Romans 8

Kilisito' Aza Nene Lelita Lihime Monovo Do Hulo-ledavo Sikalahuli'mo Lemeni Dameni Gosoho' Lehize-lidido' Nene E'metelonido' O None Lo Paulo' Line' Gamazi

Nemu' nene Izesu' Kilisitoda gi'mize minuniveti okodela nene lihime gohi ma nomivo O'moso'mo lihime lemelido' minamune. Nene nanitekumu' ve. Naza Izesu' Kilisitoda gi'mizosa minevo' minevo' minaa' do soto' o-ledaa' ive O'moso'mi Sikalahuli'mi anau' ogo nouvoni' ne'mo nene helaato' lele'mize molaa' neine' monovo lihime daali'mi anau' minuvonguti' nene mo kuluhize-nedave. Ee, evene' leli' lemeni dameni nene amuzo molamine' nenako ne'mo nene lou' gamazilo' ngelo e'metamolone' ogavo lou' gamazi ne'mo lihime'mi anau' minuninguti' nene ngelo ma kuluhize-ledamine' ve. Ne neiha lou' gamazi ne'mo ngelo mo lolo' amine' inite' nene O'moso'mo nene mo ha ine' ve. A'mine inite' ine' nene ei' gipele nene leli' lihime daa' univeti okode ne'minesi nene leli' lihimete apase-ledelingumu' ve lo imiseline' ve. Ne'mine ogavosa leli' lihimete muki' nene a'mine oko'no hamoto' nene dizavo O'moso'mo lihime imine' ve. Ido' ne'mine ine' nene lemeni dameni litehe'mo lido' e'metamosa asi O'moso'mi Sikalahu' ne'mo lido' e'meto ogo molo oga' nounive nene louli'mo lidi'mine igi evene' lisihe' lamine' minilizangumu' ve losa ne'mine ine' ve. Ee, evene' ma ingine ngemeni dameni litehelo' e'metaa' ave nene ngemeni dameni liteheli'mi initekumukovo' gili minaa' nani'za Sikalahuli'mo lido' e'metaa' nave ingine nene a'mine Sikalahu' ne'mo giline' initekumukovo' nene gili minaa' nave. Lemeni dameni litehe'mo gilido' e'metaa' ne'mo nene helo vo tolovo olonido' lele'mize molaa' neine'za Sikalahuli'mo gilido' e'metaa' ne'mo nene minevo' minevo' ogo mino hongu lovo' minelonido' lele'mize molaa' neive. A'mine lemeni dameni liteheli'mo gilido' e'metaa' ne'mo nene O'moso'mi lou' gamazi'mo lido' nene gele damo mino gele daline' amuzo'vesi nomivo mo keke' ngelo gele damoloseinako ne'mo nene O'moso biluva' o-daa' do soto' oga' neive. Ee, ngemeni dameni liteheli'mi gelekele' ve minave nete nene O'moso'mo ninge lamine' daline' inite' hamokisi nene mo keke' ngeli ma amilisave.

Ne neiha lengi' lutingu' O'moso'mi Sikalahu' nene ma minevo' dovo' ogo noline' nene lingine lengemeni dameni litehe'mi gelekele' ve minami asi Sikalahu' ne'mi gelekele' ve nene nizave. Ido' ve ma ingine Kilisito' Sikalahu've di minamave nene Kilisito' zuho minisa'mave. 10 Ee, okodine nene lihime monovoli'mo mo helelido' o neine'za evene' lisihe' lili' igi minani' ne'mo lutine nene vele gizo neive. 11 Izesu' hilinguti' do ote-dive'mi Sikalahu' ne'mo lutingu' mo minevo' dovo' ogo noline' nene a'mine Sikalahu' ne'mo lengi' lutingu' minevo' dovo' ogo neingumu' nene Kilisito' hilinguti' do ote-dive aza helelido' o neine' okodine nesi nene gohi ha do vele gizeleseive.

12 Nemu' nene neze zuhokizo, a'mido' nene golo hizo inite' ma olonido' o neine'za a'mine inite' nene lemeni dameni litehe neve eito' golo hizelonido' nene nomive. Ee, a'mine lemeni dameni litehe ne'mo gilido' nene e'meto ogo molo olonido' nene nomive. 13 Nene nanitekumu' ve. Lingine lengemeni dameni litehe'mo gilido' e'meti minilizani' nene mo mudise helaato' mini mili nizave. Ne neiha lingine O'moso'mi Sikalahuli'mi amuzodunu' nene okodine'mo monovo goloso ogo molo oga' ine' nene ma bili hililizani' nene mudise minevo' minevo' ogato' mini mili nizave. 14 Ee, O'moso'mi Sikalahuli'mo lido' e'metaa' ave muki' nene O'moso'mi izipahala nizani' nenako nemu' nene mudise minivi' minivi' ilisave. 15 Ido' O'moso'mi izipahala nizave luvoni' nene nemu' luvoni' ve: Lingine di ti' ani' Sikalahu' ne'mo nene golise gohi gili'mi vi minilizave lo do gelekele' ve lolo' o-lingidine' nevoba asi O'moso'mi izipahala lolo' o-lingidine' ma neive. Ido' ne'mine o-lidine' ne'mo laza O'mosomu' nene meteho ve lo Ahono lo vise laa' noune. 16 O'moso'mi Sikalahu' ne'mo nene leli' lute'mo lo-limine' gamazi hize ele' ogo lelikumu' nene O'moso'mi izipahala nizave lo lo soto' ogo lo-lemaa' neive. 17 Ido' O'moso'mi izipahala none' nenako O'moso'mo salani molani' inite' dalonive nene none. Ee, ido' Kilisito'ni O'moso'mo do naba o-delingu' lezesi makato' do naba o-ledelingumu' nene Kilisito' mulumo alumo nite' gihine' ne'mino lazasi makato' ma geheso' nene Kilisito' salani inite've nene ezesi makato' dalosune.

