Romans 1

Paulo' Aza Izesu' Evenele Loma Ebeku' Minani' Nene nGopo'ni Lo Luhuvo Nite' Gize nGimine' Monovo

Paulo' neni' nene Izesu' Kilisito' aposolo mineline lo O'moso'mo nele'mize molo ei' gamazi've lamine' nene lo soto soto' ogo mineline lo do kegese-nedavo Izesu' Kilisito' gono've daa' uve lolo' ogo minuve naza O'moso'mi lulo lengemo ei' evenele lolo' igi minilizave lo lengele'mize molave Loma ebeku' minave lengi' nene luhuvo nite' mene nogize-lingiduve. A'mine O'moso'mi gamazi lamine' nene O'moso'mo lo-ngemavo eze veleuti' gamazi li soto' iga' ave nete gomukuti' mono' godolou' gizikavo minine' ve. A'mine gamazi lamine' nene ei' O'moso'mi gipele Guvetesi ve Izesu' Kilisito'nimu' gizani' ma neive. A'mine O'moso'mi gipele aza evene' okode ne'minesi soto' ine' nene Zuda veti guvetesi ve naba gomu' minive Davidi' a'vopilemo' zuhouti' soto' ogo minine' ve. Ido' ei' Sikalahu've nene atoli'mine ogo lisihe' lamine' minidi'mo O'moso'mo amuzo molo hilinguti' do ote-dine' ne'mo ei' gipele gehepeve minine' nene lelebizave. Ido' ei' Izesu' Kilisito' nene O'mosolo' medelo mino aza nasahili' o-nedo aposolo nele'mize molani' nene naza eze gulive nene do ote-do evene' zuho ato ato' muki' mini'mi monani' nene ezemu' lo-ngemekuvo ezemu' gili ele'vole' igi gamazi've gili di e'metilizave losa nele'mize molani' ve. Ido' Loma ebeku' O'moso'mo Izesu' Kilisitoda lengele'mize molave linginesi nene a'mine O'moso'mo evene' zuho ato ato' mukita viline lo lo-nimine' aleveti muliseuti' nene nizave. Nemu' nene luhuvo nite' mene nogize-lengedo O'moso metehosi ido' Guvetesi ve Izesu' Kilisito' nesi nasahili' i-lingidikesivo ne'mo lengi' muludingu' hongu lo minivo mine lamine' igi minilizave lo O'mosola noluve.

Paulo' Loma Ebeku' Izesu' Zuho Minani' Nene Vo Mono' Gamazi Lo-ngemelesa Lulo Otingumu' Gizine' Gamazi

Gamazi lo ha'na ogo loloze. Gana' nene api' ogo ti' lo noluve: Lingine Izesu' Kilisito' gamazi've amuzo mili gili ele'vole' igi minani' monovotine nene misubou' misubou' buu lo nomonive likevo naza gelo Izesu' Kilisito' velemu' ogo lengi' mukikumu' tangezo' ve lo O'mosola noluve. Ido' ne'mine noluvoni' nene naza ei' gipele'mi gamazi've lo soto' o ngeme'mo mono eze gono nodo lu'ne molo opo'ni laa' nouvoni' O'moso ne'mo ezela luvongu' lengikumu' gamene gamene laa' nouvoni' monovo'ne nene gele neive. Naza nene mo lamineto' noluve. 10 Ido' naza gamene gamene a'mine O'mosola luvo gamenelo' nene ei' gilivo lisihe' o noline' nene naza gomu' lengita alove lo gamene ha'na gele'mo ogo minuvoni'za aka ma soto' o-nidamivo amuvoni' mamu' nene idise aka ma vele-nidavo lengita alohe lo laa' nouve. 11 Ido' ne'mine lo O'mosola laa' nouvoni' nene naza lengita vo O'moso'mi Sikalahutati' daa' noune' amuzo ma nene lehize-lengedekuvo monoku' amuzo mili oti minilizave lo lengita volove lo amuzo molo gelaa' uvoni' nenako nemu' nene laa' nouve. 12 Ido' lengi' do amuzo molo-lengedelove noluvoni' nene naza ti' lo gelosa noluve. Naza lengi' nizada vokuvo lingine Kilisito'nimu' gili ele'vole' iga' nani' nemukisi ido' naza gele ele'vole' oga' nouvoni' monovo'ne nemukisi nene lo volelo' melo' ogo gelo lute do amuzo molalone lo gelosa noluve. 13 Ido' neze zuhokizo, naza lengita volove lo gamene vai' ga'ne gelo minuvoni' nemu' lingine gilamilizani' nene edamoloseive lo gelosa nolo-lingimuve. A'mine gomu' lengita vamuvoni' nene voloni' aka'ne ma ngolo' lamivo vamuvoni'za idise aka'ne ngolo' lavo volosa gelekuve. Aka'ne ngolo' lavo volosa giluvoni' nene evene' linge zuho ato atota vo gono dokuvo gihile izine' ne'mino lengita a'mine'mine ogo vo gono dokuvo gihile izavo mono' lengemeni damenisi minilizave lo volosa giluvoni' ve. 14 O'moso'mo mono' gono nene evene' ato ato' mukita daline lo nimine' nenako nemu' nene nGiliki aleveti monovo'nido' nge'metaa' ave nevo'mine madu'ningu' gamazi lamine' minaa' ine' alevelasi ido' nGiliki aleveti monovo'nido' nge'metamave nevo'mine madu'ningu' gamazi lamine' minesa'mine' alevelasi mukita nene mono' gono daloni' o neive. 15 Nemu' nene Loma ve linginelasi Izesu' gamazi've lamine' nene lo soto' ogo lo-lengemelesa gilingili ogo nouve.

