a1:81Te 3:13, 5:23
b1:91Te 5:24; 1Ioa 1:3
c1:10Pil 2:2
d1:12Apo 18:24-28; 1Ko 3:4
e1:14Apo 18:8; Rom 16:23
f1:161Ko 16:15
g1:18Rom 1:16
h1:19Ais 29:14
i1:20Iop 12:17; Ais 19:12, 33:18, 44:25
j1:21Mat 11:25
k1:23Rom 9:32; 1Ko 2:14
l1:24Kol 2:3
m1:252Ko 13:4
n1:26Mat 11:25; Iak 2:5
o1:29Ep 2:9
p1:30Iel 23:5-6
q1:31Iel 9:24

1 Corinthians 1

Eni Paulo itema e Kalisito Iesu mupalusilo no anu masaxa noxou Lataua la mu'avalilo mo vivinge Sosutenisi, tekaukavu uoli voloxu ano 'o ulai noxinge ta mitema sou lalotu noxou Lataua lai ne Kolinito. Kalisito Iesu mu'avalinge mo ngexolu va'axu loxo ta mitema noxou Lataua, mo ta mitema ukalusi no tuatuala ipita mo ilinga no ualasou Tila noxinge Iesu Kalisito, anu Tila noxi'a mo Tila noxinge kalumo. Alauna mo opo se'isisi molu noxou Lataua Maminge mo Tila Iesu Kalisito ulai noxinge.

Vaikala sou 'Osa

Eni utotomu ne alemo laixe ulai noxou Latauamenge xo noxou Iesu Kalisito la Lataua mualaunangenge ngingi ta Kolinito misevile. Xo noxousi la Lataua mu'ana'analinenge no anu mimii lailaixe sou Uleenu. Mimii lailaixe ane ne anu vaivaikalamengi mukalusi xe no anu lavulavumengi mukalusi. Xo tava'u loxo a'alo laixe sou Kalisito ane nexi tea'aloxu ne muxali pekia'u no nano noxinge. Aloxo ne la sou ngingi ngaxoo va'axu no anu mimii lailaixe vile noxou Lataua Uleenu ne uasi, no mine ngingi ngaloopala sou ngaxoxomaiou Tila noxinge Iesu Kalisito ulivu une'e. a Anu Tila u'oxo peki'ainge ulai utalo no anu voxo kaluxusou mo sou susu vile uxolu noxinge uasi no anu voxo noxou Tila noxinge Iesu Kalisito. b Lataua uvikala maninasi ne mu'avalinge nge'una no anu pitapita sou mauli noxou 'Olu Iesu Kalisito anu Tila noxinge mo Anu umulinu vaikala aloxo 'o.

Kalikalipalaa no Nano no Anu Lalotu

10  c Ioxe ta vivilo no anu ualasou Tila noxinge Iesu Kalisito, la eni atali'isinge pekia'u ulai noxinge lexe ngingi latala ukalusi ne opongengi vilesisi noxinge ngatongato'o mo sou kalikalipalaa uxali nonixingengi mamu. Ngingi ngaxolu ngapita laixe manina no anu xavuxavutala noxinge mo masaxa noxinge ne uxali vilesisi. 11 Xo ta vivilo, Kuloe ta tulatulanu mose'i mivikalaleli lexe vaikala sou 'oto'oto a uxolu noxinge ne. 12  d Ma'ia ane eni elemo noxinge ne aloxo 'o, ngingi vile na'oxe,

“Eni amulinu Paulo,”
xe vile la,

“Eni amulinu Apolosi,”
xe vile la,

“Eni amulinu Kepasi,”
xe vile la,

“Eni amulinu Kalisito.”
13 Loxovaa, Kalisito ne muvalavala? Loxovaa, Paulo ane musoli no anu ovu valautusinge? Loxovaa, ngingi nge'ulo no anu ualasou Paulo? 14  e Eni a'osa musuku lexe eni a'ulosine nini vile uasi, ia Kulisipasi ilou Xaiosi ane'isisi. 15 La sou mamu sou itema vile uvikala lexe ngingi nge'ulo no anu ualasilo. 16  f Ia maninasi eni e'ulosi'a Sutepano tatulatulaanu kalumo. Xe ili'i no anu ne eni axavutalanu lexe eni a'ulosou evile la uasi. 17 Xo Kalisito mupalusilo sou lexe a'ulosi'a ta mitema uasi, ia sou a'aloxu a'alo lailaixe noxou Iesu Kalisito. Anu mupalusilo sou a'aloxu Lataua vaikalau no anu lavulavu noxou itema uasi, xo mamu sou eni a'oxo ovu valautu noxou Kalisito uxali loxo mii vitanisi.

