Revelation of John 6

Zohane' Sipisipi Angale Ne'mo Buku'mi Nala've Hukoka' Hukoka' Neivo Soto' Oka' Oka' Ine' Inite' Ningine' Gamazi Gizine'

Ido' ma ninguvoni' nene sipisipi angale ne'mo buku'mi nala've api' ogo hamo' ma huko apasavo ele'vole' igi ve'inesi ha minaa' nani' inite' seta've seta'veuti' hamo' mali'mo nene go' ngilili ne'minosa nolo molo ti' lo nolivo giluve: Ano. Lavo ninguvoni' nene aizo, ve'nela mokono' hosi ma omo neivo ninguve. A'mine hosilo' mino daa' ive nene kebili do neivo godololo' nene lovou' ngivile' avete gihaa' ani' angili' nene ma di gihi-dikevo biluva've ngivile' olosa vo ngivile' o'mo vine' ve.

Ido' sipisipi angale ne'mo buku'mi nala've naba tuu ma nene huko apasavo ele'vole' igi ve'inesi ha minaa' nani' initekuti' naba tuu ma'mo nene ano nolivo giluve. Ne'mine lavo hosi gohi ma soto' ogo ani' nene olo' gulumo ne'mine gulehe' hosi ani' ve. Ido' a'mine hosilo' daa' ive nene evene' ge nebele hele ne gebele hele li minilizangumu' nene misuboukoti' hongu lo lamino minaa' monovo nene ipe' ogo do vilive lo O'moso'mo gele emosa bainati mite' naba ma emavo dani' ve.

Ido' sipisipi angale ne'mo buku'mi nala've naba tili nene huko apasavo a'mine ele'vole' igi ve'inesi ha minaa' nani' initekuti' naba tili ne'mo nene ano nolivo giluve. Ne'mine lavo ve'nela nene gonobu' hosi gohi ma omo neivo ninguve. Ido' a'mine hosilo' minive ne'mi anau' nene sigeli ma do minine' ve. Ido' a'mine ve'inesi ha minaa' nani' inite' seta've seta've engi' vovo'ninguti' nene nolo ma ti' lo soto' ine' ma giluve: Ga'na gamene ogavo noso' nite' meni've dizo vavo noso' nite' viti meni hizilizani' nene moni naba
Laza fo kina gizune' nene Zohane' engi' moni'inemu' nGiliki gamaziuti' vanu denalias ve lo gizine' nene do velepe' izo fo kina ve lo gizune. A'mine moni vanu denalias nene Zohane' minine' gameneu' evene' hamoli'mo gamene hamo' gono davo vanu denalias nene imaa' ani' ve.
fo kina (K4) ne'mine hulisa noso' nite' viti nene geni've ngomo vani kilo (1Kg) a'ne'minevo' nene dalisave. Ido' noso' nite' goloso gidini bali nene meni hizilisa fo kina hulilizado' nene tili kilo (3Kg) ne'minevo' nene dalisave. Ne neiha noso' nite' gize vata' iga' ani' uveli'mi za've oliva za nesi ido' vaini nala' nesi nene ha minilisasize. Do goloso amozo lo lo-dine' ve.

Ido' buku'mi nala've naba fo nene huko apasavo a'mine ve'inesi ha minaa' nani' initekuti' naba fo ne'mo nene ano nolivo giluve. Ne'mine lavo ve'nela hosi ma omo minine' nene oko'nolo' lani gise holo neine' gele vine' minine' ve. Ido' a'mine hosilo' minive'mi gulive nene Helaa' ve lo minine' ve. Ido' ve ma gulive Gonoso Galese ve lo minive nene mo avito' mehenela ezesi maka' vasine' ve. Ne'mine nasivo engi' nene O'moso'mo misubou' aleve mulise seta've seta've minanguti' mulise hamo' nene ngibililisingumu' amuzo ngemekuvo ingine a'mine amuzo di mini a'mine aleve nene lovo'mo ma ngebelelive ido' ga'na'mo ma ngebele helelive ido' siki initeli'mo ma ngebele helelive ido' loposo initelite nene ma ngibili hililizave likesivo ngibili hililizangumu' nene O'moso'mo a'mine amuzo nene ngimine' ve.

Ido' buku'mi nala've naba faef ma nene huko apasavo ninguvoni' nene evene' ma O'moso'mi gamazilo' gili di mini a'mine gamazi hizi ele' igi li soto' iga' angumu' ngibili hilikevo vo'inehaza nene O'moso imaa' nani' inite' milaa' ani' holomo alata ne'mi gala'munguko nene nizavo ninguve. 10 Ido' a'mine vo'inehaza nete nene no'ine nabauti' vise li ti' li lani' ve: Guvekasi ve naba kekeize lo minine' gemeni damenisi mino monovo gihile ne'mi meleho minanive gaza nene leli' libilani' vanise malo' nene golo hizo misubou' minaa' nani' aleve nene goni' o-ngedo lihime ngemamolaniko nanihe' lihime ngemeline. 11 Ne'mine likevo a'mine evene' vo'inehaza minani' hamo hamo' nene veletati' gize'nida leme minine' genegana mokono' gehepeve nene ngemeka' ngemeka' ogo ti' lo lo-ngimine' ve: O'ove, lengi' ne'mini neni' gonolo' ve minave lengi' zuho linge nesi nene lengi' lingibilani' ne'mini igi ngibililizado' o neine' nene ngibili osu' gehepeve lilizangumu' nene lamini mini gili mini gizebo ngomo ma minilo.

12 Ido' ne'mine lo-ngemavo naza ninge nouvo sipisipi angale ne'mo nene buku'mi nala've naba sigisi ma nene huko apasavo mimi' naba goloso ine' ve. Ido' ho' nene gonobu' elo lihizine' nene vene' gevonolite gonobu' initekovo' ngilaa' naani' gele vine' ne'mine ine' ve. Ido' ike'ni'mi velelo' nene vanise ne'mino gulehe' elo osu' line' ve. 13 Ido' hepe' nabali'mo gohuno za do mo'mongo' ogavo gihile've di'mozaa' naani' ne'mino okulumoto' minani' sonohi' nene misubouko di'moze' moze' ani' ve. 14 Ido' okulumo' nene mati di gangaa' nani' ne'mino gango vo haha ine' ve. Ido' golo muki' nesi ido' ailani muki' nesi nene minani' ebe'ine hulisa ebe' mala vi minani' ve. 15 Ido' misubou' misubou' mini'mi monani' guve'inesi ve naba nesi ido' evene' naba' naba nesi ido' amilo' gizebo ve naba nesi ido' moni heneni ve nesi ido' amuzo ve nesi ido' evene' muki' gonou' ve limi minave nizahe haza ve nizahe nesi nene vi geheni gavulo golou' vi halekaa' ido' geheni muliku' vi halekaa' ani' ve. 16 Ne'mine igisa golomukisi geheni gavulomukisi ti' li li-ngidani' ve: Laza nene mo'mosi'velo' minive O'moso'mi velelo' soto' ogo minamoloningumukisi ido' sipisipi angale'mo izebolo' molavo lihime lemelinguti' olovo' ogo mineloningumukisi nene lingine limi mili hiti-lidi di haleki-lidilo. 17 Nene nanitekumu' ve. Ingine evene' lihimetemu' ngizebolo' molangumu' nene lihime limilisine' gamene naba nene mo ogani' nenako ne'mo nene evene' hamokisi ma libilami ha huli-lidikavo minamolosune.

Copyright information for `ASO