Idise Lelita Nene Geni Ha Neine'za O'moso'mi Sikalahu' Ne'mo Hize Ele' O-ledavo Inite' Mali'mo Do Goloso O-ledamivo Alinge' O'moso'mo Mo'mosi' Lamine' Do Soto' O-ledeleseive Lo Paulo' Line' Gamazi

18 Naza idise mela nene geni mulumo alumo nite' gehaa' noune' nemu' nene amuzo molo ti' lo gele nouve: Alinge' soto' o-ledeline' inite' ado' O'moso'mo do naba o-lidivo lamine' minelone' monovo ne'mo nene inite' naba goloso neine' nenako a'mine genimu' nene mo gele hulolonido' lisihe' o neive. 19 Ne nanitekumu' ve. O'moso'mo do soto' molani' inite' muki' nete nene O'moso'mo izipahala zuho Okulumo' lemeni damenisi do soto' o-ledelingumu' nene mo soto' iliho li gizebo lekeseve igi nizave. 20 Ne'mini a'mine gamenemu' gizebo igi nizani' nene a'mine gamene alido' nene O'moso'mo a'mine do soto' molani' inite' nene gihile izamilizado' ngele'mize molavo minadoti' nene kuluhizilizani' nenako nemu' nene gizebo igi nizave. Ido' O'moso'mo gihile izamilizado' ngele'mize molani' nene ingine ne'mine o-ledelive li gilangumu' nevoba asi ei' lulolo' do molosa gihile izamilizado' ngele'mize molani' ve. Ee, aza gihile izamilizado' ngele'mize molani' nene aza ti' lo gele mu'musi' ogo minosa nene ne'mine ine' ve: Alinge' vo tolovo oga' ne'mi anau' minilizanguti' nene kuluhizi O'moso neni' izipaha'ne zuho nene inite' mali'mi anaukisi minami atoli'mine igi haza gehepeve nizani' ne'mini haza minilisave lo gele mu'musi' ogo minine' ve. 22 Ee, laza ti' lo gele none: O'moso'mo do soto' molani' inite' muki' nete nene vene' izipe gidilisa mulumo gilaa' nani' ne'mini ganakuti' mulumo gili le' goloso izi mini di dizi idise gamenelasi mene ha ne'mine igi nizave. 23 Ido' inginevo' nene ne'mine igi nizavoba asi O'moso'mo lehize-ledeline' initekuti' gana' dalone' inite' O'moso'mi Sikalahu' mo do nonive lazasi nene O'moso'mo izipaha'ne ve lo do eita ogo okode nene helo vaa' akalo' minidoti' do kuluhize-delingumu' gizebo ogo nonida mene luteu' le' izo minaa' noune. 24 Ee, ne'mino hele vaa' okode nene do kuluhize-delive lo a'minemu' gele mu'musi' ogo nonivosa nene do lu' izine' ve. Ido' inite' ma soto' oloseive lo gele mu'musi' ogo gizebo minaa' noune' inite' ma soto' iline' nene laza gele mu'musi' o minelone' ma nene gohi gele mu'musi' ve lamolosune. Ido' mo ningikeni' initekumu' nene gili mu'musi' igi mini gizebo a'minemu' nene ma isa'mave. 25 Ne neiha olihe ma ningamune' initekumu' gele mu'musi' ogo minelone' nene mo a'minemu' gizebo o do dizo minelesune.

26 Ido' gele mu'musi' oga' noune' ne'mo hize ele' o-ledaa' neine' ne'mino O'moso'mi Sikalahu' ne'mosi nene monoku' gilizevo ogo minaa' nouninguti' nene hize ele' o-ledaa' neive. Ido' hize ele' o-ledaa' neine' nene laza O'mosola lolone' o neine' monovo nene gele guno amune' nenako nemu' nene asi've nene lelito' medelo laza gamazi vise' ogo le' izo luteu' gelaa' noune' monovo nene hize ele' o-ledo O'mosola lo-ledaa' neive. 27 Ne'mine oga' neine' nene Sikalahu' ne'mo gala giline' nene luteu' minine' inite' vise' ogo do soto' oga' ive O'moso ne'mo nene mo ningo gelaa' neive. Nene nanitekumu' ve. A'mine Sikalahu' ne'mo nene O'moso'mi lulolo' do molosa O'moso'mi evenelelo' medelo lelikumu' O'mosola laa' neine' nemu' ve.