Izesu' Kilisito'nimu' Gamazi Lamine' Nene Amuzo'vesi Neive Lo Paulo' Line' Gamazi

16 Naza Loma ebetasi vo Izesu' gamazi lamine' lo-lengemelove luvoni' nene a'mine gamazi ne'mo O'moso'mo Izesu'nimu' gili ele'vole' ave do ngu' izeline' amuzo've nene do soto' oga' neivosa nemu' nene naza a'mine gamazi lamine' nene lo soto' olosa novozo helamo nolize izo laa' nouvoni' nenako nemu' luve. Ee, a'mine gamazi lamine' ne'mo nene O'moso'mo do ngu' izeline' amuzo've nene gomu' Zuda vela do soto' o-ngedosa Zuda ve minamave nGiliki ve nevo'mida nesi nene do soto' o do novive.

17 Ido' O'moso'mo evene' do ngu' izeline' amuzo've nene Izesu' gamazi ne'mo do soto' oga' neive luvoni' nene nemu' luve: A'mine gamazi laminekuti' nene O'moso'mo evene' do lu' izelido' do lisihe' o-ledaa' neine' aka've nene soto' ogavo ningo gelekune. A'mine aka nene ne'mino neive: Evene' ma laza Izesu'nimu' gele ele'vole' ogo minelone' ne'movo' nene O'moso'mi velelo' evene' lisihe' lamine' lolo' ogo minelesune. Ee, gele ele'vole' olonidotikovo' nene O'moso'mo do lu' izelido' lisihe' ogo minelesune. Neve nene mono' godolou' ti' li gizi nizado' nene vo dave:

Ingine O'moso nenikumu' gili ele'vole' igi minilizadoti'
evene' lisihe' lamine' lili' ilizave nene do ngu' izekuvo
minivi' minivi' ilisave.

Evene' Muki' Lelita Nene Lihimetesivo' None' Nenako Nemu' Nene O'moso'mo Lihime Lemo Lebeleleseive Lo Paulo' Line' Gamazi

18 Evene' laza O'moso mehede emo goloso nite' muki' daa' nouningumu' nene O'moso izebolo' molavo lihimete lemelingumu' nene Okulumokuti' lo soto' ogavo a'mine monovo nene mo gelekune. Ido' gelekune' nenako nemu' nene Izesu'nimu' gele ele'vole' olonidotikovo' do lu' izeleseive luvoni' nene nemu' luvoni' ve. Evene' ingine goloso nite' di minaa' adi'mo O'mosomu' gamazi gihile lamine' neine' nene engi' lu'ningu' soto' ogo mineline' aka've hizi tilaa' nave. Ee, O'mosomu' ingine gililizani' o neine' gamazi gihile lamine' nene O'moso'mo inginela do soto' ogavo a'mine gamazi nene inginela soto' ogosa soto' neive. Soto' neine' nenako a'minemu' gilisa'mani' nene ingine a'mine gamazi gihile lamine' lu'ningu' soto' ogo mineline' aka've nene angise'ine hizi tiladi'mo nene gilisa'mave. 20 Ido' evenelite O'mosomu' gililizani' o neine' gamazi nene O'moso'mo inginela do soto' ine' ve luvoni' nene O'moso'mi monovo linge ma nene vetedunu' ningamolonido' o minine'za O'moso'mo Okulumo' misubo inite' muki' do soto' molavo mine do ogo neivo a'mine inite' muki' ningaa' nounidoti' nene eze monovo vetedunu' ningamolonido' o minine' nene ha ningo gelaa' nounako nemu' luvoni' ve. Ee, do soto' molani' inite' ningaa' nounidoti' nene aza minevo' minevo' ogo minaa' neine' amuzo'vesi ido' emeni dameni've atoli'mine ogo minine' laza ma ivile' amolonido' o minine' nesi nene ha ninge gelelonido' o neive. Ido' ha ningo gelelonido' neine' nenako O'moso huli minilizave ingine nene laza eze monovo danava ningo gelamosa hulune' ve li gamene nabala ma lamilisave. 21 Ingine nene O'moso neive li ei' monovolo ha gili minani'za O'moso neive li eikumu' gilavo dizamivo opo'ni li di naba i-disa'mani' ve. Ne'mine ami ga'ine gilaa' ani' nene vo gopo'napa gehepeve ogo lu'ningu' gilaa' ani' nene gili lamine' ami liti'musou' nizani' gilivo minaa' ani' ve. 22 Ne'mine igi mini ingine leli' nene gate gele nge lo nonive none li minani'za ingine ne'mini ma minami negi hizi mini 23 emeni dameni lamine' atoli'minesi mino helamo minevo' minevo' ogo minaa' ive O'moso nene huli ezelo' medeli evene' minivi' minivi' ami hilaa' nani' neti avazaha nehe ido' nama gaha ize guloti avazaha nehe gosiheliti avazaha nehe ne'mine nite' lolo' igi ngopo'ni laa' ani' ve.

