Revelation of John 7

O'moso'mo Misubo Do Goloso Iline' Gamene Nene Olihe Amivo O'moso'mo Ei' Evenele Ve Lo Noso Molo-ledelingumu' Nene A'mine Gamene Hazavo' Gizebo O Neivo Zohane' Ningine' Nemu' Gizine' Gamazi

Neloti' ma ninguvoni' nene angelo' seta've seta've misubo lumola lumola oti'mi vi nizavo ninguve. Ingine misubolo' nehe guvo nosolo' nehe za mukito' nehe ne hepe' elo do goloso ogalive li a'mine misubolo' hepe' eleline' hepe' seta've seta've nene di gili' li mini' mini' ani' ve. Ido' gohi ma ninguvoni' nene angelo' gohi mali'mo minevo' minevo' oga' neine' O'moso'mo ei' inite'velo' noso molaa' neine' inite've nene do mino ho' dizaa' idati' nene soto' ogo navo ninguve. Ne'mine ogo a'mine'mo nene a'mine angelo' seta've seta've ado' misubosi guvo nososi di goloso ilizave lo O'moso'mo gele ngimivemu' nene nolo nabauti' vise naba lo ti' lo lo-ngidine' ve: Laza O'mosote'mi gonou' ve'veti golihi'nido' O'moso'mi noso olihe molo-ngede osu' lo-ngedamuningu' lingine nene misubo nehe guvo noso nehe ido' za'nala' nehe neve nene olihe di goloso amilo. Ne'mine lavo O'moso'mi noso mili-ngidani' aleveti naba'ine nene mo li-nimikevo giluvoni' ve. Ado' Isilaele' gipeleti nga'vopilemo' zuho mukikuti' nene evene' vanu hadeti foti fo tauseni (144,000) nene noso mili-ngidani' ve.

Ado' Zuda' a'vopilemokuti' nene tuvelu tauseni (12,000) noso mili-ngidi
Ido' Lubeni' a'vopilemokuti' nene tuvelu tauseni (12,000) noso mili-ngidii
Ido' nGadi' a'vopilemokuti' nene tuvelu tauseni (12,000) noso mili-ngidii
Ido' Aseli' a'vopilemokuti' nene tuvelu tauseni (12,000) noso mili-ngidii
Ido' Nahatali' a'vopilemokuti' nene tuvelu tauseni (12,000) noso mili-ngidii
Ido' Manase' a'vopilemokuti' nene tuvelu tauseni (12,000) noso mili-ngidii
Ido' Simeoni' a'vopilemokuti' nene tuvelu tauseni (12,000) noso mili-ngidii
Ido' Levi' a'vopilemokuti' nene tuvelu tauseni (12,000) noso mili-ngidii
Ido' Isakala' a'vopilemokuti' nene tuvelu tauseni (12,000) noso mili-ngidii
Ido' Zebuloni' a'vopilemokuti' nene tuvelu tauseni (12,000) noso mili-ngidii
Ido' Zosehe' a'vopilemokuti' nene tuvelu tauseni (12,000) noso mili-ngidii
Ido' Benizamini' a'vopilemokuti' nene tuvelu tauseni (12,000) noso mili-ngidani' ve.

O'moso'mi Mo'mosita Evene' Vai' Goloso nGelo Gatamoso' I Minani' Nene Mokono' Initekovo' nGili Nizavo Zohane' Ningine' Nemu' Gizebo Ve Engikuti' Mali'mo Lo-imine' Gamazi Gizine' Ve

Neloti' ma ninguvoni' nene evene' vai' goloso ngelo gatamolonido' i minani' nene ado' misubou' misubouti' evene' zuho ato atokuti' oko'ine ato atokisi no'ine ato atokisi nene a'mine O'moso'mi mo'mosi've ado' sipisipi angale ote minine' velela nene oti mini mokono' initekovo' ngili zavile davile ledi di mini 10 no'ine nabauti' geke' li ti' li lani' ve:

Lukuvo nune' nene mo'mosi'velo' minive O'mosoteli'mosi
sipisipi angale ne'mosi nene lukuvo limikesivo lukuvo nune' ve.
11 Ido' ne'mine likevo angelo' muki' nene O'moso'mi mo'mosi'vesi ido' gizebo vesi ido' ele'vole' igi ve'inesi ha minaa' nani' inite' seta've seta've nesi nene di vodo vodo i-ngidi oti mini a'mine O'moso'mi mo'mosi've'mi velela nene limi go'ine hizi ingi O'moso opo'ni li 12 ti' li lani' ve:

Mo lamine' likeve.
Nemu' nene leli' O'mosote aza amuzo ve mino ido' ele'vole' ogo mino
ido' gala gele nge lo minaa' ive dizo neivo guvele monaa' neingumu' nene
isaa' neve lo do naba o-do opo'ni nolune' nene
mo huko vamo minevo' minevo' ogo minelive. Mo ne'mino miniliho.
13 Ido' a'mido' nene gizebo ve mauti' mali'mo ti' lo longo' o-nidive: Oko'nido' inite' mokonokovo' ngili minave mene zamote nizave. Ido' zaalati' ani' neve. 14 Ne'mine lavo naza ti' lo lo-imuve: Ve nabo, Naza ma gelamuve. Asi gasika nene gele nane' ve. Ne'mine lokuvo ti' lo lo-nimive: A'mine aleve meve nene goboni mili-ngidi nizavo a'mine geni ato ato' soto' ine' gameneu' ele'vole' igi geni gihi mini lukuvo nave ma nene nizave. Engi' genegana'ine nene sipisipi angale'mi vanisedunu' noso' izisa di guluvi' li di mokono' ilani' ve. 15 Nemu' nene

O'moso'mi mo'mosi've'mi velela mini
gamene gamene go' liha liti'muso iziha kekeize lo neine' numu'veu' nene
eze gono've di-di nizavo
mo'mosi'velo' minive aza engikisi maka' mino alete molo-ngedaa' oloseive.
16 Ne'mine ogavo ingine noso' nite' nehe haza noso nehe
nevo'mine inite' nene gohi ma vise' ami ga'nasi hilamilisave.
Ido' ho' ne'mosi nene oko'nido' olo' lo ma do goloso o-ngedamoloseive
17 Nene naniteli'mo ve:
Sipisipi angale O'moso'mi mo'mosi'veu' minive ne'mo nene gizebo o-ngedo mino
minevo' minevo' ogo minaa' neine' noso hinipinita nene ngele'mizo vaa' oloseive.
Ne'mino neivosa O'moso'mo nene ve'ine novozo lemali' lemali' lo-ngedo mineleseive.
Copyright information for `ASO