a3:1Ioa 1:12-13, 16:3
b3:22Ko 3:18
c3:5Ioa 1:29; 1Pi 2:22-24; 1Ioa 2:2
d3:8Ioa 8:44
e3:91Ioa 5:18
f3:11Ioa 13:34
g3:12Tav 4:8
h3:13Ioa 5:18-19
i3:14Ioa 5:24
j3:15Pal 21:8
k3:16Ioa 13:1; Xal 1:4
l3:17Lap 15:7
m3:18Iak 2:15-16
n3:21Eva 4:16
o3:23Ioa 6:29, 13:34
p3:241Ioa 4:13

1 John 3

a Ngamaisou! Tanutanuxu noxou Lataua Maminge noxinge, Anu mutila musuku, la sou Anu mumoxo'inge lexe nenge ta 'olu mo vaimomo 'o nenge taxolu loxo anu ta 'olu manina. Tava'u xo ta mitema no lia 'o ilavusinge uasi, xo ane'i ilavusou Lataua uasi. b Ta menexilo e amasaxainge, ngalomu. Nenge telavusou lexe nenge Lataua ta 'olu, ia nenge talavusou lexe ili'i, la nenge taxali a loxovaa la, uasi. Ia nenge telavu lexe ili'i no mine Kalisito ulivu une'e, la nenge taxali loxo Anu, xo nenge tamaisou loxo anu Lataua. 'Ei ane anu umolo tanu no anu xali noxou Kalisito ne, anu uxolu va'axu no anu 'ili'ilixo masumasua loxo Anu.

Ane'i ane i'oxonu 'ili'ilixo masumasua ne, imulinu lapuloto noxou Lataua uasi. Xe ane'i ane i'oxonu 'ili'ilixo masumasua ne, mixiu tumali'au Lataua mo lapuloto noxou ne, mii vitanisi no maulixa'a. c Ia ngingi ngelavusou lexe Kalisito mulu'e no lia 'o sou uxexee 'ili'ilixo masumasua noxinge. Xo Anu 'ilixo vile masua uxolu noxou uasi. Itema ane uxolu noxou Kalisito uasi, la anu u'oxo'oxonu 'ili'ilixo masumasua uasi. Anu ane usolonu sou u'oxo'oxonu 'ili'ilixo masumasua, la anu mutongonu mo mulavusou Kalisito uasi.

Ta molomoloxeni e amasaxainge. Ngalomu. Ngasaxila'inge laixe noxi'a ta mitema sou kalavoi, xo isusulingenge. Anu u'oxonu 'ilixo laixe no iou Lataua, la anu itema vile mulapu no iou Lataua loxo anu Kalisito mulapu. d Anu ane u'oxonu 'ili'ilixo masumasua ne, anu noxou Satani, xo Satani musokou 'ilixo masumasua no mine Lataua musokou sou mukoinu mimii latala mo mune'e muxali vaimomo 'o. Tava'u aloxo ne, la sou Lataua 'Olu mulu'e no lia 'o sou ukalusou xaixai noxou Satani. e La sou anu ane molu noxou Lataua ne, anu usolonu sou u'oxonu 'ilixo vile masua uasi, manina musuku lexe anu umomomo sou usolonu la uasi. Xo Lataua maulixu muxolu noxou. 10 No anu 'ilixo ane ne, la sou talavu lexe ta 'ei ane Lataua ta 'olu xe ta 'ei ane Satani ta 'olu. Xe ane'i ane i'oxonu 'ili'ilixo masua, la ane'i Lataua ta 'olu uasi. Mo ane'i ane imasaxai'a ta vimovimo'a noxou Lataua uasi, la ane'i kalumo aloxo ne.

Ngamasaxainge Ngatongato'o

11  f Lapuloto ane ngingi ngelomusou tei no mine ngingi ngemulaxu tangengi noxou Iesu ne, aloxo 'o. Ngingi ngamasaxainge ngatongato'o. 12  g Ia mamu sou ngamulinu 'ilixo noxou Kaini. Anu noxou Satani, la sou muvau vimou la musoli. Tava'u a lovoxaa, la sou anu muvau? Anu muvau, xo mumaisou lexe mii ma'ia ane anu mu'oxonu ne, laixe uasi, ia mii ma'ia ane anu vimou mu'oxonu ne, laixesi no iou Lataua. 13  h Ia, ngingi ta mitema noxou Lataua, io ta mitema sou lia 'o imasaxainge uasi, la ngakuluke mamu. 14  i Nenge telavusou lexe nenge texolu va'axu noxou Lataua la nenge loxo tesoli, ia nenge telivu noxou la nenge loxo temauli. Nenge telavu aloxo ne xo nenge temasaxainge ngatongato'o. 'Ei ane umasaxai'a ta vimovimou uasi, la anu ulavusou Iesu uasi mo anu uxolu loxo anu musoli. 15  j Anu ane umasaxai'a ta vimovimou uasi, anu itema sou uve'a ta mitema isoisoli. Mo nenge telavusou lexe itema loxo ne, umomomo sou uno'u mauli ane ukalu uasi, uasi.

16  k Iesu Kalisito mu'italonu maulixusinge, la no anu soli noxou ne, nenge telavusou 'ilixo sou tamasa-xainge ngatongato'o. La sou eni evikalangengi pekia'u lexe nenge kalumo ta'italonu maulinenge si'a ta vivinge. 17  l Ia lexe itema vile iu lavuluti tavu'alo, mumaisou vimou vile iu lavuluti uasi, la tanuxu uasi, la anu tanutanuxu noxou Lataua uxolu noxou a loxovaa? 18  m Ta molomoloxeni e amasaxainge, ngalomu. Tanengexa'a no anu ananenge ilou vaikalasi mamu. Lexe nenge tanengexa'a manina, la tasu'uline'i maninasou. 19 Ta'oxonu aloxo ne, la nenge telavu lexe vaikala manina noxou Lataua muxolu noxinge mo telavu lexe xavutalamenge uvikala lexe nenge tesusu, ia oponenge uai se'isisi no iou Lataua. Xo xavutala noxou Lataua ne, anu iouvilemo mo mulavusou 'ilixo latala mukalusi.

21  n Ta menexilo e amasaxainge. Ngalomu. Lexe xavutalamenge uvikala lexe nenge tasusu uasi, la tanenge lili no iou Lataua uasi. 22 Mo tano'u mii ma'ia e nenge temasaxa lexe Anu ulosinge. Xo nenge temulinu lapuloto noxou Lataua mo te'oxonu xaixai lailaixe, la Anu u'osasinge. 23  o Lapuloto noxou Lataua e anu muvikala pekia'u lexe nenge tamulinu ne aloxo 'o. Ngamuxamuxaxu tangengi no anu ualasou noxou Iesu Kalisito, Lataua 'Olu mo ngamasaxainge ngatongato'o. 24  p Ane'i ane imulinu lapuloto noxou Lataua ne, ane'i ixolu noxou Lataua xe Anu uxolu noxi'a kalumo. Nenge telavusou no anu Uleenu Tavuna ane anu Lataua mulosinge lexe Lataua uxolu noxinge.

Copyright information for `ATA