Romans 3

O'moso'mo Zuda Ve Hize Ele' O-ngedo Gamazi've Lehize-ngidine'za A'mine Lido' Nene Azasi Gele Do Mino A'mido' Gili Damave Nene Lihime nGemelido' Lisihe' O Neive Lo Paulo' Line' Gamazi

Ido' naza nene ne'mine luvoni' nemu' nene Zuda ve lingine lutingu' nene gopo gatine gili longo' ne'minisa ilizani' o neive: O'moso'mo ningivo Zuda vesi ido' heta ato' vesi nene mo lisihekovo' o minaa' noune' noline' nene laza Zuda ve minuningumu' Zuda ve minamave ngivile' ogo hize ele' o-ledaa' neine' nene nanitedunu' hize ele' o-ledaa' neive. Ido' laza O'moso'mi noso okodela molaa' noune' neloti' nene inite' lamine' nene nanite' soto' o-ledaa' neive li longo' ilisave. Ne'mine ilisaha inite' lamine' vai' goloso vauve elosa lelita neive. Inite' naba gana' nene O'moso'mo lo huko lo-lidine' gamazi've nene Zuda ve leli' nene di minilizave losa lehize-lidine' ve. Ne neiha Zuda ve linge ma nete nene a'mine O'moso'mo lehize-lidine' gamazilo' nene e'metamani' ve. Nemu' nene ve malite nene ti' li longo' ilisa gili nilisave: Ingine gamazi'velo' e'metamani' nemu' O'moso'mo a'mine gamazilo' e'meto amilido' o neihe. O'ove. E'metamilivoba asi a'mine gamazi'velo' nene ha mo e'meteleseive. Evene' vai' nene sozalo' vevo' minilisaha O'moso neve nene gamazi gihile laminekovo' laa' ive mineleseive. Ne'mine neingumu' nene mono' godolou' ti' li gizi nizani' ma neive:

Ne'mino neine' nene nanitekumu' ve.
O'mosoo, gaza gamazi lisihekovo' liline' o neine' nene mo
soto' neivo goniku' nesi nene gasika ngivile' olosane lo neive.
Nemu' nene naza mene evenelite iga' nani' monovolo' do molo ti' lo noluve: Laza monovo goloso ogo molo oga' noune' ne'mo nene O'moso'mi monovo lisihe' lamine' nene do soto' o-daa' neine' nenako O'moso aza monovote golosomu' lihime lemeline' nemu' nene monovo do goloso ogave lo ha lo-delonido' o neihe. O've. Mo keke' ne'mino nomive. Ido' ne'mine minidiniko O'moso'mo me misubou' ve muki' ize' molo-ledeline' nenako nado ize' molo-ledelido' lisihe' o minidine. Ido' ve ma ti' lo loloseive: Naza soza gamazi luvodiniko O'moso'mo nenikumu' lihimelo' ve minane lo lihime nimidine. Ne neiha evene' nete a'mine soza gamazi'nemu' gililizadoti' nene O'moso'mo gamazi gihile laminekovo' laa' neine' monovo've nene soto' gehepeve ogavosa ezemu' nene gohi opo'ni li di naba igi li-dilizado' idine. Ido' ne'mine idiniko naza inite' lamine' do soto' uvoni' gilidine. Nemu' neni' nene lihimelo' ve ve lo lihime nene nanimu' nimidine. Ee, ve malite lelikumu' nene divi ledivi' igi ti' li laa' nave: Paulole laa' nani' nene ne'mino neive: Monovo goloso ne'mo monovo lamine' do soto' iline' nenako nemu' ne'mine ilingumu' ve lo laza nene ha monovo goloso ogo molo minelesune. Ido' ne'mine laa' nene mo lamine' nehe. O'ove. O'moso'mo ne'mine laa' ave nene lihime ngemelido' lisihe' i nizave.

