a3:1Apo 17:15
b3:2Apo 16:1-3
c3:32Ti 3:12
d3:6Apo 18:5
e3:72Te 1:4
f3:112Te 2:16-17

1 Thessalonians 3

a Nexi texavutala lexe sou tane'e noxinge ne maxuveeni mukalu, la sou nexi texavutala lexe nexi noxou Sailasi a taxolu ne Atenai, b ia nexi tepalusou Timoti sou mulai noxinge. Timoti ne, anu vivixe no anu ualasou Iesu mo itema sou xaixai noxou Lataua sou ua'aloxu a'alo laixe noxou Kalisito. Nexi noxou tepalusou mulai noxinge sou ngatulu pekia'inge mo tapeletotosinge no anu muxamuxaxu tangengi noxou Iesu, c mo sou se'i noxinge ne ixolu ukalipala no anu tu'utu'umaxu ane ngingi ngeno'u uasi. Tu'utu'umaxu ane ne, ngingi ngelavu manina lexe Lataua musosovosinge lexe nenge tatavulenu. Xo no voxo ane nenge nenge'a texoxolu 'o, la tevivikalangengi lexe nenge tano'u tu'utu'umaxu iouiou. La ngingi ngelavu lexe mii ane ne, anu muxali manina loxo nexi tevikalangengixu tei. Tava'u aloxo ne, la sou eni axomaiou vote'i sou lexe ane'e noxinge ne maxuveeni mukalu, la sou eni epalusou sou alavu lexe ngingi ngamuxamuxaxu tangengi noxou Iesu a loxovaa? Xo eni exavutala lexe itema sou tovotovo utovongengi muxamuxaxu tangengi noxou Iesu, la xaixai noxixe ne, anu uxali mii vitanisi.

Timoti Mua'alo A'alo Laixe Si'a ta Tesalonika Mulai Noxou Paulo La Anu Mu'osa

d Ia Timoti mu'umesinge, la vaimomo 'osi anu mulivu mune'e noxixe. Muxali noxixe, la mua'alomexixu a'alo laixe singe lexe ngingi ngemuxamuxaxu tangengi manina noxou Iesu mo ngemasaxainge ngatongato'o. Mo muvikalanexi lexe utotomu ne ngingi ngaxavutalanexi laixe mo ngingi ngemasaxa manina sou lexe ngamaisixe loxo nexi temasaxa manina sou tamaisinge. e Ta vivixe, nexi telavusinge aloxo ne, xo ngingi ngemulaxu tangengi noxou Lataua la sou ngingi ngepeletotosixe sou tatulu pekia'ixe no anu tu'utu'umaxu ilou navunavu. Nexi telavu lexe ngingi ngetulu pekia'inge noxou Tila, la sou vaimomo 'o nexi texamuli lexe vasimexe papaxe mo te'osa. Nexi texavutalangengi, la nexi ta'osa misevile no iou Lataua. La talemo vaikala laixe musuku anevaa ulai noxou Lataua sou lakolisou 'osa ane ngingi ngelosixe ne? 10 No voxo utotomu no aso xe no 'olovoxo ne, nexi talavusou telinga pekia'u ulai noxou Lataua lexe nexi tane'e tamaisinge la, sou lexe muxamuxaxu tangengi noxou Iesu ne mamalaxu, la nexi tasu'ulingengi sou ngatulu pekia'inge.

11  f Nexi talinga lexe Lataua Maminge molu ilou Tila Iesu noxinge i'oxonu vote'isixe sou nexi talai noxinge. 12 Mo nexi talinga lexe Tila usu'ulingengi sou ngamasaxainge ngatongato'o manina mo ngamasaxai'a ta mitema va'ava'axa'a ukalusi loxo nexi temasaxainge manina. 13 Xe nexi talinga lexe Lataua u'oxonu opongengi pekia'u, mo sou ta mitema imaisou 'ili'ilixomengi, la ito'omenge no anu vaivaikala uasi mo ngaxolu malemalenga no iou Lataua Maminge no mine Tila noxinge Iesu Kalisito ulivu une'e ilo'a Lataua ta na'u ane malemalenga ukalusi.

Copyright information for `ATA