a4:1Mat 7:15; 1Te 5:21; 1Ioa 2:18; 2Ioa 7
b4:21Ko 12:3
c4:31Ioa 2:18
d4:4Mat 12:29; 1Ioa 5:4-5
e4:5-6Ioa 8:47, 15:19
f4:9Ioa 3:16
g4:10Rom 5:8-10; 1Ioa 2:2
h4:12Ioa 1:18
i4:132Ko 1:22; 1Ioa 3:24
j4:21Mak 12:29-31

1 John 4

Ngamaisi'a ta Uleenu Laixe

a Ta menexilo e amasaxainge, ngalomu. Mamu sou ngamuxaxu tangengi noxi'a ta uleenu ukalusi. Ngamaisi'a laixe lexe ane'i me'a noxou Lataua, uasi me'a vilemo. Xo ta mitema sou palomatana kalavoi tavu'alo milaa milu'e no lia 'o mukalu. b Ta uleenu ane ivikala manina lexe Iesu Kalisito anu muxali itema manina, la ane'i ta uleenu ane ne me'a noxou Lataua. No anu palapala'alixu noxi'a, la ngingi ngalavusou lexe uleenu ane ne, Anu noxou Lataua manina. c Ia ta uleenu ane ipala'alixu lexe Iesu Kalisito ane uxali itema manina uasi, la ane'i me'a noxou Lataua uasi. Anu uleenu noxou uluau Kalisito e ngingi ngelomusou lexe anu unene'e. Ia vaimomo 'o, anu muxali.

d Ngingi ta molomoloxeni e amasaxainge. Ngalomu. Ngingi noxou Lataua e Anu muxolu noxinge ne la sou xavi e mulosinge ne, muaulixu anu ane muxolu no lia 'o. La sou ngingi ngetaloxolixa'a ta uluau Kalisito mukalu. e Ane'i sou no lia 'osi mo mii ma'ia ane ane'i ilemolu ne, sou no lia 'osi kalumo. La sou ta mitema no lia 'o, ilomuxa'a. Ia nenge noxou Lataua mo 'ei ane mulavusou Lataua, la anu ulomu noxinge, ia 'ei ane noxou Lataua uasi, la anu ulomu noxinge uasi. No anu 'ilixo ane nesi, la sou nenge tatongonu uleenu ane manina xe ane sou kalavoi.

'Ilixo Noxou Lataua sou Tamulinu

Ta menexilo e amasaxainge, ngalomu. Nenge telavusou lexe 'ilixo sou tamasaxai'a ta mitema ne molu noxou Latauasi. La sou 'ei ane umasaxai'a ta menexu, la anu Lataua 'olu mo mulavusou Lataua. Ia 'ei ane umasaxai'a ta menexu uasi, la anu Lataua 'olu mo ulavusou Lataua uasi. Io, nenge telavusou Lataua mo telavusou lexe anu itema sou umasaxai'a ta mitema, la sou laixe lexe nenge kalumo tamasaxainge ngatongato'o. f Lataua mupalusou 'Olu anu vilesisi mulu'e no lia 'o, sou mulosinge, la sou nenge temauli. No anu soli noxou 'Olu Iesu, la Anu mumaxa'u tanutanuxu singe. 10  g Nenge tanengexu Lataua tei uasi, ia Anusi tanunenge la sou mupalusou 'Olu Iesu mulu'e sou mulosou maulixu singe sou muno'inge mulivulivunenge no anu 'ili'ilixo masumasua noxinge. Anu mulosou maulixu singe sou uxolixolinu Lataua no anu la'ia noxou. Mii ane Lataua mu'oxonu singe ne, Anu 'ilixo manina sou umasaxai'a ta mitema. 11 Ta menexilo e amasaxainge, ngalomu. Lataua mumasaxainge misevile, la sou eni avikalangengi pekia'u lexe nenge kalumo tamasaxainge ngatongato'o. 12  h Io, itema vile umaisou Lataua iou uasi tatei mo mune'e muxali vaimomo 'o. Ia lexe nenge tamasaxainge ngatongato'o, la Lataua uxolu noxinge mo 'ilixo noxou Lataua sou umasaxai'a ta mitema umauli noxinge no anu maulingenge.

13  i Lataua mulosinge Uleenu, la sou nenge telavusou lexe nenge texolu noxou xe Anu muxolu noxinge. 14 La sou nenge temaisou lexe Maminge Lataua mupalusou 'Olu mulu'e no lia 'o sou upamauline'i ta mitema. La nenge taa'a'aloi'a ta mitema no anu. 15 Lexe 'ei ane upala'alixu lexe Iesu anu Lataua 'Olu, la Lataua uxolu noxou xe anu uxolu noxou Lataua. 16 La sou nenge telavusou lexe Lataua umasaxainge mo tamuxamuxaxu tanenge no anu.

Lataua anu itema sou umasaxai'a ta mitema. La sou 'ei ane utetelisou 'ilixo ane ne, la anu uxolu noxou Lataua xe Lataua uxolu noxou.
17 Nenge taxolu noxou Lataua xe Lataua uxolu noxinge, la 'ilixo sou tamasaxai'a ta mitema umauli noxinge no anu maulingenge. La sou nenge ta'olo'olo no voxo sou tatulu no anu vaivaikala uasi. Xo nenge temulinu 'ilixo sou tamasaxai'a ta mitema loxo Anu mu'oxonu no lia 'o. 18 'Ei ane ulavusou umasaxai'a ta menexu, la no voxo sou utulu no anu vaivaikala la anu u'ume uasi. Xe 'ilixo sou umasaxai'a ta menexu umauli manina noxou, la anu u'ume uasisi manina. Ia 'ei ane anu mulavu lexe umasaxai'a ta menexu uasi, la anu u'ume xo mulavusou lexe Lataua ulosou navunavu. Anu ane u'ume, la 'ilixo sou umasaxai'a ta menexu umauli noxou uasi.

19 Nenge tamasaxainge ngatongato'o xo Lataua mumasaxainge tei. 20 'Ei ane uvikala lexe umasaxau Lataua, ia umasaxai'a ta vimovimou uasi, la anu itema sou kalavoi. Mo anu ane umaisi'a ta vimovimou, ia umasaxai'a uasi, la anu umomomo sou umasaxau Lataua ane anu umaisou uasi ne, uasi. 21  j 'Ei ane umasaxau Lataua, la eni avikalanu pekia'u lexe anu umasaxai'a ta vimovimou kalumo. Lapuloto ane ne, Lataua mulosinge.

Copyright information for `ATA