a6:1Ep 6:5
b6:2Plm 16
c6:3Xal 1:6-9
d6:52Ti 3:8, 4:4; Tit 1:14
e6:6-8Iop 1:21; Pil 4:11-12; 1Ti 4:8; Eva 13:5
f6:10Ep 5:5
g6:112Ti 2:22
h6:121Ko 9:25-26; 2Ti 4:7
i6:13Ioa 18:36-37
j6:15Pal 17:14
k6:17-20Mat 6:20; Luk 12:20-21
l6:20-211Ti 1:6; 2Ti 2:18

1 Timothy 6

a Ioxe, ta mitema noxou Lataua ane ixolu loxo ta mitema sou ipalupalusi'a vitanisi xe itavule tu'utu'umaxu, la laixe lexe ane'i itoxone'i ta tatilasi'a manina mo ilomuxa'a laixe. Ane'i i'oxonu aloxo ne, mo sou evile uvikala masua ulai noxou Lataua mo vaikala noxou e mulosiengexu 'ili'ilixo noxou uasi. b Lexe vile noxi'a ta tatilasi'a umuxamuxaxu tanu noxou Iesu, la itema sou upalupalusou vitanisi ne uvikala lexe anu kalumo itema noxou Lataua loxo eni. Tava'u aloxo ne, la sou anu utaloxolixu tila noxou ne. Ia eni avikala pekia'u lexe anu utaloxolixu tila noxou mamu. Anu uxaxai laixe loxo itema sou upalupalusousi. Xo ane'i ane ino'u mimii laixe no anu xaixai noxou itema sou upalupalusi'a ne, ane'i ta mitema noxou Lataua mo ta mitema e Lataua mumasaxai'a manina. Nalosieixu ta mitema vaikala ane 'o mo napala'alixu sou imulinu.

Masaxa sou Lamoli

c Lexe itema vile ulosieixu vaikala vilemo, ia ulomuxu vaikala manina noxou Tila noxinge Iesu Kalisito mo vaikala e ulosiengexu 'ili'ilixo noxou Lataua uasi, la nenge telavu lexe anu itema vile sou u'itinu ualasou mo ulavusou mii vile uasi. Ia utalitali'i no anu mimii tavu'alo, ia talitali'i noxou ne usu'uline'i ta mitema uasi, mo anu ilo'a i'otosou anaxa'a no anu vaikala manina noxou Lataua. Anu u'oxo aloxo ne, la u'oxone'i ta mitema ixali aloxo 'o. Iisuiisuxa'a ngatongato'o mo i'oto'oto sou anaxa'a ngatongato'o xe ikalavoisi'a ta mitema ngatongato'o, ia imuxamuxaxu tane'i ngatongato'o noxi'a uasisi manina d mo i'oto'oto sou anaxa'a utotomu. Xe ane'i xavutalai'a muxovulaulau mo tane'i vulusiu vaikala manina noxou Lataua. Xe ane'i ixavutala lexe 'ili'ilixo noxou Lataua ne, anu vote'i vile sou ikamuli lamoli no anu ane.

e Ia nenge telavu lexe tepaa no lia 'o, la texali pangapangaingesi. Tatavule mii vile sou tane'enu uasi. Ia vaimomo nenge texolu no lia 'o, la teno'u la'ilali ilou tokolomo xe tani. Io nenge tasoli, la tano'u mii vile no lia 'o sou tauatulailixu uasi, talai vitanisi. La sou 'ilixo sou tamuxamuxaxu tanenge noxou Lataua, la anu usu'ulinenge misevile lexe nenge ta'osasou mii ma'ia ane nenge tatetelisou vaimomo 'o. Ia ta mitema se'i ne, imasaxa lexe ixali ta mitema sou lavuluti. Ta mitema ane aloxo ne, la ane'i ilapau no anu tovotovo xe i'amo no anu uoi noxou Satani. Mo imulinu masaxa masua sou lialia 'o mo masaxa ane sou u'oxone'i masua. La sou ili'i, la ane'i iulua manina. 10  f Xo masaxa sou lamoli ne, anu tava'u vile sou uxalixu 'ili'ilixo masumasua tavu'alo ane. Ta mitema se'i, masaxa noxi'a no anu lamoli, la sou ane'i mixovulaulau no anu muxamuxaxu tane'i noxou Iesu mo mixamulinu tu'utu'umaxu tavu'alo ngatongato'o noxi'a.

