a1:1Luk 1:3
b1:2Mak 16:19; Luk 24:49-51
c1:3Luk 24:36-49; Apo 10:41
d1:4Luk 24:49; Ioa 14:16-17; Apo 2:33
e1:5Mat 3:11
f1:6Luk 24:21
g1:7Mak 13:32
h1:8Mat 28:19; Luk 24:48
i1:11Mat 26:64; Luk 21:27
j1:12Luk 24:50-53
l1:13Mat 10:2-4
m1:16Lex 41:9
n1:18Mat 27:3-8
o1:20Lex 69:25, 109:8
p1:22Mak 1:9, 16:19; Ioa 15:27

Acts 1

Iesu Mutelai no Opo Loxotolo

a Eni Luka akaukavu ulai noxine Teopilo aloxo 'o, a'alo ane tei ne sou mimii latala ane Iesu musoko sou mu'oxonu, mo mulosie'ixa'a ta mitema lavulavu no anu. b Mo mune'e mutalo no voxo ane Lataua muno'u mutelailixu teitexi no opo loxotolo. Ia tei no mine Anu utelai uao, io no anu xavi noxou Uleenu Tavuna, la Anu mupela'a ta mitema sou xaixai noxou. Ane'i e Anu musosovosi'a sou xaixai lexe ane'i i'oxonu. c Tei, la muxamuli navunavu tatila sou soli, xe ili'i la mumauli la. Xe no nano no anu voxo itemaxu tamei, la mupalapala'a noxi'a ta aposeli noxou ne sou mumaxa'u mo mu'oxonu mimii se'i sou ane'i ilavusou manina lexe Anu mumauli. Xe Anu muvikalane'i no anu saxisaxila'u noxou Lataua kalumo. d No voxo vile ili'i no mine Iesu musoli xe mutulu la Anu ilo'a uao ixolu sou i'ani'ani o, la Anu muvikalane'i pekia'u aloxo 'o, “Mamu sou nga'umesou tuala ne Ielusalemu, ia ngaxoxolu ne mo ngaxomaiou Uleenu Tavuna ane Mamilo muvikala lexe ulosinge loxo ngingi ngelomusou eni evikalangengi no anu. e Ioanesi mu'ulosi'a ta mitema no anu lexa, ia maxuveeni uasi, la ngingi nga'ulo no anu Uleenu Tavuna.”

f Ioxe, no mine ane'i mixolu mipita, la mitali'isou Iesu aloxo 'o, “Tilasixe, loxovaa vaimomo 'o sou nini nasu'ulinexi ta Isilaeli sou talivunoxu tualasixe mo mexe tasaxila'u?”

g La Anu mukoline'i aloxo 'o, “Voxo sou ngalivunoxu tualasinge ne, Mamilo molu musosovosou no anu masaxa noxou, ia anu mii sou ngingi ngalavusou no anu uasi. h Ia, ili'i no mine ngano'u xaviinu Uleenu Tavuna xe ulu'e uxolu noxinge, la sou ngingi ngaa'aloxu ualasilo ne Ielusalemu mo no xalee lia tila ne Iutaia mo Samalia ukalusi xe ulai uxali no xalexalee lia ukalusi.”

Anu muvikalane'i aloxo ne mukalu, la ane'i uao itutulu imamaisou sio, io Lataua muno'u mutelailixu teiteixi la tamuxala mutaluxu mole ane'i imaisou la uasi.

10 No mine ane'i uao itutulu sou iutitiiou no mine mutelai, io alaxu vilesisi 'o, la ta mitema ta tamei tokolomoxa'a keakea mixali mitulu no pa'ume'a. 11  i La ilou mivikalane'i aloxo 'o, “Ngingi ta mitema sie Xalilaia, tava'u loxovaa la sou ngatulu ngamamalei utetelai no loxotolo loxo ne? Iesu e Lataua muxexeenu noxinge sou mulaixu teitexi no opo loxotolo ne, Anu ulai la ulivu une'e iouvilesisi aloxo ngingi ngetulu ngemaisou mutelai ne.”

