a4:1Rom 6:2, 7
b4:3Ep 2:2-3
c4:5Apo 10:42
d4:7Rom 13:11-12
e4:81Pi 1:22
f4:9Eva 13:2
g4:10-11Rom 12:6-8
h4:13Apo 5:41; Iak 1:2; 1Pi 1:6-7
i4:141Pi 2:20
j4:18Xav 11:31

1 Peter 4

Xoluxolu Laixe Noxou Lataua

a Aloxo Kalisito muxamulinu navunavu no vasimolu la sou ngingi kalumo ngano'u xavutala laixe aloxo ne. Xo anu ane muno'u navunavu no vasimolu la anu susu vile noxou la uasi. La sou no mine ngingi ngamauli ngaxoxolu no voxovoxo no lia 'o la ngamulinu masaxa masua sou vasimenge uasi, ia ngamulinu masaxa noxou Latauasi. b Xo ngingi ngepaipalunu voxo latala mukalu la ngemulinu 'ili'ilixo masumasua ane ta mitema e imulaxu tane'i noxou Lataua uasi i'oxo'oxnu. 'Ili'ilixo masumasua ne anu aloxo 'o, 'ilixo sou vote'i, mo ngemulinu masaxa masua sou vasimenge, mo 'ilixo sou ngeiexu lexa pekia'u utotomu, mo 'ilixo sou lavilelu utotomu xe ngamulinu lapuloto noxou Lataua uasi la ngelotu noxi'a ta lataua kalakalavoi. Ta mitema ane imulaxu tane'i noxou Lataua uasi ikuluke manina mine ngingi ngamuline'i no anu 'ilixo masumasua noxi'a uasi, la ane'i ivikalasinge masumasua manina. c Ane'i me'a imomosou vaikala ulai noxou Lataua e Anu ulalaxii sou utilovosou 'ili'ilixo noxi'a ta mitema ane imaumauli xe ane'i ane misoisoli. Anu a'alo laixe ne mia'aloxu kalumo mulai noxi'a ane'i ane misoisoli. No anu solixa'a ne ane ta mitema anu Lataua utulusi'a no 'a vaivaikala. Ia anu a'alo laixe ne anu mia'aloxu noxi'a aloxo ne la sou ane'i imauli no 'a ulene'i aloxo Lataua umasaxai'a sou imauli. d Xo voxo sou mimii latala no lia 'o 'ala'alai sou ukalu. La sou ngaxolu se'isisi mo ngasaxila'u xavutalamengi laixe mo ngaloo no anu lakilaka. e La sou tangengixa'a ta vivinge manina xo 'ilixo ane ne anu mutila no anu 'ili'ilixo latala mukalusi mo anu usu'asou susu latala manina. f Mo ta vivinge ine'e no taasinge la ngongi'a ngasexelangenge ngatongato'o mo ngasaxila'a laixe, ia ngavivikalasi'a ili'i la uasi. 10  g Lataua mualaunasinge laixe la mulosinge xaixai iouiou vilevilesi la sou ngingi ngaxaxaisou. La sou ngingi ngaxaxaisou xaixai iou ma'ia noxinge vilevilesi ne sou ngasu'uline'i ta vivinge no nano no anu tangengi manina. 11 Lexe vile noxinge uno'u xaixai sou ua'aloxu vaikala noxou Latauasi la anu ua'alo, xe vile noxinge uno'u xaixai sou usu'uline'i ta mitema la anu u'oxonu aloxo ne no anu xavi ane Lataua mulosou. Aloxo ne la sou Lataua uno'u uala utila no anu mimii latala ane nenge ta'oxonu. Xo no anu xaixai noxou Iesu Kalisito la nenge ta'oxonu aloxo ne la sou Lataua uno'u uala utila mo xavi utotomu mo kaluxu uasi. Manina.

Tatavulenu Tu'utu'umaxu sou Taxali Loxo ta Mitema Noxou Kalisito

12 Ta menexilo e eni emasaxainge misevile, navunavu mo tu'utu'umaxu uxali sou utovongengi ia mamu sou ngakuluke no anu lexe mii vilemo a uxali ne. 13  h Ia nga'osa lexe ngingi ngano'u navunavu loxo Kalisito muno'u, la sou no voxo ane Anu ulivu une'e ilou xavi la ngingi nga'osa manina mo ngaili'eli'e. 14  i Lexe ngingi ngamulinu Kalisito, ia ta mitema ivikalasinge masumasua la Lataua Uleenu e xavi musuku uxolu noxinge mo ualusinge. 15 Ia mamu sou vile noxinge uno'u navunavu loxo itema uvau itema usoli, mo itema sou pakali, mo itema sou u'oxo 'ili'ilixo masumasua xe loxo itema sou usaxou ta mitema mi'ami'a. 16 Ia lexe ngingi ngano'u tu'utu'umaxu loxo ta mitema imulaxu tane'i noxou Kalisito la mamu sou ngamaela, ia ngaxolu loxo itemau Lataua xo Anu uno'u tu'utu'umaxu ane ne. 17 Ioxe, xo voxo a muxali sou Lataua utilovosou 'ili'ilixo noxi'a ta mitema. Lexe anu usokou noxinge nenge ta mitema e temulaxu tanenge noxou Kalisito, la sou loxovaa noxi'a ane'i ane imulinu vaikala noxou Lataua uasi ili'i? 18  j Mo sou vaikala vile muai no anu Lavuku Tavuna teinu muvikala aloxo 'o,

“Lexe anu mii pekia'u noxou Lataua sou usu'uline'i
ta mitema ane'i ane milapu,
ia anu pekia'u musuku noxou sou usu'uline'i
ane'i ta mitema ane mixiunu tumali'a noxou Lataua
la i'oxonu 'ili'ilixo masumasua.”
19 La sou ane'i ane Lataua umasaxa lexe ino'u tu'utu'umaxu no anu 'ili'ilixo i'oxonu laixe mo i'italonu maulixa'a ulai noxou Lataua anu mukoinu mimii latala mo Anu usaxila'a laixe loxo Anu muvikala.

Copyright information for `ATA