a3:1-2Ep 5:22
b3:31Ti 2:9
c3:6Tav 18:12
d3:7Ep 5:25
e3:10-12Lex 34:12-16
f3:14Ais 8:12-13; Mat 5:10; 1Pi 2:20, 4:14
g3:161Pi 2:12
h3:20Tav 6–7

1 Peter 3

Vaikala Ulai Noxi'a ta Mulu Ilo'a ta Semasemai'a

a Aloxo ne la sou ngingi ta sema ane ngetaula'i ngaxolu no laxa'a ta mulumulumengi, mo sou lexe ta mulumulumengi ane'i ilomuxu vaikala noxou Lataua uasi ixiunu maulixa'a. Ane'i ixiunu maulixa'a no anu vaivaikala noxinge uasi, ia lexe imaisinge nga'umolu Lataua xe no anu 'ili'ilixo lailaixe noxingesi la sou ane'i ixiunu maulixa'a. b Mo no anu tokolomomengi la, ngingi ngasakisakiinu laxusinge mo ngatokolomoxu tokolomo ane mi'oxonu no anu xoulu xe tokolomo ane lailaixe musuku sou vasimengesi uasi. Ia ngatokolomonu tangengi no nano no anu 'ili'ilixo lailaixe ane umomomo sou ukalu vitanisi uasi, loxo 'ilixo sou ngaxolu no laxa'a mo 'ilixo sou ngaxolu se'isisi no anu uleengengi xo anu 'ili'ilixo ane ne anu lailaixe manina no iou Lataua. Xo ta sema ta tatila taatei mimulinu 'ili'ilixo ane ne, la ane'i mimulaxu tane'i xe miloopala noxou Lataua. Ane'i mi'oxonu aloxo ne, la sou tokolomoxa'a ne lailaixe manina mo ixolu no laxa'a ta mulumului'a. c Aloxo Sala milomuxu mulue Avalaamu xe i'avalou lexe tila, lexe ngingi kalumo nga'oxonu 'ili'ilixo lailaixesi mo nga'ume no anu mii vile uasi, la ngingi ngexali loxo Sala ta 'ili'ilie. d Aloxo ne la sou ngingi ta sema ta mulumului'a kalumo ngaxavutala laixe no mine ngingi ngongi'a ngaxoxolu la ngapaipoune'i xe ngataxane'i xo ane'i vasime'a pekia'u uasi. Xo ane'i kalumo ino'u mauli ane lailaixe noxou Lataua, ngingi nga'oxonu aloxo ne la sou mii vile umomomo sou utaluxu lakilaka noxinge uasi.

Tatavulenu Tu'utu'umaxu sou 'Ilixo Laixe

Ioxe vaikala kaluxusou aloxo 'o ngingi latala ne xavutalamengi mo opongengi uxali vilesisi mo tangengixa'a ta vivinge noxou Iesu mo nga'oxonu 'ilixo lailaixesi ulai noxi'a ta vivinge xe ngaxolu no laxa'a. Mo lexe ta mitema i'oxo masuangengi mo ivikalasinge masumasua la mamu sou ngakolinu no anu 'ilixo masua xe vaikala masua, ia ngakilakasi'a sou Lataua ualusi'a utotomu. Xo Lataua mu'avalinge lexe ngingi nga'oxonu aloxo ne la sou anu ualusinge. 10  e Xo Lavuku Tavuna teinu noxou Lataua muvikala aloxo 'o,

“Anu ane umasaxa lexe maulixu uxolu maxuveeni
mo umaisou aso ulai u'una,
la usaxila'u anaxu no anu vaikala masumasua
xe vaikala kalakalavoi.
11 Mo anu uxiunu tumalou no anu 'ili'ilixo masumasua
ia u'oxonu 'ili'ilixo lailaixesi mo opo se'isisi noxi'a ta mitema.
Anu laixe lexe u'oxonu aloxo ne utotomu.
12 Xo Tila umaisi'a mo usaxila'a ane'i ane i'oxo'oxonu 'ili'ilixo mulapu
mo ikilaka la anu ulomuxa'a.
Ia Anu uxiu tumaloui'a
ane'i ane i'oxo'oxonu 'ili'ilixo masumasuasi.”
13 Lexe ngingi nga'oxo'oxonu 'ili'ilixo lailaixesi, la sou 'ena'ei umomomo sou u'oxonu masuangengi? 14  f Xo lexe ngingi ane nga'oxo'oxonu 'ili'ilixo lailaixesi ia ngano'u tu'utu'umaxu no anu la ngaxavutala tapiena mo nga'ume uasi xo Lataua ualusinge. 15 Ia ngamulaxu Kalisito Tila no nano no tangengi mo ngaxoxolu la ngalalaxii utotomu xo ta mitema ine'e la itali'isinge lexe loopala noxinge ne laaxu a loxovaa, la ngakoline'i laixesi. 16  g Ngatoxone'i mo ngakoline'i se'isisi la ngakoline'i no anu vaikala xati uasi, ngataloxolingenge mo ngataxane'i mo ngamulinu xavutala lailaixesi. Mo sou ta mitema imoxo'inge mo ivikalasinge masumasua ia imaisinge nga'oxo'oxonu 'ili'ilixo lailaixesi loxo ngingi noxou Kalisito la ane'i me'a ixiu imaela no anu vaivaikalai'a la. 17 Xo lexe masaxa noxou Lataua lexe ngingi ngano'u navunavu no anu 'ili'ilixo lailaixe la anu laixe, ia lexe ngingi ngano'u navunavu no anu 'ili'ilixo masumasua la anu lakolisou 'ilixo masua noxinge. 18 Xo Kalisito musoli sou susu noxinge alaxu vilesisi. Anu susu vile noxou uasi, ia musoli sou susu noxinge sou ulivulinenge talai noxou Lataua. Anu muxali itema la ta mitema mivau musoli ia Lataua mutulusou no anu Uleenu. 19 No mine Anu musoli la Uleenu mulai mua'aloxu vaikala noxou Lataua mulai noxi'a ta mitema ane misoisoli la uleene'i mulai muxolu no taasou navunavu. 20  h Ta mitema ne tatei no anu voxo noxou Noa no mine anu mu'oxonu lasipi, la Lataua muxomaie'i lexe ixiunu maulixa'a ia ilomu uasisi manina. Ane'i ilomu uasi la sou ta mitema muxatele tatalusi mimauli no anu lexa toxoxa'a. 21 La sou lexa ne anu sosovosou nga'ulo no anu la Lataua upamaulingengi vaimomo 'o. Ngingi nga'ulo ne sou ngaxexeenu nuni no vasimenge uasi ia anu loxo ngingi ngasakiinu vaikala ulai noxou Lataua lexe ngingi nga'oxonu 'ili'ilixo lailaixesi no iou. Xo no anu soli ilou tuluxu Iesu Kalisito la sou Lataua mupamaulingengi. 22 Mo vaimomo 'o Anu mulai muxolu teitexi no opo loxotolo no avolu Momu tema xe ane'i ane xavine'i mu'oki ilomuxu la ilo'a ta angelo ixolu no laaxu.

Copyright information for `ATA