Romans 14

Lengi' Zuho Malite Monokumu' Ga'ine Ato' Gilangumu' Nene Engi' Monovo'nido' Ize' Mili Lisa Gili Goloso Amilo Lo Paulo' Line' Gamazi

Ido' monoku' gilizevo igi minave ma lengita ikevo ma nene ha ngele'mizi milalo. Ido' ngele'mizi milalizani' nene ingine lingine gatine gilado' vo lisihe' amiline' ga'ine gili nilizangumu' nene lesisi igi gamazidunu' ge hulo ne hulo lilisamu' nene ngele'mizi milamilo. Nene ado' ne'minemu' noluve. Evene' malite gilavo inite' ato ato' muki' naa' nene ha neive. Ne neiha evene' linge ma monoku' gilizevo igi mini ize malise igi mingu' initekovo' naa' nave. Noso' nite' ato ato' muki' naa' nave nete noso' nite' ma malise iga' navemu' nene gilavo haza nite' ve li gilikelizave. Ido' O'moso ne'mo nene noso' nite' muki' gopo naa' avesi nene mo ei' ve lo ngele'mize molani' nenako nemu' nene noso' nite' malise iga' ave nete noso' nite' muki' gopo naa' aveti monovomu' nene ize' mili lamilizado' o neive. Lingine gilavo evene' ato' ne'mi gelekele' izipe'veti monovomu' ize' molo laa' nene lisihe' o neivosa nahe. O'ove. Ne'mino nomive. Engi' monovo'inemu' lilive nene engi' me'nibo'movo' nene ize' molo loloseive. Ido' me'nibo O'moso'mo gelavo monovo'ine lamine' neinako ha oti minilisave lilihe ido' monovo'ine goloso neinako di'mozilisave lilihe nene mo eitokovo' neive. Ido' ei' O'moso'mo do ote-ngedelido' lisihe' o neinako ingine mo oti minilisave.

Ido' gamene hamo hamokumu' gilune' nene evene' linge ma nete gilavo gamene nene dizi limi minaa' naha evene' linge ma nete gilavo gamene muki' nene dizi limi minami mo hamoli'minevo' minaa' nave. Lingine evene' malite gilangumu' ize' mili lami hamo hamo' a'mine gamenemu' gilavo lisihe' iline' akamu' nene gili ele'vole' igi a'mido' e'meti minilo. Evene' ma ingine gamene mamu' nene gamene naba ve li gilaa' nani' nene Guvelesi vemu' gili ne'mine iga' nave. Ido' evene' ma noso' nite' ato ato' muki' naa' nani' nene a'mine noso' nitekumu' nene O'moso tangezo' ve li opo'ni li-daa' nani' nenako neve nene mo Guvelesi vemu' gili minisa naa' nave. Ido' evene' ma ingine noso' nite' ma malise iga' nave ingine Guvelesi vemu' gili malise igi inginesi O'moso tangezo' ve li opo'ni li-daa' nave. Ido' ne'mine noluvoni' nene nemu' noluve: Laza minevo' alevo' olone' nene Guvelesi vemu' minevo' alevo' olosune. Ido' helelone' nesi nene Guvelesi vemu' helelesune. Nemu' nene laza minevo' alevo' olone' nene evene' hamolitesi lelikumukovo' nene ma minevo' alevo' osa'mune. Ido' helelone' nene hamolitesi lelikumukovo' nene ma helesa'mune. Nemu' nene minevo' alevo' ogo minelobe ido' helelobe nene Guvelesi ve'mi evenelevo' nene minelesune. Nemu' nene Kilisito' aza evene' ve'inesi ha nizaveti Guve'inesi ve mino hili nizaveti Guve'inesi ve nesi nene minelongumu' ve losa hiline' ve. Ido' nemukisi nene oto minevo' minevo' ogo neive. 10 Ido' laza mukito' O'moso'mo goni' o-ledelido' eze velelo' vo otekunivo mukito' nene ei' ize' molo-ledeline' o neinako lingine linge ma lengi' zuholiti monovo'inemu' ize' mili laa' nani' nene nanimu' nave. Ido' linge ma nete lengi' zuho mamu' gilavo lemo haza nite' lolo' oga' neine' nene nanimu' nave. 11 Ido' O'moso'mo goni' o-ledelido' nene ha volosune noluvoni' nene mono' godolou' gamazi ma ti' li gizi nizani' neine' nenako nemu' nene noluve:

Guvelesi ve'mo ti' lo nolive:
Naza nouvoni' nene soza nomive. Mo gamazi gihile lamineto' neive.
Ido' a'mine'mine ogo
naza evene' hamo hamo' muki' lingine obuvotine hizi neni' gubi' izi nimi
Gaza O'moso gihile nane li li soto' ilisave lo noluvoni' nene
gamazi gihile laminekovo' noluve.
12 Nemu' nene laza evene' hamo hamo' muki' leli' ogo molo minune' monovote nene lo soto' ogo lo-emelesune.

