nene O'moso'mi numuno ebeku' dizi mini minevo' minevo' minaali'mi izeleho minine' zali'mi gihile di nalizani' aka nene O'moso'mo engitati' do huloloseive. A'mine zamukisi ido' numuno ebekumukisi me luhuvo gize do limuvonguko gize nouvoni' inite' mamu' nene noluve.

20 Ido' me bukuu' gizuvoni' gamazilo' hize ele' ive ne'mo nene ti' lo nolive: Ee, lamineto' naza mo geto alosuve nolive. Mo ne'mino miniliho. Guvekasi ve Izesuvo gaza ano.

21 Guvetesi ve Izesu' nasahili've ne'mo nene lengi' mukita mine molo miniliho.

Moda a'nesi' ve.

Copyright information for `ASO