Titus 1

Paulo' Tito'ni Geke' Lo-do Luhuvo Nite' Gize-dine'

Titoo, naza mono' akalo' gele'mize molokuvo nazasi gazasi hamo' mono' gele ele'vole' o nosinako gaza neni' gipe'ne gihile gelo minane' make, luhuvo mene nogize-giduve. Paulo' naza O'moso'mi gelekele' izipe Izesu Kilisito' aposolo've neni' nogize-giduze. Ningezo.

O'moso'mo a'mine gono nimine' nene eze do kegeso ningekine' evene' ingine monoku' ele'vole' ilizave lo ido' gamazi gihile lamine' monoku' ma neine' nene gili vevesi minilizave lo a'mine gono nimine' ma neive. A'mine gamazi gihile ne'mi monovo ne'mino neive: O'moso soza losa'mive ne'mo gozopo' gamene gala'muda vomine olihe Okulumo' misubo do soto' molamine' gamene neu' salani gamazi lo minevo' minevo' lemeni dameni nene lehize-ledelove lo lo huko lo molo-ledo lingumu' vode otavo gilingili ogo minaa' noune. A'mine lo huko molani' gamene ogavo a'mine gamazi've do soto' o-lidine'. Ee, do soto' o-ledo do lu' izaa' ive O'moso'mo nenikumu' gaza a'mine gamazi nene lo soto' ogo evene' lo-ngeme'mo vo mineline lo gono nemavo nemu' nene gono daa' nouve.

Ne'mine ogo luhuvo nite' mene gize-gedo meteho O'moso ido' do lu' izaa' ive Izesu' Kilisito' engitati' nasahilikisi hongu lo lamino minaa' monovo nesi geikisi miniliho lo O'mosola noluve.

Keleta Aleveti Mono' Gizebo Ve Nene Nani'mine Ve Do Ote-ngedelihe Nemu' Tito'ni Lo-imine' Gamazi

Gono lumo ma ha minine' nene do veveso do apaseline lo Keleta ailaniu' hulo-gedo vuvongu' gono gamazi ne'mine lo-giduvoni' ma neive: Gaza numudo' namado' mono mono' ve linge ma do gizebo ve minilizave lo ngele'mize molalosane. Gizebo ve ngele'mize molalo ma ve ne'minevo' ngele'mize molalosane: Evene' muki' gilavo lihime've nomivo vene' hamo' do ezesi bizovo' minavo izipahala zuho nete O'mosola gi'mizi minikevo evene' nete engi' monovo ningi gili zogo zogo izi mini gamazi gilamaa' ave nizave li lamilizado' minikevo ma ve ne'minevo' ngele'mize molalosane. Ee, O'moso'mi gonolo' gizebo oga' iline' nemu' mono' gizebo ve minelive nene evene' ezemu' gilavo lihime've nomivo mineline' o neive. Ne'mine ogo mino evene' ngivile' ogo gamazi belaa' ive minamo izebolo' geto molosa'mive mino noso no sipaki amaa' ive mino lovo amaa' ive mino moni heneni mamu' mumuzo' amaa' ive ne'mine ve mineline' o neive. Ne'mine ogo venenga ve ikevo ma nasahili' o-ngedo ngele'mize molaa' ilive mino inite' lamine' ogo molo ogakumu' umo helelive mineleseive. Ido' gala gele vevesaa' ive ma mino eze monovo've lisihekovo' o mineline' mino eze oko'no lulo do hamo' ogo gizebo oga' ive mineleseive. Ne'mine ogo lo-ngeme ngeme' noune' gamazi gihile nene do gili' lo do minelive. Nene gamazi'mo eze hize ele' o-divo mono' gihile lamine' nene lo-ngemo ga'ine do hize ele' o-ngedelive. Ne'mine ogo leze mono' gamazi bilaa' aveti gamazi nene do peleseve' izo do gala'muda ilive.

Keleta Ailaniu' Sozalo' Ve Vai' Li Minangumu' Gizine' Gamazi

10 Nanitekumu' ve. Evene' a'manapa igi gamazi bilaa' ave muki' nizanako nemu' ve. Ingine godo'ningu' gamazi nomivo gopo gamazi li evene' di gopo i-ngidi go'ine izaa' nave. Engikuti' Zuda ve ma Izesuda vi gi'mizi alinge' di gopo igi Izesu' monokovo' nomive li avotemoti lou' gamazi nesi gele dunivo O'moso'mo do lu' izelive li vauve ili ne'mine iga' nave. 11 Ne'mine iga' ave nete evene' linge ma vene' izipaha'inesi muki' nene ngele'mizi gopo iga' nave. Ee, ingine go'ine izekunivo moni limilizahe li gili lamilizado' o minine' gamazi nene li ladanga mono' apizi ngimi ngele'mizi gopo iga' nave. Ido' ne'mine iga' nanako nemu' nene engi' gamazi do'mo lemoo o've lo-ngedelone. 12 Keleta ailaniu' aleveti monovo'ine goloso minine' nene soto' o minine' ve. Ido' engikuti' ve ma gamazi monovo gelaa' ive'mo engi' monovo lo soto' ogo ti' lo line': Keleta aleve nene sozalo' ve mini ido' ize loposo ne'mine mini noso' nite' nalisavo' lamine' gili mini gono dalisa gosele' goloso ngebelaa' neive. Ee, gamene gala'mudati' ne'mine monovo'ine mine do dizo idisesi ha neive line'. 13 Engikumu' a'mine gamazi line' nene lamineto' line' ve. Nemu' nene Zuda veti heluno haza gamazi nene gohi gili dami haza evene' gamazi gihile nene mehe'ine imaa' avete li huki nizani' gamazi nesi gili dami mono' gili vevesi mini gili ele'vole' ilizave lo gaza amuzo molo ngelemo ga'ine dozo. 15 Ingine inite' mamu' nene di gililizanipe di nalizanipe ne'mo lutine goloduvo eleleseive li laa' nahe. Naza lo-gemelove: Evene' lu'ine lamine' o noline' nene inite' mata' do lamine' o-ngedeleseiha evene' mono' gili huli mini lu'ine goloso o noline' nene lu'ine ga'ine ngemeni dameni goloso ine' nenako nemu' nene inite' mata' do lamine' o-ngedamo gohi do goloso o-ngedeleseive. 16 Ingine O'moso'mi monovo gele none li ve'inedunu' laa' nani'za igi mili iga' ani' ne'mo lo soto' neivo gihile nomive. Ingine evene' goloso gamazi gili hulaa' ave gono lamine' hamokisi ngeli ma dalizado' nomive.

Copyright information for `ASO