Evene' Mukikuti' Nene O'moso'mi Velelo' Ve Lisihe' Hamokisi Minamune Lo Paulo' Line' Gamazi

Neloti' nene laza nadive lo gelelone. Zuda ve leli' nene evene' linge muki' ngivile' ogo lamine' nobe. O'ove. Ne'mino minamune. Mo Zuda vesi a'mine Zuda ve minamavesi nene mo lihime monovoli'mo nene adelo' do minivevo' none lo naza mo lo-lengemekuvoni' ma ve. 10 A'mine me luvoni' gamazi ne'mo nene mono' godolou' gamazi ma ti' li gizi nizado' vo do neive:

Me misubou' nene evene' lisihe' lihime'vesi nomive nene
mo keke' hamokisi ma nomive.
11 Aka laminekumu' ningi gilave nene hamokisi ma nizamave.
Ido' O'moso ningelone li ezemu' vise' iga' ave nene mo keke' ma nizamave.
12 Ido' evene' muki' nene aka lamine' huli zovo' izi visa vi goloso nave.
Ve ma monovo laminekovo' i di vi minaa' ave nene
mo keke' hamokisi nizamave.
13 Lu'ninguti' vomine gamazi laa' nani' nene
gonoso galese ngolo' lo mininguti' unuvo goloso oga' neine' ne'minosa nene neive.
Ido' gamazi laa' nani' nene evene' go'ine izisavo' nene laa' nave.
Ido' sata' ume nete evene' ongovuso' ngibilaa' nani' ne'mino
ingine gamazi laa' nani' ne'mo nene ngebelaa' neive.
14 Ido' engita gamazi goloso ekese' lo-ngedaa' monovo nene ve'ningu' vai' lo neive.
15 Ido' gize'ine ne'mo nene evene' ngebelaato' lite' lo ngele'mizo vaa' neive.
16 Ido' zaa' zaa' akalo' vilizahe a'mida nene
inite' mata' di goloso gehepeve iga' ido' evene' geni ngimaa' ne'mine iga' nave.
17 Ne'mine igi minisa ingine hongu lo lamino minaa' aka nene mo keke' ningamave.
18 Ido' O'mosomu' golise gelaa' monovomu' nene mo ningi gilisa'mave.
19 Ido' O'moso'mi lou' gamazi'mo ne'mine line' nene a'mine lou' gamazi'mi gesi mingu' minunivemu' line' nene mo gele none. Ne'mine line' nene me misubou' aleve muki' laza lolone' gamazi nomivo lu' izo mino O'moso'mi velelo' goni' o-ledelido' lisihe' ogo mineloningumu' nene ne'mine line' ve. 20 Nemu' nene O'moso'mi lou' gamazilo' e'metelesa olonidoti' nene evene' hamokisi O'moso'mi velelo' nene gamazite nomine' ngelo minamolosune. Nanitekumu' ve. A'mine lou' gamazi ne'mo nene lihime daa' monovo danava nene do soto' gehepeve ogosa lelebizaa' neive.

O'moso'mi Velelo' Evene' Lisihe' Minelone' Nene Izesu' Kilisito'nimu' Gele Ele'vole' Ogosavo' Minelesune Lo Ne'mi Monovo Paulo' Lo-ngimine' Gamazi