28 Ido' laza ti' lo gele none: Lute O'moso eme nonive ado' ei' gala gilido' ogo ei' ve lo lele'mize molavo nonivemu' nene aza lelita soto' iliza inite' muki' nene di laminekovo' i-lidilizado' nene do molaa' neive. 29 Ido' ne'mine ine' nene aza ganakuti' ninge lamine' dani' aleve nene ei' gipele'mi emeni dameni ne'minesi lili' igi minikevo a'mine gipele nene nakunolo vai' neti uvo'nibo naba minelive losa engi' nene do kegeso ngele'mize molani' ve. 30 Ee, a'mine do kegeso ngele'mize molani' aleve nene elesesi molo-ngedo do eita ine' ve. Ido' a'mine elese molo-ngedo do eita ine' aleve nene ve lisihe' ve losasi nene lo-ngidine' ve. Ido' a'mine ve lisihe' ve lo-ngidine' aleve nene eitati' monovo lamine' atoli'mine ogo minine' nesi nene lehize-ngidine' ve.

O'moso'mo Lulo Atoli'mine Ogo Leme Neine' Nene Kilisito' Do Soto' Ogavo Ningunidoti' Nene Inite' Hamoli'mosi Mudise nGelo Ma Do Goloso O-ledamoloseive Lo Gele Nouve Lo Paulo' Line' Gamazi

31 O'moso'mo ne'mino do lu' ize neine' nenako nemu' nene ti' lo gelelesune: O'moso nene lelita molo hize ele' noo-lidine' nenako inite' malitesi nene ngeli livile' gehepeve amilisave. 32 O'moso'mo ei' gipele gehepeve nene do a'manapa amo leli' mukikumu' nene lehize-lidine' ve. Ido' ne'mine ine' nenako inite' muki' nene lehize-ledamilivoba mo ezesi do lehize-ledeleseive. 33 Ido' ei' ve lo do kegese-lede neivemu' nene O'moso'mo asi've ve lisihe' ve lo-lede neine' nenako zaho goni' o-ledelive. Mo ma nizamave. 34 Lelikumu' hilive ado' gohi hilinguti' otive Izesu' Kilisito' O'mosolati' leme mino ana zamela mino lelito' medelo gamazite hize ele' o-ledo neine' nenako zaho lihime lemelido' o neive. Mo ma nizamave. 35 Ido' Kilisito' lulo leme neivo none' ne'mi lulouti' nene inite' mali'mosi nene gelelehe' ogo hulo heta ma o-ledamoloseive. Ado' geni inite' ne'mo nehe, lihitehe initeli'mi lulou' minelone' ne'mo nehe, goboni mala' malali'mi lulou' minelonidi'mo nehe, ga'na naba helelonidi'mo nehe, okodelo' initekumu' vise' olonidi'mo nehe, ganala daato' mine molo minelonidi'mo nehe, ido' evenelite libililisa navo luno mite' velelo' ningelonidi'mo nehe, nene ma gelelehe' ogo ma hulo heta o-ledamoloseive. 36 Ido' mene noluvoni' inite' nevo'mine nene lamineto' mo soto' i-lidaa' nani' nene mono' godolou' ti' li gizado' nene vo dave:

Guvekasi ve, geita gi'mizo minuningumu' nene
gamene gamene evenelite nene libili hili hili' iga' nave.
Ne'mine nani' nene lelikumu' evene' ingine gilavo
laza nene sipisipi ize ne'mine nene nizave li giliisa libilaa' nave.
37 Ne neiha a'mine mene luvoni' inite' nete nene mo keke' livile' amavo a'mine lulo leme neive Kilisito' ne'mo hize ele' o-ledaa' neine' ne'mo nene ngivile' gehepeve okune. 38 Naza ngivile' gehepeve okune luvoni' nene nanitekumu' ve. Naza nene ti' lo gele ele'vole' o nouve: O'moso'mo lulo leme neine' Guvetesi ve Izesu' Kilisito' do soto' o-lidine' ne'mi lulou' noninguti' nene inite' mali'mosi ngelo hulo heta o-ledamoloseive. Ado' helelone' ne'mo nehe, minevo' alevo' ne'mo nehe, angelolitesi nehe, guve'inesi ve ato atolite nehe, idise soto' o-lede neine' inite' nehe, alinge' soto' o-ledeline' inite' nehe, amuzo malehe inite' ato atolite nehe, veleta nizani' initelite nehe, gala'muda nizani' initelite nehe, ido' O'moso'mo do soto' molani' inite' gohi ma nilizani' netesi nehe, nene mo ngelo nomive.

Copyright information for `ASO