Titus 3

Monovo Laminekovo' Ogo Molo Mineloningumu' Gizine' Gamazi

Gei' gizebou' minani' evene' nene gamazi do gosoho' ogo ti' lo lo-ngeme ngeme' ogo minezo: Ingine ngamanisi ido' ngamani gono di lelito' gizebo igi minaa' avesi gelekele' i-ngidi gamazi'ine gili dalizave. Alinge' gono lamine' atoli'mine atoli'mine nasahili' oga' gono ne'mine soto' iline' nene ha dalone li amuzo mili gili minilizave. Evene' mamu' ngemenga lami lovo lolize hizami hongu ve mini evene' muki' nene nasahili' i-ngidi minilizave. Lazasi gozopo' nene a'mine'mine ogo negi hizo ladani ogo gamazi gele hulo gopo minune' ve. Ne'mine ogo inite' goloso ato ato' lumo helaa' ine' ido' lanite' gelaa' une' inite' nemu' gelekele' o-do mino evene' igi mili iga' nani' ne'mine ogo molo mineloninako lo gituho' no mikile' oga' une' ve. Ne'mine ogo nonivo evene' muki' biluva' i-lidi minikevo lazasi biluva' o-ngedo minaa' une' ve. Ne'mino nonivo alinge' lele'mize lamine' oga' ive O'moso'mo eze nasahili've nesi ido' lulo limine' nesi do soto' ogo lelebizo do lu' izine'. Do lu' izine' nene laza inite' lisihe' ogo molo oga' noune' nemu' ve lo gilivoba asi've lelikumu' mulumo giline' nemu' do lu' izine' ve. Noso izo do izipe gosoho' soto' ani' ne'mine o-ledo eze Sikalahu've ne'mo lemeni dameni gosoho' limine' ne'mine ogo do lu' izine'. Ee, do lu' izaa' ive Izesu' Kilisito' gono davo ne'mo O'moso'mo eze Sikalahu've vauve elo lehize-lidine'. Nasahili' o-lidine' nemu' lele'mize lisihe' ogo ele'vole' ngemeni dameni disa minivi' minivi' ilizave lo eze Sikalahu've lehize-lidine' ve. Ne'mine ogo laza ezesi mino minevo' minevo' oloninako lo gilingili ogo dalosa gilune' inite' nene molo-lidine'. Gamazi mene gihile lamine' line' ne neive.

O'mosomu' gili ele'vole' igi nizave ingine ga'ine hamo' gili inite' lamine' ato ato' evene' hize ele' i-ngidaa' ne'mine nene amuzo mili igi mili minilizave loo luvoni' gamazi mene amuzo molo lo-ngemeline lo nogiluve. Gamazi mene lamine' neinako evene' muki' hize ele' o-ngedelido' o neive.
Abelenga gamazi ido' haza gamazimu' vise' igi li volelo' melo' igi minaa' nani' nesi gele hulo mehenga emo ido' avo'ningi gulive'inemu' li naza evene' nabaliti nga'vopilemo' nouve li engi' oko'ine di dizi di naba igi di hutile' igi laa' nani' nesi gele hulo mehenga emo ido' Mose' Zuda vemu' lou' gamazi lo huko line' nemu' ato ato' gamazi li lovo lolize hizi minaa' nani' nesi haza gamazi gopo gamazi gihile nomine' nenako gele hulo mehenga emezo. 10 Evene' malite gamazi di gopo igi li mono' mulise hizi ho'li nizavo ma do vevese-ngedelesa ga'ine do gamene hamope setape lo-ngemanivo gilamavo ma ize' molo do hulo-ngedezo. 11 Gele nabe. Ve ne'mine ve nene peleseve' izaa' ave lu'ine gopo o vine' mini ingine igi mili iga' ani' ne'mo engi' monovo'ine do soto' ogave.

Paulo' Tito'ni Gonomu' Lo-emo Evene' Geke' Lo-ngidine' Gamazi

12 Naza Nikopoli ebeku' vo mino hepe' naba eleline' gamenelokisi nene a'mida minelove lo lo hukokuze. Atema'ni he Tikiko'ni he gei' nanida imiselekuvo vo hetelavo ma gaza nene a'mine mineloni' ebeta alove lo amuzo molozo. 13 Ido' ve seta' ado' Apoloki ido' lou' gamazi li hukani' gelaa' ive Zenaki mono' gono di vilisido' inite' mata' vise' ikelisize. Nemu' akalo' inite' mata' amuzo molo vise' ogo do soto' o ngemezo. 14 Inite' lamine' ogo molo ogali'mi monovo ningi gili lamine' ilizangumu' nene leze evenete zuho Izesu' evenele muki' ingine gono lamine' di'mi vilizado' nene lu'ine milalizave. Ne'mine igi evene' ma initekumu' vise' igi geni ngebelavo ma hizi ele' i-ngidilizave. Leze zuho engita monoli'mi gihile nomine' minikelizaze.

15 Nezesi maka' none' aleve ingine gopo'ni nilave. Monokumu' ve li lu'ine limaa' nave ngopo'ni nolo-ngiduze. Gaza lo-ngemezo. Nasahili' o-lengedelive lo O'mosola noluve. Moda ve.

Copyright information for `ASO