a3:2Eva 5:12-13; 1Pi 2:2
b3:31Ko 1:10-11
c3:41Ko 1:12
d3:5-6Apo 18:4, 11, 27‑28
e3:8-9Mat 16:27; Ep 2:20-22
f3:11Ais 28:16; 1Pi 2:4-6
g3:131Ko 4:5
h3:161Ko 6:19; 2Ko 6:16
i3:19Iop 5:13
j3:20Lex 94:11

1 Corinthians 3

Kalikalipalaa no Nano no Anu Lalotu

Ta vivilo, eni evikalangengi ne loxo avikalane'i ta mitema ane'i ane mi'ana'ana no anu Uleenu Tavuna uasi. Ia eni evikalangengi loxo ta mitema ane'i ane mixolu no anu 'ilixo sou lialia 'o si. Mo 'ilixoi'a loxo ta molomolosi no nano noxou Kalisito. a Eni uao elosinge sususi 'o ia alosinge la'ilali pekia'u uasi, xo ngingi ngamomomo sou nga'ou uao. Manina xo ngingi ne ngamomomo uao. b Ngingi ne uao ngaxolu loxo ta mitema sou lialiasi 'o. Xo 'ilixo sou sangalako ilou 'oto'oto a muxolu noxinge ia ngingi ne xavutala lexe ngingi ne ta mitema sou lialia uasi? Mo ngingi ngalavusou lexe 'ilixomengi ne loxo ta mitema sou lialia 'o si uasi? c Xo no mine ngingi vile uvikala lexe,

“Eni amulinu Paulo,”
xe vile u'oxe,

“Eni amulinu Apolosi.”
La sou loxovaa, 'ilixomengi ne mumaxa'inge lexe ngingi ta mitema sou lialia 'o si uasi?

d Ioxe, Apolosi ne anu mii ma'ia? Xe eni Paulo ne eni mii ma'ia? Ia nexi noxou ne ta mitema sou xaixai vitanisi sou lexe ngingi ngamuxaxu tangengi noxou Tila. Xo Tila mulosixe xaixai vilevilesi sou taxaxaisou. Eni sou atotounu ovu ngiaxu xe Apolosi sou unixi'u lexasou ia Latauasi anu u'oxonu uleme. Aloxo ne la sou anu ane mutotounu ne mo anu ane munixi'u lexasou ne ualasi'a uasi. Ia Latauasi xo Anu u'oxonu mii uleme. e La sou itema ane utounu ovu ngiaxu mo itema ane unixi'u lexasou ne ane'i ilou mi'oxonu xaixai iou vilesisi. Mo sou ulai la anu ulotone'i umomomo no anu xaixaii'a ilou vilevilesi. Xo nexi noxou ne tanganexesi sou xaixai noxou Lataua. Xe ngingi ne aloxo Lataua xaixu mo Lataua taasou.

10 No anu alauna ane Lataua mulosilo la eni sou etulusou tani tava'u aloxo itema ane muno'u lavulavu tatila sou utulusou tani laixe. Io mose'i ane'i itulusou tani teitexi no anu, ia ane vilevilesi ne ilaxa'i laixe sou itulusou a loxovaa. 11  f Xo evile umomomo sou utulusou lavo'o sou tani tava'u vile la va'axu no anu ane mutulu tei ne uasi. Tani tava'u ane tei ne anu Iesu Kalisito. 12 Mo lexe mose'i itulusou tani teitexi no anu tani tava'u ne no anu mimii loxo xoulu ilou siliva mo lavo'o lailaixe e lapeisou tila musuku xe ovu mo ia'eia'e ainu ilou uiti ainu, 13  g la sou xaixaiou ne umaxa'u mii ma'ia ane lailaixe no anu. Xo no voxo ane ne mimii e mutalume ne uxali no lamana. Anu upala'alixu no anu navu ne sou utovonu xaixai maninasou noxi'a ta mitema vilevilesi. 14 Lexe tani ane itema vile utulusou ne uela uasi, la sou moosou ne uno'u ulusou xaixaiou ne. 15 Ia lexe tani ne uela ukalusi la xaixaiou ne usu'a vitanisi, la anu moosou ne u'ume uxexee no anu navu mo umauli.

16  h Loxovaa ngingi ngalavu lexe ngingi ne taasou lalotu noxou Lataua mo Lataua Uleenu a uxolu noxinge ne uasi? 17 Ia lexe itema vile u'oxo masuanu taasou lalotu noxou Lataua la Lataua u'oxo masuanu kalumo. Xo taasou lalotu noxou Lataua ane ne anu tavuna noxou mo ngingi nesi ane taasou lalotu noxou.

18 La sou mamu sou opongengi molu ukalavoingengi la. Xo lexe vile noxinge ne uxavutala lexe anu itema sou lavulavu no anu mimii sou lialia 'o, la laixe lexe anu uxali loxo itema sou uxovulaulau mo sou ili'i la anu uxali loxo itema sou lavulavu. 19  i Xo xavutala laixe sou lialia 'o ne anu loxo xavutala vulaulausi noxou Lataua iou. Xo Lavuku Tavuna teinu muvikala aloxo 'o,

“Anu uavoixa'a ta mitema sou xavutala laixe ne no anu lavulavu tatila sou lialia 'o.”
20  j Mo Lavuku Tavuna teinu muvikala aloxo 'o la,

“Tila mulavusou lexe xavuxavutala noxi'a ta mitema sou lavulavu ne anu mii vitanisi.”
21 Aloxo ne la sou mamu sou ngingi ngatooxa'a ta mitema la. Xo mimii ukalusi ne ngingi ngaangingisi. 22 Loxo Paulo ilou Apolosi mo Kepasi xe lialia 'o ilou mauli xe soli mo mimii ane muxolu vaimomo 'o xe ili'i kalumo ne mimii ane ne ngingi ngaangingi ukalusi. 23 Mo ngingi ne noxou Kalisito xe Kalisito ne anu noxou Lataua.

Copyright information for `ATA