Mateasi Muno'u Tanixu Iudasi

12  j Iesu mutelai mukalu, la ane'i me'a no laxa'ilu vile ilemo lexe Olivu sou milivu milai ne Ielusalemu. Laxa'ilu ane ne, muxolu 'alaisi ne Ielusalemu. La umomomo sou imuamua'i sou ilai ilotu no voxo tavuna.
1:12Anu umomomo loxo 1Km.
13  l No mine ane'i mi'unalai no tuala tila mukalu, la mitelai no tani kaveutuxu vile muxolu teitexi e ane'i ixoxolu no anu. Ane'i e ixoxolu ne, ualaualasi'a aloxo 'o. Vile noxi'a ane Pita, xe tameisi'a ane Ioanesi, xe tatalusi'a ane Iakovo. Xe se'i noxi'a ane Andeleasi mo Pilipi mo Tomasi mo Vatolomaio mo Mataio mo Iakovo ane Alipaio 'olu mo Saimoni anu itema vile noxi'a ta mitema ane imasaxa lexe ane'i me'a isaxila'u tualasi'a, xe Iudasi e Iakovo vile la 'olu. 14 Ane'i opone'i vilesisi sou ikilaka pekia'u ulai noxou Lataua utotomu. La ta sema mose'i ilo'a Malia e Iesu nenu mo ta vimovimou mipita noxi'a kalumo sou mikilaka.

15 Ili'i no mine ane'i ta mitema sou imuxamuxaxu tane'i noxou Iesu mipita, la itiitisi'a mumomomo loxo itemaxu muxatele vile (120). La Pita mutulu no taine'i sou muvikala aloxo 'o, 16  m “Ngingi ta vivilo 'o, tatei la Uleenu Tavuna muxolu noxou Deviti la Anu mu'oxonu sou mulemolu vaikala vile sou Iudasi e anu muulaxune'i ta mitema e mitetelisou Iesu. Mo vaikala muai no Lavuku Tavuna teinu ne, anu a muxali manina 'o. 17 Iudasi ne, anu itema vile e nenge nenge'a texolu mo texaxai tepita.

18  n Ia ta mitema milosou lamoli loxo lakolisou 'ilixo vile masua e anu mu'oxo noxou Iesu, la sou anu mulotonu lia vile no anu. Ia ili'i, la anu mulapau no anu lia ane ne la opoonu mupau la tamusinu mulaalaa. 19 Anu musoli aloxo ne, la ta mitema mukalusi ne Ielusalemu milomusou a'alosou la milemolu lia ane ne ualasou lexe Akeludama no anu vaikala noxi'a ne laaxu lexe lia e sialu munixisou.”

20  o La Pita muvikala aloxo 'o, “Mimii muxali noxou Iudasi aloxo ne, xo mikaukavunu muai no anu Lavuku sou Lexe aloxo 'o,

‘Tanixu uxolu vitanisi mo itema vile uxolu no anu mamu.’
Xe no anu vaikala vile la, la muvikala aloxo 'o,

‘Itema vile uno'u tanixu no anu xaixai sou uulaxunu ane ne o.’
21 Anu aloxo ne, la sou nenge tasosovosou itema vile no nixi noxinge e nenge nenge'a Tila Iesu texoxolu mutotomu, 22  p musoko no mine Ioanesi mu'ulosou mo mune'e mutalo no mine Lataua muno'u Iesu mo mu'umesinge mulai teiteixi. Itema ane ne sou nenge nenge'a taa'aloxu a'alosou soli mo tulu noxou Iesu.”

23 Pita muvikala aloxo ne mukalu, la ane'i mileme'a ta mitema ta tamei sou iua'uli sou vile uno'u tanixu Iudasi. Vile ualasou lexe Iosepu e ilemo lexe Valusavasi mo ualasou vile la lexe Iusuto, xe tameisou ualasou lexe Mateasi. 24 Mukalu, la ane'i mixolu sou mikilaka aloxo 'o, “Tilasixe, nini nelavusou xavutalamexi mukalusi, la sou nini nalosiexixu itema 'ena'ei noxi'a ane'i tamei 'o 25 sou uxali aposeli noxou Iesu mo uno'u tanixu Iudasi. Xo anu mu'umesou xaixai noxou mulai no tualasou sou uno'u navunavu no anu 'ilixo ane anu mu'oxonu.” 26 Ioxe, ane'i miavuti, la mi'oxonu vila'i vile sou lexe isosovosou vile noxi'a ilou. La sosovo noxi'a ne, mu'isalili noxou Mateasi. La sou ane'i mimuxaxu loxo anu vile noxi'a ane'i ta aposeli noxou Iesu mavulovexa mo mulu'e no lia vile.

Copyright information for `ATA