Romans 4

Gomu' Abalahamu'ni O'moso'mo Ve Lisihe' Ve Lo-dine' Monovo've Malo' Nene Ningo Geleloningumu' Paulo' Line' Gamazi

Nemu' nene laza leli' Zuda veti zuho do soto' ive avoteho Abalahamu'nida soto' ine' inite' mamu' nene laza a'mido' do molosa lo gele ha gele ogo gelelone. Abalahamu' nene aza monovo laminekovo' ogo molo minidoti' O'moso'mo ve lisihe' ve lo-didiniko aza nene ei' oko'no do dizelido' lisihe' o minidine'za O'moso'mi velelo' nene aza ne'mino ma minamidine. A'minemu' nene mono' godolou' nene nadive li gizi nizani' neve. Mene gililo:

Abalahamu' aza O'mosomu' gele ele'vole' o minavo
aza nene ve lisihe' ve lo-dine' ve.
Ve mali'mo ve malo' gono davo a'mine ve meni emeline' nene haza gidini noimuve lo gelosa emelivoba asi nenito' gono nodavo dina' neine' nene golo nohizuve lo gele minosa meni nene emeleseive. Ido' a'mine'mine ogo laza ogo molo olone' ne'mo O'mosolo' gono nodune' gilivo mino monovo lamine' gehepevelokovo' e'metunidiniko O'moso'mo a'mido' golo hizo meni ne'mine lemo ve lisihe' ve lo-lididine'za mo ne'mino nomive. Nemu' nene ve ma laza a'mine ogo molo olone' initetoti' nene menite ne'mine ve lisihe' ve lo-ledelido' nomive lo gelosa ido' O'moso aza nene lihime'inesi vemukisi ve lisihe' ve lo-ngedaa' ive ve lo laza ogo molo olone' initeto' nene gele medelamo ezemu' haza gele ele'vole' olone' nene aza ezemu' gele ele'vole' oloningumukovo' nene ve lisihe' ve lo-ledeleseive. Ido' neni' luvoni' ne'mino Davidi' aza O'moso'mo evene' igi mili minani' monovomu' nene gele hulo ve lisihe' ve lo-ngedelive nene ngolize izilizado' lisihe' i nizave lo ti' lo line' ve:

Ve ma lou' gamazi've avuto' angumu' nene
O'moso'mo gele hulo lihime'ine hulo-ngedelive nene
ngolize izilizado' lisihe' i nizave.
Ee, ve ma lihime'ine O'moso'mo do-ngede minamilive nene
ngolize izilizado' lisihe' i nizave.
Lingine gilavo a'mine ne'mino lolize izelonido' lisihe' oga' monovo mene O'moso'mi noso okodela mulunive Zuda velavo' soto' oga' neine' nehe ido' O'moso'mi noso oko'nida milisa'mave Zuda ve minamavelasi soto' oga' neine' neve. Nemu' nene lo gele ha gele olonge. Gililo. Laza ti' lo laa' none: Abalahamu' O'mosomu' gele ele'vole' ine' ne'mo O'moso ezemu' ve lisihe' ve lo-dine' ve. Nemu' nene a'mine luvoni' monovo nene O'moso'mi noso oko'nida milisa'mavelasi soto' oga' neive lo ningo gele none. Nanitekumu' ve. 10 O'moso'mo lihime'vemu' gele hulo Abalahamu'ni ve lisihe' ve lo-dine' monovomu' nene gohi gelosa gelelone. Abalahamu' oko'nola O'moso'mi noso molosa neivo O'moso'mo ve lisihe' ve lo-dine' nehe olihe O'moso'mi noso oko'nola molamivosa lo-dine' neve. O'moso'mo ve lisihe' ve lo-dine' nene oko'nola O'moso'mi noso neivosa nevoba asi olihe nomivosa ve lisihe' ve lo-dine' ve. 11 Ne'mine ogo Abalahamu' oko'nola O'moso'mi noso nomine' mino O'mosomu' gele ele'vole' ogo minine' nemu' nene O'moso'mo ve lisihe' ve lo-dine' nene do soto' olosa a'mine noso nene ei' oko'nolo' nene molani' ve. Ne'mine ine' nenako Abalahamu' aza O'moso'mi noso oko'nida nomine' minisa O'mosomu' gili ele'vole' ilizadoti' nene O'moso'mo ve lisihe' ve lo-ngedeliveti me'nibo lolo' ine' ve. 12 Ne'mino engi' me'nibo lolo' ogo minine' nene laza O'moso'mi noso okodela mulunive linge maliti meteho nesi neive. Ado' laza nene avoteho Abalahamu' O'moso'mi noso oko'nola nomivo mino gele ele'vole' ogo minine' monovo'velo' e'meto mino O'moso'mi nosovo' nene okodela mulunivoba asi gele ele'volekisi o noniveti meteho nesi nene neive.

