Romans 13

nGamani Alevete Li Hukilizani' Gamazilo' Nesi Nene Ha Gelekele' Olone' O Neive Lo Paulo' Line' Gamazi

Ido' evene' ma ngamani gono velelo' nizani' nene O'moso'mo lamivosa nene hamokisi ma nizavoba asi ei' O'moso'mo ngele'mize molavosavo' nene nizanako nemu' nene evene' muki' lingine ngamani alevete lado' nene e'meti gelekele' i-ngidilo. Ido' O'moso'mo ngele'mize molani' nenako nemu' nene engi' gamazilo' ma peleseve' izilizani' nene O'moso'mo lido' soto' aveti gamazilo' nene peleseve' izilizani' nenako mo angise'ine ne'mine ilizadi'mo nene lihime dalisave. Ee, ngamani nete evene' ma golise gililiza inite' ngisilizani' nene monovo laminekovo' igi mili minilizave nene golise gililiza inite' ngisilizavoba asi monovo goloso igi mili minilizavevo' nene ne'mine i-ngidilisave. Lingine ngamanimu' golise gelamo minelone' aka've nene do soto' olone li gilisa vise' nahe. Monovo laminekovo' igi mili minilo. Ne'mine ikevo ngamani nete siza li-lingidilisave. Ido' siza li-lingidilizani' nene O'moso'mo ngele'mize molavo ei' gelekele' ve miniisa lengi' lengele'mize lamine' ilisa gono nene daa' nani' nenako nemu' nene lingine monovo lamine' igi mili minilizangumu' nene siza li-lingidilisave. Ne neiha monovo goloso ilizani' nene ngamanite lihime lingimilizani' amuzo nene hazamu' di minamani' nenako nemu' nene golise gili minilo. Nene nanitekumu' ve. nGamani nete nene monovo goloso igi mili minilizaveti monovolo' golo hizi lihime ngimilizangumu' nene O'moso'mi gonolo' izipe've nizani' nemu' ve. Nemu' nene laza ngamani alevete lilizado' e'meto gelekele' o-ngedelone' o neive. Ido' O'mosolo' medeli lihime lingimilizangumukovo' nomive. Asi luteli'mo ngamani gamazilo' peleseve' izaa' ne'mo nene goloso ve lo lo-lemaa' neinako nemukisi nene ngamanilo' gelekele' o-ngedelone' o neive. Ido' nemukisi nene ngamanila takisi moni huli-ngidilizani' o neive. Ingine O'moso'mi gonou' izipe've mini a'mine noluvoni' gono nene daa' nave. Nemu' nene gelekele' i-ngidilo. Evene' muki' hamo hamo' ngimika' ngimika' ilizado' lisihe' o neine' inite' nene mo ha ngimilo. Takisi moni ato atoli'mine evene' ngimilizado' o noline' nene ma ngimilo. Ido' evene' ma dizi minave minikevo ma nemu' nene lengehelele izivo mini di hozi li-ngidilizado' o neivo ma a'mine alevemu' nene lengehelele izivo mini di hozi li-ngidilo.

Monovo Lamine' Ge O-nede Ne O-gede Lo Minelonido' O Neine' Monovomu' Nene Paulo' Line' Gamazi

Ido' linginela golo hizamani' dina' ma neivo ma nene geti golo hizi ngimilo. Evene' hamotasi dina' igisa haza huliki minamilo. Ido' lingine dina' nene di minami golo hizi osukovo' lilizave lo noluvoni'za linginela dina' ne'mine ma minaa' neine' ado' ngeli bekimi amilizani' o minaa' neine' nene ma neive. A'mine dina' nene lingine lutine ge neme ne geme li minilizado' o neine' inite' nemu' nene noluve. Ido' ne'mine noluvoni' nene evene' malite evene' ma lu'ine ngimilizave ingine ne'mine ilizangumu' nene O'moso'mi lou' gamazi'velo' mo e'meti osu' lilizani' nenako nemu' nene noluve. Ee, O'moso'mo lo huko line' gamazi ado' vene' vemoho' lili' ikeni' nete vene' vemoho' masi gopo ingamilo, ido' evene' ma ngibili hilamilo, ido' gumine amilo, ido' evene' maliti inite'nido' mumuzo' amilo line' gamazisi ido' O'moso'mo lo huko line' gamazi ato ato' muki' nesi nene ado' gamazi ti' lo ma neine' ne'mo nene asabu' izo osu' lo neive. Ado' lingine lengi' okodinemu' gilaa' nani' ne'mini lengi' nizada minilizavemu' nene gili lutine ngimilo. 10 Lute ngemaa' noolone' nene leli' nonida minilizave nene ngelo do goloso o-ngedamolosunako nemu' laza lute evene' ngemaa' olone' ne'mo nene O'moso'mi lou' gamazi muki' nene mo e'meto osu' gehepeve lolosune.

Gamene Naba Nene Avito' Oka' Oka' Neine' Nenako Nemu' Nene Laza Monovo Lisihe' Laminekovo' Ogo Molo Minelone Lo Paulo' Line' Gamazi

11 Ne'mine igisa idise gamene'mi monovomu' nene gili minilisave. Ado' api' ogo Kilisito'nimu' gele ele'vole' unidoti' nene O'moso'mo mudise do lu' izeline' gamene nene avito' o'mo ogo mino idise mo avito' oganako nemu' nene lingine lutine okise ongo helo mininguti' upuho' igi di oti-dilizani' o neine' gamene nene mo ogave. 12 Monovo goloso dizo minine' gamene ado' liti'muso ize minine' gamene nene vo'mo vo'mo vo osu' lolosa neivo go' lo labana' eleline' gamene nene mo avito' ogaze. Nemu' nene liti'musou' minave monovo goloso igi mili minaa' nani' nene lingine vasa izi huli hoto' igi monovo goloso lovo i imilisa lovou' inite' ne'mine O'moso'mi labanaku' minavete igi mili ilizado' lisihe' o neine' monovo lamine' nene di otuhi minilo. 13 Ee, evene' labanaku' soto' igi monave nete monovo lisihe' laminekovo' igi mili minaa' adi'mine ogo laza nene monovo laminekovo' ogo molo minelone' o neize. Noso ni sipaki igi longolize izamilo. Ee, mo noso ni sipaki amilo. Ido' vene' vemoho' alu gipe lingine gopo ingamilo. Ido' longovozo hilami monovo goloso galasa gopo iga' monovo nene mo amilo. Inite' mamu' lavodine lemavo evene' mamu' nene gili goloso amilo. 14 Ne'mine monovo goloso nene ogalone li lepesetine ne'mine Guvelesi ve Izesu' Kilisito'ni nene di kisi mini lengemeni dameni liteheli'mo lanite' gelaa' neine' monovo goloso dalizangumu' aka vise' iga' nani' nene mudise hulilo.

Copyright information for `ASO