Kalisito ne Anu Xavutala Lailaixe Mo Xavi Noxou Lataua

18  g Xo vaikala sou ovu valautu ne anu laixe uasi no anu lolomu noxi'a ta mitema ane'i ane ixoxolu ia uleene'i ne ulai usoli, ia noxinge nenge ane Lataua upamaulinenge mo ulosinge mauli, vaikala ane ne anu xavi noxou Lataua. 19  h Xo kaukavu sou muai no anu Lavuku Tavuna teinu aloxo 'o,

“Eni amamulonu xavutalai'a ta mitemasou xavutala lailaixe
mo a'oxo lavulavui'a ta mitema sou lavulavu tatila uxali mii vitanisi.”
20  i Itema sou xavutala laixe ne anu ava? Mo itema sou lavulavu no anu lapuloto ne ava? Mo itema sou lavulavu sou 'oto'oto no anu vaikala sou mimii no lia 'o ne ava? Lataua mu'oxonu lavulavu sou lia 'o ne uxali laixe uasi. 21  j Xo no anu xavutala laixe noxou Lataua la anu mu'oxonu pekia'u noxi'a ta mitema no 'a lialia sou me'a ilavusou no anu lavulavu noxi'a uasi. Ane'i ixavutala lexe vaikala noxou Lataua laixe uasi. Ia Lataua mu'osasi no anu vaikala ane nexi tea'aloxu sou upamauline'i ane'i ane imuxaxu tane'i no anu. 22 Ta Iutaia imasaxau sosovo iouiou xe ta Xiliki ikamuli xavutala laixe. 23  k Ia nexi taa'aloxu Kalisito solixu no anu ovu valautu. A'alo ane ne anu loxo mii sou kuluke noxi'a ta mitema ne Iutaia, xe ta mitema ane'i ane ta Iutaia uasi la ane'i i'oxe a'alo ne a'alo vulaulausi. 24  l Ia ta Iutaia ilo'a ta Xiliki ane Lataua mu'avali'a ne mi'oxe Kalisito anu xavi mo xavutala laixe noxou Lataua. 25  m Xo mii ma'ia noxou Lataua ane ta mitema i'oxo lexe anu laixe uasi. Ne anu tila mo muuaulixu lavulavu noxi'a ta mitema. Xe mii ma'ia noxou Lataua ane ta mitema i'oxo lexe anu mamalaxusi ne mii pekia'u muuaulixu xavi noxou itema.

26  n Ioxe ta vivilo, ngaxavutalangengi tei no voxo mine Lataua mu'avalinge. La ta peina noxinge ne lavulavumengi tila no ie'i ta mitema sou lialia 'o uasi. Mo ta piena noxinge ne ngano'u xavi uasi. Xe ta piena noxinge ne sou uala ta tatila uasi. 27 Ia Lataua muilou mii ane ta mitema i'oxe laixe uasi ne sou mupamaelane'i ta mitema sou lavulavu ta tatila no anu. Xe Lataua muilou mii ane mamalaxu no lialia 'o ne sou mupamaelane'i ta mitema pekipekia'a no anu. 28 Mo anu muiloi'a ane'i ane ualasi'a kitu'a no anu lialia mo ta mitema i'oxe ane'i mii vitanisi. Xe mii vitanisi no ie'i ta mitema ne sou umamulonu mimii ane ta mitema sou lialia ixavutala lexe anu mii tila. 29  o Aloxo ne mo sou itema vile umomomo sou utooxu no iou Lataua uasi. 30  p Xo loxo noxousi la sou ngingi ngexolu noxou Kalisito Iesu e muxali loxo lavulavu laixe noxinge molu noxou Lataua. Xo noxou Iesu anu aloxo 'o 'ilixo sou tamuamua'i ulapusi mo taxolu loxo ta mitema noxou Lataua ane anu mulivulinenge. 31  q Anu aloxo ne loxo Lavuku Tavuna teinu muvikala lexe,

“'Ena 'ei ane molu utooxu la anu utooxu Tila anusisi.”
Copyright information for `ATA