a4:2Luk 12:42
b4:51Ko 3:8
c4:6Rom 12:3
d4:7Rom 12:6
e4:112Ko 11:23-27
f4:12Mat 5:44; 2Te 3:8
g4:15Xal 4:19
h4:16Pil 3:17
i4:17Apo 19:22
j4:201Ko 2:4

1 Corinthians 4

Ta Mitema sou Xaixai Noxou Kalisito Vitanisi

Aloxo ne, la sou ngingi ta mitema ngalavusixe lexe nexi ta mitema sou xaixai noxou Kalisito vitanisi, mo loxo nexi ta mitema sou tasaxila'u mii ma'ia ane Lataua mutalumeiou. a La sou laixe lexe ta mitema ane isaxila'u xaixai ne ane'i ixaxai sou laixe manina imulinu masaxa noxou Tilasi'asi. Lexe ngingimenge xe uasi la ta mitema sou ivelunu vaivaikala ne ngailevinu 'ilixoxeni la eni taleli papaxexu uasi. Manina xo eni melo ne alevinu 'ilixoxeni la uasi. Aloxo ne la sou xavutalaxeni laixe ne anu mulamanasi. Ia xavutalaxeni umomomo sou ulevileli uasi. Ia Tilasi anu molu ulevileli no anu. b La sou mamu sou ngingi ngailevingengi vitavitanisi tei no mine voxo uao uasi ngaxomaiou Tilasi molu une'e. La mii ma'ia ane mutalume tei ne Anu uvulaxu uai lamana xe mii ma'ia uxolu utalume no xavutalai'a ta mitema, la anu uxali lamana. La sou no voxo ane ne la ta mitema vilevilesi ino'u 'osailai'a molu noxou Lataua. c Ioxe ta vivilo eni emasaxa lexe alingainge sou ngano'u mimii noxixe noxou Apolosi sou usu'ulingengi mo sou ngingi iengi umulinexi noxou no anu laaxu mimii e nexi talelemolu e mikaukavu aloxo 'o,

“Mamu sou ngalai nga'oki la ngapolopepeenu mimii e mikaukavunu.”
La sou ngaitinu itema vile ngatelaixu xe ngataloxolixu vile ulu'elai uasi.
d Xo 'ena'ei mu'oxongengi la ngexali iouvilemo noxi'a se'i ne? Mii ma'ia ane ngingi ngeno'u, ia Lataua ulosinge uasi? Ia lexe ngingi ngeno'u mii ne molu noxou Lataua mukalu, la sou loxovaa la ngingi ngatoongenge. Xo mimii e ngemasaxau ne a ngeno'u mukalu ne mo ngingi ngexali loxo ta mitema sou lavuluti mukalu. Mo ngingimenge ngexali loxo ta tatananu tuala io nexi uasi. Laixe musuku sou ngingi ngexali loxo ta tatananu tuala manina mo sou nexi kalumo taxali ta tatananu tuala loxo ngingi. Xo eni emaisou aloxo Lataua mumulanexe ta aposeli ne mutulusixe ili'i noxi'a ta mitema laoluxa'a teexu loxo ta mitema ane sou ive'a isoli no tatexa'a. La ta mitema no anu lialia ukalusi mimatakisixe mo ta angelo mimatakisixe kalumo.

10 Nexi ne loxo ta mitema e xavutalai'a laixe uasi sou Kalisito, ia ngingi ngexali loxo ta mitema sou lavulavu musuku no nano noxou Kalisito mo nexi mamalanexesi ia ngingi pekia'inge. Ngingi ualasinge tatila ia nexi ualasixe ne kitu'asi. 11  e Xo tatei mo muxali vaimomo 'o ne nexi tasosolinexesi mo limilanexe 'esi'esi xe tokolomonexe xasixasixusi xe ivevexe kalumo la nexi sixe tani sou taxolu no anu uasi. 12  f Aloxo ne la sou nexi mexe te'oxo xaixai ialuxu no avoxe, no mine ta mitema isa'isixe la nexi taalusi'a xe ane'i i'oxo masuanexi la nexi tatuluxusi, 13 no mine nexi talomusou vaikala masumasua e ane'i ilavinexe no anu ne la nexi takolinu no anu vaikala laixe mo opo se'isisi. Musoko ne mune'e muxali vaimomo 'o la nexi texali loxo mosomoso e tasusuanu no ie'i ta mitema ukalusi no lialia 'o.

14 Eni ekaukavunu vaikala ane 'o mulai noxinge sou apamaelangengi uasi, ia sou apeletotosinge loxo ngingi ta 'alixeni e talelingenge misevile. 15  g Mo lexe ngingi mengi ta mitema loxo 10,000 sou isaxila'inge no nano noxou Kalisito, ia ngingi ta maminge ta piena uasi. Xo no nano noxou Kalisito Iesu la eni exali loxo maminge no anu a'alo laixe noxou. 16  h Aloxo ne la sou eni alingainge sou ngamulinu tava'ilo tanixu. 17  i Tava'u aloxo ne la sou eni apalusou 'alixeni Timoti ne ulai noxinge. Anu ne eni talelixu misevile xo mumulaxu taanu mulolutu noxou Tila. Sou lexe ulosoiengixu vote'i sou maulixu Kalisito Iesu e muxolu noxilo 'o. Ioxe eni elosinge lavulavu noxi'a ta mitema ilotu noxou Iesu no anu tuatuala vilevilesi ukalusi. 18 Xo se'i noxinge ne uao ixolaxolasi 'o. Xo ane'i ixavuxavutala lexe eni maasi amomomo sou ane'e noxinge uasi. 19 Ia uasi xo eni ane'e noxinge paleasi lexe Tila umasaxa aloxo ne. No mine eni ane'e la eni ataxunu mo alomusou vaikalai'a ta mitema sou xolaxola e ivivikala ne uasi. Ia xavi ma'ia ane ane'i mino'u ne. 20  j Xo saxisaxila'u noxou Lataua ne anu mii sou vaivaikalasi uasi, anu mii sou xavi. 21 La sou mii ma'ia ane ngingi ngemasaxau mukalu? Xo loxovaa eni ane'e noxinge ne la ane'e ano'u vuate, uasi ane'e noxinge no nano no anu talelingenge mo uleenu sou opo se'isisi?

Copyright information for `ATA