a4:31Te 5:23; 1Pi 1:16
b4:4-51Ko 6:13
c4:7Eva 12:14; 1Pi 1:15-16
d4:8Luk 10:16; 2Ko 1:22
e4:9Ioa 13:34
f4:11Ep 4:28
g4:14Rom 14:9; 1Ko 15:3-4, 12
h4:15-161Ko 15:51-52

1 Thessalonians 4

Ta Tesalonika Imulinu 'Ili'ilixo Ane sou U'oxonu Lataua U'osa

Ta vivixe, vaivaikala noxixe kaluxusou ne aloxo 'o. Nexi telosiengixu 'ili'ilixo ane sou lexe ngingi ngamulinu sou u'oxonu Lataua u'osa, la ngingi ngemulinu mukalu ne. Ia nexi noxi'a Tila Iesu tavikalangengi pekia'u la lexe ngamulinu utotomu utotomu aloxo ne la. Xo ngingi ngelavusou vaivaikala e nexi telosinge. Ia vaivaikala ane ne, anu molu noxou Tila Iesu.

a Mo ngelavu aloxo 'o. Lataua mumasaxa lexe ngingi ngaxolu va'axu no anu 'ili'ilixo masumasua. Mo ngaxiu tumalingeu 'ili'ilixo sou vote'i, b mo ngingi vilevilesi ngalavu lexe ngasaxila'u vasimenge la nga'oxo 'ili'ilixo ane Lataua mumasaxau mo ngataxaanu loxo mii ane Lataua mulosinge, ia ngamulinu masaxa tatila sou 'ili'ilixo sou vote'i uasi loxo ta mitema ane ilavusou Lataua uasi ilavusou i'oxo'oxonu. Mo nga'oxonu susu noxi'a ta vivinge xe ngakalavoine'i sou nga'umenu mii ma'ia ane na'a uasi. Xo Tila anu ulosi'a ta mitema ane i'oxonu 'ili'ilixo ane ne navunavusou. Anu aloxo nexi tevikalangengixu pekia'u tei lexe mamu sou nga'oxonu. c Xo Lataua mu'avalinge sou lexe ta'oxonu 'ili'ilixo masumasua uasi, ia ta'oxonu 'ili'ilixo ane Anu mumasaxau. d La sou anu ane uxiu tumalouu vaivaikala ane ne, la anu uxiu tumalouu vaivaikala noxi'a ta mitema uasi, ia anu uxiu tumalouu vaivaikala noxou Lataua e ulosinge Uleenu Tavuna.

e Ia nexi tamomomo sou takaukavu vaikala se'i sou 'ilixo sou tanengingenge ngatongato'o uasi, xo Lataua anu mulosiengixu mukalu ne. 10 Mo ngingi a ngelavusou ngamasaxai'a ta vivinge latala ne Makedonia. Ia nexi tavikala pekia'u lexe ulai noxinge ngingi ta vivixe lexe ngingi nga'oxonu utotomu utotomu aloxo ne la.

11  f Mo ngingi ngaxolu se'isisi mo nga'oxonu xaixai sou usu'uli maulinenge mo ngaxavutalanu xaixaimengi mo ngaxaxaisou no avongesi loxo nexi tevikalangengi. 12 Mo sou ta mitema ane ilavusou Lataua uasi imaisinge, la itoxongengi mo i'osasou 'ili'ilixo noxinge ne, xe ngingi ngalingau la'ilali noxi'a ta mitema se'i uasi.

Lailivuxu Tila Iesu Kalisito

13 Ta vivixe, nexi temasaxa lexe ngingi umomomo sou ngalavu noxi'a ta mitema ane misoisoli, mo sou ngatamasi'a mamu loxo ta mitema tavu'alo e imolo tane'i noxou Lataua mo ixomaiou voxo ane Iesu ulivu une'e uasi, itatamasi. 14  g Nenge tamuxamuxaxu tanenge noxou Iesu lexe Anu musoli ka mumauli la. La sou nenge tamuxamuxaxu tanenge lexe Lataua ilou Iesu ilo'a ane'i ane mino'u Iesu no anu maulixa'a ia misoli, ine'ene'e. 15  h No anu vaivaikala noxou Tila, la nexi tavikalangengi aloxo 'o. Nenge ane tamauli vaimomo 'o mo ulai utalo no voxo ane Tila ulivu une'e, la nenge umomomo sou tauli noxi'a ane'i ane misoisoli tei uasi. 16 Xo no voxo ane Lataua uvikala toxoxa'a mo ta angelo i'ava xe xoolau noxou Lataua utama, la Tila anu molu no opo loxotolo sou ulu'e no lia. La sou ane'i ane mino'u Kalisito no anu maulixa'a ia misoisoli ne, ane'i itulu sou imauli la. 17 Xe ili'i, la nenge ane tamauli mo a taxoxolu 'o ne, Lataua utokinenge nenge'a ane'i ane misoisoli sou talai teiteixi no umuumu mo tamaisou Iesu. La sou nenge nenge'a Tila taxolu tapita utotomu mo kaluxu uasi. 18 Tava'u aloxo ne, la sou ngingi ngapeletotosinge ngatongato'o no anu vaivaikala ane nexi telemolu ne, mo sou uavutilixu opongengi sou ngatulu pekia'inge noxou Iesu.

Copyright information for `ATA