a2:1Eva 7:25-26
b2:2Ioa 1:29; Kol 1:20; 1Ioa 4:10
c2:5-6Ioa 14:21, 23
d2:7Ioa 13:34; 2Ioa 5-6
e2:8Ioa 1:9; Rom 13:12
f2:91Ioa 4:20
g2:10Rom 14:13
h2:11Ioa 12:35
i2:15Rom 8:7
j2:16Rom 13:14
k2:17Mat 7:21
l2:18Mat 24:5 24; 2Ioa 7
m2:19Apo 20:30
n2:201Ko 2:15; 2Ko 1:21; 2Ioa 2
o2:221Ioa 4:3; 2Ioa 7
p2:23Ioa 5:23; 1Ioa 4:15, 5:1
q2:27Ioa 16:13
r2:291Ioa 3:10

1 John 2

a Ta molomoloxeni e eni amasa-xainge, ngalomu. Tava'u xo eni ekaukavu vaivaikala ane ne, xo eni emasaxa lexe ngingi nga'oxonu 'ilixo vile masua uasi. Ia lexe evile u'oxonu susu vile, la anu mii vile uasi. Xo nenge telavusou lexe itema vile sou utulu no pa'umenge sou usu'ulinenge, la uvivikala ulai noxou Maminge, Anu a muxolu. Itema ane anu mulapu manina, anu Iesu Kalisito. b Anu mulosou maulixu sou muno'inge mulivulivunenge no anu 'ili'ilixo masumasua noxinge. Anu mu'oxonu aloxo ne singesi uasi, sou si'a ta mitema no xalee xalee tuatuala ukalusi kalumo.

Lexe nenge tamulimulinu lapuloto noxou Lataua, la telavu lexe nenge telavusou Lataua. Itema vile uvikala lexe anu mulavusou Lataua, ia umulinu lapuloto noxou Lataua uasi, la anu itema sou kalavoi mo vaikala manina noxou Lataua uxolu noxou uasi. c Ia lexe itema vile umulinu vaikala manina noxou Lataua, la anu tanuxu menexu manina loxo Lataua tanuxu. 'Ilixo ane ne, uxolu noxinge, la nenge telavu lexe nenge texolu noxou. Evile uvikala lexe uxolu noxou Lataua, la laixe lexe anu umulinu Iesu xua'u.

d Ta menexilo e eni amasaxainge, ngalomu. Eni akaukavunu lapuloto vile alavua ulai noxinge uasi, eni akaukavu lapuloto ane teinu e ngingi ngelomusou no mine ngemuxaxu tangengi noxou Kalisito. Lapuloto ane teinu ne, anu a'alo ane ngingi ngelomusou. e Ia eni akaukavunu lapuloto ano o loxo lapuloto alavua ulai noxinge. 'Ilixo noxou Iesu mo 'ilixo noxinge mumaxa'u lexe lapuloto ane ne, anu manina. Xo 'ilixo sou isivoxo, anu asou ukalu, ia lamana maninasou mukaasinge mukalu.

f Itema vile ane anu uvikala lexe anu muxolu no anu lamana, ia tanuxu vimou uasisi, la anu a uxoxolu no isivoxo sio. 10  g Ia anu ane tanuxu vimou, la anu muxolu no anu lamana. La sou anu ususu no anu 'ilixo vile masua uasi. 11  h Ia anu ane tanuxu vimou uasi, la anu muxolu no isivoxo mo uxixaoxao no isivoxo. La ulavusou lexe anu ulai ne'ei uasi, xo isivoxo la anu umalei uasi. 12 Ta molomoloxeni e amasaxainge, eni akaukavumengi, xo Lataua muxiu tumalouu 'ili'ilixo masumasua noxinge no anu ualasou Tila Iesu. 13 Mo kaukavu kalumo ulai noxi'a ta mami'a, xo ngingi ngelavusou Iesu ane muxolu tatei no mine Lataua ukoinu mimii uao. Mo kaukavu kalumo ulai noxi'a ta maulu, xo ngingi ngetaloxolixu itema masua. 14 Mo kaukavu kalumo ulai noxi'a ta molomoloxeni e amasaxai'a la, xo ngingi ngelavusou Maminge Lataua. Mo ulai noxi'a ta mami'a la, xo ngingi ngelavusou Iesu ane muxolu tatei no mine Lataua ukoinu mimii uao. Xe ulai noxi'a ta maulu la, xo ngingi xavingengi mo vaikala noxou Lataua mumauli noxinge, la ngetaloxolixu itema masua.

