a9:1Apo 22:17-18, 26:16; 1Ko 15:8-9
b9:22Ko 3:2-3
c9:4Luk 10:8
d9:9Lap 25:4; 1Ti 5:18
e9:102Ti 2:6
f9:11Rom 15:27
g9:12Apo 20:34; 2Ko 11:9
h9:13Lap 18:1-3
i9:14Mat 10:10; Xal 6:6
j9:16Iel 20:9
k9:20Apo 21:20-26
l9:222Ko 11:29
m9:25Pil 3:14; 2Ti 2:4-5, 4:7-8
n9:27Rom 8:13, 13:14

1 Corinthians 9

Xaixai Muisalili Noxou Mitema Ane Iesu mupalusou

a Loxovaa eni vasimelo manamana'u uasi? Loxovaa eni itema ane aposeli uasi? Loxovaa eni amaisou Iesu anu Tila noxinge uasi? Ia loxovaa ngingi ne loxo neneaxu xaixaixeni noxou Tila uasi? b Mo lexe se'i i'oxe eni amitema ane Iesu mupalusilo uasi ia ngingi nga'oxo lexe eni itema ane Iesu mupalusilo noxinge. Xo ngingi ne aloxo sosovo sou xaixai noxilo noxou Tila.

Anu vaikalaxeni 'o sou latolosilo ulai noxi'a ta mitema ane ixolu sou iilevinu xaixaixeni. c Loxovaa anu muisalili sou nexi tano'u la'ilalinexe xe lexanexe kalumo uasi? Mo loxovaa anu uisalili sou nexi tano'a ta semamexi ane mimulamulaxu tane'i sou noxi'a taxixaoxao loxo ta aposeli mo Tila ta vimovimou xe Kepasi kalumo uasi? Loxovaa nexi noxou Valunavasi nexisisi ta'oxonu xaixai no avoxe sou usu'ulinu xoluxolu nexesi? Itema ane uxaxai loxo itema sou 'oto'otoi'a, la anu molu umoloxou 'ani la? Xe 'ena'ei ane utou xai sou uaini vile la anu umomomo sou u'ani no anu uasi? Xe 'ena'ei ane utuvu'a ta sipsip uiexu susune'i lexaxu la uasi? Loxovaa ngingi ngaxavutala lexe eni amulimulinu xavutalai'a ta mitemasi'a e'oxonu vaikala ane 'o? Lapuloto muvikala aloxo ne. d Xo mikaukavunu no anu lapuloto noxou Mosesi aloxo 'o,

“Mamu sou ngasamalinu ta bulumakau anaxa'a no mine ane'i uao i'uve'uve'u la'ilali sosousou no alesi 'o.”
Loxovaa? Lataua muvivikala ne si'a ta bulumakau? Uasi.
10  e Anu aloxo 'o vaikala tovola'i ane ne singe. Xo anu umasaxa lexe nenge ta'oxo loxo itema ane umamulonu lialia no xai. Xe itema ane uxexeenu la'ilali sosou. Ane'i ilou mi'oxo aloxo ne xo ane'i ilou iloopala lexe ulai la ane'i ino'u 'ulusou neneaxu xaixaii'a ilou ne. 11  f Anu aloxo nexi tetounu mii sou Uleenu nonixi noxinge 'o. Ia ngingi ngalosixe mii ane sou usu'uli vasimenge la loxovaa? Anu uisalili? Ia uasi. Xo nexi tano'u mii e nexi tetounu nesi temanu. 12  g Ia lexe se'i ino'u mimii lailaixe mose'i aloxo ne noxinge la male nexi ne tano'u tavu'alo manina. Ia xo mimii lailaixe mose'i e lexe nexi tano'u noxinge ne nexi talinga sou tano'u uasi. Aloxo ne la sou nexi tatavulenu tu'umaxu ne xo tamasaxa sou tano'u uasi xo maasi la utaluxu vote'i sou a'alo laixe sou Kalisito. 13  h Ngaxavutala lexe ane'i ane ixaxai no nano no 'a taasou lalotu tatila noxou Lataua ane'i ino'u la'ilali no nano no 'a taasou lalotu tatila noxou Lataua ne. Xe ane'i ane isu'uli no 'a xaixai no nano no 'a valovalo la ane'i i'ani no anu mii ane ane'i mi'elaxu mulai mimulaxu no valovalo ne. 14  i Anu iouvilesisi aloxo Tila muvikala pekia'u lexe ane'i ane ia'aloxu a'alo laixe la ane'i ino'u xoluxolu lailaixe no lialia 'o sou a'alo laixe ane ne. 15 Ia eni ano'u mii vile uasi. Mo eni akaukavunu mimii mose'i sou ano'u noxinge uasi. Eni asoli ne mii vitanisi, ia eni a'osasou a'aloxu a'alo laixe mo ano'u mii vile uasi ne anu tila. 16  j Aloxo ne la sou no mine eni a'aloxu a'alo laixe la amomomo sou a'itileli sou uasi xo eni a'aloxu a'alo laixe ane 'o no anu masaxa ane muavutilixo sou a'alo. Masua manina noxilo lexe eni a'aloxu a'alo laixe uasi. 17 La sou eni umomomo sou ano'u 'uluxeni sou xaixai ane 'o uasi. Xo eni melo a'oxonu no 'a masaxa noxilo uasi. Eni e'oxonu umulinu masaxa noxou. 18 Ioxe la sou eni ano'u 'uluxeni ane loxovaa? Xo mimii e lexe eni ano'u loxo 'uluxeni noxi'a ta mitema 'o ane eni ano'u mimii uasi 'o. Ia 'ulu vilesisi e lexe eni ano'u ne ane eni a'aloxu a'alo laixe ulai noxi'a ta mitema.

