a1:2Rom 8:29; 2Te 2:13
b1:3-4Kol 1:12
c1:5Ioa 10:28, 17:11
d1:6Iak 1:2; 1Pi 5:10
e1:7Xav 17:3; Sek 13:9; Mal 3:3; Iak 1:3
f1:8Ioa 20:29; 2Ko 5:7
g1:10Mat 13:16-17
h1:11Lex 22; Ais 53; Luk 24:26-27
i1:14Rom 12:2; Ep 2:3, 4:17-18
j1:16Liv 11:44-45; Mat 5:48
k1:17Rom 2:11; Pal 2:23
l1:19Apo 20:28; Eva 9:12-14
m1:20Ep 1:4; 2Ti 1:9-10
n1:21Ioa 14:6; Rom 5:1-2
o1:22Ioa 13:34; Rom 12:10
p1:24-25Ais 40:6-8

1 Peter 1

Pita ne Anu Itema sou Xaixai Noxou Iesu Kalisito

Eni Pita, eni aposeli noxou Iesu Kalisito, eni ekaukavunu vaivaikala ane 'o mulai noxinge ngingi ta asila noxou Lataua ane ngelongolau tani la ngelai ngexolu no xalexalee lia ta tatila ne Pontosi, mo ne Xalatia, mo ne Kapodosia, mo ne Asia, xe ne Bitinia. a Lataua Maminge mulavusinge mo musosovosinge xo nenge texali malemalengainge no 'a xaixai noxou Uleenu, mo ngalomuxu Iesu Kalisito la sou Anu u'ulosinge no anu sialuxu. Eni akilaka lexe alauna mo opo se'isisi noxou Lataua u'ana'ana mo uxolu noxinge.

Ta'osasou Lataua sou Loopala Ane Kaluxu Uasi

b Mo nenge ta'osasou Latauamenge anu Iesu Kalisito Tila noxinge Momu, xo Anu mutulusou Iesu no anu soli, ilou tulu noxou la nenge teno'u mauli alavua, xo Anu mualaunasinge. No anu mauli ane ne u'oxo pekia'inge sou taloopala no anu mauli ane kaluxu uasi ane uai teitexi no opo loxotolo. Mimii ane ne umomosou umamulo mo nuninuni'u mo ukalu vitanisi uasi. c Ngingi ngemulaxu tangengi noxou Iesu la ngano'u mauli ane kaluxu uasi e Lataua mulalaxiinu sou ngano'u uxali manina sou no voxo kaluxusou, xo Anu usaxilainge no anu xavi noxou. d Aloxo ne la sou ngingi nga'osa manina xo tu'utu'umaxu ane muxali noxinge la mu'oxongengi ngetama ne umomomo sou uxolu maxuveeni uasi. e La sou tu'utu'umaxu ne sou utovonu muxamuxaxu tangengi lexe ngingi ngamuxaxu tangengi maninasou. Aloxo xoulu e i'elaxu sou mosomoso uxexee ia xoulu maninasousi uxali, anu iouvilesisi aloxo muxamuxaxu tangengi ne, la muxamuxaxu tangengi ne mua'ulixu xoulu, xo xoulu ne anu ukalu vitanisi. Lexe ngingi ngatulu pekia'inge no anu muxamuxaxu tangengi ulai uxali no voxo ane Iesu Kalisito uxali lamana la Lataua u'osasinge mo uitinu ualasinge. f Ia ngingi ngamaisou Iesu Kalisito uasi ia tangengixu, mo vaimomo 'o ngingi ngamaisou uasi. Ngingi ngamuxaxu tangengi noxou la nga'osa manina, 'osa'ila ane ne umomomo sou ngaa'aloxu la ngakamuli vaikala lexe ngaa'aloxu a loxovaa. Uasisi manina. Xo 'osa'ila ane ne sou teitexi no opo loxotolo. Ngingi nga'osa aloxo ne xo neneaxu muxamuxaxu tangengi ane lexe ngingi ngano'u mauli ane kaluxu uasi noxou Lataua. 10  g No anu mauli ane kaluxu uasi ne, la ta mitema sou palomatana mikakamuli laixe mo tali'i tavu'alo no anu, ia mipalomatana no anu lexe mauli ane kaluxu uasi ne ngingi nga'angingi. 11  h Mo Uleenu Kalisito muxolu noxi'a ta mitema sou palomatana la anu muvikalane'ixu mo mupala'alixu navunavu ane uxali noxou Kalisito xe ili'i no anu la Anu uno'u uala tila. Uleenu muvikalane'ixu tei loxo ne la sou ane'i mikakamuli xe mixavuxavutala lexe itema 'ena'ei manina xe imamaanu ma'ia manina ane anu une'e. 12 Mo muvikalane'i lamana lexe mimii ane ane'i mia'aloxu ne umomomo sou uxali no imamaa noxi'a uasi, ia anu muxali no anu imamaa noxinge. Ia vaimomo 'o Lataua mupalusou Uleenu Tavuna molu teitexi no opo loxotolo mulu'e mo no anu xavi no 'a Uleenu Tavuna, la ta mitema sou a'alo mia'aloxu a'alo laixe mulai noxinge. Mo no anu a'alo laixe ne la ta angelo iisu mo imasaxa lexe imaisou kalumo.

