Romans 5

O'mosomu' Gele Ele'vole' Okunivo Aza Ve Lisihe' Ve Lo-ledeline' Ne'mi Gihile Lelita Mineline' Monovomu' Nene Paulo' Line' Gamazi

Nemu' nene ezemu' gele ele'vole' unidoti' nene O'moso'mo ve lisihe' ve lo-ledavo mino O'moso'mo lelikumu' izebolo' molani' nene mateline' aka Guvetesi ve Izesu' Kilisito' velavo ne'mo nene O'mososi lezesi vovoteu' nene gamazisi nomivo lamine' none. Ee, idise mela O'moso'mo nasahili' noo-lidivo none' aka nene a'mine Guvetesi ve ne'mo vele-ledavosa a'mingu' none. Ido' a'mingu' mino O'moso'mi emeni dameni lamine' nene mudise do leli' olosune lo a'minemu' nene gilingili ogo gizebo ogo lolize izo minaa' noune. Ido' nemukovo' lolize izesa'mune. Laza geni initeli'mi lulou' minelone' ne'mo nene O'mosomu' gele ele'vole' ogo mino geni gehe do dizo minelone' amuzote do naba o-ledaa' neive lo gele mino geni inite' lelita miningu' nesi nene a'mine genimu' nene ha lolize izo minaa' noune. Ido' O'mosomu' gele ele'vole' ogo mino geni gehe do dizo minelone' ne'mo nene O'moso'mo ninge lamine' iline' lemeni dameni nene do soto' o-ledeleseive. Ido' O'moso'mo ninge lamine' iline' lemeni damenisi minelone' ne'mo leli' nene O'moso'mo do eita oloseive lo laza gele mu'musi' olonido' nene do lisihe' o-ledaa' neive lo nesi nene gele none. Ido' a'mine gele mu'musi' une' inite' nene vo haza ogavo lovozo ngelo ma helamolosune. Nene nanitekumu' ve. O'moso'mo ei' Sikalahu've lehize-lidine' ne'mo nene luteu' gono do O'moso'mo vauve elo lulo limine' ne'mi monovo nene do soto' ogo lelebizaa' neine' nenako nemu' nene a'mine gele mu'musi' une' inite' nene vo haza ogavo lovozo ngelo ma helamolosune. Ido' O'moso'mo lulo vauve elo limive luvoni' nene neemu' luve: Laza nene O'moso e'metelonido' minamo lute gilizevosi ha nonivo O'moso'mo molani' gamene nene lisihe' ogavo Kilisito' nene a'mine O'moso e'metamunivemu' nene medelo hiline' ve. Evene' lisihe' gehepeve nene bililisa navo ma evene' hamoli'mosi ezelo' medelo helelove lo ngelo ma lamoloseiha ma liline' nene laza amoso' inite' nene olosa lave lo ha gelelesune. Ido' evene' lamine' gehepevelokisi nene medeli evene' muki' nete ngeli ma hilamavo hamo hamolitevo' nene helaakumu' golise gilani' nene gili huli amuzo mili ma hililizahe lo gele nouve. Ne neiha O'moso'mo lulo atoli'mine ogo leme neine' nene ne'mino do soto' ogo lelebizave: Laza nene ha lihimelo' ve nonivo Kilisito' aza evene' amiliza inite' gehepeve ogo lelito' medelo hiline' ve. Nemu' nene ti' lo gelelesune: Kilisito' aza lelito' medelo lihimetemu' vanise've hulo helavo nemu' nene O'moso'mo idise ve lisihe' ve lo-ledavo none' nenako nemu' O'moso'mo evenekumu' izebolo' molani' nene Kilisito' do matosa lihime lemelinguti' do lu' izelingumu' nene mo gele mu'musi' olonido' o neive. 10 Ido' ne'mine noluvoni' nene nemu' noluve: Laza O'mososi biluva' ogo noningu' nene ei' O'moso'mi gipele nene lelikumu' helo O'mososi do hamo' o-lidine' nene mo amoso' inite' dani' nenako nemu' nene laza O'mososi do hamo' o-ledavo noningu' nene aza hilinguti' gohi minevo' alevo' o neine' ne'mo nene haza ilido' o neine' inite' ogo mudise do lu' izeleseive lo gele mu'musi' gehepeve olosune. 11 Ido' neevo' nevoba asi Guvetesi ve Izesu' Kilisito' ne'mino idise O'mososi do hamo' o-ledavo none' ne'mo nene O'mosomu' lolize izo minaa' noune.