Mamu sou Tangengixu Mimii sou Lia 'O

15  i Mamu sou tangengixu lia xe mimii sou lia 'o uasi. Lexe itema vile tanuxu mimii sou lia 'o, la tanutanuxu noxou Maminge Lataua uxolu noxou uasi. 16  j Xo mimii latala sou lia 'o ne, anu molu noxou Maminge Lataua uasi, ia anu molu no lia 'osi. Mimii sou lia 'o ne, aloxo 'o. Masaxa sou vasimenge loxo ta mitema imasaxau lamoli mo 'ilixo sou vote'i mose'i la. Mo ta mitema iisuiisu, xe i'itinu ualasi'a no anu mii ma'ia ane itetelisou mo no anu mii ma'ia ane ane'i mi'oxonu. 17  k Mimii latala sou lia 'o mo masaxa noxi'a ta mitema sou mimii no lia 'o, ulai la ukalu. Ia itema ane anu umulinu masaxa noxou Lataua, la anu umauli no voxovoxo, ia usoli uasi.

Ngasaxila'inge Noxi'a ta Uluau Kalisito

18  l Ta molomoloxeni e amasaxainge, ngalomu. Nenge 'a sou taxali 'alai no anu voxo sou kaluxu. Ngingi ngelomusou lexe uluau Kalisito a unene'e. Ia vaimomo 'o, ane'i ta uluau Kalisito tavu'alo a mixalixali. Ane'i mixalixali, la sou telavu lexe nenge asou taxali 'alai no anu voxo sou kaluxu. 19  m Ane'i mi'umesinge mo milai, la mumaxa'u lexe ane'i ta noxinge uasi. Manina lexe ane'i ta noxinge, la ane'i ixolu mo nenge nenge'a taxolu, ia uasi.

20  n Ia ngingi, Uleenu Tavuna anu a muxolu noxinge. Mo ngingi latala ngelavusou vaikala manina noxou Lataua. 21 Eni akaukavu aloxo 'o, xo ngingi ngelavusou vaikala manina noxou Lataua e kalavoi vile uxolu no anu uasi. La lexe ngingi ngalavusou uasi, la eni amomomo sou akaukavu aloxo ne uasi. 22  o 'Ei ane anu itema sou kalavoi? Anu ane uvikala lexe Iesu Kalisito ane e itemasou ulivulinenge uasi, la anu itema sou kalavoi ane. Itema ane loxo ne, anu uluau Kalisito mo uvikala lexe Maminge Lataua mo 'Olu Iesu ixolu uasi. 23  p Itema ane uvikala lexe 'Olu Iesu ne uxolu uasi, la Maminge Lataua uxolu noxou uasi. Ia itema ane mulavusou 'Olu Iesu, la Maminge Lataua muxolu noxou.

24 Ngatetelisou mii ane ngingi ngelo-musou tei no mine ngingi ngemuxaxu tangengi noxou Kalisito. Lexe anu a uxolu, la ngingi kalumo ngaxolu noxou 'Olu Iesu mo.

Maminge Lataua

25 Lexe nenge tatetelisou mii ane ne, la Kalisito musakii vaikala sou lexe ulosinge mauli ane ukalu uasi.

26 Eni ekaukavumengi ne, si'a ta mitema ane ine'e sou itovo ixolulaulaulingenge. 27  q Ngingi ne, ngeno'u Uleenu Tavuana mo Anu a muxolu noxinge, la sou itema vile une'e sou ulosinge lavulavu la uasi. Xo Uleenu Tavuna ulosiengixu mimii latala mo Anu manina, ia Anu kalavoi uasi. Ngingi ngaxolu noxou Kalisito loxo Uleenu Tavuna anu mulosiengixu.

Lataua ta 'Olu

28 La sou, ta molomoloxeni e amasa-xainge, ngalomu. Ngaxoxolu noxou Kalisito, mo sou Anu ulivu une'e, la ngingi nga'olo'olo mo ngamaela noxou uasi.

29  r Ngingi ngelavu lexe Lataua anu itema sou mulapu, la ngingi ngelavu lexe ane'i ane imulinu 'ilixo ane mulapu ne, Lataua ta 'olu.

Copyright information for `ATA