a3:11Ti 4:1
b3:5Mat 7:15, 21; Tit 1:16
c3:8Mul 7:11
d3:11Apo 13:14-52, 14:5, 8-20
e3:12Mat 16:24; Ioa 15:20; Apo 14:22
f3:16Rom 15:4

2 Timothy 3

Voxo Kaluxu

a Ia eni emasaxa lexe nini nalavu aloxo 'o. No voxo ane voxo kaluxusou uxali, la tu'utu'umaxu tavu'alo uxali. Tu'utu'umaxu uxali, la ta mitema ne, taneixa'asi mo imasaxau lamolisi. Mo ane'i imasaxa ixali tila mo i'itinu ualasi'a. Ilea vaikala masumasua mo ilomuxa'a ta neni'a ilo'a ta mami'a uasi mo ivikala laixe ulai noxi'a kalumo uasi. Ane'i imulinu 'ili'ilixo ane Lataua umasaxau uasi. Mo ane'i taneixa'a ta mitema uasi, mo ixiunu tumali'au 'ili'ilixo masumasua une'e noxi'a uasi. Mo ikalavoisi'a ta mitema. Mo ane'i ilavusou isaxila'u muamua'ixa'a laixe uasi. Mo ane'i i'oto, la ivea ta mitema. Mo ane'i imasaxau 'ili'ilixo ane laixe uasi. Ane'i ixiu tumali'ai'a ta menexi'a mo ane'i iavuti palea sou imulinu xavutala masua noxi'a. Xe ane'i ixavutala lexe ane'isi ta laixe manina. Ane'i imasaxau Lataua uasi, ia ane'i imasaxau mimii no anu vasime'a sou 'osa'osasi. b Naxolu va'axu noxi'a ta mitema ane ne. Xo ane'i ikalavoi lexe mimulinu 'ili'ilixo ane Lataua mumasaxau. Ia uasi, no anu vasime'asi. Ane'i mixolu va'axu no anu xavi sou 'ili'ilixo ane Lataua mumasaxau.

Se'i noxi'a ne, i'unalai no tanitani sou ivikala se'isisi ulai noxi'a ta sema ane xavutalai'a mamalaxu sou ta sema imulinu vaikalai'a. Ane'i ta sema ne, milavu lexe misusu tavu'alo, ia opone'i uavuti sou i'oxonu 'ili'ilixo masumasua tavu'alo la. Ane'i ta sema imasaxa lexe ino'u lavulavu no anu vaikala noxou Lataua utotomu, ia imomomo sou ilavu no anu vaikala manina ne uasi. c Ta mitema ane ne, ane'i mitelo anaxa'au vaikala manina noxou Lataua, loxo Ianesi ilou Iamulesi mixiu tumali'au Mosesi. Ane'i ixavutala no anu mii masumasuasi, la sou milapalapau no anu muxamuxaxu tane'i noxou Lataua. Ia ane'i isolonu i'oxonu 'ili'ilixo ane ne uasi, xo ta mitema latala imaisou mo ilavu lexe 'ilixoi'a ne masumasua mukalu loxo ta mitema tamei, Ianesi ilou Iamulesi.

Vaikala Peletoto Ulai Noxou Timoti

10 Ia nini nelavu manina no anu vaivaikala eni elosine, mo muamua'ixo mo mii ane eni exavutala sou a'oxonu, mo muxamuxaxu taleli noxou Lataua mo la'iaxo palepalea uasi, mo talelixa'a ta mitema xe etavule tu'utu'umaxu ia e'oxonu xaixai noxou Lataua. 11  d Mo nini nelavu manina lexe ta mitema ne Antioki mo Ikonia mo Lisita ne, ane'i milosilo tu'utu'umaxu mo mivelo masualeli loxo 'o. Eni exalisou tu'utu'umaxu tavu'alo, ia e'oxonu xaixai noxou Latauasi. Voxovoxo ne, eni exalisou tu'utu'umaxu ne, ia Tila mu'umeleli no anu. 12  e Anu manina musuku lexe itema vile umuxaxu tanu noxou Kalisito Iesu mo umasaxa lexe umulinu 'ili'ilixo ane Lataua mumasaxau, la anu uxalisou tu'utu'umaxu. 13 Ia ta mitema ta masua ilo'a ta mitema ane sou ikalakalavoine'i ta mitema lexe ane'i ta mitema sou ilosieixu vaikala noxou Lataua, la ane'i ilo'a ikalavoine'i ngatongato'o. La sou ane'i ilo'a ixali masua avile. 14 Ia nini natetelisou vaikala e nelomusou noxilo mo nelavusou. Xo nini nelavusou lexe 'ei ane mulosine lavulavu, 15 mo nelavusou Lavuku Tavuna no mine nini molomoloxene. Lavuku Tavuna ne, ulosine lavulavu, mo sou nini namuxaxu taneni ulai noxou Kalisito Iesu, la Lataua upamaulineni. 16  f Vaivaikala latala e muxolu no nano no Lavuku Tavuna 'o ne, Lataua mutausou. Anu usu'ulinenge sou talavu no anu vaikala manina noxou Lataua xe upela'ingexu susu ma'ia nenge te'oxonu sou umomosinge mo ulosiengexu 'ili'ilixo ane mulapu. 17 Mo sou itema sou xaixai noxou Lataua ne, ulaxalaxa'i no anu laixe manina sou umomomo sou u'oxonu xaixai laixe ukalusi.

Copyright information for `ATA