a1:1Ioa 1:1
b1:2Ioa 1:14
c1:4Ioa 16:24
d1:51Ti 6:16; Iak 1:17
e1:61Ioa 2:4
f1:8-9Lex 32:5; Xav 28:13

1 John 1

a Mii ane muxolu tatei no mine Lataua ukoinu mimii uao ne, nexi telomusou mo temaisou no iexi mo temaisou laixe manina mo tekasou. Anu vaikala sou mauli ane nexi taa'aloxu 'o.

b Mauli ane ne muxali, la nexi temaisou. La sou nexi tavikala lamana no anu 'o, xe taa'aloxu mauli ane ukalu uasi ulai noxinge. Mauli ane kaluxu uasi ne, Anu ilou Momu Lataua mixolu mipita, ia Anu muxali noxixe. Tava'u xo nexi taa'alomengixu mii ane nexi temaisou mo telomusou ne, nexi temasaxa lexe nenge nenge'a taxali vilesisi. Taxali vilesisi, la nenge tapita noxou Maminge ilou 'Olu, Iesu Kalisito. c Nexi tekaukavunu vaivaikala ane 'o, sou lexe nenge taxali vilesisi, la nexi ta'osa manina.

Tamulimulinu 'Ilixo sou Lamana

d Lataua anu lamana, ia 'ilixo sou isivoxo vile uxolu noxou uasisi manina. Anu a'alo ane ne, nexi telo-musou noxou Iesu Kalisito, la sou nexi taa'alomengixu. e Lexe nenge tavikala lamana lexe nenge noxou Lataua texali vilesisi, ia nenge tamuli-mulinu 'ili'ilixo sou isivoxo, la nenge tekalavoi mo tamulinu vaikala manina noxou Lataua uasi. Ia lexe nenge tamulimulinu 'ili'ilixo sou lamana loxo anu umulimulinu, la nenge nenge'a taxolu tapita mo sialuxu 'Olu Iesu munixisinge la sou nenge noxou Lataua taxali laixe no anu 'ilixo masumasua ukalusi.

f Lexe nenge tavikala lexe nenge ta'oxonu 'ilixo vile masua uasi, la nenge xavutalamenge ukalavoinenge, mo vaikala manina noxou Lataua uxolu noxinge uasi. Ia lexe nenge tapala'alixu 'ili'ilixo masumasua noxinge, la Lataua uxiu tumalouu 'ili'ilixo ne, mo ukalipalanenge no anu 'ili'ilixo masumasua, xo Lataua uvikala lexe u'oxonu mii ma'ia, la umulinu vaikala noxou, la u'oxonu mii laixesi. 10 Lexe nenge tavikala lexe nenge ta'oxonu 'ili'ilixo masumasua uasi, la nenge tavikala lexe Lataua anu itema sou kalavoi. Mo vaikala manina noxou Lataua uxolu no nano no maulinenge uasi.

Copyright information for `ATA