Xavineni no Anu 'Oto'oto Laixe

11  g Ia nini 'o, nini namitema sou xaixai noxou Lataua. Nini naxolu va'axu no anu 'ili'ilixo masumasua ane ne ukalusi. Ia naxaxai xavineni sou namulinu 'ili'ilixo ane mulapu mo 'ili'ilixo ane Lataua mumasaxau. Namuxamuxaxu taneni noxou Iesu mo namasaxai'a ta mitema mo naxolu se'isisi sou natavule tu'utu'umaxu xe oponeni se'isisi noxi'a ta mitema. 12  h Nini namuxamuxaxu taneni noxou Lataua mo na'oto'oto no anu 'oto'oto ane laixe. Natetelisou mauli ane kaluxu uasi ane Lataua mu'avaline sou naxaxaisou, no mine nini nepala'alixu taneni lexe Iesu anu Kalisito no ie'i ta mitema. 13  i No iou Lataua e ulailixu mauli no anu mimii latala, xe Kalisito Iesu e mupala'alixu laixe lexe Anu 'ei, mulai noxou Pontio Pilato, la eni avikalaneni pekia'u 14 lexe namulinu vaikala e eni elosine mo nasusu uasi, mo sou vaikala vile masua une'e noxine uasi. Nini naxaxai laixe aloxo ne, mole ulai utalo no voxo ane sou Tila noxinge Iesu Kalisito ulivu une'e no anu. 15  j No voxo ane Lataua molu musosovosou, la Anu ukalanu Iesu Kalisito ulivu une'e. Lataua anu itema sou ualusinge mo Anusisi usaxila'inge. Anu tatananu tuala noxi'a ta tatananu tuatuala no lia 'o ukalusi mo anu Tila noxi'a ta tatila ukalusi. 16 Anu anusisi ulavusou usoli uasi mo uxoxolu no anu lamanaxu, ia evile umomomo sou ulai 'alai noxou uasi manina. Tatei mo mune'e muxali vaimomo 'o, itema vile umaisou uasi xe nenge tamomomo sou tamaisou uasi. Tatoxonu mo xavi noxou uxoxolu kaluxu uasi. Manina.

17  k Nenge telavu lexe Lataua ulosinge mimii tavu'alo sou u'oxonenge ta'osa. Tava'u aloxo ne, la sou ta mitema sou lavuluti ne, i'itinu ualasi'a mamu. Mo imolo tane'i no anu mimii ane umaxoa palea ne uasi, ia imolo tane'i noxou Latauasi. Mo lexe ane'i imasaxa ino'u mauli ane kaluxu uasi, la laixe lexe ane'i ta mitema sou lavuluti ne, i'oxonu 'ili'ilixo aloxo 'o sou usu'uline'i ili'i. I'oxonu xaixai laixe sou usu'ulune'i ta mitema mo imaxa'u alauna noxi'a mo ivelu mimii noxi'a. Eni emasaxa lexe nini navikalane'i ta mitema sou lavuluti pekia'u lexe ane'i i'oxonu aloxo ne.

20  l Ioxe Timoti, nini naxiu tumalineu vaivaikala sou lialia e temanu uasi mo vaikala ane vilemo no anu vaikala noxou Lataua e ta mitema ilemo lexe lavulavu manina. Ta mitema se'i mimulinu vaikala ane ne, la tane'i musauxalo no anu muxamuxaxu tane'i mukalu. La sou nini nasaxila'u vaivaikala ane eni elosine ne. Ioxe, vaikala noxilo utalo aloxo ne.

Ia eni alinga lexe alauna noxou Lataua uxolu noxinge.

Copyright information for `ATA