a5:2Ioa 21:15-17; Apo 20:28
b5:32Ko 1:24; Pil 3:17; Tit 2:7
c5:5Xav 3:34; Ep 5:21; Iak 4:6
d5:6Mat 23:12; Luk 14:11; Iak 4:10
e5:7Mat 6:25-30
f5:81Te 5:6
g5:9Ep 6:11-13; Iak 4:7
h5:12Apo 12:2, 25, 13:13, 15:22, 37-40
i5:13Apo 12:2; 2Ti 4:11

1 Peter 5

Ta Tatila sou Lalotu Ilo'a ta Maulu

Ioxe vaikala ane 'o ulai noxi'a ta tatila sou lalotu ane mixolu no taingengi. Eni apeletoto loxo tatila vile no anu lalotu kalumo mo eni emaisou Kalisito muno'u navunavu manina no ieli la no anu voxo ane Anu ulivu une'e no 'a lamanaxu. a Vaikala ane 'o aloxo 'o. Ngasaxila'a ta mitema noxou Lataua mixolu no taingengi laixe loxo itema sou usaxila'a ta sipsip mo ngamaisi'a mo ngaulaxune'i laixe. Mo ngaxaxai loxo ta mitema ivikalangengi sou nga'oxonusi uasi mo ngaxaxaisi sou lamolisi uasi, ia ngaxaxai loxo ngingi ngamasaxa mo nga'osa sou nga'oxonu manina loxo Lataua umasaxainge lexe nga'oxonu. b Mo ngingi nga'oxonu tilasinge noxi'a ta mitema uasi ia ngaulaxune'i loxo ta sipsip imulinu tatanane'i. Ngingi nga'oxonu aloxo ne, xe Tila noxi'a ta mitema e usaxila'a ta sipsip ulivu une'e la ngingi ngano'u kisivalu lailaixe. Kisivalu ane ne anu umomomo sou kaluxu uasi.

c Ioxe peletoto ane 'o ulai noxinge, ngingi ta maulu kalumo aloxo 'o. Ngalomuxa'a ta tatilasinge mo ngalu'engengi no laaxa'a ta tatilasinge xo,

“Lataua uxiu tumaloui'a ane'i ane italoxolixa'a mo ixolu se'isisi uasi,
ia Anu uualusi'a ane'i ane ilu'ene'i.”
d La sou ngataloxolingenge mo ngaxolu se'isisi no laaxu Lataua anu xaviinu sou usaxila'inge, xe ili'i no anu voxo ane Lataua musosovosou uxali, la Anu uitinu ualasinge. e Aloxo ne la sou ngalosou tu'utu'umaxu ma'ia muxolu no anu xavutalamengi, xo Anu tanungenge. f Ngaxolu se'isisi mo ngaloo laixe xo uluamengi satani uxixaoxao mo ungiulele loxo laeoni ukakamuli itema sou u'ou. g La sou ngatulu pekia'inge no anu muxamuxaxu tangengi mo nga'apixu la ngakusa'u, xo ngingi ngalavusou lexe ta vivinge no xalexalee tuatuala no lia 'o ukalusi kalumo ino'u navunavu iouvilesisi. 10 Ia Lataua itema sou alauna tatila Anu mu'avalinge xo no anu xaixai noxou Kalisito, la sou Lataua mu'avalinge ta'unalai no anu lamana noxou ane kaluxu uasi. Aloxo ne la sou navunavu ngingi ngano'u ne umomomo sou uxolu maxuveeni uasi. Navunavu ane ne sou u'oxongengi ngaxali lailaixe manina mo Lataua ulosinge xavi sou ngatulu pekia'inge xe u'oxonu pekia'u muxamuxaxu tangengi. 11 Xavi noxou Lataua uxolu mo kaluxu uasi, manina.

Vaikala sou 'Osa Kaluxusou

12  h No anu su'uli noxou Sailasi eni emaisou anu loxo vivilo manina. Eni ekaukavunu vaikala pelepeletoto ataxu se 'o ulai noxinge ne anu alauna noxou Lataua maninasou ane eni apala'alixu ulai noxinge la sou no anu alauna ne ngatulu pekia'inge. 13  i Ta mitema sou lalotu noxou Lataua mixolu ne Vaviloni misova vaikala sou 'osa mulai noxinge mo Maluko e loxo 'alixeni musovanu aso laixe ulai noxinge kalumo. 14 Mo ngasexelaxa'a ta menexinge ngatongato'o la ngasexelaxa'a loxo ngingi ngemasaxai'a maninasou. Eni akilaka lexe opo se'isisi uxolu noxinge ngingi latala ane noxou Kalisito.

Copyright information for `ATA