a6:2Ais 49:8
b6:52Ko 11:23-27
c6:61Ti 4:12
d6:92Ko 4:10
e6:131Ko 4:14
f6:14Ep 5:11
g6:16Liv 26:12; 1Ko 3:16
h6:17Ais 52:11; Pal 18:4
i6:182Sa 7:14; Iel 31:9

2 Corinthians 6

Ioxe loxo Lataua ta menexu sou taxaxai la nexi talingainge lexe sou ngano'u alauna noxou Lataua ia ngapaipalunu vitanisi mamu. a Xo anu uvivikala no nano no Lavuku Tavuna teinu aloxo 'o,

“No anu voxo sou a'oxo laixe noxinge,
la eni elomusinge.
Mo no 'a voxo sou pamauli la eni esu'ulingengi.”
Eni avikalangengi, io vaimomo 'o ne anu voxo sou alauna noxou Lataua mo vaimomo 'o ne anu voxo sou pamauli.

Paulo Muxamulinu Ialuxu Masua

Nexi tamulaxu mii vile sou utaluxu vote'isi'a ta mitema uasi, mo sou ipupuiou xaixaimexi uasi. Ia no anu votevote'i ukalusi ne la nexi ta'itinexi lexe nexi ta mitema sou xaixai noxou Lataua ne. Mo nexi tetulu pekia'ixe xe tetavulenu tu'utu'umaxu mo tanexi utama piena. b Xe ane'i ipuapuasixe mo imulanexe no nano no 'a taasou navunavu xe ta mitema lai'aixe la ilosixe navunavu tatila manina. Mo taxaxai pekia'u xe 'olovoxo utotomu ne la taai laixe uasi. Xe tano'u 'ani laixe uasi. c Mo no anu 'ilixo malemalenga xe lavulavu laixe mo tataloxolinenge mo 'ilixo laixe noxi'a ta mitema ne no anu Uleenu Tavuna mo no anu 'ilixo sou tanexixa'a ta mitema manina. Vaivaikalamexi ne maninasi mo no anu xavi noxou Lataua, la nexi tano'u 'ilixo mu'isalilisi aloxo mii sou 'oto'oto no anu avoxe tema xe ae. Mo no anu 'ilixo sou toxo xe 'ilixo sou pamaela mo ikalapuunexi xe i'iti ualasixe, mimii ne anu manina ia mimaisou aloxo nexi ta mitema sou kalavoi. Ia mii vile uasi, nexi tavikala maninasi. d Ta mitema i'oxe ilavusixe uasi ia milavusixe, mo lexe tasoisoli ia nexi tamaumaulisio, xe mivexe ia ivexe tasoli uasi. 10 Mo tanexi utama u'oki ia utotomu ne ta'osa'osasi xe nexi mexi lavuluti uasi ia ta'oxone'i tapiena ixali ta mitema sou lavuluti, nexi texolu vitanisi ia nexi tamaisou lexe nexi mexi mimii tavu'alo manina.

11 Nexi tevikala lamana mulai noxinge ta Kolinito, mo tanexi muxavutalangengi. 12 Nexi ne a ta'apisou tanexi noxinge ne uasi, ia ngingisi ane nga'api'apisou tangengi noxixe ne. 13  e Ia eni avikalangengi loxo ngingi eni ta 'alixeni, ngingi kalumo ne tangengi uxavutalanexi.

Mamu Sou Ngapita Noxi'a ta Mitema Ane Imulaxu Tane'i Noxou Iesu Uasi

14  f Mamu sou ngapita noxi'a ta mitema ane imulaxu tane'i noxou Iesu uasi. Xo 'ili'ilixo lailaixe xe 'ili'ilixo masumasua ne imomomo sou ipita a loxovaa? Mo loxovaa, ma'ia ane lamana ilou isivoxo ipita ne? 15 Xe Kalisito ilou satani ne isakii vaikala a loxovaa? Mo mii ma'ia ane mumomomo sou itema ane umulaxu tanu noxou Kalisito xe ane umulaxu tanu uasi ne ivelusi'a ngato'o? 16  g Mo vaikala masaxa ma'ia ane uxolu nonixine'i taasou lalotu noxou Lataua xe ta lataua kalakalavoi? Xo nenge ne taasou lalotu noxou Lataua ane uxolu umaumauli. Aloxo Lataua muvikalane'i ta mitema noxou lexe,

“Eni axolu noxi'a mo amuamua'i nonixine'i,
mo eni ne axali Lataua noxi'a,
xe ane'i ne ixali ta mitemaxeni.”
17  h “Anu aloxo ne la sou ngalaa ngaxexesi'a
mo ngaxolu va'axu anu Tila mulemolu.
Ngalaisou mii vile nuni'u mamu
mo sou eni a'osa sou ano'inge ngane'e.”
18  i “La sou eni axali loxo Maminge
xe ngingi ngaxali loxo ta 'alixeni ta mulu mo ta sema
Tila xaviinu sou u'oxonu mimii ukalusi Anu mulemolu.”
Copyright information for `ATA