Leli' Ogo Molo None' Initeto' E'meti Leze Zuho Malite Goloso Ve Li Gilani' Inite' Disa Lihime Dikelizave. Leli' Monovotelo' Gizebo Lamine' Olosune Lo Paulo' Line' Gamazi

13 Nemu' nene laza ge ize' molo-nede ne ize' molo-gede lo minaa' monovo nene hulo gohi amolone. Asi lingine ti' li gili minilo. Leze zuho ma nene limi ingikelizaze. Laza ngele'mize goloso oga' monovo nene amolone. 14 Naza Guvetesi ve Izesuda gi'mize nouvonako ne'mo nene ti' lo gele ele'vole' gehepeve o nouve: Noso' nite' leli' lute do goloso o-ledaa' emeni damenisi minine' noso' nite' ma nomive. Ne neiha evene' malite inite' mamu' nene lute do goloso oga' inite' ve li gililizani' nene a'mine inite' neve nene engi' lu'ine do goloso oga' inite' lolo' oloseive. 15 Ne neiha lingine lengi' zuho malite noso' nite' mamu' nene lute do goloso oga' inite' ve li gili nizani' noso' nite' ma gopo naa' ilizadi'mo nene a'mine lingine zuho di goloso i-ngidilizani' nene mo lutine ngemaa' monovolo' e'metami minilisanako nemu' nene lingine ne'mine ogo leze zuho ngele'mize goloso oga' monovo ma amolone li gili minisa noso' nite' nalizadoti' nene Kilisito' engito' hilive nene vi tolovo ilizani' akalo' ngele'mizi milamilo. 16 Noso' nite' ma nalobe ido' malise ogo minelobe ne'mo nene O'moso'mo gizebo o neine' akau' nene inite' naba nomive. Asi O'moso'mi Sikalahu' ne'mo nene do soto' o-ledaa' monovo ado' monovo lisihe' laminekovo' ogo molo minaa' nesi ido' muludeu' hongu lo lamino minaa' nesi ido' luteu' gulumo avile lisivo minaa' monovo nesi nene inite' naba neine' nenako nemu' nene lingine monovo lamine' nehe li noso' nite' ha gopo nikevo lengemenga likelizaze. Alamilo. 18 Ne'mine igi Kilisitoda gelekele' i-di minilizave ingine nene O'moso'mo mulunou' lamine' geleline' inite' igi mili mini evene' nesi ningavo lisihe' iline' monovolo' nene e'meti minilisave.

19 Nemu' nene lingine lengiku' hongu li bizi lamini miniliza monovolokisi ido' monoku' ne hize ele' o-gede ge hize ele' o-nede li minilizado' lisihe' o neine' monovo ato atokisi nene amuzo mili e'meti minilo. 20 Noso' nite' ha gopo nalizani' ne'mo nene lingine O'moso'mi gono di goloso amilo. Noso' nite' ato ato' muki' nene lute do goloso amaa' neiha ha gopo nokunivo ne'mo nene evene' linge ma monokuti' limi ingalizani' nene monovo goloso olosune. 21 Nemu' nene ize me'mele nehe vaini noso nehe inite' ma nehe nene lingine nalizadi'mo lengi' zuho linge ma mono' akaloti' nene vi zovo' izilizani' nene lingine a'ne'mine inite' malise ilizani' nene lamine' o neive. 22 Ido' a'ne'mine initekumu' nene lingine hamo hamo' gilani' nene lengikisi O'mosolokisivo' neivo lengi' hamo hamokovo' gili minilo. Evene' ma nete monovo mamu' nene ne'mine oga' ha neive li gilangumu' nene engi' lu'ine'mo goloso ve lo goni' o-ngedamiline' nene engi' minevo' alevo'ine lamine' neivo ngolize izilizado' lisihe' o neive. 23 Evene' ma inite' mamu' nene nalone' lute do goloso ilihe li ga'ine seta' gili minisasi a'mine inite' gopo nalizani' nene mo O'moso'mo lihime molo-ngedeleseive. Nene nanitekumu' ve. Laza inite' mamu' nene monovo lisihe' ve lo gele ele'vole' amosasi ha gopo olone' nene monovo goloso une' gelavo lihime dalone' nenako ido' ingine a'mine inite' naa' nene lisihe' o neive li gili ele'vole' amisa nalizani' o neinako nemu' nene O'moso'mo lihime molo-ngedeleseive.

Copyright information for `ASO