24 Ne'mine igi mini O'moso mehe'ine imikevo nemu' O'moso aza nene ele'ninge va'ninge ingalizani' monovo di gopo igi lu'ine do goloso iline' monovo goloso nene di mini engi' oko'ine di gopo ilisa evene' ingine lu'ningu' lanite' gilado' nene e'metamilizanako lu'ine'mo lanite' gilido' nene ha e'metilizave lo hulo-ngidine' ve. 25 Ingine O'moso gihile nene huli-di ezelo' medeli soza o'moso di soto' igisa inite' muki' do soto' molave O'moso nene gubu' izi imi opo'ni li-dami O'moso asi've lolo' ine' initeto' nene gubu' izi ngimi ngopo'ni li minaa' ani' ve. Ne'mine ani'za inite' mata' do soto' ive O'mosovo' nene laza gamene gamene opo'ni laa' olonido' o neive. Nemu' nene ne'mino minivo. 26 Ido' evene' ne'mine igi O'moso huli-di soza o'moso ngopo'ni li minani' nemu' O'moso aza ninge mate ngimikivo ingine monovo goloso ado' ne'mine igi minani' ve: Vene' nete va'ningesivo' ingalizani' monovo O'moso'mo ganakuti' ngelebizine' ma nene huli O'moso'mo ngelebizamine' monovo goloso di soto' igi engi' vene' oko'ningu' inite' iga' ani' ve. 27 Ido' a'mine'mine igi vemoho' ingine O'moso'mo venekisi ingaa' monovo ganakuti' ngelebizine' nene mehe'ine imi ve malite ve mamu' ma duvo lo oko'ningu' olo' lavo ngovozo nite' goloso di soto' igi angise'ine oko'ningu' inite' iga' ani' ve. Ne'mine adoti' lihime dani' votigilelo' do molo O'moso'mo lihime ngemavo oko'ine nene goloso oga' neive. 28 Ee, ingine O'mosomu' gili minilizani' nemu' nene levelenga li huli-dikevo O'moso aza nene evene' ingine goloso monovomu' gohi gili minikevo a'mine ga'ine gilado' nene e'meti evenelite amilizani' o minine' monovo goloso ato ato' igi mili minilizave lo ninge mate-ngidine' ve. 29 Ne'mino ninge mate-ngedavo evene' ingine lisihe' amine' monovo danava goloso vai' lihime daa' monovo nene engita vai' goloso soto' ivo minani' ve. A'mine monovo goloso nene ne'mini nizave: Mumuzo' iga', evenekumu' lukehe iga', evene' mala inite' lamine' ma soto' o ngemavo ma a'mine vemu' ngizebolo' gohi molaa', evene' ngibili hilaa', lolize hizaa', evene' go'ine izaa', 30 evene' dovo ledevo' ogo ngemenga laa', O'moso'mi biluva've minaa', hokolize' igi hokolizeka li engi' oko'ine di dizaa', monovo goloso di soto' iga', ize'ninge me'ninge lani' gamazi gili hulaa', 31 negi suno suno daa', gamazi angise li hukisa a'mido' e'metamaa', lu'ine ngimamaa', ido' evene' muhele'ine ningamaa' ave muki' ne'mine nene nizave. 32 Ne'mino neivo O'moso'mo evene' ne'mine monovo goloso ilizadoti' nene golo hizi meni've helaa' nene dikevosa lisihe' oloseive line' nemu' nene mo gili minisasi a'mine luvoni' ne'mine monovo goloso nene ha igi mili minaa' nave. Ido' ne'mine iga' nani' nene goloso neine'za ingine a'mine monovo goloso a'nevo' nene ma amave. Ingine ningavo evene' malitesi a'mine luvoni' monovo goloso nene igi mili nizavo ma nene ingine lamine' ve li siza li-ngidaa' nave. Ingine a'ne'mine iga' nani' ne'mo nene goloso gehepeve oga' neive.

Copyright information for `ASO