a13:2Mat 17:20
b13:6Rom 12:9
c13:71Pi 4:8
d13:131Te 1:3

1 Corinthians 13

Tanutanuxu

La sou Eni Alosiengixu Vote'i Ane Laixe Manina

Lexe eni avivikala no anu vaikala iouvilemo noxi'a ta mitema mo noxi'a ta angelo kalumo, ia tanutanuxu uxolu no nano noxilo uasi, la eni ne aloxo xolalau utama piena xe xalamo e mitixitixinu vitanisi. a Lexe eni eno'u xavi sou palomatana mo elavulavu no anu xavutalae'u talume ukalusi mo lavulavu laixe ukalusi no 'a muxamuxaxu taleli ne tatila mo pekia'u umomomo sou usukunu alaele ulai va'axu. Ia tanutanuxu uxolu no nano noxilo uasi, la eni ne a mii vitanisi. Lexe eni alosi'a mimii noxilo ukalusi ne ulai noxi'a ta mitema ane i'a mimii uasi mo a'italonu vasimelo ulai noxi'a ta mitema sou i'elaxu no navu ia lexe tanutanuxu uxolu no nano noxilo uasi, la eni amomomo sou ano'u mii vile uasi.

Itema e tanuxa'a ta menexu ne anu uxolu se'isisi mo umasaxai'a maninasou. Anu uiisuiisu uasi mo utooxu mo uitinu uasi. Mo anu u'oxo 'ilixo masua uasi xe anu loxo tanuxusi uasi mo anu loxo opoo lai'a palea uasi xe anu loxo kalapusou susu ane mi'oxonu noxou ne uasi. b Tanutanuxu ne loxo sou 'osa'osa no anu 'ilixo masua uasi ia 'osa'osa no nano no anu 'ilixo umuli vaikala laixe maninasou. c Xo anu usaxilainge utotomu, anu loxo sou umulaxu tanu utotomu anu loxo uloopala utotomu mo anu utulu pekia'u utotomu.

Tanutanuxu ne umomomo sou utalo uasi ia vaivaikala sou palomatana anu a uxolu ne ia ulai la utalo mo vaivaikala iouiou ne ulai la tasiau ukalu xe lavulavu ne ulai la uxexee avile. Xo nenge telavusou mimii pa'upa'usousi mo nenge taa'alo no 'a a'alosou palomatana pa'upa'usousi. 10 Ia no voxo mine mii ane lololinu ne uxali la mimii ane pa'upa'usou 'o ne ukalu avile. 11 No voxo mine eni molomoloxo sio, la vaivaikalaxeni mo xavuxavutalaxeni mo xamuxamuli noxilo ne anu iouvilesisi aloxo ta molomolo nesi. Xe no mine exali loxo itema tila 'o la eni e'italonu 'ili'ilixo noxi'a ta molomolo ne mulai ili'i no tumalilo. 12 Vaimomo 'o nenge tamaisou mimii xalexusi loxo no anu titilo, ia ili'i la nenge tamaisou Lataua 'alaiou no ienge. Vaimomo 'o eni alavusou Lataua ne maninasou uasi ia ili'i la eni alavusou maninasou loxo Anu mulavusilo manina. 13  d Xo vaimomo 'o mii tatalu anu a muxolu. 'Ilixo sou tamuxamuxaxu tanenge mo taloopala sou tano'u mimii ane lailaixe ili'i xe tanutanuxu. Ia anu tila mo muuli noxi'a manina ane tanutanuxu.

Copyright information for `ATA