Ngaxolu Va'axu no Anu 'Ilixo Masumasua

13 Ioxe, aloxo ne la sou, ngaxavutala laixe mo xavutalamengi uloo, mo ngaxolu se'isisi, mo ngaloopala manina no anu alauna noxou Lataua e no anu voxo sou Iesu Kalisito ulivu une'e la ulosinge. 14  i Xo tei ngingi ngalavu uasi, la nge'oxonu 'ili'ilixo masumasua, ia vaimomo 'o la ngingi ngelavusou aloxo ne la sou mamu sou nga'oxonu la. Ngalolomu aloxo ta molomolo ilolomu. 15 Ia ngingi ngaxolu va'axu no anu 'ili'ilixo masumasua aloxo Anu ane mu'avalinge ne Anu tavuna. 16  j Xo kaukavu muai no nano no anu Lavuku Tavuna teinu muvikala aloxo 'o, “Ngaxolu va'axu no anu 'ili'ilixo masumasua, xo eni exolu va'axu no anu 'ili'ilixo masumasua.”

17  k No mine ngingi ngavivikala ulai noxou Lataua, la ngingi ngamoxo'u lexe Mamixe, xo Anu utilovosou xaixai noxinge vilevilesi ane ngingi nge'oxo'oxonu, mo no anu tilovo noxou ne la Anu utilovosou laixe manina umomomo sou u'oxonu tulatula vile no anu uasi. Aloxo ne la ngingi ngaxolu se'isi'si mo ngamama'u noxou Lataua xo tuala ane ngingi ngaxoxolu no anu no voxovoxo 'o ne anu tualasinge manina uasi. Ngingi ngaxolu loxo ta asilasi. 18 Mo ngingi ngelavusou lexe tei la ngingi ngemaisou 'ili'ilixo ane mauli no anu uasi noxi'a ta 'ilu'ilusungengi la ngemulinu la sou Lataua mulotongengi ngelivu no anu mimii ane anu ukalu vitanisi loxo siliva mo xoulu uasi, 19  l Anu mulotongengi ngelivu no anu sialuxu Kalisito ne lailaixe misevile loxo sipsip 'olu e mii vile loxo xalevi mo vuvuli u'oxonu vasimolu uasi. 20  m Anu Lataua mulavusou Kalisito tei no mine ukoinu mimii latala no lia 'o uao. Ia no voxo kaluxusou la Anu muxali lamana sou usu'ulingengi. 21  n La sou no anu xaixai noxou Kalisito, la ngingi ngemuxaxu tangengi mo ngaloopala noxou Lataua. Xo Anu mutulusou Kalisito no lulu la mulosou uala tila. 22  o La sou ngingi vaimomo 'o ngelomusou a'alo laixe mo ngamulinu xo Anu mu'oxongengi ngexali malemalenga. Mo sou ngingi tangengixa'a ta vivinge noxou Iesu ngatongato'o no tangengi manina. 23 Ngingi ngelolomusou a'alo laixe ane ne vaikala noxou Lataua ane kaluxusou uasi mo ngemulimulinu la Anu mu'oxongengi ngexali alavua. Mauli alavua e ngingi ngeno'u ne aloxo ovu ngiaxu e ulapau la u'ui vitanisi uasi, ia anu aloxo ane ulapau la uleme. 24  p Xo,

“Ta mitema tavu'alo ne aloxo ia'eia'e
mo tokolomoxa'a ne lailaixe aloxo ia'eia'e seseenu.
Mo ia'eia'e uxalo la sesenu ulapau.
25 Ia vaikala noxou Tatila aloxo ne uasi.
Anu umauli utotomu mo kaluxusou uasi.”
Vaikala ne ane a'alo laixe e mia'alomengi no anu.

Copyright information for `ATA