21 Ne neiha O'moso'mi velelo' evene' lisihe' mineloningumu' nene louto' e'metaa' aka ne'mo nene vo damivo O'moso'mo a'minemu' gele hulo aka ato' nene idise do soto' o-lede neive. A'mine akamu' nene O'moso'mi gamazi ne'mosi livo ido' polohetelite gizani' gamazi ne'mosi livo setato' a'minemu' nene li soto' asine' ve. 22 A'mine aka nene ne'mino neive: O'moso'mo evene' lisihe' ve lo-ngedeline' nene ingine Izesu' Kilisito'nimu' gili ele'vole' i nizangumu' ve lo Izesu' Kilisito'nimu' gili ele'vole' ave mukikumu' nene loloseive. Ee, evene' muki' nene lihime daa' noune' nenako O'moso'mi emeni dameni lamine' goloso nene do ti' olonido' lisihe' amune. Nemu' nene O'moso'mo Zuda ve nene ve lisihe' ve lo-ngedeline' aka nene ato' ma neivo Zuda ve minamave nene ve lisihe' ve lo-ngedeline' aka nene ato' ma neivoba asi mo aka hamokovo' nene neive. 24 Ne'mino neine' nenako O'moso'mo ve lisihe' ve lo-ledeline' nene laza ne'mine lo-ledelido' lisihe' amuba haza ei' lulolo' do molo nasahili' o-ledo ve lisihe' ve lo-ledeleseive. Ne'mine lo-ledeline' nene Izesu' Kilisito' aza lihimetemu' golo hizo helo kuluhize-ledaa' aka do soto' ine' nemukovo' nene ve lisihe' ve lo-ledeleseive. 25 Ido' O'moso'mo kuluhize-ledeline' aka Izesu' Kilisito' do soto' ine' nene aza leli' lihimetemu' nene ei' vanise've hulo hilingumu' nene gele ele'vole' okunivo ne'mo nene O'moso'mi izebolo've lelikumu' nene do mate-delive losa ele'mize molavosa kuluhize-ledaa' aka nene do soto' ine' ve. Izesu' ne'mine ilive lo O'moso'mo ele'mize molani' nene gomukuti' lihime daa' ani' mamu' nene gelo geto lihime ngemamo hongu lo mino ninge mate-ngidine' nenako nemu' nene ei' monovo've lisihe' o neine' nene ningi gililizave lo lelebizelesa ele'mize molani' ve. Ido' ele'mize molani' nene idise gamenela ei' monovo've lisihe' nene ado' ve lisihe' minosasi ido' Izesu'nimu' gele ele'vole' nolonivemu' nene ve lisihe' ve ha lo-ledelido' lisihe' o neine' nene lelebizelesa ele'mize molani' ve.

27 Ne'mino laza ve lisihe' ve lo-ledelido' lisihe' minamosa haza Izesu' Kilisito'nimu' gele ele'vole' unidotikovo' O'moso'mo ve lisihe' ve lo-ledaa' neine' nenako laza okode do dizelonido' nene lisihe' amive. Okode do dizelone' aka nene mo hize tile lamine' ogave. Nene nanitekumu' ve. La'lisete lou' gamazilo' e'metekunivosa O'moso'mo ve lisihe' ve lo-lididiniko a'mine aka nene hize tilamidine'za asi Kilisito'nimu' gele ele'vole' okunivosavo' nene ve lisihe' ve lo-ledaa' neine' nenako nemu' nene leli' okode do dizaa' aka nene mo hize tile lamine' ogave. 28 Ee, laza ti' lo gele none: O'moso'mo evenekumu' ve lisihe' ve lo-ledeline' nene lou' gamazilo' e'mete osu' lube lamube nemu' gele hulo Izesu' Kilisito'nimu' gele ele'vole' okunivosavo' nene ve lisihe' ve lo-ledeleseive. 29 Lingine gilavo O'moso nene Zuda ve minamaveti O'moso'ine minamo Zuda veti O'mosotevo' neihe. O'ove. O'moso nene hamokovo' neine' nenako nemu' nene aza mo Zuda ve minamave neti O'moso'inesi nene mino O'moso'mi noso okodela mulunive Zuda ve nene a'mine Kilisito'nimu' gele ele'vole' okunivo ne'mo nene ve lisihe' ve lo-ledaa' ogo ido' O'moso'mi noso oko'nida milisa'mave heta ato' vesi nene a'mine Kilisito'nimu' gili ele'vole' ikevosavo' nene engikisi O'moso'mo ve lisihe' ve lo-ngedeleseive. 31 Nemu' nene malite ti' li longo' ilisave: Ne'mino neine' nenako Kilisito'nimu' gele ele'vole' oga' ne'movo' nene O'moso'mo ve lisihe' ve lo-ledelido' lisihe' o neive li likenako lingine nene louli'mi gono nene mo osu' lave lisa nilahe. O'ove. Laza mo keke' ne'mine lamune. Asi laza ne lou' nene hize ele' noo-dune.

Copyright information for `ASO