a3:1Apo 18:27; 2Ko 5:12
b3:21Ko 9:2
c3:3Mul 24:12; Iel 31:33; Ese 36:26-27
d3:6Iel 31:31; Ioa 6:63; 1Ko 11:25
e3:7Mul 34:29
f3:9Lap 27:26; Rom 1:17
g3:13Mul 34:33
h3:16Mul 34:34
i3:17Ioa 8:36; Rom 8:2

2 Corinthians 3

a Ioxe mo loxovaa nexi a tasokou sou ta'itinu ualasixe la? Uasi loxovaa nexi loxo ta mitema mose'i sou tamasaxau uoli voloxu sou u'itinu ualasixe ulai noxinge, uasi molu noxinge? b Ngingi nesi ne ane uoli voloxu noxixe e tekaukavunu no nano no tanexi la ta mitema mukalusi milavusou mo miitisou. c Ngingi ngamaxa'u lexe ngingi ne uoli voloxu molu noxou Kalisito, nene'axu xaixai mexi kaukavusou ne no anu su'i uasi. Ia no anu Uleenu Lataua e muxolu umauli mo no anu lavo'o alelaxu uasi ia no nano noxi'a ta mitema tane'i. Nexi tanexi mutulu pekia'u mo tevau tu'umanexe noxou Lataua xo nexi noxou Kalisito. Anu loxo nexi mexe a ne temomomo sou te'oxonu mimii ane ne uasi, ia lavulavu noxixe sou xaixai ne molu noxou Lataua. d Anu mu'oxonexi temomomo sou taxali loxo ta mitema sou isaxila'u vaikala ane musakii alavua ne loxo no anu vaikala sou lapuloto e mikaukavu uasi ia no anu Uleenu, xo vaikala sou lapuloto ne uvenge tasoli ia Uleenu ne ulosinge mauli.

Lamanaxu Vaikala Ane Musakii Alavua

e Ioxe lexe xaixai ne muxalixu soli ne muxotonu kaukavusou no 'a lavo'o ia muxali ilou lamanaxu mo ta Isilaeli imomomo sou imataki uisalili ulai noxou Mosesi alaiou uasi xo anu lamanaxu ia ili'i la anu tasiauxu la, la sou loxovaa? Xaixai ane no anu Uleenu 'o lamanaxu u'oki manina. f Mo lexe xaixai ane utulusi'a ta mitema 'ilixoi'a no 'a susu noxi'a lamana sou ne, anu lamanaxu musuku la lamanaxu xaixai ane uxalixu 'ilixo muisalili ne anu lamanaxu toxoxa'a manina. 10 Xo mii ane lamanaxu loxo ne tei e Mosesi mukaukavu, ia tamomosou ilou lamana ane lapuloto alavua noxou Lataua ne toxoxa'a ane vaimomo 'o la anu lamanaxu la uasi. 11 Mo lexe mii ane uxolu lavuu uasi ne lamanaxu aloxo ne, la mii ane uxolu lavuu ne lamanaxu toxoxa'a manina.

12 La sou no mine nexi taloopala aloxo ne la nexi pumunenge manina. 13  g Nexi ne loxo Mosesi e muvausou alaiou sou utaluxa'a ta Isilaeli mo sou imataki sou no mine lamanaxu tasiauxu ne uasi. 14 Ia xavutalai'a ne muxo lololi xo mune muxali vaimomo 'o ne pupuni ane ne uxolu no mine iitisou vaikala ane musakii tei. Anu uxexee uasi xo loxo noxou Kalisitosi la sou anu uxexee. 15 Mo loxo no anu voxo ane vaimomo 'o ne no mine iitisou lapuloto noxou Mosesi la pupuni ne utaluxu tane'i. 16  h Ia no mine itema 'ena'ei ane uxiu ulai noxou Tila, la pupuni ane ne uxexesou. 17  i Ioxe Tila ne Anu a Uleenu ne mo ne'ei e Tila Uleenu uxolu la sakisaki vile usakinenge uasi vasimenge manamana'u. 18 Mo nenge ukalusi ane tava'uva'usou alaienge uasi ne nenge loxo titilo sou tamaisou lamana noxou Tila, mo taxiu taxali loxo Anu ne la no anu lamana 'uieii utatila voxovoxo ne sou ane molu noxou Lataua e anu Uleenu ne.

Copyright information for `ATA