19 La sou eni amasaxa lexe axolu vasimelo papaxesi. Ia axali loxo itema sou xaixai vitanisi noxou itema vile uasi. Eni melosi a'oxoleli axali loxo itema sou xaixai vitanisi noxi'a ta mitema ukalusi. 20  k Aloxo ne la sou no mine eni axolu no nixi noxi'a ta Iutaia la eni axali loxo ane'i ta Iutaia. Mo sou ano a ine'e. Xe no mine eni axolu no nixi noxi'a ane'i ane imulinu lapuloto la eni axali loxo eni amitema sou amulinu lapuloto ia eni axolu no anu lapuloto uasi. Eni a'oxo aloxo ne la sou eni amomomo sou alapune'i ane'e ne'i noxou Kalisito. 21 Ioxe no mine eni ane'e noxi'a ane'i ane ilavusou lapuloto uasi la eni axali loxo itema e ulavusou lapuloto uasi. Ia eni asusu no anu lapuloto noxou Lataua uasi. Eni emulinu lapuloto noxou Kalisito. Eni a'oxo aloxo ne mo sou alapune'i ane'i ane ilavusou lapuloto uasi ne ine'e noxou Kalisito. 22  l La sou no ie'i ane'i ane imulamulaxu tane'i pekia'u uasi la eni kalumo axali loxo ane'i ne sou alapune'i. Eni amasaxa lexe amulinu 'ilixoi'a ta mitema ukalusi mo sou no 'a 'ili'ilixoi'a nesi la asu'uline'i sou ino'u maulixu Kalisito. 23 No 'a 'ilixo ane eni a'oxonu ne sou eni a'osa sou a'aloxu a'alo laixe noxi'a ne mo nene'axu uxali la eni a'osa misevile.

24 Ngingi ngalavu laixe xo no 'a voxo sou saisale la ta mitema tavu'alo iiave no 'a saisale ia vilesisi noxi'asi anu uno'u 'ulu. Ngalavusou uasi ngaiave xavingengi mo sou ngano'u 'ulu ukalusi. 25  m Xo ta mitema ukalusi ane i'oxonu vilavila'i sou saisale no lia 'o ane'i tane'i utulu pekia'u manina no anu. Xo ane'i imasaxa lexe i'oxo aloxo ne mo sou ino'u kisivalui'a. Kisivalu ane ane'i ino'u ne ulai la ukalu. Ia ane nenge ta'oxonu 'o sou tano'u kisivalu ane kaluxusou uasi. 26 Aloxo ne la sou eni umomomo sou aiave loxo itema e uiave masumasua mo utotosa uasi. Mo eni umomomo sou a'oto la asuanu avolo vitavitanisi loxo itema e usu'anu avolu vitavitanisi no nixi uasi. 27  n Eni ava'u vasimelo uisalili mo sou a'oxonu vasimelo ne umulinu masaxa noxilo mo sou ulai xe eni a'aloi'a ta mitema la eni kalumo ano'u uuluxeni xo loxo 'o io ano'u uasi.

Copyright information for `ATA