Adamudati' Nene Helaa' Monovo Soto' Ogavosa Kilisitodati' Nene Helaakuti' Otosa Minevo' Minevo' Oga' Monovo Nene Soto' Ine' Ve Lo Paulo' Line' Gamazi

12 Nemu' nene laza ti' lo gele none: Me misubou' lihime soto' ine' nene ve hamoli'mo do soto' ogavo a'mine lihime ne'mo nene helaa' monovo do soto' ine' ve. Ne'mine ogavo evene' muki' nene lihime daa' noune' nenako helaa' nene leli' mukita soto' o limine' ve. 13 Ee, Mose' lou' gamazi olihe soto' amivosa me misubou' nene evene' lihime daa' ani'za lou' nomida nene O'moso'mo lihime do molo-ngedamaa' neine' ve. 14 Ne neiha lou' nomine' gameneu' nene ado' Adamu' minidoti' mine do dizo vo Mose' lou' gamazi dani' gamenela nene evene' soto' igi mini'mi ave muki' ingine Adamu'ni O'moso'mo lo huko-dine' gamazi avuto' idi'mine igi lihime ma damani'za inginesi nene helaali'mi gesi mingukovo' mini hilaakovo' ani' ma neive. Ido' Adamu' neve nene alinge' soto' ilivemu' ha avazaha've ne'minosa nene soto' ine' ve.

15 Ne neiha a'mine evene' hamoli'mo api' ogo O'moso'mo lo huko-dine' gamazi avuto' ogo lihime dadoti' nene evene' muki' helaa' noune'za a'mine Adamu' lihime dani' nene ivile' goloso ivosa O'moso'mo nasahili' o-lidine' nene evene' hamo' Izesu' Kilisito' ne'mo haza gidini vauve elo a'mine nasahili' nene evene' mukito' do soto' o-lidine' nenako nemu' nene Adamu'ni O'moso'mo lo huko-dine' gamazi avuto' ine' ne'mi gihile nene atoli'mine ogo neivo ido' O'moso'mo nasahili' o-lidine' ne'mi gihile nene atoli'mine ogo neivo ato atoli'mine igi nizasive. 16 Ee, a'mine evene' hamoli'mo lihime dani' ne'mi gihile nene atoli'mine ogo neivo O'moso'mo haza gidini o-lidine' initeli'mi gihile nene atoli'mine ogo neive noluvoni' nene nemu' noluve: A'mine lihime hamo' dani' ne'mo nene O'moso'mo goni' o-ledo lihime lemaa' neine' nene do soto' ine'za laza gamazi've avuto' vai' oga' noune' neivosa O'moso'mo nene haza gidini o-lidine' inite' ne'mo nene aza gamazite do helo ve lisihe' ve lo-ledaa' neine' nene do soto' ine' ve. 17 Lamine', evene' hamoli'mo O'moso'mo lo huko-dine' gamazi gana' avuto' idoti' nene evene' laza helaali'mi gesi mingukovo' mino helaa' noune' nenako ido' ve hamo' Izesu' Kilisito' o-lidine' inite' ne'mo helaa' nene ivile' goloso ogavosa O'moso'mo vauve elo nasahili' o-ledelidoti' ve lisihe' ve lo-ledelive laza nene guvetesi ve ne'mine lolo' ogo minevo' minevo' ogovo' minelesune. 18 Nemu' nene ti' lo gelelesune: Ve hamoli'mo O'moso'mi gamazi avuto' idoti' nene evene' muki' nene O'moso'mo goni' o-ledo lihime lemelido' o none' ne'mino ve hamoli'mo monovo lisihe' gehepeve ogo molo idoti' nene O'moso'mo gamazite do helo ve lisihe' ve lo-ledavo evene' muki' minevo' minevo' ogo minelonido' o none' ma neive. 19 Ee, evene' hamoli'mo O'moso'mi gamazi gele hulidoti' nene evene' muki' lihimelo' vevo' lolo' une' ne'mino ve hamoli'mo O'moso'mi gamazi gele do osu' lidoti' evene' muki' nene ve lisihe' lolo' olosune. 20 Ne'mine o neiha O'moso'mo lou' gamazi've do soto' ine' nene lou' avuto' oga' monovo nene naba o'mo vo minelive losa do soto' ine'za lihime daa' monovo naba o'mo vo minida nene a'mine naba o'mo vine' votigile nene ivile' goloso ivosa O'moso'mi nasahili' nene atoli'mine ogo soto' ogo minine' ve. 21 Ido' ne'mine ine' nene nanitekumu' ve. Lihime daa' monovo ne'mo helaali'mi gesi mingu' hulo-ledavo a'mingu' mino helaa' noune' ne'mino Guvetesi ve Izesu' Kilisito' gono dani' ne'mo nene evene' lisihe' lolo' o-ledo O'moso'mi nasahilili'mi gesi mingu' hulo-ledavo a'mingu' mini minivo' minivo' ilizave losa ne'mine ine' ve.

Copyright information for `ASO