Revelation of John 5

O'moso'mo Luhuvo Nite' Anau' Ma Do Minine' Nene Sipisipi Angale Bili Hilani' Gele Vine' Ne'mo Ogo Daavo Di Naba I-di Opo'ni Nilavo Zohane' Ningine' Gamazi Gizine'

Ido' neloti' ma ninguvoni' nene a'mine mo'mosi'veu' minive'mi ana zamelati' nene pepa avile ha'na ha'nalo' luhuvo velela gizi mehenela gizikani' buku nene haza vete si'zi gatikelizave li di gangi nala' seveni izi humo izikani' nene do neivo ninguve. Ido' angelo' amuzo'vesi minive mali'mo vise naba lo ti' lo nolivo ninguve: Evene' ma zaho ma'mo buku me'mi nala've nene huko apaso gatelido' lisihe' o minosa ne'mine ilive. Ne'mine line'za Okulumoku' nehe ido' misubou' nehe ido' misubo lulou' nehe evene' ma a'mine buku si'zi ningilizani' amuzo'inesi minave nene mo keke' hamokisi ma minamani' ve. Ido' a'mine buku si'zi ningilizave nene hamokisi ma soto' amavo nemu' nene naza ive nabalo' goloso uvoni' ve. Ne'mine nouvo gizebo ve mauti' hamoli'mo nene ti' lo lo-nimive: Gelezo. Zuda' a'vopilemo' zuhouti' amuzo ve ado' laioni gulo ne'mine gele vive Davidi' zuhouti' Davidido' medelo mino ei' mo'mosi've dave ne'mo nene monoli'mi lovou' vuni gehepeve oganako a'mine buku'mi nala've seveni nene huko apaselido' lisihe' o neize. Gaza nene ive amozo.

Ne'mine lavo sipisipi angale ma mo bili hilikeni' gele vine' nene ado' gizebo ve vodo vodo igi minikevo ido' ele'vole' igi ve'inesi hazavo' nizani' inite' nene vodo vodo igi minikevo Guvelesi ve'mi mo'mosi've miningu' gehepeve nene ote neivo ninguve. A'mine nene godololo' komu've seveni mino ido' vele gulo seveni mino ine' ve. A'mine vele gulo seveni neve nene O'moso'mi Sikalahu' seveni misubo mukiku' ngimisele huline' ma nene minave. A'mine sipisipi angale ne'mo nene ogo a'mine mo'mosiku' minive'mo ana zamela buku do minine' ma nene dave. Ido' a'mine buku nene do anau' ogavo a'mine ele'vole' igi ve'inesi ha minaa' nani' inite' seta've seta've nesi ido' gizebo ve tuvedi fo'a (24) nesi nene a'mine sipisipi angale'mi velela nene limi go'ine hizi ingani' ve. Ingine hamo hamo' nene musiki molaa' inite' gulive hapu nesi ido' ngolidunu' lili' ani' luduno lapeseu' nene gizikevo unuvo lamine' oga' ine' inite' vai' lo minine' nesi nene di minani' ve. Ido' a'mine unuvo lamine' oga' ine' inite' nene O'moso'mi evenelelite O'mosola laa' naani' gamazi neve nene minine' ve. Ido' a'mine velela limi pou' li ingave nete nene nama gosoho' bili mili ti' li lani' ve:

Gei' nene gibilikevo gei' vaniseka hulo helanidi'mo
evene' zuho ato ato' no'ine ato atokisi oko'ine ato atokisi
misubo ato ato' mukiku' mini'mi monani' aleve ma nene meni hizo
leli' O'mosete'mi gizebou' ngele'mize molo mo'mosi'ine naba ngemosa
O'mosomu' opo'ni li inite' lehizi-daa' ilizave lolo' o-ngedanivo
ingine misubolo' gizebo oga' gono di minilisave.
Ido' ne'mine aine' nenako ne'mo nene gaza a'mine buku nene dosa
nala've huko apaselinido' nene mo lisihe' gehepeve o nane.
11 Ne'mine ikevo ninguvoni' nene Guvelesi ve'mi mo'mosi'vesi ido' ele'vole' igi ve'inesi ha minaa' nani' initekisi ido' gizebo ve tuvedi fo'a (24) nesi nene angelolite di vodo vodo i-ngidi vai' goloso tauseni tauseni ivile' igisa minani' nene naza ningo mukito' 12 no'ine naba di nubuho igi ti' li nilavo giluvoni' ve:

Sipisipi angale gibilikeni' gaza nene
amuzo ve minaningumukisi ido' heneni ato ato' vai' do minaningumukisi
ido' gele nge laa' naningumukisi ido' ele'vole' ogo minaa' naningumukisi
ido' dizo minaa' naningumukisi ido' guveka monaa' neingumukisi nene
gopo'ni lolonido' lisihe' gehepeve o naningumu' nene
gei' gopo'ni nolune.
13 Ne'mine li nilavo ma giluvoni' nene O'moso'mo do soto' ine' inite' Okulumoku' nehe misubou' nehe ido' misubo lulou' nehe ido' guvo nosolo' nehe a'mingu' minani' inite' muki' nete nene nama ti' li nilavo giluve:

Mo'mosi'veu' minivesi sipisipi angalesi ingine nene
amuzo'inesi ve mini dizivo' minikesivo guve'ine monaa' neingumu' nene
do naba o-ngedo ngopo'ni nolune' nene mo huko vamo minevo' minevo' ogo
minelive.
14 Ne'mine likevo ele'vole' igi ve'inesi ha minaa' nani' inite' seta've seta' ve nete nene mo ne'mino minilihoo li li hulikevo gizebo ve ingine limi go'ine hizi ingi a'mine ve seta' nene di naba i-ngidi ngopo'ni lani' ve.

Copyright information for `ASO