O'moso'mo Lemelove Lo Lo Huko Salani Molo-lidine' Inite' Dalone' Nene Louto' E'metelonidoti' Dalonivoba Asi O'mosomu' Gele Ele'vole' Olonidotikovo' Nene Dalosune Lo Paulo' Line' Gamazi

13 Ido' naza ne'mine noluvoni' nene memu' luve: O'moso'mo Abalahamu'ni misubo muki' nene ei' a'vopilemokisi salani molo-lengedekuve lo lo huko-dine' nene lou' gamazi gomukuti' ma minido' e'meto miningumu' nevoba asi O'mosomu' gele ele'vole' ogo miningumu' nene O'moso'mo ve lisihe' ve lo-dine' nenako nemu' nene a'mine salani gamazi lo huko-dine' ve. 14 Ee, lou' gamazilo' e'metelonidoti' nene a'mine salani inite' nene ma dunidiniko O'mosomu' gele ele'vole' oga' monovo nesi ido' a'mine O'moso'mo Abalahamu'ni lo huko-dine' gamazi nesi nene vi haza nite' lolo' asidine. 15 Naniteli'mo ve. Lou' gamazilo' e'metaa' ne'mo nene O'moso'mo izebolo' molavo lihime lemeli akalo' lele'mize molaa' neive. Ne neiha lou' gamazi ma minamilidokovo' nene lou' gamazi avuto' olone' aka ma minamoloseive. 16 Nemu' nene a'mine salani inite' dalone' nene mo O'mosomu' gele ele'vole' olonidotikovo' nene haza gidini doso' o neive. Ee, a'mine lo huko-lidine' inite' nene O'moso'mo haza nasahili' o-lididi'movo' nene Abalahamu' a'vopilemo' zuho muki' ado' Mose' lou' gamazi'mi gesi mingu' nonivesi ido' a'mingu' minami Abalahamu' aza O'mosomu' gele ele'vole' idi'mine igi gili ele'vole' ilizavesi nene laza mukito' dalonido' lisihe' o minelive losa lehize-lidine' nenako gele ele'vole' olonidotikovo' nene haza gidini doso' o neive. Abalahamu' nene a'mine ne'mino dalonive mukiliti meteho nene neive. 17 Ne'mino meteho minine' nene a'minemu' O'moso'mo line' gamazi mono' godolou' ti' li gizi nizani' ma neive:

Naza nene evene' zuho ato ato' mukiliti avo'nibo mineline lo
gele'mize molokuve.
Ee, O'moso'mi velelo' nene a'mine lo huko line' gamazi nene mo ele'vole' o neive. Ido' O'moso aza nene hilavemu' gohi ve'ine gizilizave lo hilanguti' nene gohi do ote-ngedaa' ive mino ido' olihe soto' amani' inite' nene mo soto' ani' gilivosa a'minemu' nene ha lo soto' oga' ive nesi neive.
18 Ido' Abalahamu' nene O'moso'mo lo huko-dine' inite' soto' o-deline' aka nene nomine'za aza nene a'mine inite' soto' iline' aka nene mo ninge minine' gelavo mino aza nene O'moso'mo ga'vopilemo' nene ne'mini muki' soto' ilisave lo lo-nimido' nene gihile izavo evene' zuho ato ato' mukiliti avo'nibo ha lolo' olosuve lo gele ele'vole' ogo minine' ve. 19 Ido' ne'mino gele ele'vole' ogo minine' nene aza kilisimasi've vanu hadeti (100) ne'minesi mino oko'no've nene gilisupo molangumu' nesi nene ha gele mino ido' Sala' aza nesi nene eleni molavo izipe gedeline' gamene nene osu' lavo minine' neemukisi nene mo ha gele minine'za gele ele'vole' ogo minine' nene matamine'. 20 A'mine ne'mino O'moso'mo lo-dine' nemu' nene gele hepe' lizo gala seta' gelamine'za gele ele'vole' ine' ne'mo amuzo molo minavosa O'moso nene opo'ni laa' ine' ve. 21 Ido' a'mine gamazi lo huko-nidive O'moso ne'mo a'mine gamazi nene do gihile izelido' mo lisihe' o neine' nenako ha do gihile izeleseive lo gele mu'musi' gehepeve ogo minine' ve. 22 Ne'mine ogo minine' nenako a'neemu' nene O'moso'mo ve lisihe' ve lo-dine' ve. 23 Ido' O'moso'mo ne'mino ve lisihe' ve lo-dine' mono' godolou' gizi nizani' nene eikumukovo' neive li gililizave lisa gizi nizani' nevoba 24 asi Guvetesi ve Izesu' Kilisito' hilinguti' do ote-dive O'mosomu' gele ele'vole' ogo minunivo O'moso'mo ve lisihe' ve lo-ledelive lelikumukisi nene gizi nizani' ma neive. 25 A'mine Guvetesi ve Izesu'ni nene leli' lihimetemu' medelo helelive lo O'moso'mo eveneliti a'ningu' molavo helavosa leli' nene ve lisihe' ve lo-ledeline' aka velo hilinguti' nene gohi do ote-dine' ve.

Copyright information for `ASO